ವರಮಹಾಲಕ್ಷ್ಮಿ ಹಬ್ಬ ಎಂದರೆ ಮಹಿಳೆಯರಿಗೆ ವಿಶೇಷ ಸಂಭ್ರಮ.
ಸಮೃದ್ಧಿ ಮತ್ತು ಸಂಪತ್ತಿನ ಅಧಿದೇವತೆ ಲಕ್ಷ್ಮಿದೇವಿಯನ್ನು ವರಲಕ್ಷ್ಮಿ ರೂಪದಲ್ಲಿ ಪೂಜಿಸುವ ಈ ಹಬ್ಬದಂದು ಹಲವು ಬಗೆಯ ಸಿಹಿ ತಿಂಡಿಗಳನ್ನು ನೈವೇದ್ಯವಾಗಿ ತಯಾರಿಸಲಾಗುತ್ತದೆ. ಈ ಬಾರಿ ಹಬ್ಬಕ್ಕೆ ಮನೆಯಲ್ಲೇ ಗರಿಗರಿಯಾದ ಕರ್ಜಿಕಾಯಿ ತಯಾರಿಸಿ ಲಕ್ಷ್ಮಿದೇವಿಗೆ ನೈವೇದ್ಯವಾಗಿ ಅರ್ಪಿಸಬಹುದು.
ಕರ್ಜಿಕಾಯಿಗೆ ಬೇಕಾಗುವ ಸಾಮಗ್ರಿಗಳು
ಹೊರಗಿನ ಪದರಕ್ಕೆ:
- ಮೈದಾ ಹಿಟ್ಟು - 1 ಕಪ್
- ಚಿರೋಟಿ ರವೆ - ¼ ಕಪ್
- ಉಪ್ಪು - 1 ಟೀಸ್ಪೂನ್
- ಸಕ್ಕರೆ - ½ ಟೀಸ್ಪೂನ್
- ತುಪ್ಪ ಅಥವಾ ಬಿಸಿ ಎಣ್ಣೆ - 2 ಟೇಬಲ್ಸ್ಪೂನ್
- ನೀರು - ಅಗತ್ಯಕ್ಕೆ ತಕ್ಕಷ್ಟು
- ಎಣ್ಣೆ - ಕರಿಯಲು
ಹೂರಣಕ್ಕೆ:
- ಒಣ ಕೊಬ್ಬರಿ ತುರಿ - 1 ಕಪ್
- ಸಕ್ಕರೆ ಅಥವಾ ಬೆಲ್ಲದ ಪುಡಿ - ½ ಕಪ್
- ಹುರಿಗಡಲೆ - ½ ಕಪ್
- ಏಲಕ್ಕಿ ಪುಡಿ - 1 ಟೀಸ್ಪೂನ್
- ಬಿಳಿ ಎಳ್ಳು - 2 ಟೀಸ್ಪೂನ್
- ಗಸಗಸೆ - 2 ಟೀಸ್ಪೂನ್
- ಬಾದಾಮಿ, ಗೋಡಂಬಿ, ದ್ರಾಕ್ಷಿ - ಸ್ವಲ್ಪ
ಕರ್ಜಿಕಾಯಿ ಮಾಡುವ ವಿಧಾನ
ಮೊದಲು ಮೈದಾ, ಚಿರೋಟಿ ರವೆ, ಉಪ್ಪು ಮತ್ತು ಸಕ್ಕರೆಯನ್ನು ಒಂದು ಪಾತ್ರೆಯಲ್ಲಿ ಹಾಕಿ ಮಿಶ್ರಣ ಮಾಡಿ. ಇದಕ್ಕೆ ತುಪ್ಪ ಅಥವಾ ಬಿಸಿ ಎಣ್ಣೆ ಸೇರಿಸಿ ಚೆನ್ನಾಗಿ ಕಲಸಿ. ನಂತರ ಸ್ವಲ್ಪ ಸ್ವಲ್ಪ ನೀರು ಹಾಕುತ್ತಾ ಚಪಾತಿ ಹಿಟ್ಟಿಗಿಂತ ಸ್ವಲ್ಪ ಗಟ್ಟಿಯಾದ ಹಿಟ್ಟನ್ನು ತಯಾರಿಸಿಕೊಳ್ಳಿ. ಹಿಟ್ಟನ್ನು ಸುಮಾರು 30 ನಿಮಿಷ ಮುಚ್ಚಿಡಿ.
ಈಗ ಹೂರಣ ತಯಾರಿಸಲು ಹುರಿಗಡಲೆ, ಸಕ್ಕರೆ ಅಥವಾ ಬೆಲ್ಲ ಹಾಗೂ ಏಲಕ್ಕಿಯನ್ನು ಮಿಕ್ಸರ್ನಲ್ಲಿ ಹಾಕಿ ಸ್ವಲ್ಪ ಒರಟಾಗಿ ಪುಡಿ ಮಾಡಿಕೊಳ್ಳಿ. ಇದಕ್ಕೆ ಒಣ ಕೊಬ್ಬರಿ, ಎಳ್ಳು, ಗಸಗಸೆ ಹಾಗೂ ಸಣ್ಣದಾಗಿ ಕತ್ತರಿಸಿದ ಡ್ರೈಫ್ರೂಟ್ಸ್ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.
ನಂತರ ಹಿಟ್ಟನ್ನು ಸಣ್ಣ ಉಂಡೆಗಳಾಗಿ ಮಾಡಿಕೊಂಡು ಪೂರಿಯ ಗಾತ್ರಕ್ಕೆ ತೆಳುವಾಗಿ ಲಟ್ಟಿಸಿಕೊಳ್ಳಿ. ಮಧ್ಯದಲ್ಲಿ ಒಂದರಿಂದ ಎರಡು ಚಮಚ ಹೂರಣ ಹಾಕಿ. ಅಂಚುಗಳಿಗೆ ಸ್ವಲ್ಪ ನೀರು ಹಚ್ಚಿ ಅರ್ಧಚಂದ್ರಾಕಾರದಲ್ಲಿ ಮಡಚಿ ಬಿಗಿಯಾಗಿ ಮುಚ್ಚಿ. ಅಂಚುಗಳನ್ನು ಫೋರ್ಕ್ನಿಂದ ಒತ್ತಬಹುದು ಅಥವಾ ಕೈಯಿಂದಲೇ ಸುಂದರವಾಗಿ ಮಡಚಬಹುದು.
ಬಾಣಲೆಯಲ್ಲಿ ಎಣ್ಣೆ ಹಾಕಿ ಮಧ್ಯಮ ಉರಿಯಲ್ಲಿ ಕಾಯಿಸಿ. ಎಣ್ಣೆ ಕಾದ ಬಳಿಕ ಕರ್ಜಿಕಾಯಿಗಳನ್ನು ಹಾಕಿ ಎರಡೂ ಬದಿಯಲ್ಲಿ ಗೋಲ್ಡನ್ ಬ್ರೌನ್ ಆಗುವವರೆಗೆ ಕರಿಯಿರಿ. ಹೆಚ್ಚಿನ ಉರಿಯಲ್ಲಿ ಕರಿಯದೆ ಮಧ್ಯಮ ಉರಿಯಲ್ಲಿ ಕರಿದರೆ ಕರ್ಜಿಕಾಯಿ ಚೆನ್ನಾಗಿ ಗರಿಗರಿಯಾಗುತ್ತದೆ.
ಕರಿದ ಕರ್ಜಿಕಾಯಿಗಳನ್ನು ಟಿಶ್ಯೂ ಪೇಪರ್ ಮೇಲೆ ತೆಗೆದಿಡಿ. ತಣ್ಣಗಾದ ಬಳಿಕ ಏರ್ಟೈಟ್ ಡಬ್ಬದಲ್ಲಿ ಸಂಗ್ರಹಿಸಿದರೆ ಕೆಲವು ದಿನಗಳವರೆಗೆ ಗರಿಗರಿಯಾಗಿಯೇ ಉಳಿಯುತ್ತದೆ.
ವರಮಹಾಲಕ್ಷ್ಮಿ ಹಬ್ಬಕ್ಕೆ ಮನೆಯಲ್ಲೇ ಈ ರುಚಿಕರ ಹಾಗೂ ಗರಿಗರಿಯಾದ ಕರ್ಜಿಕಾಯಿ ತಯಾರಿಸಿ ನೈವೇದ್ಯವಾಗಿ ಅರ್ಪಿಸಬಹುದು.