ಶ್ರೀನಗರ, ಆ.30 www.bengaluruwire.com:ಲಡಾಖ್ನ ಕಡಿದಾದ ನುನ್ ಕುನ್ ಪರ್ವತ ಶ್ರೇಣಿಯಲ್ಲಿ (Nun Kun Massif) ಸುಮಾರು 18,600 ಅಡಿಗಳಷ್ಟು ಭೀಕರ ಎತ್ತರದಲ್ಲಿ ಸಿಲುಕಿಕೊಂಡಿದ್ದ ವ್ಯಕ್ತಿಯೊಬ್ಬರನ್ನು ಭಾರತೀಯ ಸೇನೆಯ ಏವಿಯೇಷನ್ ಪೈಲಟ್ಗಳು (Indian Army Aviation) ಅದ್ಭುತ ಹಾಗೂ ಚಾಕಚಕ್ಯತೆಯಿಂದ ಕಾರ್ಯಾಚರಣೆ ನಡೆಸಿ ರಕ್ಷಿಸಿದ್ದಾರೆ.
ಕ್ಷೀಣಿಸುತ್ತಿದ್ದ ಬೆಳಕು, ಬೀಸುತ್ತಿದ್ದ ಪ್ರಬಲ ಗಾಳಿ ಮತ್ತು ಅಪಾಯಕಾರಿ ಇಳಿಜಾರಿನ ನಡುವೆ ಸೇನೆ ಈ ಸಾಹಸಮಯ 'ಕ್ಯಾಶುಯಲ್ಟಿ ಇವಾಕ್ಯೂಯೇಷನ್' ಪೂರ್ಣಗೊಳಿಸಿದೆ.
ತೂಕ ಇಳಿಸಿ ಹಾರಾಟ ನಡೆಸಿದ ಪೈಲಟ್ಗಳು:
ಅತಿಯಾದ ಎತ್ತರದ ಪ್ರದೇಶಗಳಲ್ಲಿ ಗಾಳಿಯ ಸಾಂದ್ರತೆ ಕಡಿಮೆ ಇರುವುದರಿಂದ ಹೆಲಿಕಾಪ್ಟರ್ನ ಎಂಜಿನ್ ಸಾಮರ್ಥ್ಯ ಹಾಗೂ ರೋಟರ್ ಲಿಫ್ಟ್ ಗಣನೀಯವಾಗಿ ಕುಸಿಯುತ್ತದೆ. ಈ ಸವಾಲನ್ನು ಎದುರಿಸಲು, ಕಾರ್ಯಾಚರಣೆಗೆ ತೆರಳುವ ಮುನ್ನ ಹೆಲಿಕಾಪ್ಟರ್ನಲ್ಲಿದ್ದ ಎಲ್ಲಾ ಅನಗತ್ಯ ಉಪಕರಣಗಳನ್ನು ತೆಗೆದುಹಾಕಿ ತೂಕವನ್ನು ಕಡಿಮೆ ಮಾಡಲಾಗಿತ್ತು. ಜತೆಗೆ, ಕೇವಲ ಕಾರ್ಯಾಚರಣೆಗೆ ಬೇಕಾಗುವಷ್ಟೇ ಸೀಮಿತ ಇಂಧನವನ್ನು ಭರ್ತಿ ಮಾಡಿಕೊಂಡು ಗರಿಷ್ಠ ತೂಕ ಹೊರುವ ಸಾಮರ್ಥ್ಯವನ್ನು ಕಾಯ್ದುಕೊಳ್ಳಲಾಯಿತು.
ಒಂದೇ ಸ್ಕಿಡ್ ತಾಗಿಸಿ ಪ್ರಾಣಾಪಾಯದಲ್ಲಿದ್ದ ವ್ಯಕ್ತಿಯ ರಕ್ಷಣೆ:
ಘಟನಾ ಸ್ಥಳದಲ್ಲಿ ಹೆಲಿಕಾಪ್ಟರ್ ಇಳಿಸಲು ಯಾವುದೇ ಸಮತಟ್ಟಾದ ಜಾಗವಿರಲಿಲ್ಲ. ಬಲವಾದ ಪರ್ವತ ಮಾರುತಗಳ ನಡುವೆ ಪೈಲಟ್ಗಳು ಹೆಲಿಕಾಪ್ಟರ್ನ ಕೇವಲ ಒಂದೇ ಒಂದು ಲ್ಯಾಂಡಿಂಗ್ ಸ್ಕಿಡ್ ಅನ್ನು (One-skid landing) ಕಡಿದಾದ ಬೆಟ್ಟದ ಇಳಿಜಾರಿಗೆ ತಾಗಿಸಿ, ಸಮತೋಲನ ಕಾಯ್ದುಕೊಳ್ಳುವ ಮೂಲಕ 'ಪ್ರಿಕೇರಿಯಸ್ ಲೋ ಹೊವರ್' ಸ್ಥಿತಿಯಲ್ಲೇ ಗಾಯಾಳುವನ್ನು ಸುರಕ್ಷಿತವಾಗಿ ಒಳಗೆಳೆದುಕೊಂಡರು. ನಂತರ ಯಾವುದೇ ಅನಾಹುತವಿಲ್ಲದೆ ರಕ್ಷಣಾ ನೆಲೆಗೆ ಹಿಂತಿರುಗಿದರು.
ಈ ಸಾಹಸದ ಕುರಿತು 'ಎಕ್ಸ್' (ಟ್ವಿಟರ್) ಖಾತೆಯಲ್ಲಿ ಮಾಹಿತಿ ಹಂಚಿಕೊಂಡಿರುವ ಭಾರತೀಯ ಸೇನೆಯ 'ಫೈರ್ ಆಂಡ್ ಫ್ಯೂರಿ ಕಾರ್ಪ್ಸ್' (Fire and Fury Corps), "ದಿನದ ಕೊನೆಯ ಬೆಳಕಿನ ಕ್ಷಣಗಳಲ್ಲಿ ಅದ್ವಿತೀಯ ಕೌಶಲ, ಧೈರ್ಯ ಹಾಗೂ ಸಂಯಮದೊಂದಿಗೆ ನಮ್ಮ ಪೈಲಟ್ಗಳು ಈ ಜೀವ ರಕ್ಷಣಾ ಕಾರ್ಯಾಚರಣೆಯನ್ನು ಯಶಸ್ವಿಗೊಳಿಸಿದ್ದಾರೆ" ಎಂದು ಶ್ಲಾಘಿಸಿದೆ. ವಿಡಿಯೋ ನ್ಯೂಸ್ ಗೆ ಈ ಮುಂದಿನ ಲಿಂಕ್ ಕ್ಲಿಕ್ ಮಾಡಿ: https://www.instagram.com/reel/DcppKErstFa/?igsi=OGx0bmRnc2wxeWZl