Share With Friends

ಭಾರತದ ಬಹುನಿರೀಕ್ಷಿತ ಮುಂಬೈ-ಅಹಮದಾಬಾದ್ ಹೈ ಸ್ಪೀಡ್ ರೈಲು ಯೋಜನೆಗೆ ಕೇಂದ್ರ ಸರ್ಕಾರ ಮೊದಲ ಪ್ರಸ್ತಾವಿತ ಬುಲೆಟ್ ಟ್ರೈನ್ ವಿನ್ಯಾಸವನ್ನು ಅನಾವರಣಗೊಳಿಸಿದೆ. ಗಂಟೆಗೆ 320 ಕಿಮೀ ವೇಗದಲ್ಲಿ ಸಂಚರಿಸಲಿರುವ ಈ ರೈಲು, ದೇಶದ ಮೊದಲ ಹೈ ಸ್ಪೀಡ್ ರೈಲು ಸೇವೆಯಾಗಲಿದೆ.

ಕೇಂದ್ರ ರೈಲ್ವೆ ಸಚಿವಾಲಯವು ಬುಲೆಟ್ ಟ್ರೈನ್‌ನ ಮೊದಲ ಪ್ರಸ್ತಾವಿತ ವಿನ್ಯಾಸ(Streamlined Design)ವನ್ನು ಸಾರ್ವಜನಿಕರಿಗೆ ಪರಿಚಯಿಸಿದೆ. ನವದೆಹಲಿಯ ರೈಲ್ವೆ ಸಚಿವಾಲಯದ ಕಟ್ಟಡದ ಗೇಟ್ ನಂ.4 ಬಳಿ ಇದರ ಮಾದರಿ (Representational Look)ಯನ್ನು ಪ್ರದರ್ಶಿಸಲಾಗಿದೆ. ಇದು ಭಾರತದಲ್ಲಿ ಸಂಚರಿಸಲಿರುವ ಮೊದಲ ಬುಲೆಟ್ ಟ್ರೈನ್‌ನ ಅಧಿಕೃತ ದೃಶ್ಯಾವಳಿಯಾಗಿದೆ.

ಯೋಜನೆಯ ಮೊದಲ ಕಾರ್ಯಾಚರಣಾ ಹಂತವು ಸೂರತ್ ಮತ್ತು ಬಿಲಿಮೋರಾ ನಡುವಿನ ಸುಮಾರು 100 ಕಿಮೀ ಮಾರ್ಗದಲ್ಲಿ ಆರಂಭವಾಗಲಿದೆ. ಹಂತ ಹಂತವಾಗಿ ಸೇವೆ ಪ್ರಾರಂಭಿಸುವ ಮೂಲಕ ಯೋಜನೆಯ ಕಾರ್ಯಾಚರಣೆಯನ್ನು ವೇಗಗೊಳಿಸುವ ಉದ್ದೇಶ ಹೊಂದಲಾಗಿದೆ.

ಪ್ರಸ್ತುತ ಯೋಜನೆಯ ಗುರಿ ದಿನಾಂಕ ಆಗಸ್ಟ್ 15, 2027 ಆಗಿದೆ. ಭಾರತದ ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ಬುಲೆಟ್ ಟ್ರೈನ್ ಸೇವೆ ಆರಂಭಿಸುವ ಉದ್ದೇಶ ಸರ್ಕಾರದಾಗಿದೆ.

ಇದನ್ನೂ ಓದಿ :ಭಾರತೀಯ ರೈಲ್ವೆ ಕುರಿತ ಸಂಪೂರ್ಣ ಮಾಹಿತಿ

ಮುಂಬೈ-ಅಹಮದಾಬಾದ್ ಬುಲೆಟ್ ಟ್ರೈನ್ ಯೋಜನೆ ದೇಶದ ಸಾರಿಗೆ ಕ್ಷೇತ್ರದಲ್ಲಿ ಐತಿಹಾಸಿಕ ಬದಲಾವಣೆಗೆ ಕಾರಣವಾಗಲಿದೆ. ವೇಗ, ತಂತ್ರಜ್ಞಾನ ಮತ್ತು ಆಧುನಿಕ ಮೂಲಸೌಕರ್ಯದೊಂದಿಗೆ ಭಾರತ ಜಾಗತಿಕ ಹೈ ಸ್ಪೀಡ್ ರೈಲು ರಾಷ್ಟ್ರಗಳ ಸಾಲಿಗೆ ಸೇರುವತ್ತ ಹೆಜ್ಜೆ ಇಡುತ್ತಿದೆ.

ಯೋಜನೆಯ ಪ್ರಮುಖ ಮುಖ್ಯಾಂಶಗಳು:

⮞ ಗಂಟೆಗೆ 320 ಕಿಮೀ ವೇಗ :
ಪ್ರಸ್ತಾವಿತ ರೈಲು ಆರಂಭಿಕ ಹಂತದಲ್ಲಿ 8 ಬೋಗಿಗಳನ್ನು ಹೊಂದಿರಲಿದೆ. ಈ ರೈಲು ಗರಿಷ್ಠ ಗಂಟೆಗೆ 320 ಕಿಲೋಮೀಟರ್ ವೇಗದಲ್ಲಿ ಸಂಚರಿಸಲಿದೆ. ಇದರೊಂದಿಗೆ ಭಾರತದಲ್ಲೇ ಅತಿ ವೇಗದ ರೈಲು ಸೇವೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲಿದೆ.

⮞ ಮುಂಬೈ-ಅಹಮದಾಬಾದ್ ಪ್ರಯಾಣ ಕೇವಲ 2 ಗಂಟೆ :
ಈ ಯೋಜನೆಯ ಪ್ರಮುಖ ಆಕರ್ಷಣೆ ಎಂದರೆ ಪ್ರಯಾಣ ಸಮಯದಲ್ಲಿ ಭಾರೀ ಕಡಿತ. ಯೋಜನೆ ಸಂಪೂರ್ಣ ಕಾರ್ಯಾರಂಭವಾದ ಬಳಿಕ ಮುಂಬೈಯಿಂದ ಅಹಮದಾಬಾದ್‌ಗೆ ಕೇವಲ ಎರಡು ಗಂಟೆಗಳಲ್ಲಿ ತಲುಪಬಹುದಾಗಿದೆ. ಪ್ರಸ್ತುತ ಸಾಮಾನ್ಯ ರೈಲು ಪ್ರಯಾಣಕ್ಕೆ ಇದಕ್ಕಿಂತ ಬಹಳ ಹೆಚ್ಚು ಸಮಯ ಬೇಕಾಗುತ್ತದೆ.

⮞ 508 ಕಿಮೀ ಉದ್ದದ ಹೈ ಸ್ಪೀಡ್ ಕಾರಿಡಾರ್ :
ಮುಂಬೈ-ಅಹಮದಾಬಾದ್ ಬುಲೆಟ್ ಟ್ರೈನ್ ಕಾರಿಡಾರ್ ಒಟ್ಟು 508 ಕಿಲೋಮೀಟರ್ ದೂರವನ್ನು ಒಳಗೊಂಡಿದೆ. ಮಹಾರಾಷ್ಟ್ರ ಮತ್ತು ಗುಜರಾತ್ ರಾಜ್ಯಗಳನ್ನು ಸಂಪರ್ಕಿಸುವ ಈ ಮಾರ್ಗವು ಭಾರತದ ಮೊದಲ ವಿಶೇಷ ಹೈ ಸ್ಪೀಡ್ ರೈಲು ಮಾರ್ಗವಾಗಲಿದೆ.

⮞ ಮೊದಲ ಸಂಚಾರ ಯಾವಾಗ?:
ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರ ಪ್ರಕಾರ, ಅಹಮದಾಬಾದ್‌ನಿಂದ ವಾಪಿ ನಡುವಿನ ಮೊದಲ 100 ಕಿಲೋಮೀಟರ್ ಸೆಕ್ಷನ್‌ನಲ್ಲಿ ಆಗಸ್ಟ್ 2027 ರ ವೇಳೆಗೆ ಬುಲೆಟ್ ರೈಲು ಕಾರ್ಯಾಚರಣೆ ಆರಂಭಿಸಲಿದೆ. ಇಡೀ ಮುಂಬೈ-ಅಹಮದಾಬಾದ್ ಮಾರ್ಗವು 2029 ರ ವೇಳೆಗೆ ಪೂರ್ಣ ಪ್ರಮಾಣದಲ್ಲಿ ಕಾರ್ಯಾರಂಭ ಮಾಡಲಿದೆ.

⮞ ಬುಲೆಟ್ ಟ್ರೈನ್ ನಿಲ್ದಾಣಗಳ ಪಟ್ಟಿ
ಈ ಹೈ ಸ್ಪೀಡ್ ರೈಲು ಮಾರ್ಗದಲ್ಲಿ ಒಟ್ಟು 12 ನಿಲ್ದಾಣಗಳಿರಲಿವೆ.
ಸಾಬರಮತಿ, ಅಹಮದಾಬಾದ್, ಆನಂದ್, ವಡೋದರಾ, ಭರೂಚ್, ಸೂರತ್, ಬಿಲಿಮೋರಾ,
ವಾಪಿ, ಬೋಯ್ಸರ್,ವಿರಾರ್, ಠಾಣೆ, ಮುಂಬೈ,

ಇದನ್ನೂ ಓದಿ :ಭಾರತೀಯ ರೈಲ್ವೆ ಕುರಿತು ತಿಳಿದಿರಲೇಬೇಕಾದ ಸಾಮಾನ್ಯ ಸಂಗತಿಗಳು

⮞ ಎಂಜಿನಿಯರಿಂಗ್ ಅದ್ಭುತ:
ಈ ₹1.1 ಲಕ್ಷ ಕೋಟಿ ವೆಚ್ಚದ ಯೋಜನೆಯು ಜಪಾನ್ ಇಂಟರ್ನ್ಯಾಷನಲ್ ಕೋಆಪರೇಷನ್ ಏಜೆನ್ಸಿ (JICA) ನೆರವಿನೊಂದಿಗೆ ಅನುಷ್ಠಾನಗೊಳ್ಳುತ್ತಿದ್ದು, ಇದು ಭಾರತದ ಮೊದಲ 7 ಕಿಲೋಮೀಟರ್ ಉದ್ದದ ಸಮುದ್ರದಾಳದ ರೈಲು ಸುರಂಗವನ್ನು (Undersea Rail Tunnel - ಥಾಣೆ ಕ್ರೀಕ್ ಬಳಿ) ಒಳಗೊಂಡಿರಲಿದೆ. ಸದ್ಯ ಈ ಸುರಂಗ ಮಾರ್ಗದ ಕಾಮಗಾರಿಗಾಗಿ ಬೃಹತ್ ಸುರಂಗ ಕೊರೆಯುವ ಯಂತ್ರಗಳನ್ನು (TBM) ಮುಂಬೈನ ವಿಖ್ರೋಲಿಯಲ್ಲಿ ಅಳವಡಿಸಲಾಗುತ್ತಿದೆ.