ನಮ್ಮ ಹಳ್ಳಿಗಳಲ್ಲಿ ಮತ್ತು ಸಾಂಪ್ರದಾಯಿಕ ಮನೆಮದ್ದುಗಳಲ್ಲಿ ಮಕ್ಕಳ ಆರೋಗ್ಯಕ್ಕಾಗಿ ಅನೇಕ ರೀತಿಯ ಬೇರುಗಳು ಹಾಗೂ ಕಾಯಿಗಳನ್ನು ಬಳಸುವ ಪದ್ಧತಿ ಹಿಂದಿನಿಂದಲೂ ನಡೆದು ಬಂದಿದೆ. ಇವುಗಳಲ್ಲಿ ಮುಖ್ಯವಾಗಿ ಕೇಳಿಬರುವ ಒಂದು ಹೆಸರು 'ನಂಜಿ ಕಾಯಿ'. ಕೆಲವೆಡೆ ಇದನ್ನು ಸಮುದ್ರ ಫಲ ಅಥವಾ ನಂಜಿನ ಕಾಯಿ ಎನ್ನಲಾಗುತ್ತದೆ.
ಮಕ್ಕಳಿಗೆ ಇನ್ಫೆಕ್ಷನ್ ಅಥವಾ ಅಲರ್ಜಿ ಆಗಬಾರದು ಎಂದು ಇದನ್ನು ಅರೆದು ಕೊಡುವ ನಂಬಿಕೆ ಕೆಲವರಲ್ಲಿದೆ. ಆದರೆ, ಆಧುನಿಕ ವೈದ್ಯಕೀಯ ವಿಜ್ಞಾನ ಮತ್ತು ಮಕ್ಕಳ ತಜ್ಞರ ಪ್ರಕಾರ ಪುಟ್ಟ ಮಕ್ಕಳಿಗೆ ಇದನ್ನು ಕೊಡುವುದು ಎಷ್ಟು ಸುರಕ್ಷಿತ? ಇದರ ನಿಜವಾದ ಪರಿಣಾಮಗಳೇನು ಎಂಬುದನ್ನು ಪೋಷಕರು ತಿಳಿದುಕೊಳ್ಳುವುದು ಅತ್ಯಗತ್ಯ.
ವೈದ್ಯಕೀಯ ವಿಜ್ಞಾನ ಏನು ಹೇಳುತ್ತದೆ?
ಆಧುನಿಕ ವೈದ್ಯಕೀಯ ಸಂಶೋಧನೆಗಳು ಮತ್ತು ಮಕ್ಕಳ ತಜ್ಞರ ಪ್ರಕಾರ, ಮಕ್ಕಳಿಗೆ ನಂಜಿ ಕಾಯಿಯನ್ನು ಕೊಡುವುದರಿಂದ ಯಾವುದೇ ಆರೋಗ್ಯಕರ ಪ್ರಯೋಜನಗಳಿಲ್ಲ. ನೈಸರ್ಗಿಕವಾಗಿ ಸಿಗುವ ಕೆಲವು ಕಾಯಿ ಅಥವಾ ಬೀಜಗಳಲ್ಲಿ ಸ್ವಯಂ ರಕ್ಷಣಾತ್ಮಕ ರಾಸಾಯನಿಕಗಳು ಇರುತ್ತವೆ. ಇವು ಹಿರಿಯರ ದೇಹಕ್ಕೆ ತೊಂದರೆ ಮಾಡದಿದ್ದರೂ, ಪುಟ್ಟ ಮಕ್ಕಳ ಸೂಕ್ಷ್ಮವಾದ ಅಂಗಾಂಗಗಳ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು ಎನ್ನಲಾಗುತ್ತದೆ.
ನಂಜಿ ಕಾಯಿಂದಾಗು ಅಪಾಯಗಳು
ಕೆಲವು ನಂಜಿ ಕಾಯಿಗಳಲ್ಲಿ ನೈಸರ್ಗಿಕ ವಿಷದ ಅಂಶಗಳಿರುತ್ತವೆ. ಇವು ಮಕ್ಕಳ ಹೊಟ್ಟೆಗೆ ಹೋದರೆ ತೀವ್ರ ಅಡ್ಡಪರಿಣಾಮ ಉಂಟುಮಾಡಬಹುದು. ಇದನ್ನು ಸೇವಿಸಿದ ತಕ್ಷಣ ಮಕ್ಕಳಲ್ಲಿ ವಾಂತಿ, ಭೇದಿ ಮತ್ತು ಹೊಟ್ಟೆನೋವು ಕಾಣಿಸಿಕೊಳ್ಳುವ ಸಾಧ್ಯತೆ ಇರುತ್ತದೆ. ಮಕ್ಕಳ ಲಿವರ್ ಮತ್ತು ಕಿಡ್ನಿಗಳು ಇಂತಹ ಕಠಿಣ ರಾಸಾಯನಿಕಗಳನ್ನು ಅರಗಿಸಿಕೊಳ್ಳುವಷ್ಟು ಶಕ್ತವಾಗಿರುವುದಿಲ್ಲ. ಇದು ಭವಿಷ್ಯದಲ್ಲಿ ಅಂಗಾಂಗಗಳ ದೌರ್ಬಲ್ಯಕ್ಕೆ ಕಾರಣವಾಗಬಹುದು.
ಸುರಕ್ಷಿತವಾದ ಪರ್ಯಾಯ ಮನೆಮದ್ದುಗಳು
ಮಕ್ಕಳಿರುವ ಮನೆಯಲ್ಲಿ ಅಜ್ಜಿ ಕೊಡುವ ಅತ್ಯಂತ ಸುರಕ್ಷಿತ ಔಷಧವೆಂದರೆ ಜಾಯಿಕಾಯಿ. ಕಫ, ಕೆಮ್ಮು ನಿವಾರಿಸಲು ಮತ್ತು ಮಗು ಚೆನ್ನಾಗಿ ನಿದ್ರೆ ಮಾಡಲು ತಾಯಿಯ ಹಾಲಿನೊಂದಿಗೆ ಸ್ವಲ್ಪ ಜಾಯಿಕಾಯಿ ಅರೆದು ಕೊಡುವುದು ಸುರಕ್ಷಿತ.
ಮಕ್ಕಳ ಹೊಟ್ಟೆಯಲ್ಲಿ ಗ್ಯಾಸ್ ಅಥವಾ ಅಜೀರ್ಣವಾಗಿದ್ದರೆ ಸ್ವಲ್ಪ ಜೀರಿಗೆ ನೀರನ್ನು ಕುದಿಸಿ ಆರಿಸಿ ನೀಡುವುದು ಉತ್ತಮ.
6 ತಿಂಗಳು ತುಂಬಿದ ಮಕ್ಕಳಿಗೆ ಶಕ್ತಿ ನೀಡಲು ಮತ್ತು ಜೀರ್ಣಕ್ರಿಯೆ ಉತ್ತಮಗೊಳಿಸಲು ಅನ್ನದ ತಿಳಿಗಂಜಿ ಅತ್ಯುತ್ತಮ ಆಹಾರವಾಗಿದೆ.
ಪೋಷಕರಿಗೆ ಕಿವಿಮಾತು
ಪ್ರಕೃತಿಯಿಂದ ಸಿಗುವ ಪ್ರತಿಯೊಂದೂ ಆರೋಗ್ಯಕರವೇ ಆಗಿರುತ್ತದೆ ಎಂಬ ತಪ್ಪು ಕಲ್ಪನೆ ಬೇಡ. ಯಾವುದೇ ನಾಟಿ ಮದ್ದು ಅಥವಾ ಬೇರು-ಕಾಯಿಗಳನ್ನು ಮಕ್ಕಳಿಗೆ ಕೊಡುವ ಮುನ್ನ ಯಾವಾಗಲೂ ನಿಮ್ಮ ಮಕ್ಕಳ ವೈದ್ಯರ ಸಲಹೆಯನ್ನು ಪಡೆದುಕೊಳ್ಳಿ. ಸಾಂಪ್ರದಾಯಿಕ ನಂಬಿಕೆಗಳಿಗಿಂತ ಮಗುವಿನ ಸುರಕ್ಷತೆ ಮತ್ತು ವೈಜ್ಞಾನಿಕ ಆರೋಗ್ಯ ಕ್ರಮಗಳು ಅತ್ಯಂತ ಮುಖ್ಯವಾಗಿವೆ.