ಬೆಂಗಳೂರು: ವರ್ಷಕ್ಕೆ ₹45 ಲಕ್ಷ ಸಂಬಳ ಬರುತ್ತಿದೆ. ಜೊತೆಗೆ ಪ್ರಮೋಷನ್ ಮೂಲಕ ₹65 ಲಕ್ಷ ಪ್ಯಾಕೇಜ್ ಪಡೆಯುವ ಅವಕಾಶವೂ ಸಿಕ್ಕಿದೆ. ಸಾಮಾನ್ಯವಾಗಿ ಇಂತಹ ಆಫರ್ ಬಂದರೆ ಯಾರೂ ಬಿಡಲು ಇಷ್ಟಪಡುವುದಿಲ್ಲ. ಆದರೆ ಬೆಂಗಳೂರಿನ 31 ವರ್ಷದ ಸಾಫ್ಟ್ವೇರ್ ಡೆವಲಪರ್ ಒಬ್ಬರು ಮಾತ್ರ ₹20 ಲಕ್ಷ ಹೆಚ್ಚುವರಿ ಸಂಬಳದ ಆಫರ್ ಅನ್ನೇ ತಿರಸ್ಕರಿಸಿದ್ದಾರೆ.
ಹೆಚ್ಚಿನ ಸಂಬಳದ ಜೊತೆಗೆ ಕೆಲಸದ ಹೊರೆ ಮತ್ತು ಜವಾಬ್ದಾರಿ ಹೆಚ್ಚಾಗಲಿದೆ ಎಂಬ ಕಾರಣಕ್ಕೆ ಅವರು ಈ ನಿರ್ಧಾರ ತೆಗೆದುಕೊಂಡಿದ್ದಾರೆ. ಹಣಕ್ಕಿಂತ ಕುಟುಂಬ, ಫಿಟ್ನೆಸ್ ಮತ್ತು ವೈಯಕ್ತಿಕ ಜೀವನಕ್ಕೆ ಹೆಚ್ಚಿನ ಆದ್ಯತೆ ನೀಡಿರುವ ಅವರ ನಡೆ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿದೆ.
₹20 ಲಕ್ಷ ಹೆಚ್ಚುವರಿ ಸಂಬಳ ಬೇಡ ಎಂದ ಟೆಕ್ಕಿ
ಈ ಘಟನೆಯ ಬಗ್ಗೆ ವ್ಯಾಪಾರ ಸಲಹಾ ಸಂಸ್ಥೆ ಯುಬಿಲಿಟಿಯ ಸಂಸ್ಥಾಪಕ ರೋಹನ್ ಧವನ್ ಲಿಂಕ್ಡ್ಇನ್ನಲ್ಲಿ ಹಂಚಿಕೊಂಡಿದ್ದಾರೆ. ಅವರ ಪ್ರಕಾರ, 31 ವರ್ಷದ ಸಾಫ್ಟ್ವೇರ್ ಡೆವಲಪರ್ ಸದ್ಯ ವರ್ಷಕ್ಕೆ ₹45 ಲಕ್ಷ ಗಳಿಸುತ್ತಿದ್ದಾರೆ.
ಅವರಿಗೆ ಪ್ರಮೋಷನ್ ಜೊತೆಗೆ ₹65 ಲಕ್ಷದ ಪ್ಯಾಕೇಜ್ ನೀಡಲಾಗಿತ್ತು. ಆದರೆ ಹೊಸ ಹುದ್ದೆ ಸ್ವೀಕರಿಸಿದರೆ ದೊಡ್ಡ ತಂಡವನ್ನು ನಿರ್ವಹಿಸಬೇಕಾಗಿತ್ತು. ಕೆಲಸದ ಜವಾಬ್ದಾರಿಯೂ ಹೆಚ್ಚಾಗುತ್ತಿತ್ತು. ಹೀಗಾಗಿ ಅವರು ಆಫರ್ ಬೇಡ ಎಂದು ನಿರ್ಧರಿಸಿದ್ದಾರೆ.
">www.instagram.com/embed.js">
ವಾರಕ್ಕೆ ನಾಲ್ಕು ದಿನ ತಡರಾತ್ರಿ ಕೆಲಸ
ಹೊಸ ಜವಾಬ್ದಾರಿ ಸ್ವೀಕರಿಸಿದ್ದರೆ ಕೆಲಸದ ಸಮಯವೂ ಹೆಚ್ಚಾಗುತ್ತಿತ್ತು. ವಾರದಲ್ಲಿ ನಾಲ್ಕು ರಾತ್ರಿಗಳು ಅಮೆರಿಕದ ತಂಡದೊಂದಿಗೆ ತಡರಾತ್ರಿವರೆಗೂ ಕರೆಗಳಲ್ಲಿ ಭಾಗವಹಿಸಬೇಕಾಗಿತ್ತು.
ಇದರ ಜೊತೆಗೆ ಕೆಲಸದ ನಿಮಿತ್ತ ಆಗಾಗ್ಗೆ ಪ್ರಯಾಣ ಮಾಡಬೇಕಿತ್ತು. ಈಗಿರುವ ತಂಡಕ್ಕಿಂತ ಎರಡು ಪಟ್ಟು ದೊಡ್ಡ ತಂಡವನ್ನು ನಿರ್ವಹಿಸುವ ಜವಾಬ್ದಾರಿಯೂ ಅವರ ಮೇಲಿರುತ್ತಿತ್ತು.
ಹೀಗಾಗಿ ಶನಿವಾರ ಮತ್ತು ಭಾನುವಾರ ರಜೆ ಇದ್ದರೂ, ಕೆಲಸದ ಒತ್ತಡದಿಂದಾಗಿ ಆ ದಿನಗಳಲ್ಲೂ ಸಂಪೂರ್ಣವಾಗಿ ಸಮಯ ಸಿಗುತ್ತದೆಯೇ ಎಂಬುದು ಖಚಿತವಾಗಿರಲಿಲ್ಲ.
ಕುಟುಂಬ ಮತ್ತು ಫಿಟ್ನೆಸ್ಗೆ ಮೊದಲ ಆದ್ಯತೆ
ಈ ಟೆಕ್ಕಿ ತಮ್ಮ ವೈಯಕ್ತಿಕ ಜೀವನಕ್ಕೆ ಹೆಚ್ಚಿನ ಮಹತ್ವ ನೀಡುತ್ತಿದ್ದಾರೆ. ಅವರು ಮತ್ತು ಅವರ ಪತ್ನಿ ಮುಂದಿನ ವರ್ಷ ಮಗುವನ್ನು ಹೊಂದಲು ಯೋಜಿಸುತ್ತಿದ್ದಾರೆ ಎನ್ನಲಾಗಿದೆ.
ಅಲ್ಲದೆ, ವಾರದಲ್ಲಿ ಐದು ದಿನ ಬೆಳಗ್ಗೆ ವ್ಯಾಯಾಮ ಮಾಡುತ್ತಾರೆ. ಪ್ರತಿ ಬುಧವಾರ ತಮ್ಮ ಪೋಷಕರೊಂದಿಗೆ ಊಟ ಮಾಡಲು ಸಮಯ ಮೀಸಲಿಡುತ್ತಾರೆ.
ಹೀಗಾಗಿ ಹೆಚ್ಚಿನ ಸಂಬಳಕ್ಕಾಗಿ ಈ ದಿನಚರಿ ಮತ್ತು ಕುಟುಂಬದ ಜೊತೆಗಿನ ಸಮಯವನ್ನು ಕಳೆದುಕೊಳ್ಳಲು ಅವರು ಸಿದ್ಧರಿಲ್ಲ. ಇದೇ ಕಾರಣಕ್ಕೆ ₹20 ಲಕ್ಷ ಹೆಚ್ಚುವರಿ ಸಂಬಳದ ಆಫರ್ ಅನ್ನು ತಿರಸ್ಕರಿಸಿದ್ದಾರೆ.
ಮಗನಿಗೆ ₹20 ಲಕ್ಷ ಹೆಚ್ಚುವರಿ ಸಂಬಳದ ಅವಕಾಶ ಸಿಕ್ಕಿದ್ದರೂ ಅದನ್ನು ಬೇಡ ಎಂದಿರುವುದು ತಂದೆಗೂ ಅಚ್ಚರಿ ಮೂಡಿಸಿದೆ. ಇಷ್ಟು ದೊಡ್ಡ ಮೊತ್ತವನ್ನು ಏಕೆ ಬಿಟ್ಟರು ಎಂಬುದು ಅವರಿಗೂ ಅರ್ಥವಾಗಿರಲಿಲ್ಲ.
ಆದರೆ ಟೆಕ್ಕಿಗೆ ಇದು ಕೇವಲ ಸಂಬಳದ ವಿಚಾರವಾಗಿರಲಿಲ್ಲ. ಹೆಚ್ಚಿನ ಸಂಬಳದ ಜೊತೆಗೆ ಬರುವ ಹೆಚ್ಚುವರಿ ಕೆಲಸ ಮತ್ತು ಜವಾಬ್ದಾರಿಗಳು ಕುಟುಂಬ ಹಾಗೂ ವೈಯಕ್ತಿಕ ಜೀವನದ ಮೇಲೆ ಪರಿಣಾಮ ಬೀರುತ್ತವೆ ಎಂಬುದು ಅವರ ಲೆಕ್ಕಾಚಾರವಾಗಿತ್ತು.
ಸೋಷಿಯಲ್ ಮೀಡಿಯಾದಲ್ಲಿ ಪರ-ವಿರೋಧ ಚರ್ಚೆ
ರೋಹನ್ ಧವನ್ ಅವರ ಪೋಸ್ಟ್ ವೈರಲ್ ಆದ ಬಳಿಕ ಈ ವಿಚಾರದ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ಚರ್ಚೆ ನಡೆಯುತ್ತಿದೆ.
ಕೆಲವರು ಟೆಕ್ಕಿಯ ನಿರ್ಧಾರವನ್ನು ಬೆಂಬಲಿಸಿದ್ದಾರೆ. ಹಣಕ್ಕಿಂತ ಜೀವನದ ಗುಣಮಟ್ಟ ಮುಖ್ಯ ಎಂದು ಹಲವರು ಹೇಳಿದ್ದಾರೆ. ಮತ್ತೊಬ್ಬ ಬಳಕೆದಾರರು ತಮ್ಮ ಮನೆಯಲ್ಲಿದ್ದ ಚಿಕ್ಕ ಮಗುವಿನ ಕಾರಣಕ್ಕೆ ಕಳೆದ ವರ್ಷ ಶೇ.80ರಷ್ಟು ಸಂಬಳ ಹೆಚ್ಚಳದ ಆಫರ್ ಅನ್ನೇ ತಿರಸ್ಕರಿಸಿದ್ದಾಗಿ ಹಂಚಿಕೊಂಡಿದ್ದಾರೆ.
ಜೀವನದ ಬೇರೆ ಬೇರೆ ಹಂತಗಳಲ್ಲಿ ನಮ್ಮ ಆದ್ಯತೆಗಳು ಬದಲಾಗುತ್ತವೆ. ಹೀಗಾಗಿ ಹೆಚ್ಚು ಸಂಬಳ ಸಿಗುತ್ತದೆ ಎಂಬ ಕಾರಣಕ್ಕೆ ಪ್ರತಿಯೊಂದು ಅವಕಾಶವನ್ನೂ ಒಪ್ಪಿಕೊಳ್ಳಬೇಕೆಂದಿಲ್ಲ ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ.
ಒಟ್ಟಿನಲ್ಲಿ, ₹45 ಲಕ್ಷದಿಂದ ₹65 ಲಕ್ಷಕ್ಕೆ ಸಂಬಳ ಹೆಚ್ಚಿಸಿಕೊಳ್ಳುವ ಅವಕಾಶವಿದ್ದರೂ ಅದನ್ನು ಬಿಟ್ಟು ಕುಟುಂಬ ಮತ್ತು ವೈಯಕ್ತಿಕ ಜೀವನಕ್ಕೆ ಆದ್ಯತೆ ನೀಡಿದ ಈ ಟೆಕ್ಕಿಯ ನಿರ್ಧಾರ, 'ಹೆಚ್ಚಿನ ಸಂಬಳವೇ ಜೀವನದ ಯಶಸ್ಸಿನ ಅಳತೆಯೇ?' ಎಂಬ ಪ್ರಶ್ನೆಯನ್ನು ಮತ್ತೆ ಚರ್ಚೆಗೆ ತಂದಿದೆ.