ಆಸ್ಟ್ರೇಲಿಯಾ ಇನ್ನಿಂಗ್ಸ್ ವೇಳೆ ಗೆರಾಲ್ಡ್ ಕೊಯೆಟ್ಜಿ ಎಸೆದ ಶಾರ್ಟ್ ಪಿಚ್ ಎಸೆತವನ್ನು ಮ್ಯಾಟ್ ರೆನ್‌ಶಾ ಪುಲ್ ಶೂಟ್ ಮಾಡಲು ಯತ್ನಿಸಿದರು. ಆದರೆ ಬ್ಯಾಟ್‌ನ ಮೇಲ್ಭಾಗಕ್ಕೆ ಸರಿಯಾಗಿ ತಾಗದ ಚೆಂಡು ಗಂಟೆಗೆ ಭಾರಿ ವೇಗದಲ್ಲಿ ಡೀಪ್ ಮಿಡ್‌ವಿಕೆಟ್ ದಿಕ್ಕಿನಲ್ಲಿ ಗಾಳಿಯಲ್ಲಿ ತೇಲಿಹೋಯಿತು. ಆ ಜಾಗದಿಂದ ಸಾಕಷ್ಟು ದೂರದಲ್ಲಿದ್ದ ಮಾರ್ಕೊ ಜಾನ್ಸನ್, ಚೆಂಡಿನತ್ತ ಅತ್ಯಂತ ವೇಗವಾಗಿ ಧಾವಿಸಿದರು. ಮೊದಲ ನೋಟಕ್ಕೆ ಚೆಂಡು ಜಾನ್ಸನ್‌ರ ಕೈಗೆಟುಕದೆ ಬೌಂಡರಿ ಗೆರೆ ದಾಟಬಹುದು ಅಥವಾ ನೆಲಕ್ಕೆ ಬೀಳಬಹುದು ಎಂದೇ ಭಾವಿಸಲಾಗಿತ್ತು. ಆದರೆ ತಮ್ಮ ಬೃಹತ್ ದೇಹದ ಸಂಪೂರ್ಣ ಲಾಭ ಪಡೆದ ಅವರು, ಬಲಬದಿಗೆ ತೀವ್ರವಾಗಿ ಜಿಗಿದು, ಮೈದಾನದಲ್ಲಿ ಜಾರುತ್ತಾ ಒಂದೇ ಕೈಯಲ್ಲಿ ಚೆಂಡನ್ನು ಅದ್ಭುತವಾಗಿ ಡೈವ್ ಮಾಡಿ ಹಿಡಿದರು.

ಕ್ಯಾಚ್ ಹಿಡಿದ ತಕ್ಷಣವೇ ಚೆಂಡು ಯಾವುದೇ ಕಾರಣಕ್ಕೂ ನೆಲಕ್ಕೆ ತಾಗದಂತೆ ತಮ್ಮ ಮಣಿಕಟ್ಟನ್ನು ಜಾಗರೂಕತೆಯಿಂದ ತಿರುಗಿಸಿ, ಶುದ್ಧವಾಗಿ ಕ್ಯಾಚ್ ಪೂರ್ಣಗೊಳಿಸಿದರು. ಈ ಕಲ್ಪನಾಶೀತ ಫೀಲ್ಡಿಂಗ್ ಸಾಹಸವನ್ನು ಕಂಡ ಸಹ ಆಟಗಾರರು ಹಾಗೂ ಕ್ರೀಡಾಂಗಣದಲ್ಲಿದ್ದ ಪ್ರೇಕ್ಷಕರು ಒಂದು ಕ್ಷಣ ಸ್ತಬ್ಧರಾಗಿ, ನಂತರ ಎದ್ದು ನಿಂತು ಚಪ್ಪಾಳೆ ತಟ್ಟಿದರು. ಈ ವಿಡಿಯೋ ಜಾಲತಾಣಗಳಲ್ಲಿ ಕ್ಷಣಾರ್ಧದಲ್ಲಿ ವೈರಲ್ ಆಗಿದೆ.

ಈ ಪಂದ್ಯದಲ್ಲಿ ಜಾನ್ಸನ್ ಕೇವಲ ಫೀಲ್ಡಿಂಗ್‌ನಲ್ಲಿ ಮಾತ್ರವಲ್ಲದೆ, ಬ್ಯಾಟಿಂಗ್‌ನಲ್ಲೂ ತಂಡದ ಸಂಕಷ್ಟಕ್ಕೆ ಆಸರೆಯಾದರು. ಆರಂಭದಲ್ಲೇ 168 ರನ್‌ಗಳಿಗೆ 5 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ದಕ್ಷಿಣ ಆಫ್ರಿಕಾಗೆ ಚೇತರಿಕೆ ನೀಡಿದ ಇವರು, ಕೇವಲ ಕೆಲವೇ ಎಸೆತಗಳಲ್ಲಿ 75 ರನ್‌ಗಳ ಸ್ಪೋಟಕ ಅರ್ಧಶತಕ ಸಿಡಿಸಿ ತಂಡದ ಮೊತ್ತವನ್ನು 297 ರನ್‌ಗಳ ಬೃಹತ್ ಮಟ್ಟಕ್ಕೆ ತಲುಪಿಸಿದರು. ಬೌಲಿಂಗ್‌ನಲ್ಲೂ ಅಪಾಯಕಾರಿ ಬ್ಯಾಟರ್ ಟ್ರಾವಿಸ್ ಹೆಡ್ ವಿಕೆಟ್ ಪಡೆದ ಜಾನ್ಸನ್, ಇಡೀ ಪಂದ್ಯದಲ್ಲಿ ಒಟ್ಟು 4 ಅದ್ಭುತ ಕ್ಯಾಚ್‌ಗಳನ್ನು ಹಿಡಿಯುವ ಮೂಲಕ ದಕ್ಷಿಣ ಆಫ್ರಿಕಾದ ಗೆಲುವಿನ ರೂವಾರಿಯಾದರು.