ಆದರೆ, ಇದೀಗ ಐದನೇ ದಿನವಾದ ಮಂಗಳವಾರದಂದು ಚಿತ್ರದ ಗಳಿಕೆಯಲ್ಲಿ ಶೇಕಡಾ 10.4 ರಷ್ಟು ಪ್ರಗತಿ ಕಂಡುಬಂದಿದ್ದು, ಚಿತ್ರತಂಡ ನಿಟ್ಟುಸಿರು ಬಿಡುವಂತಾಗಿದೆ.

ಐದನೇ ದಿನದ ಕಲೆಕ್ಷನ್ ವಿವರ

ಬಾಕ್ಸ್ ಆಫೀಸ್ ಗಳಿಕೆಯ ಅಧಿಕೃತ ಮಾಹಿತಿ ಪ್ರಕಾರ, ಐದನೇ ದಿನ ಆಲ್ಫಾ ಸಿನಿಮಾ ಭಾರತದಾದ್ಯಂತ ಒಟ್ಟು 4.25 ಕೋಟಿ ರೂಪಾಯಿ ನಿವ್ವಳ ಗಳಿಕೆ ಮಾಡಿದೆ. ಇದು ಸೋಮವಾರದ ಗಳಿಕೆಗೆ (3.85 ಕೋಟಿ ರೂ.) ಹೋಲಿಸಿದರೆ ಉತ್ತಮ ಪ್ರಗತಿಯಾಗಿದೆ. ಇದರೊಂದಿಗೆ ಸಿನಿಮಾ ಬಿಡುಗಡೆಯಾದ ಐದು ದಿನಗಳಲ್ಲಿ ಭಾರತದಲ್ಲಿ ಒಟ್ಟು 42.10 ಕೋಟಿ ರೂಪಾಯಿ ನಿವ್ವಳ ಗಳಿಕೆ ಮಾಡಿದ್ದು, ಭಾರತದ ಒಟ್ಟು ಒಟ್ಟಾರೆ ಗಳಿಕೆ (ಗ್ರಾಸ್ ಕಲೆಕ್ಷನ್) 50.23 ಕೋಟಿ ರೂಪಾಯಿಗೆ ತಲುಪಿದೆ.

ವಿಶ್ವದಾದ್ಯಂತ ಭರ್ಜರಿ ಕಮಾಯಿ

ಕೇವಲ ಭಾರತದಲ್ಲಿ ಮಾತ್ರವಲ್ಲದೆ ವಿದೇಶಿ ಮಾರುಕಟ್ಟೆಯಲ್ಲೂ ಆಲ್ಫಾ ಸಿನಿಮಾ ಗಮನಾರ್ಹ ಪ್ರದರ್ಶನ ನೀಡುತ್ತಿದೆ. ಐದನೇ ದಿನ ವಿದೇಶಗಳಲ್ಲಿ 1.50 ಕೋಟಿ ರೂಪಾಯಿ ಗಳಿಸುವ ಮೂಲಕ, ಒಟ್ಟು ವಿದೇಶಿ ಗಳಿಕೆಯನ್ನು 19.80 ಕೋಟಿ ರೂಪಾಯಿಗೆ ಹೆಚ್ಚಿಸಿಕೊಂಡಿದೆ. ಅಲ್ಲಿಗೆ ಭಾರತ ಮತ್ತು ವಿದೇಶಿ ಗಳಿಕೆ ಎರಡನ್ನೂ ಸೇರಿಸಿದರೆ, ಆಲ್ಫಾ ಸಿನಿಮಾ ವಿಶ್ವದಾದ್ಯಂತ ಕೇವಲ ಐದೇ ದಿನಗಳಲ್ಲಿ ಒಟ್ಟು 70.03 ಕೋಟಿ ರೂಪಾಯಿ ಗ್ರಾಸ್ ಕಲೆಕ್ಷನ್ ಮಾಡುವ ಮೂಲಕ ಮುನ್ನುಗ್ಗುತ್ತಿದೆ.

ಬಜೆಟ್ ತೂಗಿಸಲು ಇನ್ನೂ ಬೇಕಿದೆ ದೊಡ್ಡ ಮೊತ್ತ

ಅನಿಲ್ ಕಪೂರ್ ಮತ್ತು ಬಾಬಿ ಡಿಯೋಲ್ ಅವರಂತಹ ಘಟಾನುಘಟಿ ತಾರಾಗಣ ಹೊಂದಿರುವ ಈ ಚಿತ್ರವನ್ನು ಯಶ್ ರಾಜ್ ಫಿಲ್ಮ್ಸ್ ಸಂಸ್ಥೆ ಸುಮಾರು 100 ರಿಂದ 130 ಕೋಟಿ ರೂಪಾಯಿ ಭಾರಿ ಬಜೆಟ್‌ನಲ್ಲಿ ನಿರ್ಮಿಸಿದೆ. ವಾರದ ದಿನಗಳಲ್ಲಿ ಸಾಮಾನ್ಯವಾಗಿ ಸಿನಿಮಾಗಳ ಗಳಿಕೆ ಕಡಿಮೆಯಾಗುವ ಟ್ರೆಂಡ್ ನಡುವೆ ಆಲ್ಫಾ ಚೇತರಿಕೆ ಕಂಡಿರುವುದು ಆಶಾದಾಯಕವಾಗಿದ್ದರೂ, ಚಿತ್ರ ಲಾಭದ ಹಳಿಗೆ ಬರಲು ಮುಂಬರುವ ದಿನಗಳಲ್ಲಿ ಇನ್ನು ದೊಡ್ಡ ಮಟ್ಟದ ಗಳಿಕೆ ಮಾಡುವ ಅಗತ್ಯವಿದೆ. ಸದ್ಯ ಚಿತ್ರಮಂದಿರಗಳಲ್ಲಿ ಕ್ಲಾಸಿ ಆಕ್ಷನ್ ಎಂಟರ್‌ಟೈನರ್ ಆಗಿ ಪ್ರದರ್ಶನ ಕಾಣುತ್ತಿರುವ ಈ ಚಿತ್ರಕ್ಕೆ ಅಲಿಯಾ ಭಟ್ ಅಭಿಮಾನಿಗಳಿಂದ ಉತ್ತಮ ಬೆಂಬಲ ಸಿಗುತ್ತಿದೆ.