ಕೆಲವೊಮ್ಮೆ ತುರ್ತು ಪರಿಸ್ಥಿತಿ, ಜನಸಂದಣಿ ಅಥವಾ ಇತರ ಕಾರಣಗಳಿಂದ ಟಿಕೆಟ್ ಪಡೆಯಲು ಸಾಧ್ಯವಾಗದೇ ಇರಬಹುದು ಅಥವಾ ಟಿಕೆಟ್ ಕಳೆದುಹೋಗಿರಬಹುದು. ಇಂತಹ ಸಂದರ್ಭಗಳಲ್ಲಿ ಟಿಟಿಇ (TTE) ಬಂದರೆ ಮಧ್ಯದಲ್ಲೇ ರೈಲಿನಿಂದ ಇಳಿಸಿಬಿಡುವ ಭಯ ಸಹಜ.

ಆದರೆ ಮಹಿಳೆಯರ ಹಾಗೂ ಮಕ್ಕಳ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಭಾರತೀಯ ರೈಲ್ವೆ ವಿಶೇಷ ನಿಯಮವೊಂದನ್ನು ಜಾರಿಗೆ ತಂದಿದೆ. ಭಾರತೀಯ ರೈಲ್ವೆ ಕಾಯ್ದೆಯ ಸೆಕ್ಷನ್ 139ರ ಪ್ರಕಾರ, ಒಬ್ಬಂಟಿಯಾಗಿ ಪ್ರಯಾಣಿಸುತ್ತಿರುವ ಮಹಿಳೆ ಅಥವಾ ಮಕ್ಕಳೊಂದಿಗೆ ಪ್ರಯಾಣಿಸುತ್ತಿರುವ ಮಹಿಳೆಯ ಬಳಿ ಟಿಕೆಟ್ ಇಲ್ಲದಿದ್ದರೂ, ರಾತ್ರಿ 10:00 ಗಂಟೆಯಿಂದ ಬೆಳಿಗ್ಗೆ 6:00 ಗಂಟೆಯವರೆಗೆ ಅವರನ್ನು ರೈಲಿನಿಂದ ಬಲವಂತವಾಗಿ ಕೆಳಗಿಳಿಸಲು ಅವಕಾಶವಿಲ್ಲ ಎಂದು ಹೇಳಲಾಗಿದೆ.

ಈ ನಿಯಮದ ಉದ್ದೇಶ ಆಡಳಿತಾತ್ಮಕ ನಿಯಮಗಳಿಗಿಂತ ಮಹಿಳೆಯರ ಜೀವ ಮತ್ತು ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡುವುದಾಗಿದೆ. ಕತ್ತಲೆಯ ಸಮಯದಲ್ಲಿ ಅಪರಿಚಿತ ಅಥವಾ ಸಣ್ಣ ನಿಲ್ದಾಣಗಳಲ್ಲಿ ಮಹಿಳೆಯರು ಅಪಾಯಕ್ಕೆ ಸಿಲುಕದಂತೆ ನೋಡಿಕೊಳ್ಳುವುದು ರೈಲ್ವೆಯ ಮುಖ್ಯ ಉದ್ದೇಶವಾಗಿದೆ.

ಮಹಿಳೆಯರಿಗೆ ಯಾವ ರಕ್ಷಣೆ ದೊರೆಯುತ್ತದೆ?

ಹಳೆಯ ರೈಲ್ವೆ ನಿಯಮಗಳ ಪ್ರಕಾರ, ರಾತ್ರಿ 10:00 ರಿಂದ ಬೆಳಿಗ್ಗೆ 6:00 ಗಂಟೆಯವರೆಗೆ ಒಬ್ಬಂಟಿಯಾಗಿ ಪ್ರಯಾಣಿಸುತ್ತಿರುವ ಮಹಿಳೆ ಅಥವಾ ಮಕ್ಕಳೊಂದಿಗೆ ಪ್ರಯಾಣಿಸುತ್ತಿರುವ ಮಹಿಳೆಯ ಬಳಿ ಮಾನ್ಯ ಟಿಕೆಟ್ ಅಥವಾ ರೈಲ್ವೆ ಪಾಸ್ ಇಲ್ಲದಿದ್ದರೂ ಅವರನ್ನು ಬಲವಂತವಾಗಿ ರೈಲಿನಿಂದ ಇಳಿಸಲು ಯಾವುದೇ ಅಧಿಕಾರಿಗೂ ಹಕ್ಕಿಲ್ಲ.

ಟಿಕೆಟ್ ಇಲ್ಲದಿದ್ದರೆ ಟಿಟಿಇ ಏನು ಮಾಡಬೇಕು?

ರಾತ್ರಿ ವೇಳೆ ಮಹಿಳೆಯ ಬಳಿ ಟಿಕೆಟ್ ಇಲ್ಲದಿರುವುದು ಕಂಡುಬಂದರೆ, ಟಿಟಿಇ ತಕ್ಷಣವೇ ಅವರನ್ನು ಕೆಳಗಿಳಿಸುವಂತಿಲ್ಲ. ಬದಲಾಗಿ ರೈಲ್ವೆ ಈ ಕೆಳಗಿನ ಕ್ರಮಗಳನ್ನು ಅನುಸರಿಸಬೇಕು.

• ಸ್ಥಳದಲ್ಲೇದಂಡವಿಧಿಸಬಹುದು: ಪರಿಸ್ಥಿತಿಯನ್ನು ಪರಿಶೀಲಿಸಿದ ಬಳಿಕ ನಿಯಮಾನುಸಾರ ದಂಡ ಅಥವಾ ಹೆಚ್ಚುವರಿ ಶುಲ್ಕ ವಿಧಿಸಿ ಹೊಸ ಟಿಕೆಟ್ ನೀಡಬಹುದು.
• ಹಣಇಲ್ಲದಿದ್ದರೂಪ್ರಯಾಣಮುಂದುವರಿಸಲುಅವಕಾಶ: ಮಹಿಳೆಯ ಬಳಿ ದಂಡ ಪಾವತಿಸಲು ಹಣ ಇಲ್ಲದಿದ್ದರೂ, ಅವರನ್ನು ರಾತ್ರಿ ವೇಳೆ ರೈಲಿನಿಂದ ಕೆಳಗಿಳಿಸದೆ ಸುರಕ್ಷಿತವಾಗಿ ಪ್ರಯಾಣ ಮುಂದುವರಿಸಲು ಅವಕಾಶ ನೀಡಬೇಕು.
• ನಿಯಂತ್ರಣಕೊಠಡಿಗೆಮಾಹಿತಿ: ದುರುಪಯೋಗವಾಗದಂತೆ ಸಂಬಂಧಿತ ವಲಯ ನಿಯಂತ್ರಣ ಕೊಠಡಿಗೆ (Zonal Control Room) ಈ ಕುರಿತು ಮಾಹಿತಿ ನೀಡಬೇಕು.

ಯಾವ ಸಂದರ್ಭಗಳಲ್ಲಿ ರೈಲಿನಿಂದ ಇಳಿಸಬಹುದು?

ಕೆಲವು ಅಪರೂಪದ ಸಂದರ್ಭಗಳಲ್ಲಿ ಮಹಿಳಾ ಪ್ರಯಾಣಿಕರ ವರ್ತನೆ ಅನುಮಾನಾಸ್ಪದವಾಗಿದ್ದರೆ ಅಥವಾ ಇತರ ಪ್ರಯಾಣಿಕರಿಗೆ ತೊಂದರೆ ಉಂಟುಮಾಡುತ್ತಿದ್ದರೆ ಅವರನ್ನು ರೈಲಿನಿಂದ ಇಳಿಸುವ ಅಗತ್ಯ ಬರಬಹುದು.

ಆದರೆ ಇದಕ್ಕೂ ಕಟ್ಟುನಿಟ್ಟಿನ ನಿಯಮಗಳಿವೆ. ರಾತ್ರಿ ವೇಳೆ ಯಾವುದೇ ಕಾರಣಕ್ಕೂ ಮಹಿಳೆಯನ್ನು ರೈಲಿನಿಂದ ಕೆಳಗಿಳಿಸಲು ಅವಕಾಶವಿಲ್ಲ. ಅಗತ್ಯವಿದ್ದರೆ ಹಗಲಿನ ವೇಳೆಯಲ್ಲಿ, ಪ್ರಮುಖ ಜಂಕ್ಷನ್ ಅಥವಾ ದೊಡ್ಡ ರೈಲು ನಿಲ್ದಾಣದಲ್ಲಿ ಮಾತ್ರ ಇಳಿಸಬೇಕು. ಅಲ್ಲದೆ ರೈಲ್ವೆ ರಕ್ಷಣಾ ಪಡೆ (RPF)ಯ ಮಹಿಳಾ ಪೊಲೀಸ್ ಸಿಬ್ಬಂದಿ ಉಪಸ್ಥಿತಿಯಲ್ಲೇ ಕಾನೂನು ಕ್ರಮ ಕೈಗೊಳ್ಳಬೇಕು. ಪುರುಷ ಸಿಬ್ಬಂದಿ ಮಾತ್ರ ಮಹಿಳೆಯನ್ನು ರೈಲಿನಿಂದ ಕೆಳಗಿಳಿಸುವಂತಿಲ್ಲ.

ಸಾರ್ವಜನಿಕರಿಗೆ ತಿಳಿಯಬೇಕಾದ ವಿಷಯ

ಮಹಿಳೆಯರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಭಾರತೀಯ ರೈಲ್ವೆ ರೂಪಿಸಿರುವ ಈ ನಿಯಮ ಶ್ಲಾಘನೀಯವಾಗಿದೆ. ರೈಲ್ವೆ ಯಾವುದೇ ರೀತಿಯ ಟಿಕೆಟ್ ರಹಿತ ಪ್ರಯಾಣವನ್ನು ಉತ್ತೇಜಿಸುವುದಿಲ್ಲ. ಆದರೆ ಅನಿವಾರ್ಯ ಪರಿಸ್ಥಿತಿಯಲ್ಲಿ ಸಿಲುಕಿರುವ ಮಹಿಳೆಯರ ಸುರಕ್ಷತೆಗೆ ಆದ್ಯತೆ ನೀಡುತ್ತದೆ.ಆದ್ದರಿಂದ ಒಬ್ಬಂಟಿಯಾಗಿ ರೈಲಿನಲ್ಲಿ ಪ್ರಯಾಣಿಸುವ ನಿಮ್ಮ ಕುಟುಂಬದ ಸದಸ್ಯರು, ಸ್ನೇಹಿತೆಯರು ಅಥವಾ ಪರಿಚಯದ ಮಹಿಳೆಯರಿಗೆ ಈ ನಿಯಮದ ಬಗ್ಗೆ ತಿಳಿಸಿ. ಈ ಮಾಹಿತಿ ಕಷ್ಟದ ಸಂದರ್ಭಗಳಲ್ಲಿ ಅವರಿಗೆ ಧೈರ್ಯ ಮತ್ತು ಸುರಕ್ಷತೆಯ ಭರವಸೆ ನೀಡಬಹುದು.