ಇದು ಗಂಭೀರ ಆರೋಗ್ಯ ಸಮಸ್ಯೆಯನ್ನು ಆರಂಭದಲ್ಲೇ ಪತ್ತೆಹಚ್ಚಲು ಸಹಾಯ ಮಾಡುತ್ತದೆ.

ಗ್ಲಿಯೊಬ್ಲಾಸ್ಟೋಮಾ (Glioblastoma) ಮೆದುಳಿನ ನರಕೋಶಗಳಿಗೆ ರಕ್ಷಣೆ ಮತ್ತು ಸಹಕಾರ ನೀಡುವ 'ಆಸ್ಟ್ರೋಸೈಟ್ಸ್‌' (Astrocytes) ಎಂಬ ಕೋಶಗಳಿಂದ ವೇಗವಾಗಿ ಬೆಳೆಯುವ ಗಂಭೀರ ಕ್ಯಾನ್ಸರ್‌ ಆಗಿದೆ. ಇದು ಸುತ್ತಮುತ್ತಲಿನ ಆರೋಗ್ಯಕರ ಮೆದುಳಿನ ಅಂಗಾಂಶಗಳಿಗೂ ವೇಗವಾಗಿ ಹರಡಬಹುದು. ಶಸ್ತ್ರಚಿಕಿತ್ಸೆಯ ಮೂಲಕ ಇದನ್ನು ಸಂಪೂರ್ಣವಾಗಿ ತೆಗೆದುಹಾಕುವುದು ಕಷ್ಟ. ಶಸ್ತ್ರಚಿಕಿತ್ಸೆಯ ನಂತರವೂ ಸಾಮಾನ್ಯ ಮೆದುಳಿನ ಕೋಶಗಳ ನಡುವೆ ಕೆಲವು ಕ್ಯಾನ್ಸರ್ ಕೋಶಗಳು ಉಳಿದುಕೊಳ್ಳುವ ಸಾಧ್ಯತೆ ಇರುತ್ತದೆ.

ಹೀಗಾಗಿ ರೋಗಿಯ ಸ್ಥಿತಿಯನ್ನು ಆಧರಿಸಿ ಶಸ್ತ್ರಚಿಕಿತ್ಸೆ, ರೇಡಿಯೇಷನ್ ಥೆರಪಿ ಹಾಗೂ ಕೀಮೋಥೆರಪಿಯನ್ನು ಸಂಯೋಜಿಸಿ ಚಿಕಿತ್ಸೆ ನೀಡಲಾಗುತ್ತದೆ.

ಟ್ಯೂಮರ್ ಮೆದುಳಿನ ಯಾವ ಭಾಗದಲ್ಲಿ ಉಂಟಾಗಿದೆ ಎಂಬುದರ ಆಧಾರದ ಮೇಲೆ ತಲೆನೋವು, ಫಿಟ್ಸ್‌ (ಮೂರ್ಛೆ), ದೇಹದ ಕೆಲವು ಭಾಗಗಳಲ್ಲಿ ಬಲಹೀನತೆ, ಮಾತನಾಡಲು ತೊಂದರೆ, ವ್ಯಕ್ತಿತ್ವದಲ್ಲಿ ಬದಲಾವಣೆ ಅಥವಾ ಜ್ಞಾಪಕಶಕ್ತಿ ಕುಂಠಿತವಾಗುವುದು ಸೇರಿದಂತೆ ವಿವಿಧ ಲಕ್ಷಣಗಳು ಕಾಣಿಸಿಕೊಳ್ಳಬಹುದು.

ಗ್ಲಿಯೊಬ್ಲಾಸ್ಟೋಮಾ ಏಕೆ ಅತ್ಯಂತ ಅಪಾಯಕಾರಿ ಬ್ರೈನ್ ಕ್ಯಾನ್ಸರ್‌ಗಳಲ್ಲಿ ಒಂದಾಗಿದೆ? ಯಾವ ಲಕ್ಷಣಗಳನ್ನು ನಿರ್ಲಕ್ಷಿಸಬಾರದು? ಚಿಕಿತ್ಸಾ ವಿಧಾನಗಳೇನು? ಈ ಕುರಿತು ಡಾ. ಲೋಕೇಶ್ ಬಿ., ಹಿರಿಯ ಸಲಹೆಗಾರರು - ನ್ಯೂರಾಲಜಿ, ಆಸ್ಟರ್ ಸಿಎಂಐ ಆಸ್ಪತ್ರೆ, ಬೆಂಗಳೂರು, ಮಾಹಿತಿ ನೀಡಿದ್ದಾರೆ.

ಆರಂಭಿಕ ಲಕ್ಷಣಗಳನ್ನು ಸಾಮಾನ್ಯ ತಲೆನೋವು ಅಥವಾ ಹಳೆಯ ತಲೆಯ ಗಾಯವೆಂದು ಏಕೆ ತಪ್ಪಾಗಿ ಭಾವಿಸಲಾಗುತ್ತದೆ?

ಬ್ರೈನ್ ಟ್ಯೂಮರ್‌ನ ಆರಂಭಿಕ ಲಕ್ಷಣಗಳು ಬಹಳ ಸೌಮ್ಯವಾಗಿರಬಹುದು. ಅವು ಸಾಮಾನ್ಯವಾಗಿ ದಿನನಿತ್ಯದ ಆರೋಗ್ಯ ಸಮಸ್ಯೆಗಳಂತೆಯೇ ಕಾಣಿಸಿಕೊಳ್ಳುತ್ತವೆ.

ತಲೆನೋವು ಮೈಗ್ರೇನ್, ಮಾನಸಿಕ ಒತ್ತಡ, ನಿದ್ರಾಹೀನತೆ, ದೇಹದಲ್ಲಿ ನೀರಿನ ಕೊರತೆ ಅಥವಾ ಸೈನಸ್ ಸಮಸ್ಯೆಗಳಿಂದಲೂ ಉಂಟಾಗುವುದರಿಂದ, ಜನರು ಅದನ್ನು ಬ್ರೈನ್ ಟ್ಯೂಮರ್‌ನ ಲಕ್ಷಣವೆಂದು ಸಾಮಾನ್ಯವಾಗಿ ಅನುಮಾನಿಸುವುದಿಲ್ಲ.

ಈ ಹಿಂದೆ ತಲೆಗೆ ಗಾಯವಾಗಿದ್ದವರು ಹೊಸದಾಗಿ ಕಾಣಿಸಿಕೊಳ್ಳುವ ತಲೆನೋವು, ತಲೆಸುತ್ತು ಅಥವಾ ಏಕಾಗ್ರತೆಯ ಕೊರತೆಯನ್ನು ಹಳೆಯ ಗಾಯದಿಂದಲೇ ಉಂಟಾಗುತ್ತಿದೆ ಎಂದು ಭಾವಿಸಬಹುದು.

ಆದರೆ ಲಕ್ಷಣಗಳು ಹೊಸದಾಗಿ ಆರಂಭವಾಗಿ ಕಡಿಮೆಯಾಗದೆ ಕ್ರಮೇಣ ಹೆಚ್ಚಾಗುತ್ತಿದ್ದರೆ ಅಥವಾ ಇತರ ನರವೈಜ್ಞಾನಿಕ ಸಮಸ್ಯೆಗಳೊಂದಿಗೆ ಕಾಣಿಸಿಕೊಂಡರೆ ಅವುಗಳನ್ನು ನಿರ್ಲಕ್ಷಿಸಬಾರದು.

ಸಾಮಾನ್ಯ ತಲೆನೋವು ಮತ್ತು ಬ್ರೈನ್ ಟ್ಯೂಮರ್‌ನಿಂದ ಉಂಟಾಗುವ ತಲೆನೋವಿನ ವ್ಯತ್ಯಾಸವೇನು?

ಕೇವಲ ತಲೆನೋವಿನ ಸ್ವರೂಪವನ್ನು ಆಧರಿಸಿ ಅದು ಬ್ರೈನ್ ಟ್ಯೂಮರ್‌ನಿಂದ ಉಂಟಾಗಿದೆಯೇ ಎಂಬುದನ್ನು ಖಚಿತವಾಗಿ ಹೇಳಲು ಸಾಧ್ಯವಿಲ್ಲ.

ಆದರೆ ಟ್ಯೂಮರ್‌ಗೆ ಸಂಬಂಧಿಸಿದ ತಲೆನೋವು ಸಾಮಾನ್ಯವಾಗಿ ಕ್ರಮೇಣ ತೀವ್ರವಾಗುತ್ತಾ, ಪದೇಪದೇ ಕಾಣಿಸಿಕೊಳ್ಳಬಹುದು. ವಿಶೇಷವಾಗಿ ಬೆಳಗ್ಗೆ ನಿದ್ರೆಯಿಂದ ಎದ್ದಾಗ ತಲೆನೋವು ಹೆಚ್ಚಾಗಿರುವುದು, ಕೆಮ್ಮುವಾಗ, ಬಾಗಿದಾಗ ಅಥವಾ ದೇಹದೊಳಗಿನ ಒತ್ತಡ ಹೆಚ್ಚಾದಾಗ ನೋವು ತೀವ್ರವಾಗುವುದು ಕಂಡುಬರಬಹುದು.

ಇದರ ಜೊತೆಗೆ ವಾಂತಿ, ಫಿಟ್ಸ್‌ (ಮೂರ್ಛೆ), ದೃಷ್ಟಿಯಲ್ಲಿ ಬದಲಾವಣೆ, ಕೈ-ಕಾಲುಗಳಲ್ಲಿ ಬಲಹೀನತೆ ಅಥವಾ ಮರಗಟ್ಟುವಿಕೆಯಂತಹ ಲಕ್ಷಣಗಳೂ ಕಾಣಿಸಿಕೊಳ್ಳಬಹುದು.

ಆದರೆ ಇಂತಹ ಲಕ್ಷಣಗಳು ಇತರ ಆರೋಗ್ಯ ಸಮಸ್ಯೆಗಳ ಕಾರಣದಿಂದಲೂ ಉಂಟಾಗಬಹುದು. ಹೀಗಾಗಿ ಹೊಸದಾಗಿ ಆರಂಭವಾಗುವ ಅಥವಾ ತೀವ್ರತೆಯಲ್ಲಿ ಬದಲಾವಣೆಯಾಗುವ ತಲೆನೋವನ್ನು ಸ್ವತಃ ನಿರ್ಧರಿಸಿಕೊಳ್ಳದೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.

ಯಾವ ಲಕ್ಷಣಗಳು ಕಂಡುಬಂದರೆ ತಕ್ಷಣ ನ್ಯೂರಾಲಜಿಸ್ಟ್‌ರನ್ನು ಸಂಪರ್ಕಿಸಬೇಕು?

• ಹಿಂದೆಂದೂ ಅನುಭವಿಸದ ರೀತಿಯಲ್ಲಿ ಹಠಾತ್ತನೆ ತೀವ್ರವಾದ ತಲೆನೋವು ಕಾಣಿಸಿಕೊಂಡು, ಕೆಲವೇ ಸೆಕೆಂಡ್‌ಗಳು ಅಥವಾ ನಿಮಿಷಗಳಲ್ಲಿ ತೀವ್ರಗೊಳ್ಳುವುದು.

• ಜೀವನದಲ್ಲಿ ಮೊದಲ ಬಾರಿಗೆ ಫಿಟ್ಸ್‌ (ಮೂರ್ಛೆ) ಬರುವುದು.

• ದೇಹದ ಒಂದು ಭಾಗದಲ್ಲಿ ಹಠಾತ್ತನೆ ಬಲಹೀನತೆ ಅಥವಾ ಮರಗಟ್ಟುವಿಕೆ ಕಾಣಿಸಿಕೊಳ್ಳುವುದು.

• ಮಾತನಾಡಲು ಅಥವಾ ಇತರರು ಮಾತನಾಡುವುದನ್ನು ಅರ್ಥಮಾಡಿಕೊಳ್ಳಲು ತೊಂದರೆಯಾಗುವುದು.

• ಹಠಾತ್ತನೆ ದೃಷ್ಟಿ ಮಂದವಾಗುವುದು.

• ಸಮತೋಲನ ಕಳೆದುಕೊಳ್ಳುವುದು ಅಥವಾ ಪ್ರಜ್ಞೆ ತಪ್ಪುವುದು.

• ವರ್ತನೆ ಅಥವಾ ವ್ಯಕ್ತಿತ್ವದಲ್ಲಿ ಗಮನಾರ್ಹ ಬದಲಾವಣೆ ಕಾಣಿಸಿಕೊಳ್ಳುವುದು.

• ಯಾವುದೇ ಸ್ಪಷ್ಟ ಕಾರಣವಿಲ್ಲದೆ ಪದೇಪದೇ ವಾಂತಿ ಮಾಡುವುದು.

ಬ್ರೈನ್ ಟ್ಯೂಮರ್‌ನ್ನು ಆರಂಭದಲ್ಲೇ ಪತ್ತೆಹಚ್ಚಲು ಯಾವ ಪರೀಕ್ಷೆಗಳು ಅಗತ್ಯ?

ವೈದ್ಯರು ರೋಗಿಯ ಲಕ್ಷಣಗಳನ್ನು ಪರಿಶೀಲಿಸಿ ಬ್ರೈನ್ ಟ್ಯೂಮರ್‌ ಬಗ್ಗೆ ಅನುಮಾನ ವ್ಯಕ್ತಪಡಿಸಿದರೆ, ಮೆದುಳಿನ ಇಮೇಜಿಂಗ್ ಪರೀಕ್ಷೆಗಳನ್ನು ನಡೆಸಲಾಗುತ್ತದೆ.

ಬ್ರೈನ್ MRI ಸ್ಕ್ಯಾನ್:
ಇದು ಮೆದುಳಿನ ಅಂಗಾಂಶಗಳನ್ನು ಅತ್ಯಂತ ಸ್ಪಷ್ಟವಾಗಿ ತೋರಿಸುವ ಪ್ರಮುಖ ಪರೀಕ್ಷೆಯಾಗಿದೆ. ಟ್ಯೂಮರ್‌ನ ಗಾತ್ರ, ಸ್ಥಳ ಹಾಗೂ ಸ್ವರೂಪವನ್ನು ಗುರುತಿಸಲು ಇದು ಸಹಾಯ ಮಾಡುತ್ತದೆ. ಅಗತ್ಯವಿದ್ದರೆ ಕಾಂಟ್ರಾಸ್ಟ್ ಇಂಜೆಕ್ಷನ್ ನೀಡಿ ಇನ್ನಷ್ಟು ಸ್ಪಷ್ಟವಾದ ಚಿತ್ರಗಳನ್ನು ಪಡೆಯಬಹುದು.

ಬ್ರೈನ್ CT ಸ್ಕ್ಯಾನ್:
ತುರ್ತು ಪರಿಸ್ಥಿತಿಗಳಲ್ಲಿ ಅಥವಾ MRI ಲಭ್ಯವಿಲ್ಲದ ಸಂದರ್ಭಗಳಲ್ಲಿ CT ಸ್ಕ್ಯಾನ್ ಬಳಸಲಾಗುತ್ತದೆ.

ಟ್ಯೂಮರ್ ಇರುವುದು ದೃಢಪಟ್ಟರೆ, ಅದರ ಪ್ರಕಾರವನ್ನು ಖಚಿತಪಡಿಸಿಕೊಳ್ಳಲು ವಿಶೇಷ MRI ಪರೀಕ್ಷೆಗಳು ಅಥವಾ ಬಯಾಪ್ಸಿ/ಶಸ್ತ್ರಚಿಕಿತ್ಸೆ ಅಗತ್ಯವಾಗಬಹುದು.

ಯುವಕರು ಅಥವಾ ಮಧ್ಯವಯಸ್ಕರಲ್ಲಿ ಗ್ಲಿಯೊಬ್ಲಾಸ್ಟೋಮಾ ಸಾಮಾನ್ಯವೇ?

ಗ್ಲಿಯೊಬ್ಲಾಸ್ಟೋಮಾ ಯಾವುದೇ ವಯಸ್ಸಿನವರಲ್ಲಿಯೂ ಕಾಣಿಸಿಕೊಳ್ಳಬಹುದು. ಆದರೆ ಸಾಮಾನ್ಯವಾಗಿ 60 ವರ್ಷಕ್ಕಿಂತ ಮೇಲ್ಪಟ್ಟವರಲ್ಲಿ ಇದು ಹೆಚ್ಚು ಕಂಡುಬರುತ್ತದೆ. ಯುವಕರಲ್ಲಿ ಇದು ಅಪರೂಪ.

ಬಹುತೇಕ ಜನರಲ್ಲಿ ಗ್ಲಿಯೊಬ್ಲಾಸ್ಟೋಮಾ ಉಂಟಾಗಲು ನಿರ್ದಿಷ್ಟ ಜೀವನಶೈಲಿ ಅಥವಾ ಆಹಾರ ಪದ್ಧತಿಯೇ ಕಾರಣ ಎಂದು ಹೇಳಲು ಸಾಧ್ಯವಿಲ್ಲ.

ಅತಿಯಾದ ಪ್ರಮಾಣದಲ್ಲಿ ಐಯನೈಸಿಂಗ್ ರೇಡಿಯೇಷನ್‌ (Ionising Radiation) ಗೆ ಒಡ್ಡಿಕೊಳ್ಳುವುದು ಇದಕ್ಕೆ ಸಂಬಂಧಿಸಿದಂತೆ ದೃಢಪಟ್ಟಿರುವ ಪ್ರಮುಖ ಪರಿಸರ ಅಪಾಯದ ಅಂಶವಾಗಿದೆ.

ಕೆಲವು ಅಪರೂಪದ ವಂಶಪಾರಂಪರಿಕ ಜನ್ಯ ದೋಷಗಳೂ ಇದಕ್ಕೆ ಕಾರಣವಾಗಬಹುದು. ಆದರೆ ಬಹುತೇಕ ಪ್ರಕರಣಗಳಲ್ಲಿ ಯಾವುದೇ ಕುಟುಂಬದ ಇತಿಹಾಸವಿಲ್ಲದಿದ್ದರೂ ಗ್ಲಿಯೊಬ್ಲಾಸ್ಟೋಮಾ ಕಾಣಿಸಿಕೊಳ್ಳುತ್ತದೆ.

ಪ್ರಸ್ತುತ ಗ್ಲಿಯೊಬ್ಲಾಸ್ಟೋಮಾ ಚಿಕಿತ್ಸೆಯಲ್ಲಿ ಶಸ್ತ್ರಚಿಕಿತ್ಸೆ, ರೇಡಿಯೋಥೆರಪಿ, ಟೆಮೋಜೋಲೊಮೈಡ್ (Temozolomide) ಕೀಮೋಥೆರಪಿ ಸೇರಿದಂತೆ ವಿವಿಧ ವಿಧಾನಗಳನ್ನು ಬಳಸಲಾಗುತ್ತಿದೆ. ಇದರ ಜೊತೆಗೆ ಟ್ಯೂಮರ್ ಟ್ರೀಟಿಂಗ್ ಫೀಲ್ಡ್ಸ್‌ (TTF), ಇಮ್ಯುನೋಥೆರಪಿ ಮತ್ತು ಟಾರ್ಗೆಟೆಡ್ ಥೆರಪಿಗಳ ಕುರಿತೂ ವಿಶ್ವದಾದ್ಯಂತ ವ್ಯಾಪಕ ಸಂಶೋಧನೆ ನಡೆಯುತ್ತಿದೆ.