ಸಾಮಾನ್ಯ ನೀರಿನ ಬದಲು ದಿನವಿಡೀ ಎಳನೀರು ಕುಡಿಯುವುದು ಉತ್ತಮವೇ? ಸ್ಪೋರ್ಟ್ಸ್ ಡ್ರಿಂಕ್ಸ್‌ಗಿಂತ ಇದು ಶ್ರೇಷ್ಠವೇ? ಎಂಬ ಪ್ರಶ್ನೆಗಳಿಗೆ ವಿಜ್ಞಾನ ನೀಡುವ ಉತ್ತರ ಇಲ್ಲಿದೆ.

ಎಳನೀರು vs ಸಾಮಾನ್ಯ ನೀರು: ಯಾವುದು ಹೆಚ್ಚು ಹೈಡ್ರೇಟಿಂಗ್? ದೈನಂದಿನ ಜೀವನದಲ್ಲಿ ದೇಹಕ್ಕೆ ನೀರಿನಂಶ (Hydration) ಒದಗಿಸಲು ಸಾಮಾನ್ಯ ನೀರೇ ಅತ್ಯುತ್ತಮ ಆಯ್ಕೆ.

• ಎಳನೀರಿನ ಗುಣ: ಎಳನೀರಿನಲ್ಲಿ ಪೊಟ್ಯಾಸಿಯಮ್, ಸೋಡಿಯಂ ಮತ್ತು ಮೆಗ್ನೀಸಿಯಮ್‌ನಂತಹ ನೈಸರ್ಗಿಕ ಎಲೆಕ್ಟ್ರೋಲೈಟ್‌ಗಳಿವೆ. ಬಿಸಿಲಿನಲ್ಲಿ ಅತಿಯಾಗಿ ಬೆವರು ಹರಿದಾಗ ಅಥವಾ ಶ್ರಮದಾಯಕ ಕೆಲಸ ಮಾಡಿದಾಗ ಇದು ದೇಹಕ್ಕೆ ಶಕ್ತಿ ನೀಡುತ್ತದೆ.

• ಸಾಮಾನ್ಯ ನೀರೇ ಸಾಕು: ಕಚೇರಿಯಲ್ಲಿ ಕುಳಿತು ಕೆಲಸ ಮಾಡುವಾಗ, ಓದುವಾಗ ಅಥವಾ ದಿನನಿತ್ಯದ ಬಾಯಾರಿಕೆಗೆ ಸಾಮಾನ್ಯ ನೀರನ್ನು ಬಿಟ್ಟು ಎಳನೀರು ಕುಡಿಯುವ ಅಗತ್ಯವಿಲ್ಲ. ಏಕೆಂದರೆ ಸಾಮಾನ್ಯ ನೀರು ಯಾವುದೇ ಕ್ಯಾಲೋರಿ ಅಥವಾ ಸಕ್ಕರೆಯಿಲ್ಲದೆ ದೇಹವನ್ನು ತಂಪಾಗಿರಿಸುತ್ತದೆ.

ಸ್ಪೋರ್ಟ್ಸ್ ಡ್ರಿಂಕ್ಸ್‌ಗಿಂತ ಎಳನೀರು ಉತ್ತಮವೇ? ಮಾರುಕಟ್ಟೆಯಲ್ಲಿ ಸಿಗುವ ಸ್ಪೋರ್ಟ್ಸ್ ಪಾನೀಯಗಳಿಗೆ ಹೋಲಿಸಿದರೆ ಎಳನೀರಿನ ಪೋಷಕಾಂಶಗಳ ಸಮತೋಲನ ಭಿನ್ನವಾಗಿರುತ್ತದೆ.

• ಎಳನೀರಿನಲ್ಲಿ ಪೊಟ್ಯಾಸಿಯಮ್ ಅಧಿಕವಾಗಿದ್ದು (ಒಂದು ಕಪ್‌ನಲ್ಲಿ ಸುಮಾರು 470 ಮಿ.ಗ್ರಾಂ), ಸೋಡಿಯಂ ಪ್ರಮಾಣ ತೀರಾ ಕಡಿಮೆ ಇರುತ್ತದೆ (ಸುಮಾರು 30 ಮಿ.ಗ್ರಾಂ).

• ತೀವ್ರ ಕಸರತ್ತು ಅಥವಾ ದೀರ್ಘಾವಧಿಯ ಕ್ರೀಡೆಗಳಲ್ಲಿ ತೊಡಗುವ ಆಟಗಾರರ ದೇಹದಿಂದ ಬೆವರಿನ ಮೂಲಕ ಅಪಾರ ಪ್ರಮಾಣದ ಸೋಡಿಯಂ ನಷ್ಟವಾಗುತ್ತದೆ. ಅಂತಹ ಸಂದರ್ಭಗಳಲ್ಲಿ ಎಳನೀರಿನಲ್ಲಿರುವ ಕಡಿಮೆ ಸೋಡಿಯಂ ಸಾಕಾಗುವುದಿಲ್ಲ. ಆದ್ದರಿಂದ ಅಥ್ಲೀಟ್‌ಗಳಿಗೆ ವಿಶೇಷ ಸ್ಪೋರ್ಟ್ಸ್ ಡ್ರಿಂಕ್ಸ್‌ಗಳೇ ಸೂಕ್ತ.

ಎಳನೀರಿನ ಬಗ್ಗೆ ಇರುವ 3 ಪ್ರಮುಖ ತಪ್ಪು ಕಲ್ಪನೆಗಳು:

ತಪ್ಪು ಕಲ್ಪನೆ 1: ಎಳನೀರಿನಲ್ಲಿ ಸಕ್ಕರೆ ಇರುವುದಿಲ್ಲ.

ವಾಸ್ತವ: ಎಳನೀರಿನಲ್ಲಿ ನೈಸರ್ಗಿಕ ಸಕ್ಕರೆ ಮತ್ತು ಕಾರ್ಬೋಹೈಡ್ರೇಟ್‌ಗಳಿರುತ್ತವೆ. ಮಾರುಕಟ್ಟೆಯಲ್ಲಿ ಬಾಟಲಿಗಳಲ್ಲಿ ಸಿಗುವ ಪ್ಯಾಕೇಜ್ಡ್ ಎಳನೀರಿನಲ್ಲಿ ಕೃತಕ ಸಕ್ಕರೆ ಅಥವಾ ಸಂರಕ್ಷಕಗಳನ್ನು (Preservatives) ಸೇರಿಸಿರಬಹುದು. ಆದ್ದರಿಂದ ಲೇಬಲ್ ಪರೀಕ್ಷಿಸುವುದು ಮುಖ್ಯ.

ತಪ್ಪು ಕಲ್ಪನೆ 2: ಹೆಚ್ಚು ಎಳನೀರು ಕುಡಿದಷ್ಟು ಒಳ್ಳೆಯದು.

ವಾಸ್ತವ: ಎಳನೀರಿನಲ್ಲಿ ಪೊಟ್ಯಾಸಿಯಮ್ ಅಧಿಕವಾಗಿರುವುದರಿಂದ, ಮೂತ್ರಪಿಂಡ (ಕಿಡ್ನಿ) ಸಮಸ್ಯೆ ಇರುವವರು ಹಾಗೂ ಪೊಟ್ಯಾಸಿಯಮ್ ನಿಯಂತ್ರಣದಲ್ಲಿಡಲು ವೈದ್ಯರ ಸಲಹೆ ಪಡೆದಿರುವವರು ಅತಿಯಾಗಿ ಎಳನೀರು ಕುಡಿಯಬಾರದು.

ತಪ್ಪು ಕಲ್ಪನೆ 3: ಜಿಮ್ ಮುಗಿದ ತಕ್ಷಣ ಎಳನೀರು ಕಡ್ಡಾಯ.

ವಾಸ್ತವ: ಹಗುರವಾದ ವ್ಯಾಯಾಮದ ನಂತರ ಸಾಮಾನ್ಯ ನೀರು ಕುಡಿದರೆ ಸಾಕು. ಅತಿಯಾಗಿ ಬೆವರುವಂತಹ ಕಠಿಣ ವರ್ಕೌಟ್‌ಗಳಿಗೆ ಮಾತ್ರ ಎಲೆಕ್ಟ್ರೋಲೈಟ್‌ಗಳ ಅಗತ್ಯವಿರುತ್ತದೆ.

ತಾಜಾ ಎಳನೀರು vs ಪ್ಯಾಕೇಜ್ಡ್ ಎಳನೀರು ನೇರವಾಗಿ ಕಾಯಿಯಿಂದ ಕುಡಿಯುವ ನೈಸರ್ಗಿಕ ಎಳನೀರು ಯಾವಾಗಲೂ ಶ್ರೇಷ್ಠ. ಪ್ಯಾಕ್ ಮಾಡಿದ ಎಳನೀರು ಖರೀದಿಸುವ ಮುನ್ನ ಅದರಲ್ಲಿ ಹೆಚ್ಚುವರಿ ಸಕ್ಕರೆ (Added sugar), ಸೋಡಿಯಂ ಹಾಗೂ ಕ್ಯಾಲೋರಿ ಪ್ರಮಾಣ ಎಷ್ಟಿದೆ ಎಂಬುದನ್ನು ಪರೀಕ್ಷಿಸುವುದು ಸೂಕ್ತ.

ಎಳನೀರು ಒಂದು ಅದ್ಭುತ ನೈಸರ್ಗಿಕ ಪಾನೀಯ ಹೌದಾದರೂ, ಅದು ಸಾಮಾನ್ಯ ಕುಡಿಯುವ ನೀರಿಗೆ ಪೂರ್ಣ ಬದಲಿಯಾಗಲಾರದು. ನಿಮ್ಮ ದೈಹಿಕ ಶ್ರಮ, ಆರೋಗ್ಯದ ಸ್ಥಿತಿ ಮತ್ತು ಹವಾಮಾನಕ್ಕೆ ಅನುಗುಣವಾಗಿ ಎಳನೀರನ್ನು ಸರಿಯಾದ ಪ್ರಮಾಣದಲ್ಲಿ ಸೇವಿಸುವುದೇ ಜಾಣತನ.