ಈ ಕೆಟ್ಟ ಅಭ್ಯಾಸವು ದಿನದ ಆರಂಭದಲ್ಲೇ ನಮ್ಮ ಮನಸ್ಸನ್ನು ನೂರಾರು ಆಲೋಚನೆಗಳಿಂದ ತುಂಬಿಸಿ ತೀವ್ರ ಒತ್ತಡಕ್ಕೆ ಸಿಲುಕಿಸುತ್ತದೆ ಎಂದು ಆರೋಗ್ಯ ತಜ್ಞರು ಎಚ್ಚರಿಸಿದ್ದಾರೆ. ನಿದ್ರೆಯಿಂದ ಎದ್ದ ತಕ್ಷಣ ಫೋನ್‌ಗೆ ಪ್ರಥಮ ಆದ್ಯತೆ ನೀಡುವುದರಿಂದ ದಿನವಿಡೀ ನಕಾರಾತ್ಮಕ ಆಲೋಚನೆಗಳು ಮತ್ತು ದುರ್ಬಲ ಮಾನಸಿಕ ಸ್ಥಿತಿ ಕಾಡಲು ಆರಂಭಿಸುತ್ತದೆ.

ಫೀಲ್ಡಿಂಗ್ ಗ್ರಾಜುಯೇಟ್ ವಿಶ್ವವಿದ್ಯಾಲಯದ ಅಧ್ಯಯನದ ಪ್ರಕಾರ, ಹಾಸಿಗೆಯಿಂದ ಎದ್ದೇಳುವ ಮುನ್ನವೇ ಫೋನ್ ಪರಿಶೀಲಿಸುವುದರಿಂದ ನಮ್ಮ ಮಾನಸಿಕ ಶಕ್ತಿ ಗಣನೀಯವಾಗಿ ಕ್ಷೀಣಿಸುತ್ತದೆ. ಇದು ದಿನವಿಡೀ ಪರಿಣಾಮಕಾರಿಯಾಗಿ ಕೆಲಸಗಳನ್ನು ನಿರ್ವಹಿಸುವ ನಮ್ಮ ಸಾಮರ್ಥ್ಯಕ್ಕೆ ದೊಡ್ಡ ಅಡ್ಡಿಯಾಗುತ್ತದೆ. ಎಚ್ಚರವಾದ ತಕ್ಷಣ ಸಂದೇಶಗಳು, ಇಮೇಲ್‌ಗಳು ಮತ್ತು ಸಾಮಾಜಿಕ ಜಾಲತಾಣಗಳ ಅಪ್‌ಡೇಟ್‌ಗಳನ್ನು ನೋಡುವುದರಿಂದ ದೇಹದಲ್ಲಿ ಕಾರ್ಟಿಸೋಲ್ (ಒತ್ತಡದ ಹಾರ್ಮೋನ್) ಮಟ್ಟದಲ್ಲಿ ಹಠಾತ್ ಏರಿಕೆ ಉಂಟಾಗುತ್ತದೆ. ಇದರಿಂದ ದಿನದ ಆರಂಭದಲ್ಲೇ ಆತುರ, ಆತಂಕ ಹಾಗೂ ಅನಗತ್ಯ ಗೊಂದಲಗಳು ಕಾಡತೊಗಡುತ್ತವೆ.

ಬೆಳಗ್ಗೆ ಫೋನ್ ನೋಡುವ ಅಭ್ಯಾಸವನ್ನು ಬಿಡುವುದು ಹೇಗೆ?

ಈ ಅಪಾಯಕಾರಿ ಅಭ್ಯಾಸವನ್ನು ಮುಂದುವರಿಸುವ ಬದಲು ನಿಮ್ಮ ಬೆಳಗಿನ ದಿನಚರಿಯಲ್ಲಿ ಸಕಾರಾತ್ಮಕ ಬದಲಾವಣೆಗಳನ್ನು ಮಾಡಿಕೊಳ್ಳುವುದು ಅತ್ಯಂತ ಅವಶ್ಯಕವಾಗಿದೆ. ಪ್ರತಿದಿನ ಬೆಳಗ್ಗೆ ಕೇವಲ 20 ನಿಮಿಷಗಳನ್ನು ನೀರು ಕುಡಿಯುವುದು, ಲಘು ವ್ಯಾಯಾಮ ಮಾಡುವುದು ಮತ್ತು ಅಂದಿನ ಕೆಲಸಗಳನ್ನು ಯೋಜಿಸುವುದಕ್ಕೆ ಮೀಸಲಿಟ್ಟರೆ ನಿಮ್ಮ ಇಡೀ ದಿನ ಅತ್ಯದ್ಭುತವಾಗಿ ರೂಪುಗೊಳ್ಳುತ್ತದೆ. ಕೆಲವು ವಾರಗಳ ಕಾಲ ಈ ಕ್ರಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಿದರೆ ಮಾನಸಿಕ ಶಾಂತಿ ಲಭಿಸುವುದಲ್ಲದೆ, ಕೆಲಸಗಳು ಸಂಘಟಿತ ರೀತಿಯಲ್ಲಿ ನಡೆಯುತ್ತವೆ ಹಾಗೂ ಫೋನ್ ಮುಟ್ಟಬೇಕೆಂಬ ಪ್ರಚೋದನೆ ಕ್ರಮೇಣ ಕಡಿಮೆಯಾಗುತ್ತದೆ.

ಸಾಕಷ್ಟು ನೀರು ಕುಡಿಯುವುದು: ರಾತ್ರಿಯಿಡೀ ದೇಹದ ಜಲಸಂಚಯನ ಮಟ್ಟ ಕಡಿಮೆಯಾಗಿರುವುದರಿಂದ, ಬೆಳಿಗ್ಗೆ ಎದ್ದ ಕೂಡಲೇ ಒಂದು ಲೋಟ ನೀರು ಕುಡಿಯುವುದು ಆರೋಗ್ಯಕರ ಅಭ್ಯಾಸದ ಉತ್ತಮ ಆರಂಭವಾಗಿದೆ.

ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳುವುದು: ಬೆಳಿಗ್ಗೆ 5ರಿಂದ 10 ನಿಮಿಷಗಳ ಕಾಲ ಹೊರಾಂಗಣದಲ್ಲಿ ಅಥವಾ ಕಿಟಕಿಯ ಬಳಿ ನಿಲ್ಲುವುದರಿಂದ ದೇಹದ ಆಂತರಿಕ ಗಡಿಯಾರ ಅಂದರೆ ಸಿರ್ಕಾಡಿಯನ್ ರಿದಮ್‌ ಸರಿಯಾಗಿ ನಿಯಂತ್ರಣಗೊಳ್ಳಲು ಸಹಾಯವಾಗುತ್ತದೆ.

ದೈಹಿಕ ಚಟುವಟಿಕೆ: ಬೆಳಗಿನ ಸ್ಟ್ರೆಚಿಂಗ್, ಯೋಗ ಅಥವಾ ಸ್ವಲ್ಪ ನಡಿಗೆಯು ರಕ್ತ ಪರಿಚಲನೆಯನ್ನು ಸುಧಾರಿಸುತ್ತದೆ. ಇದು ಬೆಳಗಿನ ಮೈಕೈ ಬಿಗಿತವನ್ನು ನಿವಾರಿಸುವುದಲ್ಲದೆ, ಮನಸ್ಥಿತಿಯನ್ನು ಉತ್ತಮಗೊಳಿಸುವ ನರಪ್ರೇಕ್ಷಕಗಳ ಉತ್ಪಾದನೆಯನ್ನು ಹೆಚ್ಚಿಸುತ್ತದೆ.

ಧ್ಯಾನ ಮತ್ತು ಆಳವಾದ ಉಸಿರಾಟ: ದಿನಕ್ಕೆ ಕೇವಲ 5 ನಿಮಿಷಗಳ ಕಾಲ ಶಾಂತವಾಗಿ ಧ್ಯಾನ ಮಾಡುವುದು ಅಥವಾ ಆಳವಾದ ಉಸಿರಾಟದ ವ್ಯಾಯಾಮ ಮಾಡುವುದರಿಂದ ಒತ್ತಡದ ಮಟ್ಟ ತೀವ್ರವಾಗಿ ಕಡಿಮೆಯಾಗುತ್ತದೆ. ಇದು ಯಾವುದೇ ಆತಂಕವಿಲ್ಲದೆ ಅಂದಿನ ಕೆಲಸಗಳನ್ನು ವ್ಯವಸ್ಥಿತವಾಗಿ ನಿರ್ವಹಿಸಲು ನೆರವಾಗುತ್ತದೆ.

ದಿನದ ಯೋಜನಾ ನಿರ್ವಹಣೆ (ಡೇ ಪ್ಲಾನ್): ನೀವು ಕೃತಜ್ಞರಾಗಿರುವ ಮೂರು ವಿಷಯಗಳನ್ನು ಅಥವಾ ಆ ದಿನ ಸಾಧಿಸಬೇಕಾದ ಮೂರು ಪ್ರಮುಖ ಕಾರ್ಯಗಳನ್ನು ನಿತ್ಯ ಬೆಳಗ್ಗೆ ಡೈರಿಯಲ್ಲಿ ಬರೆಯುವುದರಿಂದ ಏಕಾಗ್ರತೆ ಹೆಚ್ಚುತ್ತದೆ. ಇದು ಗುರಿಯಿಲ್ಲದೆ ಫೋನ್ ಸ್ಕ್ರೋಲ್ ಮಾಡುವುದನ್ನು ತಡೆಯುತ್ತದೆ.

ಚಹಾ ಅಥವಾ ಕಾಫಿ ಆಸ್ವಾದನೆ: ಪಕ್ಷಿಗಳ ಚಿಲಿಪಿಲಿ ನಾದವನ್ನು ಆಲಿಸುತ್ತಾ ಅಥವಾ ನಿಮ್ಮ ಆಂತರಿಕ ಭಾವನೆಗಳೊಂದಿಗೆ ಬೆರೆಯುತ್ತಾ, ಯಾವುದೇ ಆತುರವಿಲ್ಲದೆ ನಿಮ್ಮ ಬೆಳಗಿನ ಚಹಾ ಅಥವಾ ಕಾಫಿಯನ್ನು ಸವಿಯಿರಿ. ಇದು ಪ್ರಸ್ತುತ ಕ್ಷಣದಲ್ಲಿ ಮನಸ್ಸಿನ ಶಾಂತಿಯನ್ನು ಹೆಚ್ಚಿಸುತ್ತದೆ.

ತಜ್ಞರ ಸಲಹೆಯ ಪ್ರಕಾರ, ಎಚ್ಚರವಾದ ತಕ್ಷಣ ಮೊಬೈಲ್ ಪರಿಶೀಲಿಸುವ ಅಭ್ಯಾಸವನ್ನು ಬಿಡಲು ಸ್ಮಾರ್ಟ್‌ಫೋನ್‌ ಬದಲು ಪ್ರಮಾಣಿತ ಅಲಾರಾಂ ಗಡಿಯಾರ ಬಳಸುವುದು ಅಥವಾ ಮಲಗುವಾಗ ಫೋನ್ ಅನ್ನು ಸುಲಭವಾಗಿ ತಲುಪದ ದೂರದ ಸ್ಥಳದಲ್ಲಿ ಇಡುವುದು ಉತ್ತಮ ಮಾರ್ಗವಾಗಿದೆ. ಎಚ್ಚರವಾದ ತಕ್ಷಣ ಫೋನ್ ನೋಡುವುದು ನಿಮ್ಮ ಮೊದಲ ಕೆಲಸವಾಗಬಾರದು ಎಂಬುದನ್ನು ಸದಾ ನೆನಪಿನಲ್ಲಿಡಿ.

(ಸೂಚನೆ: ಈ ವರದಿಯಲ್ಲಿ ನೀಡಲಾದ ಆರೋಗ್ಯ ಸಂಬಂಧಿತ ಮಾಹಿತಿ ಹಾಗೂ ಸಲಹೆಗಳು ಸಾಮಾನ್ಯ ಮಾಹಿತಿಗಾಗಿ ಮಾತ್ರವಾಗಿದ್ದು, ವೈಜ್ಞಾನಿಕ ಸಂಶೋಧನೆ ಹಾಗೂ ವೃತ್ತಿಪರ ಸಲಹೆಗಳ ಆಧಾರದ ಮೇಲೆ ಒದಗಿಸಲಾಗಿದೆ. ಯಾವುದೇ ವಿಶೇಷ ಆರೋಗ್ಯ ವಿಧಾನಗಳನ್ನು ಅಳವಡಿಸಿಕೊಳ್ಳುವ ಮೊದಲು ತಜ್ಞ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.)