ಆದರೆ, ದೀರ್ಘ ಪ್ರಯಾಣದ ನಂತರ ಕಾಲಿನ ಒಂದೇ ಬದಿಯಲ್ಲಿ ಕಾಣಿಸಿಕೊಳ್ಳುವ ಇಂತಹ ನೋವನ್ನು ಎಂದಿಗೂ ಮಸಾಜ್ ಮಾಡಬಾರದು ಎಂದು ಅಮೆರಿಕದ ಮೇರಿಲ್ಯಾಂಡ್ ಮೂಲದ ಪ್ರಸಿದ್ಧ ಅರಿವಳಿಕೆ ಮತ್ತು ನೋವು ನಿವಾರಣಾ ವೈದ್ಯರಾದ ಡಾ. ಕುನಾಲ್ ಸೂದ್ ಎಚ್ಚರಿಸಿದ್ದಾರೆ.

ಪ್ರಯಾಣದ ನಂತರ ಬರುವ ನೋವು ಸಾಮಾನ್ಯ ಸ್ನಾಯು ಸೆಳೆತದಂತೆ ಕಂಡರೂ, ಅದು 'ಡೀಪ್ ವೇನ್ ಥ್ರಂಬೋಸಿಸ್' (DVT) ಎಂಬ ಅಪಾಯಕಾರಿ ಆರೋಗ್ಯ ಸಮಸ್ಯೆಯ ಲಕ್ಷಣವಾಗಿರಬಹುದು.
​ಗಂಟೆಗಟ್ಟಲೆ ಒಂದೇ ಕಡೆ ಕುಳಿತು ಪ್ರಯಾಣಿಸುವುದರಿಂದ ಕಾಲುಗಳ ಚಲನೆ ಸ್ಥಗಿತಗೊಂಡು, ರಕ್ತದ ಪರಿಚಲನೆ ನಿಧಾನವಾಗುತ್ತದೆ. ಈ ಸ್ಥಿತಿಯಲ್ಲಿ ಕಾಲಿನ ಆಳವಾದ ರಕ್ತನಾಳಗಳಲ್ಲಿ ರಕ್ತ ಹೆಪ್ಪುಗಟ್ಟಲು (ಬ್ಲಡ್ ಕ್ಲಾಟ್) ಆರಂಭವಾಗುತ್ತದೆ. ಇದನ್ನೇ ವೈದ್ಯಕೀಯ ಭಾಷೆಯಲ್ಲಿ ಡಿವಿಟಿ ಎಂದು ಕರೆಯಲಾಗುತ್ತದೆ. ಇದರ ಪ್ರಮುಖ ಸವಾಲೆಂದರೆ ಈ ನೋವು ಸಾಮಾನ್ಯ ಸ್ನಾಯು ಸೆಳೆತದಂತೆಯೇ ಭಾಸವಾಗುತ್ತದೆ. ಕಾಲಿನ ಒಂದೇ ಬದಿಯಲ್ಲಿ ನೋವು ಕಾಣಿಸಿಕೊಳ್ಳುವುದು, ಕಾಲು ಉಬ್ಬಿಕೊಳ್ಳುವುದು, ನೋವಿರುವ ಜಾಗ ಮುಟ್ಟಿದರೆ ಬಿಸಿಯಾಗಿರುವುದು, ಚರ್ಮ ಕೆಂಪಗಾಗುವುದು, ರಕ್ತನಾಳಗಳು ಎದ್ದುಕಾಣುವುದು ಮತ್ತು ಕಾಲಿನಲ್ಲಿ ಭಾರಿ ಆಯಾಸದ ಭಾವನೆ ಮೂಡುವುದು ಈ ಕಾಯಿಲೆಯ ಪ್ರಮುಖ ಲಕ್ಷಣಗಳಾಗಿವೆ.
​ಒಂದು ವೇಳೆ ಕಾಲಿನಲ್ಲಿ ರಕ್ತ ಹೆಪ್ಪುಗಟ್ಟಿದ್ದರೆ ಮತ್ತು ಆ ಸಮಯದಲ್ಲಿ ಆ ಜಾಗವನ್ನು ಮಸಾಜ್ ಮಾಡಿದರೆ, ಆ ರಕ್ತದ ಗಂಟು ರಕ್ತನಾಳದಿಂದ ಕಿತ್ತುಬಂದು ನೇರವಾಗಿ ಶ್ವಾಸಕೋಶವನ್ನು ತಲುಪುವ ಅಪಾಯವಿರುತ್ತದೆ. ಇದನ್ನು 'ಪಲ್ಮನರಿ ಎಂಬಾಲಿಸಂ' ಎಂದು ಕರೆಯಲಾಗುತ್ತದೆ. ಶ್ವಾಸಕೋಶಕ್ಕೆ ರಕ್ತದ ಗಂಟು ಸೇರಿದಾಗ ದೇಹಕ್ಕೆ ಆಮ್ಲಜನಕವನ್ನು ಹೀರಿಕೊಳ್ಳಲು ಸಾಧ್ಯವಾಗದೆ ತೀವ್ರ ಉಸಿರಾಟದ ತೊಂದರೆ ಉಂಟಾಗಿ, ಕ್ಷಣಾರ್ಧದಲ್ಲಿ ಪ್ರಾಣಕ್ಕೆ ಕುತ್ತು ಬರಬಹುದು.

ಆದ್ದರಿಂದ ದೀರ್ಘ ಪ್ರಯಾಣದ ನಂತರ ಕಾಲಿನಲ್ಲಿ ಇಂತಹ ನೋವು ಕಾಣಿಸಿಕೊಂಡರೆ ಮಸಾಜ್ ಮಾಡುವುದು, ಕಷ್ಟಪಟ್ಟು ಕಾಲನ್ನು ಎಳೆಯುವುದು ಅಥವಾ ನಡೆಯಲು ಪ್ರಯತ್ನಿಸುವ ಬದಲು ತಕ್ಷಣ ವೈದ್ಯಕೀಯ ತಪಾಸಣೆ ಮಾಡಿಸಿಕೊಳ್ಳುವುದು ಉತ್ತಮ. ಈ ಕಾಯಿಲೆಯಿಂದ ಬಚಾವಾಗಲು ಸುಲಭವಾದ ಮಾರ್ಗಗಳೂ ಇವೆ. ದೀರ್ಘಾವಧಿಯ ಪ್ರಯಾಣದ ಸಮಯದಲ್ಲಿ ದೇಹದಲ್ಲಿ ನೀರಿನಂಶ ಕಡಿಮೆಯಾಗದಂತೆ ನೋಡಿಕೊಳ್ಳಬೇಕು, ಕುಳಿತಲ್ಲೇ ಕಾಲುಗಳನ್ನು ನಿಯಮಿತವಾಗಿ ಚಲಿಸಬೇಕು ಮತ್ತು ನಡುವೆ ಸ್ವಲ್ಪ ಸಮಯ ಎದ್ದು ನಡೆದಾಡುವುದರಿಂದ ರಕ್ತ ಹೆಪ್ಪುಗಟ್ಟುವಿಕೆಯನ್ನು ಸುಲಭವಾಗಿ ತಡೆಯಬಹುದು.