ನ್ಯೂಯಾರ್ಕ್‌ನಲ್ಲಿ ಆಯೋಜಿಸಲಾಗಿದ್ದ 'ಒನ್ ವರ್ಲ್ಡ್, ಒನ್ ಹ್ಯೂಮ್ಯಾನಿಟಿ' (ಒಂದು ಜಗತ್ತು, ಒಂದು ಮಾನವೀಯತೆ) ಕಾರ್ಯಕ್ರಮವನ್ನು ಉದ್ದೇಶಿಸಿ ಮೋಹನ್ ಭಾಗವತ್ ಮಾತನಾಡಿದರು. ಅಪಾರ ವೈವಿಧ್ಯತೆಯ ನಡುವೆಯೂ ಮಾನವೀಯ ಏಕತೆಯನ್ನು ಕಾಪಾಡಿಕೊಂಡು ಬರುವುದು ಭಾರತದ ಸಾಂಪ್ರದಾಯಿಕ ದೃಷ್ಟಿಕೋನ ಹಾಗೂ ಸನಾತನ ಪರಂಪರೆಯಾಗಿದೆ ಎಂದು ಅವರು ಈ ಸಂದರ್ಭದಲ್ಲಿ ಹೇಳಿದರು.

ಈ ವೇಳೆ 2018ರಲ್ಲಿ ನಡೆದ ಘಟನೆಯೊಂದನ್ನು ನೆನಪಿಸಿಕೊಂಡ ಭಾಗವತ್, "ಕೆಲವು ಮುಸ್ಲಿಂ ಸಮುದಾಯದ ನಾಯಕರು ನನ್ನನ್ನು ಭೇಟಿಯಾಗಿ, 'ಹಿಂದೂ ರಾಷ್ಟ್ರ' ಎಂದರೆ ಮುಸ್ಲಿಮರನ್ನು ಭಾರತದಿಂದ ಹೊರಹಾಕಲಾಗುತ್ತದೆಯೇ?" ಎಂದು ಆತಂಕದಿಂದ ಪ್ರಶ್ನಿಸಿದ್ದರು. ಆಗ ನಾನು, "ಭಾರತದಲ್ಲಿ ಮುಸ್ಲಿಮರು ಇರಬಾರದು ಎಂದು ಭಾವಿಸುವವನು ಎಂದಿಗೂ ನಿಜವಾದ ಹಿಂದೂ ಆಗಿರಲು ಸಾಧ್ಯವಿಲ್ಲ. ಎಲ್ಲ ಧಾರ್ಮಿಕ ಮಾರ್ಗಗಳೂ ಅಂತಿಮವಾಗಿ ಒಂದೇ ದೇವರೆಡೆಗೆ ಕರೆದೊಯ್ಯುತ್ತವೆ ಎಂಬುದನ್ನು ನಂಬುವುದೇ ಹಿಂದುತ್ವ" ಎಂದು ತಿಳಿಸಿದ್ದಾಗಿ ಹೇಳಿದರು.

ವಿವಿಧ ಧಾರ್ಮಿಕ ನಂಬಿಕೆಗಳನ್ನು ಉದಾಹರಣೆಯೊಂದಿಗೆ ವಿವರಿಸಿದ ಅವರು, "ನಾನು ಬೆಳಕಿನತ್ತ ಬೆರಳು ತೋರಿಸಿದಾಗ, ನೀವು ಮೊದಲು ನನ್ನ ಬೆರಳನ್ನು ನೋಡಿ, ನಂತರ ಬೆಳಕನ್ನು ನೋಡಬೇಕು. ಅದನ್ನು ಬಿಟ್ಟು ಬೆರಳನ್ನೇ ನೋಡುತ್ತಾ ಕುಳಿತರೆ ಬೆಳಕನ್ನು ಕಾಣಲು ಸಾಧ್ಯವಿಲ್ಲ. ಅಂತೆಯೇ ಧಾರ್ಮಿಕ ಮಾರ್ಗಗಳು ಬೇರೆಯಾಗಿದ್ದರೂ, ತಲುಪುವ ಅಂತಿಮ ದೈವಿಕ ಸತ್ಯ ಒಂದೇ ಆಗಿದೆ" ಎಂದರು.

ಭಾರತವು ಸುದೀರ್ಘ ಇತಿಹಾಸದಲ್ಲಿ ವಿಶ್ವದ ವಿವಿಧ ಧರ್ಮಗಳಿಗೆ ಸೇರಿದ ಜನರಿಗೆ ಆಶ್ರಯ ನೀಡಿದ ಉದಾರ ಪರಂಪರೆಯನ್ನು ಹೊಂದಿದೆ. ವಿದೇಶಿ ಆಕ್ರಮಣಗಳಿಂದಾಗಿ ದೇಶವು ತಾಂತ್ರಿಕವಾಗಿ ಮತ್ತು ಭೌತಿಕವಾಗಿ ಹಲವು ವಿಷಯಗಳನ್ನು ಕಳೆದುಕೊಂಡಿರಬಹುದು. ಆದರೆ 'ವಸುಧೈವ ಕುಟುಂಬಕಂ' ಅಂದರೆ ಜಗತ್ತನ್ನೇ ಒಂದೇ ಕುಟುಂಬವಾಗಿ ಕಾಣುವ ಭಾರತೀಯ ಮನೋಭಾವ ಮತ್ತು ಸಂಸ್ಕೃತಿ ಇಂದಿಗೂ ಸಜೀವವಾಗಿದೆ ಎಂದು ಭಾಗವತ್ ಮೆಚ್ಚುಗೆ ವ್ಯಕ್ತಪಡಿಸಿದರು.