ಪ್ರಯಾಗ್‌ರಾಜ್‌ನ ವಕೀಲ ಅಭಿಷೇಕ್ ಯಾದವ್ ಎಂಬುವವರು ತಮ್ಮ ಮಗಳ ಕಸ್ಟಡಿಗೆ ಕೋರಿ ಸಲ್ಲಿಸಿದ್ದ ಮೇಲ್ಮನವಿಯನ್ನು ಮಾನ್ಯ ಮಾಡಿದ ನ್ಯಾಯಮೂರ್ತಿ ಸರಳ್ ಶ್ರೀವಾಸ್ತವ ಮತ್ತು ನ್ಯಾಯಮೂರ್ತಿ ಸುಧಾಂಶು ಚೌಹಾಣ್ ಅವರನ್ನೊಳಗೊಂಡ ಪೀಠವು ಈ ನಿರ್ಧಾರವನ್ನು ಪ್ರಕಟಿಸಿದೆ.

ಪ್ರಕರಣದ ಹಿನ್ನೆಲೆಯ ಪ್ರಕಾರ, ಅಭಿಷೇಕ್ ಯಾದವ್ 2019 ರಲ್ಲಿ ವಿವಾಹವಾಗಿದ್ದು, 2022 ರಲ್ಲಿ ದಂಪತಿಗೆ ಹೆಣ್ಣುಮಗು ಜನಿಸಿತ್ತು. 2023 ರಲ್ಲಿ ಯಾದವ್ ಅವರ ಪತ್ನಿಯನ್ನು ಆಕೆಯ ಸಹೋದರರು ತವರು ಮನೆಗೆ ಕರೆದೊಯ್ದಿದ್ದು, 2024 ರಲ್ಲಿ ಆಕೆ ನಿಧನರಾದರು. ಪತ್ನಿಯ ಮರಣದ ನಂತರ ಮಾವ ಮತ್ತು ಭಾವಂದಿರು ಮಗುವನ್ನು ನೀಡಲು ನಿರಾಕರಿಸಿದಾಗ, ಯಾದವ್ ನ್ಯಾಯಾಲಯದ ಬಾಗಿಲು ತಟ್ಟಿದ್ದರು. ಆದರೆ ವಿಚಾರಣಾ ನ್ಯಾಯಾಲಯವು ಯಾದವ್ ಅವರ ಅರ್ಜಿಯನ್ನು ವಜಾಗೊಳಿಸಿತ್ತು. ಮಾವನ ಕಡೆಯವರು ಯಾದವ್ ಅವರು ವರದಕ್ಷಿಣೆಗಾಗಿ ಕಿರುಕುಳ ನೀಡುತ್ತಿದ್ದರು ಮತ್ತು ಶೀಘ್ರದಲ್ಲೇ ಎರಡನೇ ಮದುವೆಯಾಗಲಿದ್ದಾರೆ ಎಂದು ಆರೋಪಿಸಿದ್ದರು.

ವಿಚಾರಣಾ ನ್ಯಾಯಾಲಯದ ಆದೇಶವನ್ನು ರದ್ದುಗೊಳಿಸಿದ ಹೈಕೋರ್ಟ್, ಮಗುವು ತನ್ನ ತಾಯಿಯ ತಂದೆ ಮತ್ತು ಐದು ಮಕ್ಕಳಿರುವ ಚಿಕ್ಕಮ್ಮನ ಮನೆಯಲ್ಲಿ ಸರದಿಯಂತೆ ವಾಸಿಸುತ್ತಿದ್ದು, ಅಲ್ಲಿ ಆಕೆಯ ಭವಿಷ್ಯ ಸುರಕ್ಷಿತವಾಗಿ ಕಾಣುತ್ತಿಲ್ಲ ಎಂದು ಅಭಿಪ್ರಾಯಪಟ್ಟಿದೆ. ಪರಿಸ್ಥಿತಿಯ ಬದಲಾವಣೆಯಿಂದ ಮಗುವಿಗೆ ತಂದೆಯೊಂದಿಗೆ ಹೊಂದಿಕೊಳ್ಳಲು ಆರಂಭದಲ್ಲಿ ಸ್ವಲ್ಪ ಕಷ್ಟವಾಗಬಹುದು, ಆದರೆ ಮಗುವಿನ ಉತ್ತಮ ಭವಿಷ್ಯಕ್ಕಾಗಿ ತಂದೆಗೆ ಕಸ್ಟಡಿ ನೀಡುವುದು ಸೂಕ್ತ ಎಂದು ಪೀಠವು ತಿಳಿಸಿದೆ. ಆಗಸ್ಟ್ 21 ರಂದು ನೀಡಲಾದ ಈ ಆದೇಶದಲ್ಲಿ, ಒಂದು ತಿಂಗಳೊಳಗೆ ಮಗುವಿನ ಕಸ್ಟಡಿಯನ್ನು ತಂದೆಗೆ ಹಸ್ತಾಂತರಿಸುವಂತೆ ಮಗುವಿನ ತಾಯಿಯ ಕಡೆಯವರಿಗೆ ಹೈಕೋರ್ಟ್ ನಿರ್ದೇಶನ ನೀಡಿದೆ.