ಈ ಎರಡೂ ನಗರಗಳ ಮೇಲೆ ದಾಳಿ ನಡೆಸಲು ಮಿಲಿಟರಿ ಕಮಾಂಡರ್‌ಗಳಿಗೆ ರಷ್ಯಾದ ರಾಜಕೀಯ ನಾಯಕತ್ವ ಸೂಚನೆ ನೀಡಿದೆ ಎನ್ನಲಾಗಿದ್ದರೂ, ಸದ್ಯಕ್ಕೆ ರಷ್ಯಾ ಪಡೆಗಳು ಸೈನ್ಯವನ್ನು ಒಂದೆಡೆ ಸೇರಿಸುತ್ತಿರುವ ಯಾವುದೇ ಪುರಾವೆಗಳಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. 2022 ರ ಫೆಬ್ರವರಿಯಲ್ಲಿ ಪೂರ್ಣಪ್ರಮಾಣದ ದಾಳಿ ಆರಂಭಿಸಿದಾಗಲೂ ರಷ್ಯಾ ಕೈವ್ ವಶಪಡಿಸಿಕೊಳ್ಳಲು ಯತ್ನಿಸಿ ಸೋತಿತ್ತು.

ಇನ್ನೊಂದೆಡೆ, ರಷ್ಯಾ ತನ್ನ ಸೈನಿಕರ ಬಲವನ್ನು ಹೆಚ್ಚಿಸಿಕೊಳ್ಳಲು ಹೆಚ್ಚುವರಿ ಸಜ್ಜುಗೊಳಿಸುವಿಕೆ (Mobilisation) ಪರೀಕ್ಷಿಸುತ್ತಿದೆ ಎಂಬ ವರದಿಗಳ ಬೆನ್ನಲ್ಲೇ, ಪೋಲೆಂಡ್ ಪ್ರಧಾನಿ ಡೊನಾಲ್ಡ್ ಟಸ್ಕ್ ಅವರು ರಷ್ಯಾದಿಂದ ಉದ್ವಿಗ್ನತೆ ಹೆಚ್ಚಾಗುತ್ತಿದ್ದು, ಮುಂಬರುವ ಆರು ತಿಂಗಳು ಅತ್ಯಂತ ನಿರ್ಣಾಯಕವಾಗಲಿವೆ ಎಂದು ಎಚ್ಚರಿಸಿದ್ದಾರೆ. ರಷ್ಯಾ ರಾಜಧಾನಿ ಕೈವ್ ಸೇರಿದಂತೆ ವಿವಿಧ ಭಾಗಗಳ ಮೇಲೆ ನಿರಂತರವಾಗಿ ಜೆಟ್ ಚಾಲಿತ ಡ್ರೋನ್‌ಗಳ ಮೂಲಕ ಬಾಂಬ್ ದಾಳಿ ನಡೆಸುತ್ತಿದ್ದು, ಪರಿಸ್ಥಿತಿ ತೀವ್ರ ವಿಕೋಪಕ್ಕೆ ತಿರುಗಿದೆ.

ಕೈವ್‌ನ ಪಶ್ಚಿಮ ಉಪನಗರದ ಮಿಲಾ ಗ್ರಾಮದಲ್ಲಿದ್ದ ಸೇನಾ ಸ್ಫೋಟಕಗಳ ಉಗ್ರಾಣದ ಮೇಲೆ ರಷ್ಯಾದ ಡ್ರೋನ್ ಅಪ್ಪಳಿಸಿದ ಪರಿಣಾಮ ಸಂಭವಿಸಿದ ಸರಣಿ ಸ್ಫೋಟದಲ್ಲಿ ಕನಿಷ್ಠ 37 ಜನರು ಮೃತಪಟ್ಟಿದ್ದಾರೆ. ಈ ದಾಳಿಯಿಂದ ಬುಚಾ ಪ್ರದೇಶದಲ್ಲಿನ ವೃದ್ಧಾಶ್ರಮ ಸೇರಿದಂತೆ 50ಕ್ಕೂ ಹೆಚ್ಚು ವಸತಿ ಕಟ್ಟಡಗಳು ಹಾನಿಗೊಳಗಾಗಿದ್ದು, 42 ಜನರು ಗಾಯಗೊಂಡಿದ್ದಾರೆ. ರಕ್ಷಣಾ ಕಾರ್ಯಾಚರಣೆಯ ವೇಳೆ ಡಿಮಿಟ್ರಿವ್ಕಾ ಸಮುದಾಯದ ಮುಖ್ಯಸ್ಥ ತಾರಾಸ್ ಡಿಡಿಚ್ ಅವರು ಮೃತಪಟ್ಟಿದ್ದಾರೆ.ವಸತಿ ಪ್ರದೇಶದ ಬಳಿ ಅಪಾಯಕಾರಿ ಸ್ಫೋಟಕಗಳನ್ನು ಸಂಗ್ರಹಿಸಿಟ್ಟಿದ್ದಕ್ಕೆ ಸಂಬಂಧಿಸಿದಂತೆ ಉಕ್ರೇನ್ ಸರ್ಕಾರಿ ಅಧಿಕಾರಿಗಳ ನಿರ್ಲಕ್ಷ್ಯದ ವಿರುದ್ಧ ಅಪರಾಧ ತನಿಖೆಯನ್ನು ಆರಂಭಿಸಲಾಗಿದೆ.