Friday, 20 Nov, 12.40 pm Karnataka News

Posts
ಶಿರಾ ಬೈಎಲೆಕ್ಷನ್ ಗೆಲುವಿಗೆ ನಾನೊಬ್ಬನೇ ಕಾರಣಕರ್ತನಲ್ಲ! ಆಂತರಿಕ ‘ಅಸಹನೆ’ ತಣಿಸಲು ಬಿ.ವೈ ವಿಜಯೇಂದ್ರ ಪ್ರಯತ್ನ

ರಾಯಚೂರು: ಶಿರಾ ಬೈಎಲೆಕ್ಷನ್‌ನಲ್ಲಿ ಬಿಜೆಪಿ ಭರ್ಜರಿ ಗೆಲುವಿನ ಪೂರ್ಣ ಕ್ರೆಡಿಟ್‌ ಸಿಎಂ ಪುತ್ರ ಬಿವೈ ವಿಜಯೇಂದ್ರ ಪಾಲಾಗುತ್ತಿದ್ದಂತೆ ಬಿಜೆಪಿಯಲ್ಲಿ ಶುರುವಾಗಿರುವ ಆಂತರಿಕ ‘ಅಸಹನೆ’ ಯನ್ನು ತಣಿಸಲು ಬಿ.ವೈ ವಿಜಯೇಂದ್ರ ಮುಂದಾಗಿದ್ದಾರೆ. ಚುನಾವಣೆ ಗೆಲುವಿಗೆ ನಾನೊಬ್ಬನೇ ಹೊಣೆ ಅಲ್ಲ ಎಂದು ಪದೇ ಪದೇ ಹೇಳಿಕೆ ಕೊಡುತ್ತಿದ್ದಾರೆ.

ರಾಯಚೂರು ಜಿಲ್ಲೆಯ ಸಿಂಧನೂರಿನಲ್ಲಿ ಶುಕ್ರವಾರ ಮಾತನಾಡಿದ ವಿಜಯೇಂದ್ರ,ಉಪ ಚುನಾವಣೆಯಲ್ಲಿ ನನ್ನೊಬ್ಬನಿಂದಲೇ ಗೆಲುವು ಸಾಧ್ಯವಾಗಿದೆ ಎಂದು ಹೇಳುವುದಿಲ್ಲ, ಪಕ್ಷದ ಎಲ್ಲ ಕಾರ್ಯಕರ್ತರ ಪರಿಶ್ರಮದಿಂದ ಗೆಲುವು ಸಿಕ್ಕಿದೆ. ನನ್ನೊಬ್ಬನಿಂದಲೇ ಗೆಲುವು ಎಂದು ಹೇಳುವುದು ಸರಿಯೂ ಅಲ್ಲ ಎಂದಿದ್ದಾರೆ.

ಅಲ್ಲದೆ, ಬಸವಕಲ್ಯಾಣ ಕ್ಷೇತ್ರದ ಉಪಚುನಾವಣೆಯಲ್ಲಿ ಸ್ಪರ್ಧೆಯ ಬಗ್ಗೆ ನಿರ್ಧಾರ ತೆಗೆದುಕೊಂಡಿಲ್ಲ. ಆದರೆ ಮಸ್ಕಿ ಉಪಚುನಾವಣೆಗೆ ನನ್ನ ಉಸ್ತುವಾರಿಗೆ ಕೇಳುತ್ತಿದ್ದಾರೆ. ಪಕ್ಷ ವಹಿಸುವ ಯಾವುದೇ ಜವಾಬ್ದಾರಿ ನಿರ್ವಹಿಸುವೆ ಎನ್ನುವ ಮೂಲಕ ವಿರೋಧ ತಣಿಸುವ ಪ್ರಯತ್ನ ನಡೆಸಿದ್ದಾರೆ.
ಶಿರಾ ವಿಧಾನಸಭಾ ಕ್ಷೇತ್ರದಲ್ಲಿ ಬಿಜೆಪಿಯ ಗೆಲುವಿನ ಹೊಣೆಯನ್ನು ಬಿ.ವೈ ವಿಜಯೇಂದ್ರ ಹೊತ್ತುಕೊಂಡಿದ್ದರು. ಶಿರಾದಲ್ಲಿ ಬಿಜೆಪಿ ಅಭ್ಯರ್ಥಿ. ಡಾ. ರಾಜೇಶ್ ಗೌಡ ಪರವಾಗಿ ಚುನಾವಣಾ ತಂತ್ರಗಾರಿಕೆ ನಡೆಸಿದ್ದರು. ಬಿಜೆಪಿಯ ಹಿಡಿತ ಇಲ್ಲದ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿಯ ಗೆಲುವುದು ವಿಜಯೇಂದ್ರಗೆ ಭಾರೀ ಮುನ್ನಡೆಯನ್ನು ತಂದುಕೊಟ್ಟಿತ್ತು. ಪಕ್ಷದಲ್ಲೂ ವಿಜಯೇಂದ್ರ ತಂತ್ರಗಾರಿಕೆ ಸದ್ದು ಮಾಡಿತ್ತು.
ಆದರೆ ಗೆಲುವಿನ ಸಂಪೂರ್ಣ ಕ್ರೆಡಿಟನ್ನು ವಿಜಯೇಂದ್ರ ಅವರಿಗೆ ನೀಡುವ ಬಗ್ಗೆ ಪಕ್ಷದಲ್ಲಿ ತಕರಾರು ಎದ್ದಿತ್ತು. ಆರ್‌ಎಸ್‌ಎಸ್‌ ಹಿನ್ನೆಲೆಯ ಪ್ರಮುಖರು ಈ ನಡೆಗೆ ವಿರೋಧ ವ್ಯಕ್ತಪಡಿಸಿದ್ದರು. ಆಂತರಿಕವಾಗಿಯೂ ಭಾರೀ ಚರ್ಚೆಗೆ ಇದು ಗ್ರಾಸವಾಗಿತ್ತು. ಈ ಹಿನ್ನೆಲೆಯಲ್ಲಿ ವಿಜಯೇಂದ್ರ ಪದೇ ಪದೇ ಹೇಳಿಕೆ ನೀಡುವ ಮೂಲಕ ಸಮಸ್ಯೆ ಶಮನ ಮಾಡುವ ಪ್ರಯತ್ನ ನಡೆಸುತ್ತಿದ್ದಾರೆ.

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: Karnataka News
Top