ಮೆಕ್ಕಾದಲ್ಲಿ ಹಜ್ ಯಾತ್ರೆಯ ಪ್ರಮುಖ ಆಚರಣೆಯಾದ 'ರಮಿ ಅಲ್-ಜಮರತ್' (ಸೈತಾನನಿಗೆ ಕಲ್ಲು ಹೊಡೆಯುವ ಸಾಂಕೇತಿಕ ಆಚರಣೆ) ವೇಳೆ ತಮ್ಮದೇ ಆದ ವಿಶಿಷ್ಟ ಬೌಲಿಂಗ್ ಶೈಲಿಯಲ್ಲಿ ಕಲ್ಲು ತೂರುವ ಮೂಲಕ ನೆರೆದಿದ್ದವರಲ್ಲಿ ನಗು ಮೂಡಿಸಿದ್ದಾರೆ. ಈ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಕ್ರಿಕೆಟ್ ಅಭಿಮಾನಿಗಳನ್ನು ಹಳೆಯ ನೆನಪುಗಳತ್ತ ಕೊಂಡೊಯ್ದಿದೆ.

ಸೈತಾನನಿಗೂ ಯಾರ್ಕರ್ ಹಾಕಿದ ದಿಗ್ಗಜ

ಮೆಕ್ಕಾದಲ್ಲಿನ ಪವಿತ್ರ ಯಾತ್ರೆಯ ವೇಳೆ ಇಹ್ರಾಮ್ (ಬಿಳಿ ಉಡುಪು) ಧರಿಸಿದ್ದ ವಸೀಮ್ ಅಕ್ರಮ್, ಸೈತಾನನಿಗೆ ಕಲ್ಲು ಹೊಡೆಯುವ ಸಾಂಕೇತಿಕ ಆಚರಣೆಯಲ್ಲಿ ಭಾಗವಹಿಸಿದ್ದರು. ಈ ಸಂದರ್ಭದಲ್ಲಿ ಕಲ್ಲು ತೂರುವಾಗ ಅವರ ದೇಹದ ಚಲನೆ, ರನ್-ಅಪ್ ಹಾಗೂ ಮಣಿಕಟ್ಟಿನ ಮೂಲಕ ಕಲ್ಲು ಎಸೆಯುವ ಭಂಗಿ ಅವರ ಹಳೆಯ ಬೌಲಿಂಗ್ ಶೈಲಿಯನ್ನೇ ಸಂಪೂರ್ಣವಾಗಿ ಹೋಲುತ್ತಿತ್ತು. ಕಲ್ಲು ತೂರಿದ ಬಳಿಕ ಅವರು ವಿಕೆಟ್ ಪಡೆದಾಗ ಮೈದಾನದಲ್ಲಿ ಮಾಡುತ್ತಿದ್ದ ವಿಶಿಷ್ಟ ಸಂಭ್ರಮಾಚರಣೆಯನ್ನೂ ಸಹ ಪ್ರದರ್ಶಿಸಿದರು. ಇದನ್ನು ಕಂಡ ನೆಟ್ಟಿಗರು, 'ಅಕ್ರಮ್ ಅವರು ಸೈತಾನನಿಗೂ ತಮ್ಮ ಖಡಕ್ ಯಾರ್ಕರ್ ಹಾಕಿದ್ದಾರೆ' ಎಂದು ತಮಾಷೆಯಾಗಿ ಕಾಮೆಂಟ್ ಮಾಡುತ್ತಿದ್ದಾರೆ.

ಸ್ನೇಹಿತರಲ್ಲಿ ನಗು ತರಿಸಿದ ಅಕ್ರಮ್ ಶೈಲಿ

ವಸೀಮ್ ಅಕ್ರಮ್ ಅವರ ಈ ವಿಶಿಷ್ಟ ಶೈಲಿಯನ್ನು ಕಂಡು ಅವರೊಂದಿಗಿದ್ದ ಸ್ನೇಹಿತರು ಹಾಗೂ ಸಹ ಯಾತ್ರಿಕರು ನಗೆಗಡಲಲ್ಲಿ ತೇಲಿದರು. ಪವಿತ್ರ ಯಾತ್ರೆಯ ನಡುವೆಯೂ ಅಕ್ರಮ್ ತಮ್ಮ ಬೌಲಿಂಗ್ ಮರೆತಿಲ್ಲ ಎಂದು ಅವರ ಸ್ನೇಹಿತರೊಬ್ಬರು ತಮಾಷೆ ಮಾಡಿದ್ದಾರೆ. ಅಕ್ರಮ್ ಜೊತೆಯಲ್ಲಿ ಪಾಕಿಸ್ತಾನದ ಮಾಜಿ ನಾಯಕ ಮಿಸ್ಬಾ-ಉಲ್-ಹಕ್ ಹಾಗೂ ಫಖ್ರ್-ಎ-ಆಲಂ ಕೂಡ ಉಪಸ್ಥಿತರಿದ್ದರು. ಅಲ್ಲದೆ, ಪವಿತ್ರ ಮೆಕ್ಕಾದಲ್ಲಿ ತಮ್ಮ ಹಳೆಯ ಸ್ನೇಹಿತ ಹಾಗೂ ಮಾಜಿ ಸಹಪಾಠಿ ಸಯೀದ್ ಅನ್ವರ್ ಅವರನ್ನು ಸಹ ಅಕ್ರಮ್ ಭೇಟಿಯಾಗಿದ್ದಾರೆ. ಅತ್ಯಂತ ಶ್ರದ್ಧಾಭಕ್ತಿಯ ಆಧ್ಯಾತ್ಮಿಕ ವಾತಾವರಣದ ನಡುವೆಯೂ ಅಕ್ರಮ್ ಅವರ ಈ ಹಾಸ್ಯಮಯ ವರ್ತನೆ ಎಲ್ಲರ ಗಮನ ಸೆಳೆದಿದೆ.

ಅಭಿಮಾನಿಗಳಲ್ಲಿ ಗರಿಗೆದರಿದ ಹಳೆಯ ನೆನಪು

ಈ ವಿಡಿಯೋ ಎಕ್ಸ್ (ಹಿಂದಿನ ಟ್ವಿಟರ್) ಸೇರಿದಂತೆ ವಿವಿಧ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿದ್ದು, ವಿಶ್ವಾದ್ಯಂತ ಇರುವ ಕ್ರಿಕೆಟ್ ಅಭಿಮಾನಿಗಳಿಗೆ ಇದು ಕೇವಲ ಒಂದು ವೈರಲ್ ವಿಡಿಯೋ ಆಗುಳಿದಿಲ್ಲ. ಬದಲಾಗಿ, 90ರ ದಶಕದ ಕ್ರಿಕೆಟ್ ಸುವರ್ಣ ಯುಗದ ನೆನಪಾಗಿದೆ. ತಮ್ಮ ಅದ್ಭುತ ರಿವರ್ಸ್ ಸ್ವಿಂಗ್ ಮೂಲಕ ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಬರೋಬ್ಬರಿ 916 ವಿಕೆಟ್‌ಗಳನ್ನು ಕಬಳಿಸಿದ್ದ ಅಕ್ರಮ್, ವಕಾರ್ ಯೂನಿಸ್ ಜೊತೆಗೂಡಿ ಕ್ರಿಕೆಟ್ ಇತಿಹಾಸದ ಅತ್ಯಂತ ಅಪಾಯಕಾರಿ ಬೌಲಿಂಗ್ ಜೋಡಿ ಎನಿಸಿಕೊಂಡಿದ್ದರು. ಇದೀಗ ಹಜ್ ಯಾತ್ರೆಯಲ್ಲೂ ತಮ್ಮ ಹಳೆಯ ಬೌಲಿಂಗ್ ಶೈಲಿಯನ್ನು ಮರುಸೃಷ್ಟಿಸುವ ಮೂಲಕ ಅಕ್ರಮ್ ಕ್ರಿಕೆಟ್ ಮೇಲಿನ ತಮ್ಮ ಒಲವು ಹಾಗೂ ಅಭಿಮಾನಿಗಳ ಪ್ರೀತಿಯನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ.

ಇದನ್ನೂ ಓದಿ : ಬ್ಯಾಟಿಂಗ್ ಮಾತ್ರವಲ್ಲ, ಸಂಸ್ಕಾರದಿಂದಲೂ ಮನಗೆದ್ದ ಸೂರ್ಯವಂಶಿ : 15ರ ಪೋರನಿಗೆ ದಿಗ್ಗಜರ ಸಲಾಂ!