Dailyhunt Logo
  • Light mode
    Follow system
    Dark mode
    • Play Story
    • App Story
ಶಬರಿಮಲೆ ಯಾತ್ರೆಗೆ ಚಾಲನೆ: ಇಂದು ಸಂಜೆ ಭಕ್ತರಿಗೆ ಮುಕ್ತವಾಗಲಿದೆ ಅಯ್ಯಪ್ಪ ಸ್ವಾಮಿ ದೇಗುಲ

ಶಬರಿಮಲೆ ಯಾತ್ರೆಗೆ ಚಾಲನೆ: ಇಂದು ಸಂಜೆ ಭಕ್ತರಿಗೆ ಮುಕ್ತವಾಗಲಿದೆ ಅಯ್ಯಪ್ಪ ಸ್ವಾಮಿ ದೇಗುಲ

ತಿರುವನಂತಪುರಂ: ಲಕ್ಷಾಂತರ ಭಕ್ತರು ಎದುರುನೋಡುತ್ತಿರುವ ಶಬರಿಮಲೆ ವಾರ್ಷಿಕ ತೀರ್ಥಯಾತ್ರೆ ಸೋಮವಾರದಿಂದ ಶುರುವಾಗಲಿದೆ. ಇಂದು ಸಂಜೆ ಅಯ್ಯಪ್ಪ ಸ್ವಾಮಿ ಸನ್ನಿಧಾನದ ಬಾಗಿಲು ತೆರೆಯುವ ಮೂಲಕ ಸುಮಾರು 2 ತಿಂಗಳ ಕಾಲ ನಡೆಯುವ ಸುದೀರ್ಘ ಯಾತ್ರೆಗೆ ಅಧಿಕೃತ ಚಾಲನೆ ಸಿಗಲಿದ್ದು, ಸರ್ಕಾರ ಹಾಗೂ ತಿರುವಾಂಕೂರು ದೇವಸ್ವಂ ಮಂಡಳಿ (ಟಿಡಿಬಿ) ಭಕ್ತರ ಸ್ವಾಗತಕ್ಕೆ ಎಲ್ಲಾ ಸಿದ್ಧತೆಗಳನ್ನು ಪೂರ್ಣಗೊಳಿಸಿವೆ.

ಇಂದಿನಿಂದ ಆರಂಭವಾಗಲಿರುವ ಮಂಡಲ ಪೂಜೆ ಯಾತ್ರೆಯು ಡಿಸೆಂಬರ್ 27ರವರೆಗೆ ಮುಂದುವರಿಯಲಿದೆ. ಇದಾದ ಬಳಿಕ ಕೆಲ ದಿನಗಳ ಕಾಲ ದರ್ಶನಕ್ಕೆ ವಿರಾಮ ಇರಲಿದ್ದು, ತದನಂತರ ಡಿಸೆಂಬರ್ 30ರಿಂದ ಮಕರವಿಳಕ್ಕು ತೀರ್ಥಯಾತ್ರೆ ಆರಂಭಗೊಳ್ಳಲಿದೆ. ಜನವರಿ 14ರಂದು ಅತ್ಯಂತ ಪ್ರಮುಖವಾದ ಮಕರವಿಳಕ್ಕು ದರ್ಶನ ನಡೆಯಲಿದ್ದು, ಈ ಅವಧಿಯಲ್ಲಿ ಸುಗಮ ದರ್ಶನಕ್ಕಾಗಿ ವಿಶೇಷ ವ್ಯವಸ್ಥೆಗಳನ್ನು ಮಾಡಿಕೊಳ್ಳಲಾಗಿದೆ.

ಯಾತ್ರಾರ್ಥಿಗಳಿಗೆ ಜೀವ ವಿಮೆ ಸೌಲಭ್ಯ

ಈ ಬಾರಿಯ ಶಬರಿಮಲೆ ಯಾತ್ರೆಯನ್ನು ಮತ್ತಷ್ಟು ವ್ಯವಸ್ಥಿತಗೊಳಿಸುವ ಹಾಗೂ ಸುರಕ್ಷಿತವಾಗಿಸುವ ನಿಟ್ಟಿನಲ್ಲಿ ರಾಜ್ಯದ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಸರ್ಕಾರ ಮತ್ತು ಟಿಡಿಬಿ ಮಹತ್ವದ ಹೆಜ್ಜೆ ಇಟ್ಟಿವೆ. ದೇವಾಲಯಕ್ಕೆ ಭೇಟಿ ನೀಡುವ ಭಕ್ತರ ಅನುಕೂಲಕ್ಕಾಗಿ ಜೀವ ವಿಮಾ ಯೋಜನೆಯನ್ನು ಅಳವಡಿಸಲಾಗಿದ್ದು, ಇದರೊಂದಿಗೆ ಮೂಲಸೌಕರ್ಯ ಮತ್ತು ಜನದಟ್ಟಣೆ ನಿರ್ವಹಣೆಯಲ್ಲೂ ಅಗತ್ಯ ಸುಧಾರಣೆಗಳನ್ನು ತರಲಾಗಿದೆ.

50 ಲಕ್ಷ ಟಿನ್ ಅರವಣ ಪಾಯಸ ಮೀಸಲು

ಸನ್ನಿಧಾನದಲ್ಲಿ ಪ್ರಸಾದ ತಯಾರಿಸುವ ಘಟಕದ ನವೀಕರಣ ಕಾಮಗಾರಿ ನಡೆಯುತ್ತಿರುವುದರಿಂದ ಈ ಬಾರಿ 'ಅರವಣ' ಪಾಯಸದ ಅಭಾವ ಸೃಷ್ಟಿಯಾಗಬಹುದು ಎಂಬ ಅನುಮಾನಗಳಿದ್ದವು. ಆದರೆ ಟಿಡಿಬಿ ಅಧ್ಯಕ್ಷ ಕೆ. ಜಯಕುಮಾರ್ ಈ ಆತಂಕವನ್ನು ದೂರ ಮಾಡಿದ್ದಾರೆ. ಭಕ್ತರ ದರ್ಶನಕ್ಕೆ ದೇವಾಲಯ ತೆರೆಯುವ ಮುನ್ನವೇ 50 ಲಕ್ಷ ಟಿನ್‌ಗಳಷ್ಟು ಅರವಣ ಪಾಯಸವನ್ನು ದಾಸ್ತಾನು ಮಾಡಲಾಗಿದ್ದು, ಯಾತ್ರಾರ್ಥಿಗಳಿಗೆ ಪ್ರಸಾದ ವಿತರಣೆಯಲ್ಲಿ ಯಾವುದೇ ಕೊರತೆಯಾಗುವುದಿಲ್ಲ ಎಂದು ಅವರು ಖಚಿತಪಡಿಸಿದ್ದಾರೆ.

Dailyhunt
Disclaimer: This content has not been generated, created or edited by Dailyhunt. Publisher: Karnatakanewsbeat