ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಸದ್ಯಕ್ಕೆ ಐದು ತಂಡಗಳ ಈ ಪ್ರತಿಷ್ಠಿತ ಟೂರ್ನಿಯನ್ನು ವಿಸ್ತರಿಸುವ ಯಾವುದೇ ತಕ್ಷಣದ ಯೋಜನೆ ಹೊಂದಿಲ್ಲ ಎಂದು ಸ್ಪಷ್ಟಪಡಿಸಿದ್ದರೂ, ಪಂಜಾಬ್ ಕಿಂಗ್ಸ್ ಮಾತ್ರ ಮಹಿಳಾ ಕ್ರಿಕೆಟ್‌ನ ಭವಿಷ್ಯದ ಮೇಲೆ ಅಪಾರ ನಂಬಿಕೆ ಇರಿಸಿದ್ದು, ಹೂಡಿಕೆ ಮಾಡಲು ಸಜ್ಜಾಗುತ್ತಿದೆ.

2023ರಲ್ಲಿ ಆರಂಭವಾದ ಮಹಿಳಾ ಪ್ರೀಮಿಯರ್ ಲೀಗ್ ಅಲ್ಪಾವಧಿಯಲ್ಲೇ ಜಾಗತಿಕ ಮಟ್ಟದಲ್ಲಿ ದೊಡ್ಡ ಶಕ್ತಿಯಾಗಿ ಬೆಳೆದು ನಿಂತಿದೆ. ಪ್ರಸ್ತುತ ಈ ಲೀಗ್‌ನಲ್ಲಿ ಕೇವಲ ಐದು ತಂಡಗಳು ಮಾತ್ರ ಸೆಣಸಾಡುತ್ತಿದ್ದು, ಪುರುಷರ ಐಪಿಎಲ್‌ನ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಮುಂಬೈ ಇಂಡಿಯನ್ಸ್ ಹಾಗೂ ಡೆಲ್ಲಿ ಕ್ಯಾಪಿಟಲ್ಸ್ ಫ್ರಾಂಚೈಸಿಗಳು ಮಾತ್ರ ಮಹಿಳಾ ತಂಡಗಳನ್ನು ಹೊಂದಿವೆ. ಪಂಜಾಬ್ ಕಿಂಗ್ಸ್ ತಂಡದಲ್ಲಿ ಶೇಕಡಾ 48 ರಷ್ಟು ಪಾಲು ಹೊಂದಿರುವ ಬರ್ಮನ್ ಅವರು, ಭವಿಷ್ಯದಲ್ಲಿ ಮಹಿಳಾ ಕ್ರಿಕೆಟ್ ಬೃಹತ್ ಮಾರುಕಟ್ಟೆಯಾಗಿ ಹೊರಹೊಮ್ಮಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಬಿಸಿಸಿಐ ಯಾವಾಗ ಟೂರ್ನಿಯನ್ನು ವಿಸ್ತರಿಸಲು ಮುಂದಾಗುತ್ತದೆಯೋ, ಆಗ ಖಂಡಿತವಾಗಿಯೂ ಡಬ್ಲ್ಯುಪಿಎಲ್ ಪ್ರವೇಶಿಸಲು ನಾವು ಸಿದ್ಧರಾಗಿದ್ದೇವೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಮಹಿಳಾ ಪ್ರೀಮಿಯರ್ ಲೀಗ್ ಅತ್ಯಂತ ಕಡಿಮೆ ಅವಧಿಯಲ್ಲಿ ಮಹಿಳಾ ಆಟಗಾರ್ತಿಯರಿಗೆ ಒಂದು ಪ್ರಮುಖ ವೇದಿಕೆಯಾಗಿ ರೂಪುಗೊಂಡಿದೆ ಮತ್ತು ಮಹಿಳಾ ಕ್ರಿಕೆಟ್‌ನ ಈ ಅಗಾಧ ಬೆಳವಣಿಗೆಯನ್ನು ನೋಡುವುದೇ ಒಂದು ಅದ್ಭುತ ಅನುಭವ ಎಂದು ಬರ್ಮನ್ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಆರಂಭಿಕ ಹಂತದಲ್ಲಿ ನಾವು ಮಹಿಳಾ ತಂಡದ ಮೇಲೆ ಹೂಡಿಕೆ ಮಾಡದಿರಲು ಸಮಯ ಮತ್ತು ಕೆಲವು ಕಾರ್ಯತಂತ್ರದ ನಿರ್ಧಾರಗಳು ಹಾಗೂ ದೀರ್ಘಕಾಲೀನ ವ್ಯಾಪಾರ ಪರಿಗಣನೆಗಳು ಕಾರಣವಾಗಿದ್ದವೇ ಹೊರತು, ಮಹಿಳಾ ಕ್ರಿಕೆಟ್‌ನ ಸಾಮರ್ಥ್ಯದ ಬಗ್ಗೆ ನಮಗೆ ಯಾವುದೇ ಅನುಮಾನಗಳಿರಲಿಲ್ಲ ಎಂದಿದ್ದಾರೆ. ವೈಯಕ್ತಿಕವಾಗಿ ಹೇಳುವುದಾದರೆ, ಮಹಿಳಾ ಕ್ರಿಕೆಟ್‌ನ ಭವಿಷ್ಯ ಅತ್ಯಂತ ಉಜ್ವಲವಾಗಿದೆ ಮತ್ತು ನಾವು ಕೂಡ ಮಹಿಳಾ ಐಪಿಎಲ್ ತಂಡದ ಮಾಲೀಕರಾಗಲು ಕಾತುರರಾಗಿದ್ದೇವೆ ಎಂದು ಅವರು ತಮ್ಮ ಉತ್ಸಾಹವನ್ನು ಬಿಚ್ಚಿಟ್ಟಿದ್ದಾರೆ.

ಯಶಸ್ಸಿನ ಹಿನ್ನೆಲೆ

ಇತ್ತೀಚಿನ ವರ್ಷಗಳಲ್ಲಿ ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಅಂತಾರಾಷ್ಟ್ರೀಯ ಯಶಸ್ಸು ಕೂಡ ಈ ಬೆಳವಣಿಗೆಗೆ ಪ್ರಮುಖ ಕಾರಣವಾಗಿದೆ. ಹರ್ಮನ್‌ಪ್ರೀತ್ ಕೌರ್ ನಾಯಕತ್ವದ ಭಾರತೀಯ ಪಡೆ ಕಳೆದ ವರ್ಷ ಚೊಚ್ಚಲ ಏಕದಿನ ವಿಶ್ವಕಪ್ ಮುಡಿಗೇರಿಸಿಕೊಂಡು ಇತಿಹಾಸ ನಿರ್ಮಿಸಿರುವುದು, ಹಾಗೂ ಇಂಗ್ಲೆಂಡ್‌ನಲ್ಲಿ ನಡೆಯಲಿರುವ ಮುಂದಿನ ಟಿ೨೦ ವಿಶ್ವಕಪ್‌ಗೆ ನೆಚ್ಚಿನ ತಂಡವಾಗಿ ಹೊರಹೊಮ್ಮಿರುವುದು ದೇಶದಲ್ಲಿ ಮಹಿಳಾ ಕ್ರಿಕೆಟ್‌ನ ಜನಪ್ರಿಯತೆಯನ್ನು ಮುಗಿಲೆತ್ತರಕ್ಕೆ ಕೊಂಡೊಯ್ದಿದೆ. ಈ ಕುರಿತು ಮಾತನಾಡಿರುವ ಬರ್ಮನ್, ಕ್ರಿಕೆಟ್‌ನ ಗುಣಮಟ್ಟ, ಪ್ರೇಕ್ಷಕರ ಆಸಕ್ತಿ ಮತ್ತು ವಾಣಿಜ್ಯಿಕ ಪ್ರತಿಕ್ರಿಯೆಗಳು ನಿರೀಕ್ಷೆಗೂ ಮೀರಿ ಯಶಸ್ವಿಯಾಗಿವೆ. ಯುವತಿಯರು ಇಂದು ಮಹಿಳಾ ಕ್ರಿಕೆಟಿಗರನ್ನು ತಮ್ಮ ಆದರ್ಶ ಕ್ರೀಡಾಪಟುಗಳನ್ನಾಗಿ ನೋಡುತ್ತಿದ್ದಾರೆ, ಇದು ಕ್ರೀಡೆಯ ಭವಿಷ್ಯವನ್ನೇ ಸಂಪೂರ್ಣವಾಗಿ ಬದಲಾಯಿಸುತ್ತಿದೆ ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ.

ಅರುಣ್​ ಧುಮಾರ್​ ಹೇಳಿದ್ದೇನು?

ಪಂಜಾಬ್ ಕಿಂಗ್ಸ್ ಮಾತ್ರವಲ್ಲದೆ, ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್‌ಕೆ) ಕೂಡ ಮಹಿಳಾ ತಂಡವನ್ನು ಹೊಂದುವ ಆಶಯವನ್ನು ಈ ವರ್ಷದ ಆರಂಭದಲ್ಲೇ ವ್ಯಕ್ತಪಡಿಸಿತ್ತು. ಆದರೆ, ಹೊಸ ಫ್ರಾಂಚೈಸಿಗಳಿಗೆ ಮಣೆಹಾಕುವ ಮುನ್ನ ಪ್ರಸ್ತುತವಿರುವ ಐದು ತಂಡಗಳ ಟೂರ್ನಿಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶವನ್ನು ಐಪಿಎಲ್ ಆಡಳಿತ ಮಂಡಳಿ ಹೊಂದಿದೆ ಎಂದು ಐಪಿಎಲ್ ಅಧ್ಯಕ್ಷ ಅರುಣ್ ಧುಮಾಲ್ ಈ ಹಿಂದೆ ತಿಳಿಸಿದ್ದರು. ಒಟ್ಟಾರೆಯಾಗಿ, ವಾಣಿಜ್ಯ ಹಾಗೂ ಕ್ರೀಡಾ ದೃಷ್ಟಿಕೋನದಿಂದ ಡಬ್ಲ್ಯುಪಿಎಲ್ ಅಭೂತಪೂರ್ವ ಯಶಸ್ಸು ಸಾಧಿಸುತ್ತಿರುವುದು ಸ್ಪಷ್ಟವಾಗಿದ್ದು, ಟೂರ್ನಿ ವಿಸ್ತರಣೆಯಾದಾಗ ಮತ್ತಷ್ಟು ದಿಗ್ಗಜ ಫ್ರಾಂಚೈಸಿಗಳು ಮಹಿಳಾ ಕ್ರಿಕೆಟ್ ಅಖಾಡಕ್ಕೆ ಧುಮುಕುವುದು ಖಚಿತವಾಗಿದೆ.

ಇದನ್ನೂ ಓದಿ : "ನಾನಿಲ್ಲಿ ಟ್ರ್ಯಾಪ್ ಆಗಿದ್ದೇನೆ, ಮಾತಾಡಲು ಆಗುತ್ತಿಲ್ಲ" : ಶವವಾಗಿ ಪತ್ತೆಯಾದ ಮಹಿಳೆಯ ಕೊನೆ ಸಂದೇಶ!