ಬೆಂಗಳೂರು: ಸ್ಯಾಂಡಲ್ವುಡ್ ಹಾಗೂ ರ್ಯಾಕಿಂಗ್ ಸ್ಟಾರ್ ಯಶ್ (Actor Yash) ಅವರ ಜೀವನದಲ್ಲಿ ಅತ್ಯಂತ ವಿಶೇಷ ಹಾಗೂ ಹತ್ತಿರದ ಸ್ಥಾನ ಪಡೆದಿರುವ ಅವರ ಪ್ರೀತಿಯ ತಂಗಿ ನಂದಿನಿ (Nandini Rahul), ಈ ಬಾರಿಯ ರಕ್ಷಾಬಂಧನ ಹಬ್ಬವನ್ನು ತಮ್ಮ ಅಣ್ಣನೊಂದಿಗೆ ಅತ್ಯಂತ ಸಂಭ್ರಮ ಹಾಗೂ ಭಾವನಾತ್ಮಕವಾಗಿ ಆಚರಿಸಿದ್ದಾರೆ.
ಪ್ರತಿವರ್ಷವೂ ಯಾವುದೇ ಕಾರಣಕ್ಕೂ ತಪ್ಪಿಸದೇ ತಮ್ಮ ಪ್ರೀತಿಯ ಅಣ್ಣನಿಗೆ ರಾಖಿ ಕಟ್ಟುವ ನಂದಿನಿ, ಈ ಬಾರಿಯೂ ಯಶ್ಗೆ ಪ್ರೀತಿಯ ದಾರವನ್ನು ಕಟ್ಟಿ, ಹಬ್ಬದ ಮುದ್ದಾದ ಕ್ಷಣಗಳ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ನನ್ನ ಅತ್ಯಂತ ಫೇವರೆಟ್ ವ್ಯಕ್ತಿ ತಂಗಿ ಎಂದಿದ್ದ ಯಶ್ ಇತ್ತೀಚೆಗಷ್ಟೇ ದೇಶದ ಜನಪ್ರಿಯ ಟಿವಿ ಶೋ 'ಆಪ್ ಕಿ ಅದಾಲತ್'ನಲ್ಲಿ (Aap Ki Adalat) ನಟ ಯಶ್ ಭಾಗವಹಿಸಿದ್ದಾಗ, ನಿರೂಪಕರು ನಂದಿನಿ ಅವರ ಹೆಸರು ಪ್ರಸ್ತಾಪಿಸಿದ್ದರು. ಈ ವೇಳೆ ತಕ್ಷಣವೇ ಪ್ರತಿಕ್ರಿಯಿಸಿದ್ದ ಯಶ್, "ನನ್ನ ತಂಗಿ ನಂದಿನಿ ಈ ಇಡೀ ಜಗತ್ತಿನಲ್ಲೇ ನನ್ನ ಅತ್ಯಂತ ಫೇವರೆಟ್ ವ್ಯಕ್ತಿ" ಎಂದು ಮನಸಾರೆ ಹೊಗಳಿದ್ದರು. ಯಶ್ ಅವರ ಈ ಮಾತಿನ ನಂತರ ಬಾಲಿವುಡ್ ಮಂದಿಯಲ್ಲೂ ಯಶ್ ಅವರ ಈ ಮುದ್ದಿನ ತಂಗಿ ನಂದಿನಿ ಯಾರು ಎಂಬ ಕುತೂಹಲ ಭಾರಿ ಪ್ರಮಾಣದಲ್ಲಿ ವ್ಯಕ್ತವಾಗಿತ್ತು. ಯಶ್ ಎಷ್ಟೇ ಬ್ಯುಸಿ ಶೂಟಿಂಗ್ ಶೆಡ್ಯೂಲ್ನಲ್ಲಿದ್ದರೂ ಅಥವಾ ಯಾವುದೇ ಕಾರ್ಯಕ್ರಮದಲ್ಲಿದ್ದರೂ ತಂಗಿಯಿಂದ ರಾಖಿ ಕಟ್ಟಿಸಿಕೊಳ್ಳುವುದನ್ನು ಎಂದಿಗೂ ಮರೆಯುವುದಿಲ್ಲ. ಅದರಂತೆ ಈ ಬಾರಿಯೂ ಅಣ್ಣ-ತಂಗಿಯರ ಅಪರೂಪದ ಬಾಂಧವ್ಯದ ಚಿತ್ರಗಳು ಹೊರಬಂದಿದ್ದು, ಜನರ ಮನ ಗೆದ್ದಿವೆ. ರಾಖಿ ಕಟ್ಟಿದ ಫೋಟೋಗಳ ಜೊತೆಗೆ ನಂದಿನಿ ತಮ್ಮ ಪ್ರೀತಿಯ ಅಣ್ಣನಿಗಾಗಿ ಹೃದಯಸ್ಪರ್ಶಿ ಸಾಲುಗಳನ್ನು ಸೋಶಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ. ಅಣ್ಣನಿಗೆ ಪ್ರೀತಿಯಿಂದ ವಿಶ್ ಮಾಡಿದ ನಂದಿನಿ ತಮ್ಮ ಸುಂದರ ಬಾಂಧವ್ಯದ ಬಗ್ಗೆ ಬರೆದಿರುವ ನಂದಿನಿ, "ನಮ್ಮ ನಡುವೆ ಎಷ್ಟೇ ದೂರವಿರಲಿ, ಎಷ್ಟೇ ಭಿನ್ನಾಭಿಪ್ರಾಯಗಳು ಬರಲಿ ಅಥವಾ ಎಂತಹದ್ದೇ ಪರಿಸ್ಥಿತಿ ಎದುರಾಗಲಿ, ನಾವಿಬ್ಬರೂ ಹಂಚಿಕೊಂಡಿರುವ ಈ ಪವಿತ್ರ ಬಂಧವನ್ನು ಜಗತ್ತಿನ ಯಾವುದೂ ಬದಲಾಯಿಸಲು ಸಾಧ್ಯವಿಲ್ಲ" ಎಂದು ಭಾವುಕರಾಗಿದ್ದಾರೆ. ಮುಂದುವರಿದು, "ಕೆಲವು ರಕ್ತಸಂಬಂಧಗಳು ಕೇವಲ ಹುಟ್ಟಿನಿಂದ ಮಾತ್ರ ಗಟ್ಟಿಯಾಗುವುದಿಲ್ಲ. ಜೀವಮಾನವಿಡೀ ಜೊತೆಗಿರುವ ನೆನಪುಗಳು, ಒಬ್ಬರನ್ನೊಬ್ಬರು ಅರ್ಥೈಸಿಕೊಳ್ಳುವ ಗುಣ ಮತ್ತು ಕಷ್ಟ-ಸುಖದ ಸಂದರ್ಭದಲ್ಲಿ ಬೆನ್ನೆಲುಬಾಗಿ ನಿಲ್ಲುವ ಮನಸ್ಥಿತಿಯಿಂದ ಆ ಸಂಬಂಧ ಇನ್ನಷ್ಟು ಗಟ್ಟಿಯಾಗುತ್ತದೆ. ನಿನ್ನನ್ನು ಅಪಾರವಾಗಿ ಪ್ರೀತಿಸುವ ಮತ್ತು ಬದುಕಿನ ಪ್ರತಿಯೊಂದು ಹಂತದಲ್ಲೂ ನಿನ್ನ ಜೊತೆಯಾಗಿ ನಿಲ್ಲುವ ಸಹೋದರಿ ನಿನಗಾಗಿಯೇ ಸದಾ ಇರುತ್ತಾಳೆ. ಹ್ಯಾಪಿ ರಕ್ಷಾ ಬಂಧನ ಭಯ್ಯಾ" ಎಂದು ಶುಭ ಹಾರೈಸಿದ್ದಾರೆ. ಇದೀಗ ಯಶ್ ಹಾಗೂ ನಂದಿನಿ ಅವರ ಈ ಮುದ್ದಾದ ಬಾಂಧವ್ಯ ಮತ್ತು ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಅಭಿಮಾನಿಗಳು ಶುಭಾಶಯಗಳ ಸುರಿಮಳೆ ಗೈಯುತ್ತಿದ್ದಾರೆ.