ಬೆಂಗಳೂರು: ನಿತೇಶ್ ತಿವಾರಿ ನಿರ್ದೇಶನದ ಬಹುನಿರೀಕ್ಷಿತ 'ರಾಮಾಯಣ' (Ramayana) ಸಿನಿಮಾದ ಟ್ರೇಲರ್ ಬಿಡುಗಡೆಯಾಗಿ ದೇಶಾದ್ಯಂತ ಭಾರಿ ಸಂಚಲನ ಮೂಡಿಸಿದೆ. ಈ ಟ್ರೇಲರ್ನಲ್ಲಿ ರಕ್ಕಸರಾಜ ರಾವಣನಾಗಿ ಕಣಕ್ಕಿಳಿದಿರುವ ರಾಕಿಂಗ್ ಸ್ಟಾರ್ ಯಶ್ (Actor Yash) ಅವರ ಸ್ಕ್ರೀನ್ ಪ್ರೆಸೆನ್ಸ್ ಮತ್ತು ಖಡಕ್ ಲುಕ್ಗೆ ಅಭಿಮಾನಿಗಳು ಶಹಬ್ಬಾಸ್ ಎನ್ನುತ್ತಿದ್ದಾರೆ.
ಇದರ ಬೆನ್ನಲ್ಲೇ, ಯಶ್ ನಟನೆಯ ಸೂಪರ್ ಹಿಟ್ ಕನ್ನಡ ಚಿತ್ರ 'ಮಾಸ್ಟರ್ ಪೀಸ್' (2015) ಸಿನಿಮಾದ ಹಳೆಯ ವಿಡಿಯೋ ತುಣುಕೊಂದು ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. 'ಮಾಸ್ಟರ್ ಪೀಸ್' ವಿಡಿಯೋದಲ್ಲೇನಿತ್ತು? 2015ರಲ್ಲಿ ತೆರೆಕಂಡಿದ್ದ 'ಮಾಸ್ಟರ್ ಪೀಸ್' ಸಿನಿಮಾದ ದೃಶ್ಯವೊಂದರಲ್ಲಿ ಯಶ್, ರಾವಣನ ಕಲ್ಪನೆ ಮತ್ತು ಪಾತ್ರದ ಗತ್ತು-ಗಾಂಭೀರ್ಯದ ಬಗ್ಗೆ ಮಾತನಾಡುವ ಪ್ರಸಂಗವಿತ್ತು. ಆ ದೃಶ್ಯದಲ್ಲಿ ಅವರು ರಾವಣನ ವ್ಯಕ್ತಿತ್ವ, ಆತನ ಶಕ್ತಿ ಹಾಗೂ ಸಿದ್ಧಾಂತಗಳನ್ನು ಮೆಚ್ಚಿ ಹೇಳುವ ಸಂಭಾಷಣೆಗಳಿದ್ದವು. ಇದೀಗ 'ರಾಮಾಯಣ' ಟ್ರೇಲರ್ನಲ್ಲಿ ಯಶ್ ರಾವಣನಾಗಿ ಮಿಂಚುತ್ತಿದ್ದಂತೆಯೇ, ನೆಟ್ಟಿಗರು ಆ ಹಳೆಯ ದೃಶ್ಯವನ್ನು ಲಿಂಕ್ ಮಾಡಿ, "ಯಶ್ ಅವರಿಗೆ ರಾವಣನ ಪಾತ್ರ ಮಾಡುವ ಆಸೆ ಹಾಗೂ ತುಡಿತ ಅಂದೇ ಇತ್ತು. ಅಂದಿನ ಅವರ ಕನಸು ಇಂದು ಬಹುಕೋಟಿ ವೆಚ್ಚದ ಭಾರತದ ಅತಿ ದೊಡ್ಡ ಸಿನಿಮಾದಲ್ಲಿ ನನಸಾಗಿದೆ" ಎಂದು ಪೋಸ್ಟ್ ಮಾಡುತ್ತಿದ್ದಾರೆ.
ರಾವಣನಾಗಿ ಯಶ್ ದರ್ಬಾರ್, ಅಭಿಮಾನಿಗಳು ಫುಲ್ ಫಿದಾ!
'ರಾಮಾಯಣ' ಟ್ರೇಲರ್ನಲ್ಲಿ ಯಶ್ ಅವರ ಎಂಟ್ರಿ, ಶರೀರದ ಭಂಗಿ ಹಾಗೂ ಅಬ್ಬರದ ಅಭಿನಯ ಪ್ರೇಕ್ಷಕರನ್ನು ಕಟ್ಟಿಹಾಕಿದೆ. 'ಕೆಜಿಎಫ್' ಸರಣಿಯ ಬಳಿಕ ಜಾಗತಿಕ ಮಟ್ಟದಲ್ಲಿ ದೊಡ್ಡ ಮಟ್ಟದ ಕ್ರೇಜ್ ಹೊಂದಿರುವ ಯಶ್, ಈ ಬಿಗ್ ಬಜೆಟ್ ಸಿನಿಮಾದಲ್ಲಿ ರಾವಣನಂತಹ ಸಂಕೀರ್ಣ ಮತ್ತು ಪ್ರಭಾವಶಾಲಿ ಪಾತ್ರವನ್ನು ಹೇಗೆ ಪೋಷಿಸಿದ್ದಾರೆ ಎಂಬುದನ್ನು ನೋಡಲು ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ.
ಸದ್ಯ ಸೋಶಿಯಲ್ ಮೀಡಿಯಾಗಳಲ್ಲಿ ಯಶ್ ಅವರ 'ಮಾಸ್ಟರ್ ಪೀಸ್' ವಿಡಿಯೋ ಮತ್ತು 'ರಾಮಾಯಣ' ಟ್ರೇಲರ್ ತುಣುಕುಗಳನ್ನು ಒಟ್ಟಿಗೆ ಜೋಡಿಸಿ (Edits) ಹಂಚಿಕೊಳ್ಳಲಾಗುತ್ತಿದ್ದು, ಭಾರೀ ವೈರಲ್ ಆಗುತ್ತಿದೆ.