ಇಂಟರ್ನೆಟ್ ಜಗತ್ತಿನಲ್ಲಿರುವ ಮಾಹಿತಿಯನ್ನೇ ಆಧಾರವಾಗಿಟ್ಟುಕೊಂಡು ಕಲಿಯುತ್ತಿರುವ ಎಐ, ಈಗ ಲಿಂಗಭೇದ ಮತ್ತು ಜನಾಂಗೀಯವಾದವನ್ನು ಅಳವಡಿಸಿಕೊಳ್ಳುತ್ತಿರುವುದು ಸಂಶೋಧನೆಯಿಂದ(Research) ತಿಳಿದುಬಂದಿದೆ.

ವಿಶ್ವಸಂಸ್ಥೆಯ ಸಂಶೋಧಕರು ಜಾಗತಿಕವಾಗಿ ಬಳಕೆಯಲ್ಲಿರುವ ಒಟ್ಟು 133 ಎಐ ವ್ಯವಸ್ಥೆಗಳನ್ನು ತೀವ್ರ ಅಧ್ಯಯನಕ್ಕೆ ಒಳಪಡಿಸಿದ್ದರು. ಈ ಪೈಕಿ ಸುಮಾರು ಶೇಕಡಾ 44 ರಷ್ಟು ಎಐ ಮಾಡ್ಯೂಲ್‌ಗಳು ಲಿಂಗ ಪಕ್ಷಪಾತವನ್ನು ಬಹಿರಂಗವಾಗಿ ತೋರ್ಪಡಿಸಿವೆ ಎಂದು ಯುಎನ್ ವರದಿ ಹೇಳಿದೆ. ಸರಳವಾಗಿ ಹೇಳುವುದಾದರೆ, ಈ ಎಐ ಮಾಡ್ಯೂಲ್‌ಗಳು ಮಹಿಳೆಯರನ್ನು ಕೀಳಾಗಿ ಕಾಣುವ ಪುರುಷ ಅಹಂಕಾರದ ಮನಸ್ಥಿತಿಯನ್ನು ಬಿಂಬಿಸುತ್ತಿವೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಮಹಿಳೆಯರನ್ನು ಕೀಳಾಗಿ ಚಿತ್ರಿಸುವ ತಂತ್ರಜ್ಞಾನ: ಪ್ರಸ್ತುತ ಜಗತ್ತಿನಲ್ಲಿ ಅತಿ ಹೆಚ್ಚು ಬಳಕೆಯಲ್ಲಿರುವ ದೊಡ್ಡ ಭಾಷಾ ಮಾದರಿಗಳು (ಎಲ್‌ಎಲ್‌ಎಂ) ಪುರುಷರನ್ನು ಉಲ್ಲೇಖಿಸುವಾಗ ಉದ್ಯಮ, ನಾಯಕತ್ವ, ವ್ಯಾಪಾರ ಮತ್ತು ವೃತ್ತಿಜೀವನದ ಯಶಸ್ಸಿಗೆ ಸಂಬಂಧಿಸಿದ ಪದಗಳನ್ನು ಬಳಸುತ್ತಿವೆ. ಆದರೆ ಅದೇ ಸಮಯದಲ್ಲಿ ಮಹಿಳೆಯರನ್ನು ಕೇವಲ ಮನೆ, ಕುಟುಂಬ, ಅಡುಗೆ ಮತ್ತು ಮಕ್ಕಳ ಆರೈಕೆಗೆ ಮಾತ್ರ ಸೀಮಿತಗೊಳಿಸಿ ಪದೇ ಪದೇ ಸಂಯೋಜಿಸುತ್ತಿವೆ. ಇನ್ನು ಕೆಲವು ಗಂಭೀರ ಸಂದರ್ಭಗಳಲ್ಲಿ ಎಐ ವ್ಯವಸ್ಥೆಗಳು ಮಹಿಳೆಯರನ್ನು ಕೇವಲ ಲೈಂಗಿಕ ವಸ್ತುಗಳಾಗಿ ಅಥವಾ ಪುರುಷರಿಗೆ ಅಧೀನರಾಗಿರುವ ವ್ಯಕ್ತಿಗಳಂತೆ ಚಿತ್ರಿಸುವ ಆಘಾತಕಾರಿ ಪ್ರತಿಕ್ರಿಯೆಗಳನ್ನು ಸೃಷ್ಟಿಸಿವೆ ಎಂದು ವಿಶ್ವಸಂಸ್ಥೆ ತೀವ್ರ ಆತಂಕ ವ್ಯಕ್ತಪಡಿಸಿದೆ.

ಸಂಶೋಧನೆಯ ವೇಳೆ ತಜ್ಞರು ಎಐ ಮಾದರಿಗಳಿಗೆ ವ್ಯಕ್ತಿಯ ಲಿಂಗದಿಂದ ಪ್ರಾರಂಭವಾಗುವ ಕೆಲವು ಸರಳ ವಾಕ್ಯಗಳನ್ನು ಪೂರ್ಣಗೊಳಿಸಲು ಸೂಚಿಸಿದ್ದರು. ಈ ವೇಳೆ ಬಂದ ಪ್ರತಿಕ್ರಿಯೆಗಳಲ್ಲಿ ಐದರಲ್ಲಿ ಒಂದು ಭಾಗದಷ್ಟು ಉತ್ತರಗಳು ಸಂಪೂರ್ಣ ಲಿಂಗ ತಾರತಮ್ಯ ಅಥವಾ ಸ್ತ್ರೀದ್ವೇಷದಿಂದ ಕೂಡಿರುವುದು ಪತ್ತೆಯಾಗಿದೆ. ಕೆಲವು ಕೃತಕ ಬುದ್ಧಿಮತ್ತೆಯ ಮಾಡ್ಯೂಲ್‌ಗಳು ಮಹಿಳೆಯರನ್ನು ಸ್ವತಂತ್ರ ವ್ಯಕ್ತಿಗಳಾಗಿ ನೋಡುವ ಬದಲು ಯಾರದ್ದೋ ಆಸ್ತಿ ಅಥವಾ ಒಂದು ವಸ್ತು ಎಂದು ಬಣ್ಣಿಸಿವೆ. ಇಂದು ಜಗತ್ತಿನಾದ್ಯಂತ ಕಚೇರಿ ಕೆಲಸಗಳು, ಇಮೇಲ್ ಬರವಣಿಗೆ, ಪ್ರಸ್ತುತಿಗಳ ಸಿದ್ಧತೆ ಮತ್ತು ಕಂಟೆಂಟ್ ರಚನೆಗೆ ಎಐ ತಂತ್ರಜ್ಞಾನವನ್ನು ವ್ಯಾಪಕವಾಗಿ ಬಳಸಲಾಗುತ್ತಿದೆ. ಇಂತಹ ಸಂದರ್ಭದಲ್ಲಿ ಎಐನ ಈ ತಾರತಮ್ಯದ ಅಲ್ಗಾರಿದಮ್‌ಗಳು ಸಮಾಜದಲ್ಲಿ ಅಸಮಾನತೆಯನ್ನು ಮತ್ತಷ್ಟು ಬಲಪಡಿಸುತ್ತಿವೆ ಎಂದು ವಿಶ್ವಸಂಸ್ಥೆ ಆತಂಕ ವ್ಯಕ್ತಪಡಿಸಿದೆ.

ಇದು ತಂತ್ರಜ್ಞಾನದ ದೋಷವಲ್ಲ, ಮನುಷ್ಯನ ಇತಿಹಾಸದ ಪ್ರಭಾವ: ಯುಎನ್ ವುಮೆನ್ ಸಂಸ್ಥೆಯ ಪ್ರಕಾರ, ಎಐನಲ್ಲಿ ಕಂಡುಬರುತ್ತಿರುವ ಈ ನಡವಳಿಕೆಯು ತಂತ್ರಜ್ಞಾನದ ತಾಂತ್ರಿಕ ದೋಷವಲ್ಲ. ಬದಲಿಗೆ ಎಐ ತಂತ್ರಜ್ಞಾನವು ಇಂಟರ್ನೆಟ್‌ನಲ್ಲಿ ಲಭ್ಯವಿರುವ ದಶಕಗಳ ಹಿಂದಿನ ಹಳೆಯ ಸ್ಟೀರಿಯೊಟೈಪ್‌ಗಳು, ಪೂರ್ವಾಗ್ರಹಗಳು ಮತ್ತು ತಾರತಮ್ಯದ ಇತಿಹಾಸವನ್ನು ಓದಿ ಕಲಿಯುತ್ತಿದೆ. ಮನುಷ್ಯರೇ ಸೃಷ್ಟಿಸಿರುವ ಇಂಟರ್ನೆಟ್ ಜಗತ್ತಿನ ಇತಿಹಾಸದ ಮೇಲೆ ಎಐಗೆ ತರಬೇತಿ ನೀಡುತ್ತಿರುವುದರಿಂದ, ಅದು ಮನುಷ್ಯನ ಮನಸ್ಸಿನಲ್ಲಿರುವ ಕೆಟ್ಟ ಪಕ್ಷಪಾತಗಳನ್ನೇ ಮರು ಉತ್ಪಾದಿಸುತ್ತಿದೆ ಎಂದು ವರದಿಯಲ್ಲಿ ಸ್ಪಷ್ಟಪಡಿಸಲಾಗಿದೆ.