ನವದೆಹಲಿ: ಭಾರತೀಯ ದೂರಸಂಪರ್ಕ ದೈತ್ಯ ಭಾರ್ತಿ ಏರ್ಟೆಲ್ (Airtel) ಜಾಗತಿಕ ಮಟ್ಟದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ. ಒಟ್ಟು 65 ಕೋಟಿಗೂ ಅಧಿಕ ಚಂದಾದಾರರನ್ನು (Subscribers) ಹೊಂದುವ ಮೂಲಕ ಏರ್ಟೆಲ್ ಈಗ ವಿಶ್ವದ ಎರಡನೇ ಅತಿದೊಡ್ಡ ದೂರಸಂಪರ್ಕ ಸೇವಾ ಕಂಪನಿಯಾಗಿ ಹೊರಹೊಮ್ಮಿದೆ.
ಜಾಗತಿಕ ದೂರಸಂಪರ್ಕ ಉದ್ದಿಮೆಯನ್ನು ಪ್ರತಿನಿಧಿಸುವ ಜಿಎಸ್ಎಂಎ (GSMA) ಬಿಡುಗಡೆ ಮಾಡಿರುವ ಮಾರ್ಚ್ 31ರ ಅಂಕಿ-ಅಂಶಗಳು ಈ ಮಹತ್ವದ ಬೆಳವಣಿಗೆಯನ್ನು ಖಚಿತಪಡಿಸಿವೆ. ಭಾರತ ಮತ್ತು ಆಫ್ರಿಕಾ ಖಂಡದ ಪ್ರಮುಖ ದೇಶಗಳಲ್ಲಿ ತನ್ನ ಕಾರ್ಯಾಚರಣೆಯನ್ನು ವಿಸ್ತರಿಸಿರುವ ಭಾರ್ತಿ ಏರ್ಟೆಲ್, ಗ್ರಾಹಕರ ಸಂಖ್ಯೆಯಲ್ಲಿ ಚೀನಾ ಮೊಬೈಲ್ ನಂತರದ ಸ್ಥಾನವನ್ನು ಅಲಂಕರಿಸಿದೆ. ಕಂಪನಿಯು ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಮಾರುಕಟ್ಟೆಗಳಲ್ಲಿ ತನ್ನ ಅಧಿಪತ್ಯವನ್ನು ಸ್ಥಾಪಿಸಿದ್ದು, ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ಉತ್ತಮ ಸೇವೆಯ ಮೂಲಕ ಕೋಟ್ಯಂತರ ಗ್ರಾಹಕರನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿದೆ. ಏರ್ಟೆಲ್ ಹೊಂದಿರುವ ಒಟ್ಟು ಚಂದಾದಾರರ ಪೈಕಿ ಸಿಂಹಪಾಲು ಭಾರತದ್ದಾಗಿದೆ. ಭಾರತವೊಂದರಲ್ಲೇ ಕಂಪನಿಯು 36.8 ಕೋಟಿ ಗ್ರಾಹಕರನ್ನು ಹೊಂದಿದ್ದು, ದೇಶದ ಪ್ರಮುಖ ಟೆಲಿಕಾಂ ಆಪರೇಟರ್ಗಳಲ್ಲಿ ಒಂದಾಗಿ ಮುಂದುವರಿದಿದೆ. ಇನ್ನು ಆಫ್ರಿಕಾ ಖಂಡದ 14 ದೇಶಗಳಲ್ಲಿ ತನ್ನ ಸೇವೆಯನ್ನು ಒದಗಿಸುತ್ತಿರುವ ಏರ್ಟೆಲ್, ಅಲ್ಲಿ ಸುಮಾರು 17.9 ಕೋಟಿಗೂ ಅಧಿಕ ಮೊಬೈಲ್ ಬಳಕೆದಾರರನ್ನು ಸಂಪಾದಿಸಿದೆ. ಭಾರತದ ಹೊರಗೂ ಕಂಪನಿಯು ಗಳಿಸಿರುವ ಈ ಅಗಾಧ ಜನಪ್ರಿಯತೆ ಜಾಗತಿಕ ರ್ಯಾಂಕಿಂಗ್ ಏರಲು ಪ್ರಮುಖ ಕಾರಣವಾಗಿದೆ.