ಇಷ್ಟು ದಿನಗಳ ಕಾಲ ಅವರ ಅಂತ್ಯಕ್ರಿಯೆ ವಿಳಂಬವಾಗಲು ಕಾರಣವೇನು ಮತ್ತು ಅವರ ಪಾರ್ಥಿವ ಶರೀರವನ್ನು ಎಲ್ಲಿ ಇಡಲಾಗಿತ್ತು ಎಂಬ ಪ್ರಶ್ನೆಗಳಿಗೆ ಈಗ ಇರಾನ್ (Iran) ಅಧಿಕೃತ ಮೂಲಗಳಿಂದ ಸ್ಪಷ್ಟ ಮಾಹಿತಿ ಲಭ್ಯವಾಗಿದೆ.

ಕಳೆದ ಫೆಬ್ರವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಭೀಕರ ವೈಮಾನಿಕ ದಾಳಿಯಲ್ಲಿ ಆಯತೊಲ್ಲಾ ಅಲಿ ಖಮೇನಿ ಮತ್ತು ಅವರ ಕುಟುಂಬದ ಕೆಲ ಸದಸ್ಯರು ಮೃತಪಟ್ಟಿದ್ದರು. ಆ ಬಳಿಕ ಇರಾನ್ ಮತ್ತು ಅಮೆರಿಕ-ಇಸ್ರೇಲ್ ನಡುವೆ ತೀವ್ರ ಸ್ವರೂಪದ ಯುದ್ಧ ಆರಂಭವಾಗಿತ್ತು. ಈ ಯುದ್ಧದ ಭೀಕರತೆ ಮತ್ತು ಕಠಿಣ ಭದ್ರತಾ ಸವಾಲುಗಳ ಕಾರಣದಿಂದಾಗಿ ಇರಾನ್ ಸರ್ಕಾರಕ್ಕೆ ಲಕ್ಷಾಂತರ ಜನರು ಸೇರುವ ಇಂತಹ ಬೃಹತ್ ಅಂತ್ಯಸಂಸ್ಕಾರ ಸಮಾರಂಭವನ್ನು ತಕ್ಷಣವೇ ಆಯೋಜಿಸಲು ಸಾಧ್ಯವಾಗಲಿಲ್ಲ. ಪ್ರಸ್ತುತ ಅಮೆರಿಕ ಮತ್ತು ಇರಾನ್ ನಡುವೆ ತಾತ್ಕಾಲಿಕ ಕದನ ವಿರಾಮ ಘೋಷಣೆಯಾಗಿದ್ದು, ಪರಿಸ್ಥಿತಿ ಕೊಂಚ ತಿಳಿಗೊಂಡಿರುವ ಹಿನ್ನೆಲೆಯಲ್ಲಿ ಈಗ ಜುಲೈ ಮೊದಲ ವಾರದಲ್ಲಿ ಆರು ದಿನಗಳ ಕಾಲ ಸುದೀರ್ಘ ಅಂತ್ಯಸಂಸ್ಕಾರದ ವಿಧಿವಿಧಾನಗಳನ್ನು ಹಮ್ಮಿಕೊಳ್ಳಲಾಗಿದೆ.

ಇನ್ನು ಇಷ್ಟು ದಿನಗಳ ಕಾಲ ಖಮೇನಿ ಅವರ ಶರೀರ ಎಲ್ಲಿದೆ ಎಂಬ ಬಗ್ಗೆ ಜಗತ್ತಿನಾದ್ಯಂತ ಹಲವು ವದಂತಿಗಳು ಹರಡಿದ್ದವು. ಅವರು ಮೃತಪಟ್ಟ ಬೆನ್ನಲ್ಲೇ ಕೋಮ್ ನಗರದ ಪ್ರಸಿದ್ಧ ಧಾರ್ಮಿಕ ಕೇಂದ್ರದಲ್ಲಿ ಅವರ ದೇಹವನ್ನು ತಾತ್ಕಾಲಿಕವಾಗಿ ರಹಸ್ಯವಾಗಿ ದಫನ್ ಮಾಡಲಾಗಿದೆ ಎಂಬ ಮಾತುಗಳು ಕೇಳಿಬಂದಿದ್ದವು. ಆದರೆ ಅಲ್ಲಿನ ಧಾರ್ಮಿಕ ಸಂಸ್ಥೆಯು ಈ ವದಂತಿಗಳನ್ನು ಸಾರಾಸಗಟಾಗಿ ನಿರಾಕರಿಸಿತ್ತು. ಇತ್ತೀಚೆಗೆ ಅಂತ್ಯಸಂಸ್ಕಾರ ಸಮಿತಿಯ ವಕ್ತಾರರಾದ ಇಮಾನ್ ಅತ್ತಾರ್ಜಾದೆ ಅವರು ಈ ಬಗ್ಗೆ ಸ್ಪಷ್ಟನೆ ನೀಡಿದ್ದು, ಖಮೇನಿ ಮತ್ತು ಅವರ ಕುಟುಂಬಸ್ಥರ ಭೌತಿಕ ಶರೀರಗಳನ್ನು ಧಾರ್ಮಿಕ ಮತ್ತು ಕಾನೂನು ನಿಯಮಗಳ ಅನ್ವಯ ಅತ್ಯಂತ ಸುರಕ್ಷಿತವಾದ ರಹಸ್ಯ ಸ್ಥಳದಲ್ಲಿ ಕಾವಲಿನಲ್ಲಿ ಇಡಲಾಗಿತ್ತು. ಎಲ್ಲಿಯೂ ಗುಪ್ತವಾಗಿ ದಫನ್ ಮಾಡಿರಲಿಲ್ಲ ಅಥವಾ ಬೇರೆಡೆಗೆ ಹಸ್ತಾಂತರಿಸಿರಲಿಲ್ಲ ಎಂದು ತಿಳಿಸಿದ್ದಾರೆ.

ಪ್ರಸ್ತುತ ಖಮೇನಿ ಅವರ ಪಾರ್ಥಿವ ಶರೀರವನ್ನು ಇರಾನ್‌ನ ರಾಜಧಾನಿ ಟೆಹ್ರಾನ್‌ನ ಪ್ರಸಿದ್ಧ ಗ್ರ್ಯಾಂಡ್ ಮೊಸಲ್ಲಾ ಮಸೀದಿಗೆ ತರಲಾಗಿದ್ದು, ಸಾರ್ವಜನಿಕರ ದರ್ಶನಕ್ಕೆ ವ್ಯವಸ್ಥೆ ಮಾಡಲಾಗಿದೆ. ಇರಾನ್ ಇತಿಹಾಸದಲ್ಲೇ ಅತ್ಯಂತ ದೊಡ್ಡದಾದ ಈ ಅಂತ್ಯಸಂಸ್ಕಾರದ ಮೆರವಣಿಗೆಯು ಟೆಹ್ರಾನ್, ಕೋಮ್ ಮತ್ತು ಇರಾಕ್‌ನ ಪ್ರಮುಖ ಶಿಯಾ ಧಾರ್ಮಿಕ ನಗರಗಳ ಮೂಲಕ ಹಾದುಹೋಗಲಿದ್ದು, ಅಂತಿಮವಾಗಿ ಮಶ್ಹದ್ ನಗರದ ಪವಿತ್ರ ಇಮಾಮ್ ರೆಜಾ ದರ್ಗಾದಲ್ಲಿ ಅವರ ಅಂತ್ಯಕ್ರಿಯೆ ನೆರವೇರಲಿದೆ.