ಸಫಾರಿ ಕೌಂಟರ್ ಅನ್ನು ಬಂಡೀಪುರದಿಂದ ಮೇಲುಕಾಮನಹಳ್ಳಿಗೆ ಸ್ಥಳಾಂತರಿಸಲಾಗಿದೆ. ಮೇಲುಕಾಮನಹಳ್ಳಿಯಿಂದ ಪ್ರಯಾಣಿಸುವ ಸಮಯವನ್ನು ಪರಿಗಣಿಸಿ ಸಫಾರಿ ವೀಕ್ಷಣೆಯ ಸಮಯವನ್ನು ಈ ಹಿಂದೆ 2.30 ಗಂಟೆಗೆ ನಿಗದಿಪಡಿಸಲಾಗಿತ್ತು. ಪ್ರವಾಸಿಗರ ಅನುಕೂಲಕ್ಕಾಗಿ ಈಗ ಸಫಾರಿ ಅವಧಿಯನ್ನು ಅರ್ಧ ಗಂಟೆ ಹೆಚ್ಚಿಸಿ, ಒಟ್ಟು 3 ಗಂಟೆಗಳಿಗೆ ವಿಸ್ತರಿಸಲಾಗಿದೆ.

ಇಲಾಖೆಯ ಬಸ್ ಸಫಾರಿಗೆ ಹಿರಿಯರಿಗೆ ₹1000 (ಹಿಂದೆ ₹650) ಹಾಗೂ ಮಕ್ಕಳಿಗೆ ₹500 (ಹಿಂದೆ ₹325) ದರ ನಿಗದಿ ಮಾಡಲಾಗಿದೆ. ಜೀಪ್ ಸಫಾರಿಗೆ ಹಿರಿಯರಿಗೆ ₹1,500 (ಹಿಂದೆ ₹1,100) ಮತ್ತು ಮಕ್ಕಳಿಗೆ ₹750 (ಹಿಂದೆ ₹550) ದರ ಜಾರಿಗೆ ಬಂದಿದೆ.

ಉಳಿದಂತೆ 200 ಎಂಎಂ ಗಿಂತ ಹೆಚ್ಚಿನ ಲೆನ್ಸ್ ಕ್ಯಾಮೆರಾಗಳಿಗೆ ₹1,500 ಹಾಗೂ ಜಿಎಸ್‌ಟಿ ವಿಧಿಸಲಾಗಿದೆ. ಕಾರು ಪಾರ್ಕಿಂಗ್‌ಗೆ ₹100, ಲಘು ವಾಹನಗಳಿಗೆ ₹200 ಮತ್ತು ಬಸ್‌ಗಳಿಗೆ ₹300 ದರ ನಿಗದಿಪಡಿಸಲಾಗಿದೆ. ಉಚಿತ ಪ್ರವೇಶಕ್ಕೆ ಇದ್ದ ಮಕ್ಕಳ ವಯೋಮಿತಿಯನ್ನು 5 ವರ್ಷದಿಂದ 3 ವರ್ಷಕ್ಕೆ ಇಳಿಸಲಾಗಿದೆ.