ಕುವೈತ್ ಸಿಟಿ: ಗಲ್ಫ್ ರಾಷ್ಟ್ರಗಳಲ್ಲಿ ಅಮೆರಿಕ ಮತ್ತು ಇರಾನ್ ನಡುವಿನ (Us Iran War) ಉದ್ವಿಗ್ನತೆ ತುತ್ತತುದಿಗೆ ತಲುಪಿದ್ದು, ಬುಧವಾರ (ಜೂನ್ 3, 2026) ಕುವೈತ್ (Kuwait) ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೆ ನಡೆದ ಭೀಕರ ಡ್ರೋನ್ ದಾಳಿಯ (Drone Strike) ರೋಮಹರ್ಷಕ ಸಿಸಿಟಿವಿ (CCTV) ದೃಶ್ಯಗಳು ಈಗ ಇಂಟರ್ನೆಟ್‌ನಲ್ಲಿ ಹರಿದಾಡುತ್ತಿವೆ.
ಈ ಭೀಕರ ದಾಳಿಯಲ್ಲಿ ಒಬ್ಬ ಭಾರತೀಯ ಪ್ರಜೆ ಮೃತಪಟ್ಟಿದ್ದು, 60 ಕ್ಕೂ ಹೆಚ್ಚು ಜನರು ತೀವ್ರವಾಗಿ ಗಾಯಗೊಂಡಿದ್ದಾರೆ. ಕುವೈತ್‌ನ ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ಬಿಡುಗಡೆ ಮಾಡಿರುವ ಈ ವಿಡಿಯೋದಲ್ಲಿ, ವಿಮಾನ ನಿಲ್ದಾಣದ ಟರ್ಮಿನಲ್ 1 (T1) ಮೇಲೆ ಡ್ರೋನ್ ಬಂದು ಅಪ್ಪಳಿಸುವ ಭೀಕರ ದೃಶ್ಯ ಹಾಗೂ ಅದರ ಬೆನ್ನಲ್ಲೇ ಅಲ್ಲಿ ಸೃಷ್ಟಿಯಾದ ಆತಂಕ, ಕಾಲ್ತುಳಿತ ಮತ್ತು ತುರ್ತು ರಕ್ಷಣಾ ಸಿಬ್ಬಂದಿ ಧಾವಿಸುತ್ತಿರುವ ದೃಶ್ಯಗಳು ಸೆರೆಯಾಗಿವೆ. "ಇದು ಇರಾನ್‌ನ ಕ್ರೂರ ಆಕ್ರಮಣ" ಜೂನ್ 3, 2026 ರಂದು ಕುವೈತ್ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ 1 ರ ಮೇಲೆ ಇರಾನ್ ಡ್ರೋನ್‌ಗಳ ಮೂಲಕ ನಡೆಸಿದ ಕ್ರೂರ ಆಕ್ರಮಣದ ಮೊದಲ ಕ್ಷಣಗಳಿವು. ಈ ದಾಳಿಯು ಅಮೂಲ್ಯ ಜೀವ ಬಲಿ ಪಡೆದಿದ್ದು, ತೀವ್ರ ಮಾನವ ಗಾಯಗಳು ಮತ್ತು ವ್ಯಾಪಕ ವಸ್ತು ನಷ್ಟವನ್ನು ಉಂಟುಮಾಡಿದೆ ಎಂದು ಕುವೈತ್ ಡಿಜಿಸಿಎ ಸಿಸಿಟಿವಿ ದೃಶ್ಯಗಳನ್ನು ಹಂಚಿಕೊಳ್ಳುತ್ತಾ ತಿಳಿಸಿದೆ. ಕುವೈತ್ ರಕ್ಷಣಾ ಸಚಿವಾಲಯವು ಇದನ್ನು "ಕ್ರಿಮಿನಲ್ ಇರಾನ್ ಆಕ್ರಮಣ" ಎಂದು ಕರೆದಿದ್ದರೆ, ಅಲ್ಲಿನ ವಿದೇಶಾಂಗ ಸಚಿವಾಲಯವು ದಾಳಿಯಿಂದಾಗಿ ಕುವೈತ್‌ನಲ್ಲಿರುವ ಹಲವಾರು ರಾಜತಾಂತ್ರಿಕ ಕಚೇರಿಗಳಿಗೂ (Diplomatic Missions) ಹಾನಿಯಾಗಿದೆ ಎಂದು ಹೇಳಿದೆ. ದಾಳಿಗೆ ಬಲಿಯಾದ ಭಾರತೀಯ ಪ್ರಜೆ ಈ ಇಡೀ ದುರಂತದಲ್ಲಿ ಮೃತಪಟ್ಟ ಏಕೈಕ ವ್ಯಕ್ತಿ ಭಾರತೀಯ ಪ್ರಜೆಯಾಗಿದ್ದಾರೆ. ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವಾಲಯವು (MEA) ಈ ಸಾವನ್ನು ಖಚಿತಪಡಿಸಿದ್ದು, ಗಾಯಗೊಂಡವರಲ್ಲಿಯೂ ಹಲವಾರು ಭಾರತೀಯ ನಾಗರಿಕರು ಸೇರಿದ್ದಾರೆ ಎಂದು ತಿಳಿಸಿದೆ. ನವದೆಹಲಿಯು ಈ ದಾಳಿಯನ್ನು ತೀವ್ರವಾಗಿ ಖಂಡಿಸಿದ್ದು, ಪ್ರಾದೇಶಿಕ ಉದ್ವಿಗ್ನತೆಯನ್ನು ಮತ್ತಷ್ಟು ಹೆಚ್ಚಿಸುವ ಇಂತಹ ಕೃತ್ಯಗಳನ್ನು ತಕ್ಷಣವೇ ನಿಲ್ಲಿಸಬೇಕು ಎಂದು ಕರೆ ನೀಡಿದೆ. ಅಮೆರಿಕ-ಇರಾನ್ ಸೇನಾ ಸಂಘರ್ಷದ ಹಿನ್ನೆಲೆ ಗಲ್ಫ್ ವಲಯದಲ್ಲಿ ನಡೆಯುತ್ತಿರುವ ಬೃಹತ್ ಸೇನಾ ಸಂಘರ್ಷದ ಭಾಗವಾಗಿ ಈ ದಾಳಿ ನಡೆದಿದೆ. ಇರಾನ್‌ನ ತೈಲ ಟ್ಯಾಂಕರ್ ಮತ್ತು ಕೇಶ್ಮ್ ದ್ವೀಪದ ಮೇಲೆ ಅಮೆರಿಕ ನಡೆಸಿದ ದಾಳಿಗೆ ಪ್ರತಿಕಾರವಾಗಿ ಈ ಪ್ರದೇಶದಲ್ಲಿನ ಅಮೆರಿಕದ ಮಿಲಿಟರಿ ನೆಲೆಗಳನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿರುವುದಾಗಿ ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಆರಂಭದಲ್ಲಿ ಘೋಷಿಸಿತ್ತು. ಆದರೆ, ವಿಮಾನ ನಿಲ್ದಾಣದ ಮೇಲಿನ ದಾಳಿಯ ಹೊಣೆಯನ್ನು ನಿರಾಕರಿಸಿರುವ ಟೆಹ್ರಾನ್ (ಇರಾನ್ ರಾಜಧಾನಿ), "ಇದು ಇರಾನ್ ಡ್ರೋನ್ ದಾಳಿಯಲ್ಲ, ಬದಲಿಗೆ ಅಮೆರಿಕದ ಕ್ಷಿಪಣಿ ಪ್ರತಿರೋಧಕ ವ್ಯವಸ್ಥೆಯು (Missile Interceptor) ಕೈಕೊಟ್ಟಿದ್ದರಿಂದ ಮಿಸ್ ಫೈರ್ ಆಗಿ ಈ ಹಾನಿ ಸಂಭವಿಸಿದೆ" ಎಂದು ವಾದಿಸಿದೆ. ಇರಾನ್ ವಾದ ತಳ್ಳಿಹಾಕಿದ ಅಮೆರಿಕ; ರಾಜತಾಂತ್ರಿಕ ಕ್ರಮ ಕೈಗೊಂಡ ಕುವೈತ್ ಇರಾನ್‌ನ ಈ ಹೇಳಿಕೆಯನ್ನು ಅಮೆರಿಕದ ಸೆಂಟ್ರಲ್ ಕಮಾಂಡ್ (CENTCOM) ಸಂಪೂರ್ಣವಾಗಿ ತಳ್ಳಿಹಾಕಿದೆ. ಇರಾನ್ ಸುಳ್ಳು ಹೇಳುತ್ತಿದ್ದು, ಕುವೈತ್ ಭೂಪ್ರದೇಶದ ಮೇಲೆ ಉದ್ದೇಶಪೂರ್ವಕವಾಗಿ ಮತ್ತು ಅನ್ಯಾಯದ ದಾಳಿ ನಡೆಸಿದೆ ಎಂದು ವಾಷಿಂಗ್ಟನ್ ಆರೋಪಿಸಿದೆ.
ಅಲ್ಲದೆ, ಕುವೈತ್ ಮತ್ತು ಬಹ್ರೇನ್ ಕಡೆಗೆ ಬರುತ್ತಿದ್ದ ಇರಾನ್ ಕ್ಷಿಪಣಿಗಳನ್ನು ತಾನು ಹೊಡೆದು ಉರುಳಿಸಿರುವುದಾಗಿ ಮತ್ತು ಆತ್ಮರಕ್ಷಣೆಗಾಗಿ ಇರಾನ್ ನೆಲೆಗಳ ಮೇಲೆ ದಾಳಿ ನಡೆಸಿರುವುದಾಗಿ ಅಮೆರಿಕ ತಿಳಿಸಿದೆ.
ಈ ದಾಳಿಗೆ ತಕ್ಷಣದ ರಾಜತಾಂತ್ರಿಕ ಪ್ರತಿಕ್ರಿಯೆ ನೀಡಿರುವ ಕುವೈತ್ ಸರ್ಕಾರ, ತನ್ನ ದೇಶದಲ್ಲಿದ್ದ ಇಬ್ಬರು ಇರಾನ್ ರಾಜತಾಂತ್ರಿಕರನ್ನು 24 ಗಂಟೆಗಳ ಒಳಗೆ ದೇಶ ತೊರೆಯುವಂತೆ ಆದೇಶಿಸಿದೆ. ಅಲ್ಲದೆ ಇರಾನ್ ರಾಯಭಾರ ಕಚೇರಿಯ ಚಾರ್ಜ್ ಡಿ'ಅಫೇರ್ಸ್ ಅವರಿಗೆ ಸಮನ್ಸ್ ಜಾರಿಗೊಳಿಸಿ ಅಧಿಕೃತ ಪ್ರತಿಭಟನೆಯನ್ನು ದಾಖಲಿಸಿದೆ. ಸಿಸಿಟಿವಿ ದೃಶ್ಯಗಳು ಹೊರಬಂದ ಬೆನ್ನಲ್ಲೇ ಈ ದಾಳಿಯ ತೀವ್ರತೆ ಜಾಗತಿಕ ಮಟ್ಟದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದ್ದು, ಗಲ್ಫ್ ಪ್ರದೇಶದಲ್ಲಿ ಭದ್ರತಾ ಆತಂಕ ಮತ್ತಷ್ಟು ಹೆಚ್ಚಾಗಿದೆ.