ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್(Donald Trump) ಅವರು ಕತಾರ್(Qatar) ದೇಶದಿಂದ ಉಡುಗೊರೆಯಾಗಿ ಬಂದಿರುವ, ಬರೋಬ್ಬರಿ 400 ಮಿಲಿಯನ್ ಡಾಲರ್ (ಸುಮಾರು ₹3,300 ಕೋಟಿಗೂ ಅಧಿಕ) ಮೌಲ್ಯದ ಅತ್ಯಾಧುನಿಕ 'ಏರ್ ಫೋರ್ಸ್ ಒನ್' (Air Force One) ಅಧಿಕೃತ ವಿಮಾನದಲ್ಲಿ ಬುಧವಾರ ತಮ್ಮ ಚೊಚ್ಚಲ ಪ್ರಯಾಣ ಬೆಳೆಸಿದ್ದಾರೆ.
ಬೋಯಿಂಗ್ 747-800 ಮಾದರಿಯ ಈ ಹೊಸ ವಿಮಾನವು ಟ್ರಂಪ್ ಅವರ ರಾಯಲ್ ಲೈಫ್ಸ್ಟೈಲ್ಗೆ ತಕ್ಕಂತೆ ಸಂಪೂರ್ಣವಾಗಿ ಮರುರೂಪಗೊಂಡಿದೆ. ವಿಮಾನದ ಈ ಹೊಸ ವೈಭವದ ಬಗ್ಗೆ ಹೆಮ್ಮೆಯಿಂದ ಮಾತನಾಡಿರುವ ಟ್ರಂಪ್, "ನಿಮ್ಮ ಮುಂದೆ ಎರಡು ಆಯ್ಕೆಗಳಿರುತ್ತವೆ; ಒಂದೋ ನೀವು ಎಲ್ಲವನ್ನೂ ಸರಳವಾಗಿ ಇಟ್ಟುಕೊಳ್ಳಬಹುದು, ಇಲ್ಲವೇ ಜಗತ್ತಿಗೆ ಅದನ್ನು ಗಂಭೀರವಾಗಿ ಪ್ರದರ್ಶಿಸಬಹುದು," ಎಂದು ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಟ್ರಂಪ್ ಇಷ್ಟದ ಬಣ್ಣ, ಅರಮನೆಯಂತಹ ಸೌಲಭ್ಯ! ಹಳೆಯ ವಿಮಾನಗಳ ಬದಲಿಗೆ ಹೊಸ 'ಬ್ರಿಡ್ಜ್' ಭದ್ರತಾ ವ್ಯವಸ್ಥೆಯ ಕೊರತೆ? ತಜ್ಞರ ಪ್ರಶ್ನೆ ವಾಯುಯಾನ ತಜ್ಞರ ಪ್ರಕಾರ, ಕಮ್ಯುನಿಕೇಶನ್ ಆಂಟೆನಾಗಳ ಸಂಖ್ಯೆಯೂ ಕಡಿಮೆಯಿದ್ದು, ಈ ವಿಮಾನವು ದೇಶೀಯ (Domestic) ಪ್ರಯಾಣಕ್ಕೆ ಮಾತ್ರ ಹೆಚ್ಚು ಸೂಕ್ತವಾಗಿದೆ. ಆದರೆ, ಭದ್ರತೆ ಮತ್ತು ಸುರಕ್ಷಿತ ಸಂವಹನ ವ್ಯವಸ್ಥೆಯಲ್ಲಿ ಯಾವುದೇ ರಾಜಿ ಮಾಡಿಕೊಂಡಿಲ್ಲ ಎಂದು ಅಮೆರಿಕ ವಾಯುಪಡೆ ಸ್ಪಷ್ಟಪಡಿಸಿದೆ. ಉಡುಗೊರೆ ಸುತ್ತ ಹೆಣೆದುಕೊಂಡ ವಿವಾದ
ಈ ಹಿಂದೆ ಅಮೆರಿಕ ಅಧ್ಯಕ್ಷರ ವಿಮಾನಕ್ಕಿದ್ದ ಸಾಂಪ್ರದಾಯಿಕ ತಿಳಿ ನೀಲಿ ಬಣ್ಣವನ್ನು ಈಗ ಬದಲಾಯಿಸಲಾಗಿದೆ. ಟ್ರಂಪ್ ಅವರ ವೈಯಕ್ತಿಕ ಆದ್ಯತೆಗೆ ತಕ್ಕಂತೆ ವಿಮಾನದ ಕೆಳಭಾಗಕ್ಕೆ ನೇವಿ-ಬ್ಲೂ (ಗಾಢ ನೀಲಿ) ಬಣ್ಣ ಬಳಿದು, ಮಧ್ಯದಲ್ಲಿ ಕೆಂಪು ಮತ್ತು ಚಿನ್ನದ ಬಣ್ಣದ ಪಟ್ಟಿಗಳನ್ನು ನೀಡಲಾಗಿದೆ. ವಿಮಾನದ ಒಳಾಂಗಣವು ಅತ್ಯಂತ ಐಷಾರಾಮಿ ಕಾರ್ಪೆಟ್ಗಳು, ಮಲಗಲು ಅನುಕೂಲಕರವಾದ ಸೀಟುಗಳು, ಐಷಾರಾಮಿ ವುಡ್ ಪ್ಯಾನಲಿಂಗ್ ಹಾಗೂ ಸೀಟ್ ಬೆಲ್ಟ್ಗಳ ಮೇಲೆ ಅಧ್ಯಕ್ಷರ ಅಧಿಕೃತ ಮುದ್ರೆಯನ್ನು (Presidential Seal) ಒಳಗೊಂಡಿದೆ.
ಕಳೆದ 36 ವರ್ಷಗಳಿಂದ ಅಮೆರಿಕ ಅಧ್ಯಕ್ಷರ ಸೇವೆ ಸಲ್ಲಿಸುತ್ತಿರುವ ಹಳೆಯ ಬೋಯಿಂಗ್ ವಿಮಾನಗಳ ಬದಲಿಗೆ, 2028ರಲ್ಲಿ ಹೊಸದಾಗಿ ಬರಲಿರುವ ಎರಡು ವಿಮಾನಗಳ ಮಧ್ಯದ ಅವಧಿಗೆ ಈ ಕತಾರ್ ವಿಮಾನವನ್ನು 'ಬ್ರಿಡ್ಜ್' (ತಾತ್ಕಾಲಿಕ ವ್ಯವಸ್ಥೆ) ಆಗಿ ಬಳಸಲಾಗುತ್ತಿದೆ. ಕಳೆದ ವರ್ಷ ಶ್ವೇತಭವನಕ್ಕೆ ಮರಳಿದ ಕೆಲವೇ ವಾರಗಳಲ್ಲಿ ಟ್ರಂಪ್ ಈ ವಿಮಾನವನ್ನು ವೀಕ್ಷಿಸಿ, ತಮ್ಮ ಉಳಿದ ಅಧಿಕಾರಾವಧಿಯ ಪ್ರಯಾಣಕ್ಕೆ ಇದನ್ನು ಸಿದ್ಧಪಡಿಸುವಂತೆ ಸೂಚಿಸಿದ್ದರು.
ಅಧ್ಯಕ್ಷರ ಆದೇಶದ ಮೇರೆಗೆ ಅತ್ಯಂತ ಕಡಿಮೆ ಅವಧಿಯಲ್ಲಿ ಈ ವಿಮಾನವನ್ನು ಸಿದ್ಧಪಡಿಸಿರುವುದರಿಂದ, ಇದರಲ್ಲಿ ಕೆಲವು ಪ್ರಮುಖ ತಾಂತ್ರಿಕ ಬದಲಾವಣೆಗಳನ್ನು ಮಾಡಲು ಸಾಧ್ಯವಾಗಿಲ್ಲ ಎಂದು ಅಸೋಸಿಯೇಟೆಡ್ ಪ್ರೆಸ್ (AP) ವರದಿ ಮಾಡಿದೆ. ಕೋಲ್ಡ್ವಾರ್ ಕಾಲದ ಹಳೆಯ ವಿಮಾನಗಳಲ್ಲಿದ್ದ ಕ್ಷಿಪಣಿ ಪತ್ತೆ ಹಚ್ಚುವ ವ್ಯವಸ್ಥೆ (Missile Detection) ಮತ್ತು ರಕ್ಷಣಾ ಕೌಂಟರ್ಮೇಜರ್ಗಳು ಈ ವಿಮಾನದಲ್ಲಿ ಮೇಲ್ನೋಟಕ್ಕೆ ಕಾಣಿಸುತ್ತಿಲ್ಲ.
ಮಧ್ಯಪ್ರಾಚ್ಯದ ಪ್ರಭಾವಿ ದೇಶವಾದ ಕತಾರ್ನಿಂ ದ ಇಷ್ಟು ದೊಡ್ಡ ಮೊತ್ತದ ವಿಮಾನವನ್ನು ಉಡುಗೊರೆಯಾಗಿ ಪಡೆದಿರುವುದು ಅಮೆರಿಕದಲ್ಲಿ ನೈತಿಕ ಮತ್ತು ರಾಜತಾಂತ್ರಿಕ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಆದರೆ ಇದನ್ನು ಸಮರ್ಥಿಸಿಕೊಂಡಿರುವ ಟ್ರಂಪ್, "ನಮ್ಮನ್ನು ಅತ್ಯಂತ ಗೌರವದಿಂದ ನಡೆಸಿಕೊಂಡ ದೇಶ ನೀಡಿದ ಉಡುಗೊರೆ ಇದಾಗಿದೆ" ಎಂದಿದ್ದಾರೆ. ಭವಿಷ್ಯದಲ್ಲಿ ಈ ವಿಮಾನವನ್ನು ಅಧ್ಯಕ್ಷೀಯ ಲೈಬ್ರರಿಗೆ ಹಸ್ತಾಂತರಿಸುವುದಾಗಿಯೂ ಅವರು ಹೇಳಿದ್ದಾರೆ. ತಮ್ಮ ಮೊದಲ ಅಧಿಕೃತ ಪ್ರಯಾಣದಲ್ಲಿ ಟ್ರಂಪ್ ಈ ವಿಮಾನದ ಮೂಲಕ ನಾರ್ತ್ ಡಕೋಟಾಕ್ಕೆ ಭೇಟಿ ನೀಡಿದ್ದಾರೆ.