ತಿರುವನಂತಪುರಂ: ಏಪ್ರಿಲ್ 9 ರಂದು ನಡೆಯುವ ಕೇರಳ ವಿಧಾನಸಭಾ (Kerala Election) ಚುನಾವಣೆಯಲ್ಲಿ ಮತದಾನದ ಪ್ರಮಾಣವನ್ನು ಹೆಚ್ಚಿಸಲು ಭಾರತೀಯ ಚುನಾವಣಾ ಆಯೋಗವು ಅತ್ಯಂತ ಆಕರ್ಷಕ ಮತ್ತು ವಿನೂತನ ಕ್ರಮಗಳನ್ನು ಕೈಗೊಂಡಿದೆ. ಸಾಮಾನ್ಯವಾಗಿ ಮತದಾನ ಎಂದರೆ ನೀರಸ ಪ್ರಕ್ರಿಯೆ ಎಂದು ಭಾವಿಸುವ ಯುವ ಮತದಾರರನ್ನು ಸೆಳೆಯಲು ಈ ಬಾರಿ ಚುನಾವಣೆಯನ್ನು ಆಚರಿಸಲು ಆಯೋಗ ಮುಂದಾಗಿದೆ.
ಹಲ್ವಾ ವಿತರಿಸಲು ನಿರ್ಧಾರ ಕಾರ್ಪೊರೇಟ್ಸಂಸ್ಥೆಗಳಸಾಥ್ ಯುವ ಪೀಳಿಗೆಯನ್ನು ತಲುಪಲು ಆಯೋಗವು ಎಐ (AI) ವಿಡಿಯೋಗಳು, ರೀಲ್ಸ್ಗಳು ಮತ್ತು 'ಜೆನ್-ಜೆಡ್ ಆಂಥೆಮ್' (Gen-Z Anthem) ಅನ್ನು ಬಿಡುಗಡೆ ಮಾಡಿದೆ. ಮತದಾನದ ನಂತರ ಏಪ್ರಿಲ್ 10 ಮತ್ತು 11ರಂದು ಸಪ್ಲೈಕೋ (SupplyCo) ಮೂಲಕ ಕೇವಲ 1 ರೂಪಾಯಿಗೆ ಅಕ್ಕಿ ಹಿಟ್ಟು ನೀಡುವ ವಿಶೇಷ ಆಫರ್ ಕೂಡ ಘೋಷಿಸಲಾಗಿದೆ. ರಾಜ್ಯದಲ್ಲಿ ಶೇಕಡಾ 90ಕ್ಕಿಂತ ಹೆಚ್ಚು ಮತದಾನವಾಗುವ ಗುರಿಯನ್ನು ಆಯೋಗ ಹೊಂದಿದ್ದು, ಬಿಸಿಲಿನ ತಾಪದಿಂದ ರಕ್ಷಿಸಲು ವ್ಯವಸ್ಥೆಯನ್ನು ಕಲ್ಪಿಸಲಾಗಿದೆ. ಈಗಾಗಲೇ ಮನೆಯಿಂದಲೇ ಮತದಾನ ಮಾಡುವ ಪ್ರಕ್ರಿಯೆಯು ಶೇಕಡಾ 75ರಷ್ಟು ಪೂರ್ಣಗೊಂಡಿದ್ದು, ಏಪ್ರಿಲ್ 4ರ ವೇಳೆಗೆ ಇದು ಮುಕ್ತಾಯಗೊಳ್ಳಲಿದೆ. ಒಟ್ಟಿನಲ್ಲಿ, ಚುನಾವಣಾ ಆಯೋಗವು ಮತದಾನವನ್ನು ಕೇವಲ ಹಕ್ಕಾಗಿ ಮಾತ್ರವಲ್ಲದೆ, ಒಂದು ಸಂಭ್ರಮದ ಆಚರಣೆಯನ್ನಾಗಿ ಮಾಡುವ ಮೂಲಕ ಹೊಸ ದಾಖಲೆ ಬರೆಯಲು ಸಜ್ಜಾಗಿದೆ.
ಕೇರಳದಲ್ಲಿ ಸುಮಾರು 50 ಲಕ್ಷ ಯುವ ಮತದಾರರಿದ್ದು, ಅವರು ಮತದಾನದ ಪ್ರಕ್ರಿಯೆಯಲ್ಲಿ ಹೆಚ್ಚಿನ ಆಸಕ್ತಿ ತೋರಿಸುತ್ತಿಲ್ಲ ಎಂಬ ಅಂಶ ಬೆಳಕಿಗೆ ಬಂದಿದೆ. ಇದನ್ನು ಹೋಗಲಾಡಿಸಲು ಮೊದಲ ಬಾರಿಗೆ ಮತದಾನ ಮಾಡುವವರಿಗೆ ಪ್ರತಿ ಜಿಲ್ಲೆಯ ಆಯ್ದ ಮತಗಟ್ಟೆಗಳಲ್ಲಿ ಸಿಹಿಯಾದ ಹಲ್ವಾ ಪ್ಯಾಕೆಟ್ಗಳನ್ನು ವಿತರಿಸಲು ನಿರ್ಧರಿಸಲಾಗಿದೆ. ಮತದಾನದ ಹಾದಿಯಲ್ಲಿ ಅವರಿಗೆ ಮಧುರವಾದ ಅನುಭವ ನೀಡುವ ಉದ್ದೇಶದಿಂದ ಈ 'ಹಲ್ವಾ ಅಭಿಯಾನ' ಹಮ್ಮಿಕೊಳ್ಳಲಾಗಿದೆ.
ಚುನಾವಣಾ ಆಯೋಗದ ಈ ಪ್ರಯತ್ನಕ್ಕೆ ಖಾಸಗಿ ಸಂಸ್ಥೆಗಳು ಕೂಡ ಕೈಜೋಡಿಸಿವೆ. ಎರ್ನಾಕುಲಂ ಮತ್ತು ತಿರುವನಂತಪುರಂನಲ್ಲಿ ಮತಗಟ್ಟೆಯ 2 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಮತದಾರರಿಗೆ ಉಚಿತ 'ಉಬರ್' (Uber) ರೈಡ್ ಸೌಲಭ್ಯ ನೀಡಲಾಗುತ್ತಿದೆ. ಇದರೊಂದಿಗೆ ಸ್ಟಾರ್ಬಕ್ಸ್ ಮತ್ತು ಕೆಫೆ ಕಾಫಿ ಡೇ ಅಂತಹ ಸಂಸ್ಥೆಗಳು ಮತ ಚಲಾಯಿಸಿದವರಿಗೆ ರಿಯಾಯಿತಿ ನೀಡುವ ಕುರಿತು ಚರ್ಚೆ ನಡೆಸುತ್ತಿವೆ. ಇನ್ನು ಬ್ಲಿಂಕಿಟ್, ಸ್ವಿಗ್ಗಿ ಮತ್ತು ಝೊಮ್ಯಾಟೋ ಅಂತಹ ವಿತರಣಾ ಸಂಸ್ಥೆಗಳು ಮತದಾನದ ಬಗ್ಗೆ ಜಾಗೃತಿ ಸಂದೇಶಗಳನ್ನು ರವಾನಿಸುತ್ತಿವೆ.