ಮುಂಬೈ: ಖ್ಯಾತ ಗಾಯಕ ಮತ್ತು ರಾಪರ್ ಯೋ ಯೋ ಹನಿ ಸಿಂಗ್ (Honey Singh) ತಮ್ಮ ಜೀವನದ ಅತ್ಯಂತ ಕಠಿಣ ಹಾಗೂ ಕರಾಳ ದಿನಗಳ ಬಗ್ಗೆ ಮತ್ತೊಮ್ಮೆ ಮುಕ್ತವಾಗಿ ಮಾತನಾಡಿದ್ದಾರೆ.

ಎಚ್ಚರಿಕೆ ನೀಡಿದ್ದ ಶಾರುಖ್ ಖಾನ್ ಮತ್ತು ಅಕ್ಷಯ್ ಕುಮಾರ್
ತಾವು ಯಶಸ್ಸಿನ ಉತ್ತುಂಗದಲ್ಲಿದ್ದಾಗ ಬಾಲಿವುಡ್ ಸೂಪರ್‌ಸ್ಟಾರ್‌ಗಳಾದ ಶಾರುಖ್ ಖಾನ್ ಮತ್ತು ಅಕ್ಷಯ್ ಕುಮಾರ್ ಅವರು ಮಾದಕ ದ್ರವ್ಯಗಳ ದಾಸರಾಗದಂತೆ ತಮಗೆ ಪದೇ ಪದೇ ಎಚ್ಚರಿಕೆ ನೀಡಿದ್ದರು ಎಂಬ ವಿಷಯವನ್ನು ಅವರು ಬಿಚ್ಚಿಟ್ಟಿದ್ದಾರೆ.

ಬಹಳ ಕಾಲದವರೆಗೆ ಮಾದಕ ದ್ರವ್ಯದ ವ್ಯಸನ ಹಾಗೂ ಬೈಪೋಲಾರ್ ಡಿಸಾರ್ಡರ್ ಎಂಬ ಮಾನಸಿಕ ಆರೋಗ್ಯ ಸಮಸ್ಯೆಯಿಂದಾಗಿ ಚಿತ್ರರಂಗದಿಂದ ಸಂಪೂರ್ಣವಾಗಿ ದೂರವಿದ್ದ ಹನಿ ಸಿಂಗ್, ಇತ್ತೀಚಿನ ಪಾಡ್‌ಕಾಸ್ಟ್ ಸಂದರ್ಶನವೊಂದರಲ್ಲಿ ತಮ್ಮ ಹಳೆಯ ದಿನಗಳ ಹೋರಾಟ, ಒಂಟಿತನ ಮತ್ತು ಅನುಭವಿಸಿದ ಪತನವನ್ನು ನೆನಪಿಸಿಕೊಂಡಿದ್ದಾರೆ.

ವಿಶೇಷ ಸಂದರ್ಶನದಲ್ಲಿ 2011 ರಿಂದ 2014 ರವರೆಗಿನ ದಿನಗಳ ಕುರಿತು ಮಾತನಾಡಿದ ಹನಿ ಸಿಂಗ್, ಅತಿ ಚಿಕ್ಕ ವಯಸ್ಸಿನಲ್ಲಿ ಸಿಕ್ಕ ಭಾರಿ ಹಣ ಮತ್ತು ಅಪಾರ ಜನಪ್ರಿಯತೆ ತಮ್ಮನ್ನು ಸಂಪೂರ್ಣವಾಗಿ ಬದಲಾಯಿಸಿತ್ತು ಎಂದು ಒಪ್ಪಿಕೊಂಡಿದ್ದಾರೆ. ಆ ಸಮಯದಲ್ಲಿ ತಮಗೆ ಪ್ರಜ್ಞೆಯೇ ಇರುತ್ತಿರಲಿಲ್ಲ ಮತ್ತು ತಾವು ನೆಮ್ಮದಿಯಿಂದ ಇರಲಿಲ್ಲ ಎಂದು ಹೇಳಿದ್ದಾರೆ. ಯಶಸ್ಸು ನೆತ್ತಿಗೇರಿದಾಗ ತಮ್ಮ ನಡಿಗೆ, ಮಾತು ಎಲ್ಲವೂ ಬದಲಾಗಿತ್ತು, ಎಲ್ಲರನ್ನೂ ಗೌರವವಿಲ್ಲದೆ ನಡೆಸಿಕೊಳ್ಳುತ್ತಿದ್ದೆ ಮತ್ತು ಈ ಎಲ್ಲ ಸಾಧನೆಯನ್ನು ನಾನೊಬ್ಬನೇ ಮಾಡಿದ್ದು ಎಂದು ಅಹಂಕಾರದಿಂದ ಕೊನೆಗೆ ನನ್ನನ್ನು ನಾನೇ ದೇವರು ಎಂದು ಕರೆದುಕೊಳ್ಳುತ್ತಿದ್ದೆ ಎಂದು ಅವರು ಬೇಸರದಿಂದ ತಿಳಿಸಿದ್ದಾರೆ. ಹಣ ಮತ್ತು ಅಹಂಕಾರದ ಜೊತೆಗೆ ಡ್ರಗ್ಸ್ ವ್ಯಸನವು ತಮ್ಮನ್ನು ಅತ್ಯಂತ ಭೀಕರ ಮಾನಸಿಕ ಸ್ಥಿತಿಗೆ ತಳ್ಳಿತ್ತು ಮತ್ತು ಆ ಕರಾಳ ರೂಪ ತಮಗೇ ಇಷ್ಟವಾಗುತ್ತಿರಲಿಲ್ಲ ಎಂದು ಹನಿ ಸಿಂಗ್ ವಿವರಿಸಿದ್ದಾರೆ. ಆದರೆ, ತಮ್ಮ ಈ ಪತನಕ್ಕೆ ಅವರು ಚಿತ್ರರಂಗವನ್ನು ಹೊಣೆ ಮಾಡದೆ, ತಮ್ಮದೇ ತಪ್ಪು ನಿರ್ಧಾರಗಳು ಮತ್ತು ಆಲೋಚನೆಗಳು ಕಾರಣ ಎಂದು ಹೇಳಿದ್ದಾರೆ.

ತಮ್ಮ ಈ ವಿನಾಶಕಾರಿ ಜೀವನಶೈಲಿಯನ್ನು ಗಮನಿಸಿದ್ದ ಚಿತ್ರರಂಗದ ಹಿರಿಯ ನಟರು ಸಮಯ ಮೀರುವ ಮುನ್ನವೇ ಎಚ್ಚೆತ್ತುಕೊಳ್ಳುವಂತೆ ಬುದ್ಧಿವಾದ ಹೇಳಿದ್ದರು ಎಂಬುದನ್ನು ಹನಿ ಸಿಂಗ್ ನೆನಪಿಸಿಕೊಂಡಿದ್ದಾರೆ. ತಮ್ಮ ಬೆಳವಣಿಗೆಯ ದಿನಗಳಲ್ಲಿ ಅಮಿತಾಭ್ ಬಚ್ಚನ್, ಸಲ್ಮಾನ್ ಖಾನ್, ಶಾರುಖ್ ಖಾನ್ ಮತ್ತು ಅಕ್ಷಯ್ ಕುಮಾರ್ ಅವರಂತಹ ದಿಗ್ಗಜರೊಂದಿಗೆ ಕೆಲಸ ಮಾಡುವ ಅವಕಾಶ ಸಿಕ್ಕಿತ್ತು ಮತ್ತು ಅವರ ಸರಳತೆ ತಮ್ಮ ಮೇಲೆ ಭಾರಿ ಪ್ರಭಾವ ಬೀರಿತ್ತು ಎಂದಿದ್ದಾರೆ. ವಿಶೇಷವಾಗಿ ಶಾರುಖ್ ಖಾನ್ ಮತ್ತು ಅಕ್ಷಯ್ ಕುಮಾರ್ ಅವರು ತಮ್ಮ ತಪ್ಪು ಹವ್ಯಾಸಗಳಿಂದ ದೂರವಿರಲು ಸದಾ ತಿಳಿಸುತ್ತಿದ್ದರು ಎಂದಿದ್ದಾರೆ. ಈ ಕೆಟ್ಟ ಹವ್ಯಾಸಗಳು ನಿನ್ನನ್ನು ಸಂಪೂರ್ಣವಾಗಿ ಹಾಳುಮಾಡುತ್ತವೆ, ನಿನ್ನ ಕೆರಿಯರ್ ಮುಗಿಸಿ ಸದೆಬಡಿಯುತ್ತವೆ ಎಂದು ಶಾರುಖ್ ಖಾನ್ ಹಲವು ಬಾರಿ ಪ್ರೀತಿಯಿಂದಲೇ ಎಚ್ಚರಿಸಿದ್ದರು ಎಂದು ಅವರು ಹೇಳಿದ್ದಾರೆ.

ಸಂಗೀತ ಕಾರ್ಯಕ್ರಮದಲ್ಲಿ ಕುಸಿದು ಬಿದಿದ್ದ ಹನಿ ಸಿಂಗ್
'ದೇಸಿ ಕಲಾಕಾರ್' ನಂತಹ ಸೂಪರ್‌ಹಿಟ್ ಹಾಡುಗಳ ನಂತರ ಹನಿ ಸಿಂಗ್ ಜನಪ್ರಿಯತೆ ಮುಗಿಲು ಮುಟ್ಟಿದ್ದರೂ, ತೆರೆಯ ಮರೆಯಲ್ಲಿ ಅವರ ವೈಯಕ್ತಿಕ ಜೀವನ ಸಂಪೂರ್ಣವಾಗಿ ಹದಗೆಟ್ಟಿತ್ತು. ತೀವ್ರ ಮಾದಕ ವ್ಯಸನದ ನಡುವೆಯೇ ಅವರಿಗೆ ಬೈಪೋಲಾರ್ ಡಿಸಾರ್ಡರ್ ಇರುವುದು ಪತ್ತೆಯಾಗಿತ್ತು. 2017 ರ ಸಂಗೀತ ಪ್ರವಾಸವೊಂದರ ಮಧ್ಯದಲ್ಲೇ ತೀವ್ರವಾಗಿ ಕುಸಿದುಬಿದ್ದ ಅವರು, ಸಂಗೀತ ಲೋಕ ಮತ್ತು ಸಾರ್ವಜನಿಕ ಜೀವನದಿಂದ ಸಂಪೂರ್ಣವಾಗಿ ಹಿಂದೆ ಸರಿದು ದೆಹಲಿಗೆ ಮರಳಿ ಜಾಗತಿಕ ಮಟ್ಟದ ವೈದ್ಯರ ತಂಡದೊಂದಿಗೆ ಚಿಕಿತ್ಸೆ ಮತ್ತು ಚೇತರಿಕೆ ಆರಂಭಿಸಿದರು. ಹಿಂದಿನ ಸಂದರ್ಶನವೊಂದರಲ್ಲಿ ತಮ್ಮ ವ್ಯಸನದ ತೀವ್ರತೆಯನ್ನು ಬಿಚ್ಚಿಟ್ಟಿದ್ದ ಅವರು, ತಾವು ದಿನಕ್ಕೆ 12 ರಿಂದ 15 ಜಾಯಿಂಟ್‌ಗಳನ್ನು ಸೇದುತ್ತಾ, ಇಡೀ ಬಾಟಲಿ ಮದ್ಯ ಕುಡಿಯುತ್ತಾ ಕುಟುಂಬವನ್ನೇ ಮರೆತು ನಿಯಂತ್ರಣ ಕಳೆದುಕೊಂಡಿದ್ದ ದಿನಗಳನ್ನು ನೆನೆದಿದ್ದರು. ಒಮ್ಮೆ ಅತಿಯಾದ ನಶೆಯಲ್ಲಿ ತಮ್ಮ ಸ್ನೇಹಿತನ ಹೊಟ್ಟೆಗೆ ಎಂಟು ಬಾರಿ ಕಚ್ಚಿದ್ದ ಘಟನೆಯನ್ನೂ ಅವರು ಹಂಚಿಕೊಂಡಿದ್ದರು.