ಇದೀಗ ಈ ವಿವಾದಕ್ಕೆ ಸೂಕ್ತ ರೀತಿಯಲ್ಲೇ ಪ್ರತಿಕ್ರಿಯೆ ನೀಡಿರುವ ಕೃತಿ, ತಮ್ಮ ತಂಗಿ ನೂಪುರ್ ಸನೋನ್ ಜೊತೆ ರಾಖಿ ಹಬ್ಬ ಆಚರಿಸುವ ಮೂಲಕ ಟ್ರೋಲರ್‌ಗಳಿಗೆ ಸಖತ್ ಟಾಂಗ್ ನೀಡಿದ್ದಾರೆ.

ವಿಮರ್ಶಕರಿಗೆ ತಿರುಗೇಟು ಕೊಟ್ಟ ನಟಿ

ತಮ್ಮ ಸಹೋದರಿ ನೂಪುರ್ ಕೈಗೆ ರಾಖಿ ಕಟ್ಟಿರುವ ಸುಂದರ ಫೋಟೋವನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿರುವ ಕೃತಿ, "ರಾಖಿ ಹಬ್ಬದ ಉಡುಪುಗಳ ಬಗ್ಗೆ ಚರ್ಚಿಸುವ ಫ್ಯಾಷನ್ ಕಮಿಟಿ ಇನ್ನು ತನ್ನ ಚರ್ಚೆಯನ್ನು ಮುಂದುವರಿಸಲಿ. ನಾವು ಮಾತ್ರ ಹಬ್ಬದ ನಿಜವಾದ ಅರ್ಥ ಮತ್ತು ಪ್ರೀತಿಯ ಕಡೆಗೆ ಗಮನ ಹರಿಸುತ್ತಿದ್ದೇವೆ" ಎಂದು ಬರೆದುಕೊಳ್ಳುವ ಮೂಲಕ ವಿಮರ್ಶಕರಿಗೆ ತಿರುಗೇಟು ನೀಡಿದ್ದಾರೆ.

ಏನಿದು ರಕ್ಷಾ ಬಂಧನ ಜಾಹೀರಾತು ವಿವಾದ?
ಜ್ಯುವೆಲ್ಲರಿ ಜಾಹೀರಾತಿನಲ್ಲಿ ಕೃತಿ ಸನೋನ್ ಧರಿಸಿದ್ದ ಬ್ರಾಲೆಟ್ ಶೈಲಿಯ ಚೋಲಿ ಉಡುಪು ಸಂಪ್ರದಾಯಕ್ಕೆ ವಿರುದ್ಧವಾಗಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಹಲವರು ಆಕ್ಷೇಪ ವ್ಯಕ್ತಪಡಿಸಿದ್ದರು. ಹಬ್ಬದ ವಾತಾವರಣಕ್ಕೆ ಇಂತಹ ಉಡುಪು ಸೂಕ್ತವಲ್ಲ ಎಂದು ಟೀಕಿಸಲಾಗಿತ್ತು. ಇದರ ಜೊತೆಗೆ ಜಾಹೀರಾತಿನಲ್ಲಿ ನಾಯಿಗೂ ರಾಖಿ ಕಟ್ಟುವ ದೃಶ್ಯವಿದ್ದು, ಇದು ಕೂಡ ಕೆಲವರ ಅಸಮಾಧಾನಕ್ಕೆ ಕಾರಣವಾಗಿತ್ತು. ನಟಿ ಹಾಗೂ ಸಂಸದೆ ಕಂಗನಾ ರಣಾವತ್ ಸಹ ಈ ಬಗ್ಗೆ ಬಹಿರಂಗವಾಗಿ ಕಿಡಿಕಾರಿದ್ದು, "ಬಿಕಿನಿ ಧರಿಸಿ ರಾಖಿ ಕಟ್ಟಲಾಗುತ್ತಿದೆ" ಎಂದು ಆರೋಪಿಸಿ ಜಾಹೀರಾತನ್ನು ಟೀಕಿಸಿದ್ದರು.

ಈ ಎಲ್ಲಾ ಟೀಕೆಗಳಿಗೆ ಇನ್‌ಸ್ಟಾಗ್ರಾಮ್ ಮೂಲಕ ತಿರುಗೇಟು ನೀಡಿದ್ದ ಕೃತಿ ಸನೋನ್, "ಮಹಿಳೆ ಧರಿಸುವ ಉಡುಪುಗಳು ಆಕೆಯ ಸಂಸ್ಕೃತಿ ಮತ್ತು ಆಚಾರ-ವಿಚಾರದ ಗೌರವವನ್ನು ನಿರ್ಧರಿಸುವುದಿಲ್ಲ. ಹಬ್ಬಗಳ ಸಾಂಸ್ಕೃತಿಕ ಮಹತ್ವ ಇರುವುದು ನಾವು ತೊಡುವ ಬಟ್ಟೆಯಲ್ಲಲ್ಲ, ಬದಲಾಗಿ ನಮ್ಮ ಮನಸ್ಸಿನಲ್ಲಿರುವ ಭಾವನೆಗಳಲ್ಲಿ. ಮಹಿಳೆಯರು ಏನು ಧರಿಸಬೇಕು ಎಂದು ಹೆಜ್ಜೆ ಹೆಜ್ಜೆಗೂ ಶಾಸನ ಮಾಡುವುದನ್ನು ಜಗತ್ತು ಎಂದು ನಿಲ್ಲಿಸುತ್ತದೆಯೋ ಗೊತ್ತಿಲ್ಲ. ಸಾಂಪ್ರದಾಯಿಕ ಉಡುಪುಗಳ ಶೈಲಿ ಬದಲಾಗಿರಬಹುದು, ಆದರೆ ಭಾರತೀಯ ಸಂಸ್ಕೃತಿ ಇರುವುದು ಪ್ರತಿಯೊಬ್ಬರ ಹೃದಯದಲ್ಲೇ ಹೊರತು ಅವರ ಬಟ್ಟೆಯ ನೆಕ್‌ಲೈನ್‌ನಲ್ಲಲ್ಲ" ಎಂದು ಕಟುವಾಗಿ ಉತ್ತರ ಕೊಟ್ಟಿದ್ದರು.

ಇನ್ನು ನಾಯಿಗೆ ರಾಖಿ ಕಟ್ಟುವ ವಿಚಾರಕ್ಕೆ ಸ್ಪಷ್ಟನೆ ನೀಡಿದ್ದ ನಟಿ, "ರಕ್ಷಾ ಬಂಧನ ಎಂಬುದು ಕೇವಲ ಸಹೋದರ-ಸಹೋದರಿಯರ ಸಂಬಂಧಕ್ಕೆ ಮಾತ್ರ ಸೀಮಿತವಲ್ಲ, ಅದು ಪರಸ್ಪರ ರಕ್ಷಣೆಯ ರಕ್ಷಾಸೂತ್ರ. ನಾನು ಮತ್ತು ನನ್ನ ತಂಗಿ ವರ್ಷಗಳಿಂದ ಪರಸ್ಪರ ರಾಖಿ ಕಟ್ಟಿಕೊಳ್ಳುತ್ತೇವೆ. ನಮ್ಮ ರಕ್ಷಣೆಗೆ ಸಹೋದರನೇ ಇರಬೇಕೆಂದೇನೂ ಇಲ್ಲ. ನಮಗೆ ನಮ್ಮ ಸಾಕುನಾಯಿಗಳು ಸಹ ಕುಟುಂಬದ ಸದಸ್ಯರಿದ್ದಂತೆ, ಆದ್ದರಿಂದ ಅವುಗಳಿಗೂ ರಾಖಿ ಕಟ್ಟಿದ್ದೇವೆ" ಎಂದಿದ್ದಾರೆ. ಕೃತಿ ಅವರ ತಂಗಿ ನೂಪುರ್ ಕೂಡ ಅಕ್ಕನ ಬೆಂಬಲಕ್ಕೆ ನಿಂತು, "ರಾಖಿ ಕಟ್ಟಿಸಿಕೊಂಡ ನನಗೇ ಇಲ್ಲದ ಅಭ್ಯಂತರ ಬೇರೆಯವರಿಗೆ ಏತಕ್ಕೆ?" ಎಂದು ಪ್ರಶ್ನಿಸಿದ್ದಾರೆ.