AI generated image
ರಾಯಚೂರು/ ಕೊಪ್ಪಳ : ಕರ್ನಾಟಕದ ಬಹುತೇಕ ಭಾಗಗಳಲ್ಲಿ ಮುಂಗಾರು ಮಳೆಯ (Monsoon rain) ಆರ್ಭಟ ಜೋರಾಗಿದ್ದು ಸಾರ್ವಜನಿಕರ ದೈನಂದಿನ ಬದುಕಿಗೆ ತೊಂದರೆಯಾಗಿದೆ. ಆದರೆ ಇದಕ್ಕೆ ತದ್ವಿರುದ್ಧವಾಗಿ ಕಲ್ಯಾಣ ಕರ್ನಾಟಕ ಭಾಗದ ರಾಯಚೂರು (Raichur) ಹಾಗೂ ಕೊಪ್ಪಳ (Koppala) ಜಿಲ್ಲೆಗಳಲ್ಲಿ ವರುಣನ ಕೃಪೆ ಇಲ್ಲದೆ ತೀವ್ರ ಕ್ಷಾಮದ ವಾತಾವರಣ ಉಂಟಾಗಿದೆ.
ಆರಂಭದ ಹದ ಮಳೆಗೆ ಬಿತ್ತನೆ ಕಾರ್ಯ ಮುಗಿಸಿದ್ದ ಕೃಷಿಕರು (farmers), ಈಗ ತೇವಾಂಶದ ಕೊರತೆಯಿಂದಾಗಿ ತಮ್ಮ ಕಣ್ಣೆದುರೇ ಒಣಗುತ್ತಿರುವ ಬೆಳೆಗಳನ್ನು ಕಂಡು ಕಂಗಾಲಾಗಿದ್ದಾರೆ. ಬಿಸಿಲಿನ ನಾಡು ರಾಯಚೂರಿನಲ್ಲಿ ಮೇ ತಿಂಗಳ ಅಂತ್ಯದಲ್ಲಿ ಬಿದ್ದ ಮಳೆಯನ್ನು ನಂಬಿಕೊಂಡು ರೈತರು ಹತ್ತಿ ಮತ್ತು ತೊಗರಿ ಬಿತ್ತಿದ್ದರು. ಆದರೆ ಈಗ ಮಳೆಯ ಸುಳಿವೇ ಇಲ್ಲದ ಕಾರಣ ಕೃಷಿ ಭೂಮಿಗಳು ಒಣಗಿ ನಿಂತಿವೆ. ಆಶಾಪುರ ಸೇರಿದಂತೆ ಜಿಲ್ಲೆಯ ಹಲವು ಹಳ್ಳಿಗಳಲ್ಲಿ ಈಗಾಗಲೇ ಮೂರು ಬಾರಿ ಬಿತ್ತನೆ ಮಾಡಿದರೂ ಬೀಜಗಳು ಮೊಳಕೆಯೊಡೆದಿಲ್ಲ, ಇನ್ನು ಕೆಲವು ಕಡೆ ಬೆಳೆದ ಅಲ್ಪಸ್ವಲ್ಪ ಗಿಡಗಳು ಬಾಡುತ್ತಿವೆ. ಇತ್ತ ಕೊಪ್ಪಳ ಜಿಲ್ಲೆಯಲ್ಲೂ ಪರಿಸ್ಥಿತಿ ಭಿನ್ನವಾಗಿಲ್ಲದೆ, ತಿಂಗಳಿನಿಂದ ಮಳೆಯಾಗದ ಕಾರಣ ಭೀಕರ ಬರದ ಛಾಯೆ ಆವರಿಸಿದೆ. ಭಾನಾಪುರದ ಸಿದ್ದಲಿಂಗನಗೌಡ ಎಂಬ ರೈತರು ಸಾವಿರಾರು ರೂಪಾಯಿ ಸಾಲ ಮಾಡಿ ಬೆಳೆದ ತೊಗರಿಯನ್ನು ಉಳಿಸಿಕೊಳ್ಳಲು ಪ್ರತಿ ಟ್ಯಾಂಕರ್ ನೀರಿಗೆ ನೂರಾರು ರೂಪಾಯಿ ವೆಚ್ಚ ಮಾಡಿ ಗಿಡಗಳಿಗೆ ಉಣಿಸುತ್ತಿದ್ದಾರೆ. ಹೀಗೆ ಮಳೆಯ ಕೊರತೆಯಿಂದಾಗಿ ಕೊಪ್ಪಳದಲ್ಲಿ ಈ ಬಾರಿ ನಿರೀಕ್ಷಿತ ಮಟ್ಟದಲ್ಲಿ ಬಿತ್ತನೆಯೇ ನಡೆದಿಲ್ಲ. ಬಿತ್ತನೆಗಾಗಿ ತಂದಿದ್ದ ಬೀಜ ಮತ್ತು ರಸಗೊಬ್ಬರಗಳು ರೈತರ ಮನೆಗಳಲ್ಲೇ ಉಳಿದುಕೊಂಡಿವೆ. ರಾಜ್ಯದ ಒಂದು ಕಡೆ ಅತಿವೃಷ್ಟಿಯ ಭೀತಿಯಿದ್ದರೆ, ಕಲ್ಯಾಣ ಕರ್ನಾಟಕದಲ್ಲಿ ಮಾತ್ರ ಅನಾವೃಷ್ಟಿಯ ಆತಂಕ ಎದುರಾಗಿದೆ. ಈ ಕಠಿಣ ಪರಿಸ್ಥಿತಿಯಲ್ಲಿ ಜನಪ್ರತಿನಿಧಿಗಳು ಹಾಗೂ ಆಡಳಿತ ವರ್ಗದವರು ತಕ್ಷಣ ಕಾರ್ಯಪ್ರವೃತ್ತರಾಗಿ ಸಂಕಷ್ಟದಲ್ಲಿರುವ ಅನ್ನದಾತರಿಗೆ ಸೂಕ್ತ ಪರಿಹಾರ ಮತ್ತು ನೆರವು ನೀಡಬೇಕಾಗಿದೆ.