ಏನಿದೆ ಪೋಸ್ಟ್‌ನಲ್ಲಿ?
ಷರೀಫ್ ಅವರ ಈ ಪೋಸ್ಟ್‌ನ ಎಡಿಟ್ ಹಿಸ್ಟರಿಯಲ್ಲಿ ನೋಡಿದಾಗ 'Draft - Pakistan's PM Message on X' ಎಂಬ ಲೇಬಲ್‌ನೊಂದಿಗೆ ಕಾಣಿಸಿಕೊಂಡಿದೆ. ಅಂದರೆ ಈ ಸಂದೇಶವು ಮೊದಲೇ ಸಿದ್ಧಪಡಿಸಿದ ಕರಡು ಪ್ರತಿಯಾಗಿತ್ತು ಎಂಬುದು ಇದರಿಂದ ಬಹಿರಂಗವಾಗಿದೆ. ಪ್ರಧಾನಿ ಅವರ ಅಧಿಕೃತ ಖಾತೆಯಲ್ಲಿ 'ಡ್ರಾಫ್ಟ್' ಎಂಬ ಪದ ಬಳಕೆಯಾಗಿರುವುದು ನೋಡಿ ನೆಟ್ಟಿಗರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಈ ಸಂದೇಶವನ್ನು ಪಾಕಿಸ್ತಾನವೇ ಸಿದ್ಧಪಡಿಸಿದ್ದೇ ಅಥವಾ ಬೇರೆ ಯಾವುದಾದರೂ ದೇಶದ ಪ್ರಭಾವದಿಂದ ಬರೆಯಲಾಗಿದೆಯೇ ಎಂಬ ಚರ್ಚೆ ಈಗ ಶುರುವಾಗಿದೆ.

ವಿಶೇಷವೆಂದರೆ ಈ ಪೋಸ್ಟ್‌ನಲ್ಲಿನ ಭಾಷೆಯು ವೈಟ್ ಹೌಸ್ ನೀಡಿದ ಸೂಚನೆಯಂತೆ ಕಾಣುತ್ತಿದೆ ಎಂದು ಕೆಲವು ಬಳಕೆದಾರರು ಸಾಮಾಜಿಕ ಜಾಲತಾಣದಲ್ಲಿ ಟೀಕೆ ಮಾಡಿದ್ದಾರೆ.. ಅಮೆರಿಕಕ್ಕೆ ಅನುಕೂಲವಾಗುವಂತೆ ಈ ಸಂದೇಶವನ್ನು ಸಿದ್ಧಪಡಿಸಲಾಗಿದ್ದು, ಪ್ರಧಾನಿ ಖಾತೆಯಿಂದ ಹಾಕಲಾಗಿದೆ ಅಷ್ಟೇ ಎಂಬ ವದಂತಿಗಳು ಹರಡುತ್ತಿವೆ. ಈ ಬಗ್ಗೆ ಪಾಕಿಸ್ತಾನದಿಂದ ಆಗಲಿ ಅಥವಾ ಅಮೆರಿಕದಿಂದ ಯಾವುದೇ ಅಧಿಕೃತ ಸ್ಪಷ್ಟನೆ ಹೊರಬಿದ್ದಿಲ್ಲ. ಆದರೂ ಪಾಕಿಸ್ತಾನವು ಇರಾನ್ ಮತ್ತು ಅಮೆರಿಕ ನಡುವೆ ಎರಡು ವಾರಗಳ ಕದನ ವಿರಾಮ ಘೋಷಣೆ ಆಗಿರುವುದರಲ್ಲಿ ಪ್ರಮುಖ ಪಾತ್ರ ವಹಿಸಿರುವುದು ಗಮನಾರ್ಹ ಆಗಿದೆ. ಒಂದು ವೇಳೆ ದಾಳಿಗಳು ನಿಂತರೆ ತಾನು ಕೂಡ ಸೈನಿಕ ಕ್ರಮಗಳನ್ನು ನಿಲ್ಲಿಸುವುದಾಗಿ ಇರಾನ್ ತಿಳಿಸಿದ್ದು, ಈ ಅವಧಿಯಲ್ಲಿ ಸಮುದ್ರ ಮಾರ್ಗದಲ್ಲಿ ಸರಕು ಸಾಗಣೆಗೆ ಸುರಕ್ಷತೆ ನೀಡುವುದಾಗಿ ಭರವಸೆ ನೀಡಿದೆ.