ಸುಮಾರು 5,000 ಅಮೆರಿಕ ನೌಕಾಪಡೆ ಮತ್ತು ಮೆರೈನ್ ಸಿಬ್ಬಂದಿ ಥಾಯ್ಲೆಂಡ್‌ನ ಪಟ್ಟಾಯ ನಗರಕ್ಕೆ ಆಗಮಿಸುತ್ತಿರುವ ಹಿನ್ನೆಲೆಯಲ್ಲಿ ಸ್ಥಳೀಯ ಪೊಲೀಸರು ಭದ್ರತೆ ಹಾಗೂ ವೇಶ್ಯಾವಾಟಿಕೆ (Pattaya Sex) ನಿಯಂತ್ರಣಕ್ಕೆ ವಿಶೇಷ ಕ್ರಮ ಕೈಗೊಂಡಿದ್ದಾರೆ.

ಅಮೆರಿಕದ ನೌಕಾಪಡೆಯ USS Abraham Lincoln ವಿಮಾನವಾಹಕ ನೌಕೆ ಬುಧವಾರ ಸಮೀಪದ ಲೇಮ್ ಚಾಬಾಂಗ್ ಬಂದರಿಗೆ ತಲುಪುವ ನಿರೀಕ್ಷೆಯಿದೆ. ಇದರೊಂದಿಗೆ ಇನ್ನೆರಡು ಅಮೆರಿಕ ನೌಕಾಪಡೆ ಹಡಗುಗಳು ಆಗಮಿಸಲಿದ್ದು, ಸಿಬ್ಬಂದಿಗೆ ದೀರ್ಘಾವಧಿಯ ಸಮುದ್ರಯಾನದ ಬಳಿಕ ವಿಶ್ರಾಂತಿ ಮತ್ತು ಮನರಂಜನೆಗಾಗಿ ಕರಾವಳಿಗೆ ತೆರಳಲು ಅವಕಾಶ ನೀಡಲಾಗುತ್ತದೆ.

ಸೇನಾ ಸಿಬ್ಬಂದಿಯ ಆಗಮನದಿಂದ ಪಟ್ಟಾಯದ ಪ್ರಮುಖ ಪ್ರವಾಸಿ ಮತ್ತು ರಾತ್ರಿ ಮನರಂಜನಾ ಪ್ರದೇಶಗಳಲ್ಲಿ ಜನಸಂದಣಿ ಹೆಚ್ಚಾಗುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಪೊಲೀಸರು ಬೀಚ್ ಪ್ರದೇಶಗಳು ಹಾಗೂ ಪ್ರಮುಖ ನೈಟ್‌ಲೈಫ್ ವಲಯಗಳಲ್ಲಿ ಗಸ್ತು ಹೆಚ್ಚಿಸಿದ್ದಾರೆ.

ಅಮೆರಿಕ ಸಿಬ್ಬಂದಿಯ ಆಗಮನಕ್ಕೂ ಮುನ್ನವೇ ಪಟ್ಟಾಯ ಪೊಲೀಸರು ಕಾರ್ಯಾಚರಣೆ ಆರಂಭಿಸಿದ್ದಾರೆ. ವಾರಾಂತ್ಯದಲ್ಲಿ ನಡೆದ ದಾಳಿಗಳಲ್ಲಿ ವೇಶ್ಯಾವಾಟಿಕೆ ಶಂಕೆಯ ಮೇರೆಗೆ ಸುಮಾರು 40ರಿಂದ 50 ಮಂದಿಯನ್ನು ವಶಕ್ಕೆ ಪಡೆಯಲಾಗಿದೆ ಎಂದು ವರದಿಯಾಗಿದೆ.

ಪಟ್ಟಾಯ ಪೊಲೀಸ್ ಮುಖ್ಯಸ್ಥ ಅನೇಕ್ ಶ್ರೀಥಾಂಗ್ಯೋ, ವೇಶ್ಯಾವಾಟಿಕೆಯನ್ನು ಸಂಪೂರ್ಣವಾಗಿ ನಿಯಂತ್ರಿಸುವುದು ಸವಾಲಿನ ಕೆಲಸವಾಗಿದೆ ಎಂದು ಹೇಳಿದ್ದಾರೆ. ಸಾರ್ವಜನಿಕ ಸ್ಥಳಗಳಲ್ಲಿಯೇ ಸಂಭಾವ್ಯ ಗ್ರಾಹಕರನ್ನು ಸಂಪರ್ಕಿಸುವ ಸಾಧ್ಯತೆ ಇರುವುದರಿಂದ ಪೊಲೀಸರಿಗೆ ಎಲ್ಲ ಚಟುವಟಿಕೆಗಳ ಮೇಲೂ ನಿಗಾ ಇಡುವುದು ಕಷ್ಟವಾಗುತ್ತಿದೆ ಎಂದು ಅವರು ತಿಳಿಸಿದ್ದಾರೆ.

ಪಟ್ಟಾಯ ಆರ್ಥಿಕತೆಗೆ ತಾತ್ಕಾಲಿಕ ಲಾಭದ ನಿರೀಕ್ಷೆ

ಅಮೆರಿಕ ಸೇನಾ ಸಿಬ್ಬಂದಿಯ ಭೇಟಿಯಿಂದ ಪಟ್ಟಾಯದ ಪ್ರವಾಸೋದ್ಯಮ ಕ್ಷೇತ್ರಕ್ಕೆ ಅಲ್ಪಾವಧಿಯಲ್ಲಿ ಉತ್ತೇಜನ ಸಿಗುವ ನಿರೀಕ್ಷೆಯಿದೆ. ಹೋಟೆಲ್‌ಗಳು, ರೆಸ್ಟೋರೆಂಟ್‌ಗಳು, ಬಾರ್‌ಗಳು, ಅಂಗಡಿಗಳು ಸೇರಿದಂತೆ ಹಲವು ವಾಣಿಜ್ಯ ಚಟುವಟಿಕೆಗಳು ಹೆಚ್ಚಾಗಬಹುದು.

ಪಟ್ಟಾಯ ಮೇಯರ್ ಪೊರಮಾಸ್ ನ್ಗಾಂಪಿಚೆಸ್ ಅವರ ಅಂದಾಜಿನ ಪ್ರಕಾರ, ಪ್ರತಿ ಅಮೆರಿಕ ಸೇನಾ ಸಿಬ್ಬಂದಿ ದಿನಕ್ಕೆ ಸುಮಾರು 1,000ರಿಂದ 3,000 ಥಾಯ್ ಬಹ್ತ್ ವರೆಗೆ ಖರ್ಚು ಮಾಡುವ ಸಾಧ್ಯತೆಯಿದೆ. ಆರ್ಥಿಕ ಚಟುವಟಿಕೆಯ ಪರಿಣಾಮ ಹಲವು ದಿನಗಳವರೆಗೆ ಹರಡಬಹುದು.

ಒಮ್ಮೆ ಸಣ್ಣ ಮೀನುಗಾರಿಕಾ ಗ್ರಾಮವಾಗಿದ್ದ ಪಟ್ಟಾಯ, ವಿಯೆಟ್ನಾಂ ಯುದ್ಧದ ಅವಧಿಯಲ್ಲಿ ಥಾಯ್ಲೆಂಡ್‌ನಲ್ಲಿ ನಿಯೋಜಿಸಲಾಗಿದ್ದ ಅಮೆರಿಕ ಸೇನಾ ಸಿಬ್ಬಂದಿ ವಿಶ್ರಾಂತಿಗಾಗಿ ಭೇಟಿ ನೀಡಲು ಆರಂಭಿಸಿದ ಬಳಿಕ ಪ್ರಮುಖ ಪ್ರವಾಸಿ ತಾಣವಾಗಿ ರೂಪುಗೊಂಡಿತು.

ಥಾಯ್ಲೆಂಡ್‌ನಲ್ಲಿ ವೇಶ್ಯಾವಾಟಿಕೆ ಕಾನೂನುಬಾಹಿರವಾಗಿದ್ದರೂ, ಪಟ್ಟಾಯ ಸೇರಿದಂತೆ ಕೆಲವು ಪ್ರಮುಖ ಪ್ರವಾಸಿ ನಗರಗಳಲ್ಲಿ ಈ ಉದ್ಯಮ ಬಹಿರಂಗವಾಗಿ ಕಾಣಿಸಿಕೊಳ್ಳುತ್ತದೆ. ಈ ಬಾರಿ ಪಟ್ಟಾಯಕ್ಕೆ ಆಗಮಿಸುತ್ತಿರುವ USS Abraham Lincoln ನೌಕೆಗೆ ಇತ್ತೀಚಿನ ನಿಯೋಜನೆ ಅತ್ಯಂತ ದೀರ್ಘವಾಗಿತ್ತು. ನೌಕೆ ಕಳೆದ ನವೆಂಬರ್‌ನಲ್ಲಿ ಸ್ಯಾನ್ ಡಿಯಾಗೋ ಬಂದರಿನಿಂದ ಹೊರಟ ಬಳಿಕ ಮಧ್ಯಪ್ರಾಚ್ಯದಲ್ಲಿನ ಅಮೆರಿಕದ ಸೇನಾ ಕಾರ್ಯಾಚರಣೆಗಳ ಹಿನ್ನೆಲೆಯಲ್ಲಿ ಅದರ ನಿಯೋಜನೆಯಲ್ಲಿ ಬದಲಾವಣೆ ಮಾಡಲಾಗಿತ್ತು. ನೌಕೆ ಸತತವಾಗಿ 200ಕ್ಕೂ ಹೆಚ್ಚು ದಿನ ಸಮುದ್ರದಲ್ಲಿದ್ದ ಅವಧಿ ಆಧುನಿಕ ಕಾಲದ ಅಮೆರಿಕದ ವಿಮಾನವಾಹಕ ನೌಕೆಗಳ ದೀರ್ಘ ನಿಯೋಜನೆಗಳಲ್ಲಿ ಒಂದಾಗಿದೆ ಎಂದು ವರದಿಯಾಗಿದೆ.

ಇಷ್ಟು ದೀರ್ಘಾವಧಿಯ ಕಾರ್ಯಾಚರಣೆಯಿಂದ ಸಿಬ್ಬಂದಿಯ ಮಾನಸಿಕ ಒತ್ತಡ ಮತ್ತು ಮನೋಬಲದ ಬಗ್ಗೆ ಕೂಡ ಆತಂಕ ವ್ಯಕ್ತವಾಗಿದೆ. ಇತ್ತೀಚಿನ ವರದಿಗಳು ನೌಕೆಯಲ್ಲಿನ ಆತ್ಮಹತ್ಯೆ ಪ್ರಯತ್ನಗಳು ಹಾಗೂ ಸಿಬ್ಬಂದಿಯ ಮನೋಬಲ ಕುಸಿತದ ಬಗ್ಗೆ ಪ್ರಶ್ನೆಗಳನ್ನು ಎತ್ತಿವೆ.