ನವದೆಹಲಿ: ಸೆಪ್ಟೆಂಬರ್ 5ರ ಶಿಕ್ಷಕರ ದಿನಾಚರಣೆಯಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ(Narendra Modi) ಅವರು ದೆಹಲಿಯ(Delhi) ಪ್ರತಿಷ್ಠಿತ ಶ್ರೀ ರಾಮ್ ಕಾಲೇಜ್ ಆಫ್ ಕಾಮರ್ಸ್ (SRCC) ಕಾಲೇಜಿಗೆ ಭೇಟಿ ನೀಡುವ ಸಾಧ್ಯತೆಯಿದೆ. 100 ವರ್ಷಗಳನ್ನು ಪೂರೈಸುತ್ತಿರುವ ಈ ಕಾಲೇಜಿನ ಶತಾಬ್ದಿ ಮಹೋತ್ಸವ ಆಚರಣೆಯಲ್ಲಿ ಭಾಗವಹಿಸಲಿರುವ ಪ್ರಧಾನಿ ಮೋದಿ, ಯುವ ಜನ್-ಝಿ (Gen Z) ವಿದ್ಯಾರ್ಥಿಗಳೊಂದಿಗೆ ನೇರ ಸಂವಾದ ನಡೆಸಲಿದ್ದಾರೆ ಎಂದು ಎಎನ್ಐ ವರದಿ ಮಾಡಿದೆ.
ಯುವ ಪೀಳಿಗೆ ತಲುಪಲು ಬಿಜೆಪಿ ಬೃಹತ್ ಪ್ಲಾನ್ ವಿಶೇಷ ತಂಡ ರಚನೆ: ಯುವಕರೊಂದಿಗೆ ಸುಲಭವಾಗಿ ಸಂವಹನ ನಡೆಸಲು ಬಿಜೆಪಿ ಅಧ್ಯಕ್ಷ ನಿತಿನ್ ನವೀನ್ ಅವರ ನೇತೃತ್ವದಲ್ಲಿ ಇತ್ತೀಚೆಗೆ ಸಭೆ ನಡೆದಿದ್ದು, ಪಕ್ಷದ ಹಿರಿಯ ನಾಯಕರು ಹಾಗೂ ಯುವ ಪ್ರತಿನಿಧಿಗಳನ್ನೊಳಗೊಂಡ 'ಜನ್-ಝಿ ಔಟ್ರೀಚ್' (Gen Z Outreach) ತಂಡವನ್ನು ರಚಿಸಲಾಗಿದೆ. ವಿವಿಧ ಕಾರ್ಯಕ್ರಮಗಳು: ಕೇವಲ ರಾಜಕೀಯ ಸಮಾವೇಶಗಳಿಗೆ ಸೀಮಿತವಾಗದೆ, ಬೈಕ್ ಯಾತ್ರೆಗಳು, ಹ್ಯಾಕಥಾನ್ಗಳು, ಮ್ಯಾರಥಾನ್, ಸೈಕ್ಲಿಂಗ್ ಹಾಗೂ ನಾವೀನ್ಯತೆ ಸ್ಪರ್ಧೆಗಳ ಮೂಲಕ ಯುವಜನತೆಯನ್ನು ತಲುಪಲು ಯೋಜಿಸಲಾಗಿದೆ. NEET ಪ್ರತಿಭಟನೆಯ ಬೆನ್ನಲ್ಲೇ ಯುವಕರತ್ತ ಗಮನ ಈ ಘಟನೆಗಳ ಬಳಿಕ ಯುವಜನರಲ್ಲಿ ಸರ್ಕಾರದ ವಿರುದ್ಧ ಸೃಷ್ಟಿಯಾಗಿರುವ ಅಸಮಾಧಾನವನ್ನು ಶಮನಗೊಳಿಸಲು ಮತ್ತು ಯುವ ಭಾರತದ ನೈಜ ಅಗತ್ಯತೆಗಳನ್ನು ಆಲಿಸಲು ಪ್ರಧಾನಿ ಮೋದಿ ಅವರ ಈ ನೇರ ಸಂವಾದ ಕಾರ್ಯಕ್ರಮ ನೆರವಾಗಲಿದೆ ಎಂದು ಹೇಳಲಾಗಿದೆ.
ಮುಂದಿನ ಪೀಳಿಗೆಯ ಮತದಾರರಾದ ಯುವಕರನ್ನು ಸೆಳೆಯಲು ಮತ್ತು ಅವರ ಆಶೋತ್ತರಗಳನ್ನು ಅರ್ಥೈಸಿಕೊಳ್ಳಲು ಬಿಜೆಪಿ ಹೆಣೆದಿರುವ ವಿಶೇಷ ಕಾರ್ಯತಂತ್ರದ ಭಾಗವಾಗಿ ಪ್ರಧಾನಿಯವರ ಈ ಭೇಟಿ ಮಹತ್ವ ಪಡೆದುಕೊಂಡಿದೆ.
ಇತ್ತೀಚೆಗೆ ನಡೆದ NEET ಪರೀಕ್ಷಾ ಅಕ್ರಮ ಹಾಗೂ ಪ್ರಶ್ನೆ ಪತ್ರಿಕೆ ಸೋರಿಕೆ ಖಂಡಿಸಿ ಸಾವಿರಾರು ವಿದ್ಯಾರ್ಥಿಗಳು ಮತ್ತು ಯುವ ಸಂಘಟನೆಗಳು ಬೃಹತ್ ಪ್ರತಿಭಟನೆ ನಡೆಸಿದ್ದವು. ಈ ಪ್ರತಿಭಟನೆಯ ಕಾವು ಹೆಚ್ಚಾಗಿ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ರಾಜೀನಾಮೆ ನೀಡಬೇಕಾಯಿತು. ಪ್ರತಿಭಟನೆ ವೇಳೆ ಪ್ರತಿಪಕ್ಷಗಳು ಹಾಗೂ ಕೆಲವು ಸಂಘಟನೆಗಳು ಜನ್-ಝಿ ಯುವಕರನ್ನು ಹಾದಿ ತಪ್ಪಿಸುವ ಕೆಲಸ ಮಾಡಿದವು ಎಂದು ಧರ್ಮೇಂದ್ರ ಪ್ರಧಾನ್ ಬಳಿಕ ಆರೋಪಿಸಿದ್ದರು.