ಇದು ಕೇವಲ ಜನಸಂಖ್ಯೆಯ ಇಳಿಕೆಯಲ್ಲ, ಬದಲಿಗೆ ಭವಿಷ್ಯದ ಜಾಗತಿಕ ಆರ್ಥಿಕತೆ ಮತ್ತು ಮಾನವ ಸಂಪನ್ಮೂಲದ (Human Resources) ಮೇಲಾಗುತ್ತಿರುವ ದೊಡ್ಡ ಪೆಟ್ಟು ಎಂದು ಜಾಗತಿಕ ಜನಸಂಖ್ಯಾ ತಜ್ಞರು ತೀವ್ರ ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.

ಆದಾಗ್ಯೂ, ವಿಜ್ಞಾನಿಗಳು ಮತ್ತು ಸಂಶೋಧಕರು ಈ ಮಹಾ ಕುಸಿತಕ್ಕೆ ಕೇವಲ ಆರ್ಥಿಕ ಅಂಶಗಳು ಮಾತ್ರ ಕಾರಣವಲ್ಲ, ಬದಲಿಗೆ ನಮ್ಮ ಕೈಯಲ್ಲಿರುವ ಸ್ಮಾರ್ಟ್ಫೋನ್ಗಳು ಮತ್ತು ಸಾಮಾಜಿಕ ಮಾಧ್ಯಮಗಳೇ (Social Media) ಅಸಲಿ ವಿಲನ್ ಇರಬಹುದೇ ಎನ್ನುವ ಹೊಸ ಚರ್ಚೆಯನ್ನು ಹುಟ್ಟುಹಾಕಿದ್ದಾರೆ.

ಪ್ರಸಿದ್ಧ 'ಫೈನಾನ್ಷಿಯಲ್ ಟೈಮ್ಸ್' ಪ್ರಕಟಿಸಿರುವ ವರದಿಯ ಪ್ರಕಾರ, ವಿಶ್ವದ ಮೂರನೇ ಎರಡರಷ್ಟು ಭಾಗಗಳಲ್ಲಿ ಜನನ ಪ್ರಮಾಣವು, ಒಂದು ದೇಶದ ಜನಸಂಖ್ಯಾ ಸ್ಥಿರತೆಯನ್ನು ಕಾಪಾಡಿಕೊಳ್ಳಲು ಅಗತ್ಯವಿರುವ ಕನಿಷ್ಠ ಪ್ರಮಾಣಕ್ಕಿಂತಲೂ ತೀರಾ ಕೆಳಮಟ್ಟಕ್ಕೆ ಕುಸಿದಿದೆ. ಅಂದರೆ, ಅನೇಕ ದೇಶಗಳಲ್ಲಿ ಹಳೆಯ ತಲೆಮಾರಿನ ವಯೋವೃದ್ಧರು ಮರಣ ಹೊಂದುತ್ತಿರುವ ವೇಗಕ್ಕೆ ಹೋಲಿಸಿದರೆ, ಹೊಸದಾಗಿ ಹುಟ್ಟುತ್ತಿರುವ ಮಕ್ಕಳ ಸಂಖ್ಯೆ ತೀರಾ ನಗಣ್ಯವಾಗಿದೆ.

ದಕ್ಷಿಣ ಕೊರಿಯಾ, ಜಪಾನ್, ಚೀನಾ, ಯುರೋಪ್ ಮತ್ತು ಅಮೆರಿಕದಂತಹ ಮುಂದುವರಿದ ದೇಶಗಳಲ್ಲಿ ಈ ಸಮಸ್ಯೆ ಈಗಾಗಲೇ ಹೆಮ್ಮರವಾಗಿ ಬೆಳೆದು ನಿಂತಿದೆ. ಆದರೆ ಆತಂಕಕಾರಿ ವಿಷಯವೆಂದರೆ, ಈ ಮಾರಕ ಪ್ರವೃತ್ತಿ ಈಗ ಲ್ಯಾಟಿನ್ ಅಮೆರಿಕ, ಮಧ್ಯಪ್ರಾಚ್ಯ ಮತ್ತು ಏಷ್ಯಾದ ಇತರ ಅನೇಕ ದೇಶಗಳಿಗೂ ವ್ಯಾಪಿಸುತ್ತಿದೆ.

ಕಳೆದ 10 ರಿಂದ 15 ವರ್ಷಗಳಲ್ಲಿ ಜಾಗತಿಕವಾಗಿ ಜನನ ಪ್ರಮಾಣದಲ್ಲಿ ಕಂಡುಬಂದಿರುವ ಹಠಾತ್ ಕುಸಿತಕ್ಕೆ ಸ್ಮಾರ್ಟ್ಫೋನ್ ಮತ್ತು ಸಾಮಾಜಿಕ ಮಾಧ್ಯಮಗಳ ಅತಿಯಾದ ಬಳಕೆ ಜನರ ಜೀವನಶೈಲಿಯನ್ನು ಸಂಪೂರ್ಣವಾಗಿ ಬದಲಾಯಿಸಿರುವುದೇ ಮುಖ್ಯ ಕಾರಣ ಎಂದು ಸಂಶೋಧಕರು ಬಲವಾಗಿ ನಂಬಿದ್ದಾರೆ. ಇಂಟರ್ನೆಟ್ ಜಗತ್ತಿನಲ್ಲಿ ಮುಳುಗಿರುವ ಇಂದಿನ ಯುವಜನರು ಮೊದಲಿಗಿಂತಲೂ ಭೌತಿಕವಾಗಿ ಸಂವಹನ ನಡೆಸುವುದು ತೀರಾ ಕಡಿಮೆ ಮಾಡಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ನೂರಾರು ವರ್ಚುವಲ್ ಸ್ನೇಹಿತರಿದ್ದರೂ, ನಿಜ ಜೀವನದಲ್ಲಿ ಸಂಬಂಧಗಳನ್ನು ರೂಪಿಸಿಕೊಳ್ಳುವುದು ಅವರಿಗೆ ಕಷ್ಟವಾಗುತ್ತಿರುವುದರಿಂದ ಯುವ ಪೀಳಿಗೆಯಲ್ಲಿ ಒಂಟಿತನ ವಿಪರೀತವಾಗಿ ಹೆಚ್ಚುತ್ತಿದೆ. ಇದು ಅಂತಿಮವಾಗಿ ಮದುವೆ ಮತ್ತು ಮಕ್ಕಳನ್ನು ಹೊಂದುವ ನಿರ್ಧಾರದ ಮೇಲೆ ನೇರ ಪರಿಣಾಮ ಬೀರುತ್ತಿದೆ.

ಇಂಟರ್ನೆಟ್ ಸ್ಪೀಡ್ ಹೆಚ್ಚಾದಷ್ಟೂ ಜನನ ಪ್ರಮಾಣ ನಿಧಾನ!

ಅಮೆರಿಕ ಮತ್ತು ಯುಕೆಯಲ್ಲಿ 4G ಇಂಟರ್ನೆಟ್ ನೆಟ್ವರ್ಕ್ಗಳು ಪ್ರಾರಂಭವಾದ ನಂತರದ ದತ್ತಾಂಶಗಳನ್ನು (Data) ಪರಿಶೀಲಿಸಿದಾಗ ಸಂಶೋಧಕರಿಗೆ ಒಂದು ಆಘಾತಕಾರಿ ಸತ್ಯ ಬೆಳಕಿಗೆ ಬಂದಿದೆ. ಹೈಸ್ಪೀಡ್ ಮೊಬೈಲ್ ಇಂಟರ್ನೆಟ್ ಕ್ರಾಂತಿ ಆದಂತಹ ಜಾಗಗಳಲ್ಲೇ ಜನನ ಪ್ರಮಾಣವು ಭಾರಿ ಪ್ರಮಾಣದಲ್ಲಿ ಕುಸಿತ ಕಂಡಿದೆ. ಸ್ಮಾರ್ಟ್ಫೋನ್ಗಳ ಆಗಮನದಿಂದಾಗಿ ಇಂದಿನ ಯುವಜನರು ದಿನದ ಬಹುಪಾಲು ಸಮಯವನ್ನು ಆನ್ಲೈನ್ನಲ್ಲೇ ಕಳೆಯುತ್ತಿರುವುದರಿಂದ, ಅವರಿಗೆ ಮುಖಾಮುಖಿ ಸಿಗುವ ಮುಕ್ತಾವಕಾಶಗಳೇ ಇಲ್ಲದಂತಾಗಿವೆ.

ಇಂದಿನ ಡೇಟಿಂಗ್, ಸ್ನೇಹ ಮತ್ತು ಸಂಬಂಧಗಳ ಬಹುಪಾಲು ಭಾಗವು ಕೇವಲ ಇನ್ಸ್ಟಾಗ್ರಾಮ್, ಫೇಸ್ಬುಕ್ನಂತಹ ಸಾಮಾಜಿಕ ಜಾಲತಾಣಗಳ ಸ್ಕ್ರೀನ್ಗಳಿಗೆ ಸೀಮಿತವಾಗಿದೆ. ಅಲ್ಲಿ ಇತರರ ಪರಿಪೂರ್ಣ ಮತ್ತು ಆಡಂಬರದ ಜೀವನವನ್ನು ವೀಕ್ಷಿಸುತ್ತಾ, ಯುವಜನರು ದೀರ್ಘಕಾಲೀನ ಸಂಬಂಧಗಳನ್ನು ತಪ್ಪಿಸುತ್ತಿದ್ದಾರೆ ಅಥವಾ ಒಂಟಿ ಜೀವನಕ್ಕೆ ಒಗ್ಗಿಕೊಳ್ಳುತ್ತಿದ್ದಾರೆ.

ಹಿಂದಿನ ಕಾಲದಲ್ಲಿ ಮದುವೆಯಾದ ದಂಪತಿಗಳು ಕಡಿಮೆ ಮಕ್ಕಳನ್ನು ಹೊಂದುತ್ತಿದ್ದರಿಂದ ಜನನ ಪ್ರಮಾಣ ಕುಸಿಯುತ್ತಿತ್ತು. ಆದರೆ ಇಂದಿನ ಪರಿಸ್ಥಿತಿ ತದ್ವಿರುದ್ಧವಾಗಿದೆ. ಈಗ ಇಡೀ ಸಾಮಾಜಿಕ ಸಂಬಂಧಗಳೇ ವಿಘಟನೆಯಾಗುತ್ತಿವೆ. ಇದರರ್ಥ ಬಹುಪಾಲು ಯುವಜನರು ಮದುವೆಯಾಗಲು ಒಪ್ಪುತ್ತಿಲ್ಲ ಅಥವಾ ಯಾವುದೇ ದೀರ್ಘಾವಧಿಯ ಸಂಬಂಧಗಳಲ್ಲಿ ತೊಡಗಿಸಿಕೊಳ್ಳಲು ಆಸಕ್ತಿ ತೋರಿಸುತ್ತಿಲ್ಲ.

ಅತಿಯಾದ ಸ್ಕ್ರೀನ್ ಟೈಮ್ ಮಾನಸಿಕ ಆರೋಗ್ಯದ ಮೇಲೂ ತೀವ್ರ ಪೆಟ್ಟು ನೀಡುತ್ತಿದ್ದು, ಯುವ ಪೀಳಿಗೆಯಲ್ಲಿ ಒತ್ತಡ ಮತ್ತು ಖಿನ್ನತೆಯನ್ನು ಹೆಚ್ಚಿಸುತ್ತಿದೆ. ಇದು ಅವರ ನೈಜ ಸಾಮಾಜಿಕ ಜೀವನದ ಉತ್ಸಾಹವನ್ನೇ ಉಡುಗಿಸುತ್ತಿದೆ.

ಆದರೆ ತಜ್ಞರು ಕೇವಲ ಸ್ಮಾರ್ಟ್ಫೋನ್ಗಳನ್ನು ಮಾತ್ರವೇ ದೂಷಿಸುವುದಿಲ್ಲ. ಇದರೊಂದಿಗೆ ಗಗನಕ್ಕೇರುತ್ತಿರುವ ದುಬಾರಿ ವಸತಿ ವೆಚ್ಚ, ಉದ್ಯೋಗದ ಅಭದ್ರತೆ ಮತ್ತು ಒತ್ತಡ, ಮಕ್ಕಳ ದುಬಾರಿ ಶಿಕ್ಷಣ ವೆಚ್ಚ ಹಾಗೂ ಭವಿಷ್ಯದ ಬಗೆಗಿನ ಅತಿಯಾದ ಭಯಗಳು ಕೂಡ ಯುವಜನರನ್ನು ಮಕ್ಕಳನ್ನು ಹೊಂದುವ ಆಲೋಚನೆಯಿಂದ ದೂರ ಇಡುತ್ತಿವೆ.

ಇಂದಿನ ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಯುವಜನರಿಗೆ ಒಂದು ಸ್ಥಿರವಾದ ಕೆಲಸ ಪಡೆಯಲು ಅಥವಾ ಸ್ವಂತ ಮನೆ ಖರೀದಿಸಲು ಇಡೀ ಯೌವನವೇ ಕರಗಿ ಹೋಗುತ್ತಿದೆ. ಹೀಗಾಗಿ ಅವರು ಮದುವೆ ಮತ್ತು ಮಕ್ಕಳ ನಿರ್ಧಾರವನ್ನು ಮುಂದೂಡುತ್ತಾ ಹೋಗುತ್ತಿದ್ದಾರೆ.

ಈ ಜಾಗತಿಕ ಜನಸಂಖ್ಯಾ ಕುಸಿತವನ್ನು ತಡೆಯುವ ಸಲುವಾಗಿ ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ದೇಶಗಳು ಮಕ್ಕಳ ಆರೈಕೆಗಾಗಿ ಭಾರಿ ಮೊತ್ತದ ಹಣಕಾಸು ನೆರವು, ದೊಡ್ಡ ಮಟ್ಟದ ತೆರಿಗೆ ವಿನಾಯಿತಿಗಳು ಮತ್ತು ಆಕರ್ಷಕ ಯೋಜನೆಗಳನ್ನು ಘೋಷಿಸುತ್ತಿದ್ದರೂ, ಅಲ್ಲಿನ ಜನನ ದರದಲ್ಲಿ ಯಾವುದೇ ಗಮನಾರ್ಹ ಸುಧಾರಣೆ ಕಂಡುಬಂದಿಲ್ಲ.

ಈ ಸಮಸ್ಯೆಯ ನಿಜವಾದ ಮೂಲ ಇರುವುದು ಜನರ ಬದಲಾದ ಜೀವನಶೈಲಿ ಮತ್ತು ಸಾಮಾಜಿಕ ನಡವಳಿಕೆಯಲ್ಲಿಯೇ ಹೊರತು ಕೇವಲ ಹಣದಲ್ಲಿ ಅಲ್ಲ. ಹೀಗಾಗಿ ಕೇವಲ ಆರ್ಥಿಕ ನೆರವು ನೀಡುವುದರಿಂದ ಈ ಜಾಗತಿಕ ಕಂಟಕವನ್ನು ಪರಿಹರಿಸಲು ಸಾಧ್ಯವಿಲ್ಲ ಎಂದು ಜಾಗತಿಕ ತಜ್ಞರು ವಿಷಾದ ವ್ಯಕ್ತಪಡಿಸಿದ್ದಾರೆ.