ಇತ್ತೀಚಿನ ದಿನಗಳಲ್ಲಿ ಹಬ್ಬದ ಆಫರ್, ಬ್ಯಾಂಕ್ ಡಿಸ್ಕೌಂಟ್, ಎಕ್ಸ್‌ಚೇಂಜ್ ಬೋನಸ್ ಹೀಗೆ ನಾನಾ ಆಕರ್ಷಕ (Tech News) ಕೊಡುಗೆಗಳನ್ನು ನೋಡಿ ಜನರು ಆನ್‌ಲೈನ್‌ನಲ್ಲೇ ಮೊಬೈಲ್, ಲ್ಯಾಪ್‌ಟಾಪ್ (Laptop) ಸೇರಿದಂತೆ ದುಬಾರಿ ಗ್ಯಾಜೆಟ್‌ಗಳನ್ನು ಖರೀದಿಸುತ್ತಿದ್ದಾರೆ.
ಅಂಗಡಿಗಳಿಗೆ ಅಲೆಯುವ ಬದಲು ಮನೆಯಲ್ಲೇ ಕುಳಿತು ಆರ್ಡರ್ ಮಾಡಿದರೆ ಸಾಕು, ಕೆಲವೇ ದಿನಗಳಲ್ಲಿ ವಸ್ತು ಮನೆ ಬಾಗಿಲಿಗೆ ತಲುಪುತ್ತದೆ.
ಆದರೆ ಆರ್ಡರ್ ಮಾಡಿದ ಉತ್ಪನ್ನ ಕೈಗೆ ಬಂದಾಗಲೇ ಕೆಲವರಿಗೆ ಅಸಲಿ ಸಮಸ್ಯೆ ಎದುರಾಗುತ್ತದೆ. ಬಾಕ್ಸ್‌ನಲ್ಲಿ ಹಾಳಾದ ಫೋನ್ ಇರುವುದು, ಸ್ಕ್ರೀನ್ ಒಡೆದಿರುವುದು ಅಥವಾ ಆರ್ಡರ್ ಮಾಡಿದ ಮೊಬೈಲ್ ಬದಲಿಗೆ ಬೇರೆ ವಸ್ತು ಬಂದಿರುವ ಘಟನೆಗಳು ಗ್ರಾಹಕರನ್ನು ಸಂಕಷ್ಟಕ್ಕೆ ಸಿಲುಕಿಸಬಹುದು.
ಇಂತಹ ಸಂದರ್ಭದಲ್ಲಿ ರಿಟರ್ನ್ ಅಥವಾ ರಿಪ್ಲೇಸ್‌ಮೆಂಟ್‌ಗಾಗಿ ಕಂಪನಿಯನ್ನು ಸಂಪರ್ಕಿಸಿದರೆ ಉತ್ಪನ್ನದ ಸ್ಥಿತಿಗೆ ಸಂಬಂಧಿಸಿದ ಸಾಕ್ಷ್ಯ ಕೇಳುವ ಸಾಧ್ಯತೆಯಿದೆ. ಹೀಗಾಗಿ ಆನ್‌ಲೈನ್‌ನಲ್ಲಿ ದುಬಾರಿ ಗ್ಯಾಜೆಟ್ ಖರೀದಿಸುವವರು ಡೆಲಿವರಿ ಪಡೆದ ತಕ್ಷಣ ಬಾಕ್ಸ್ ತೆರೆಯುವ ಆತುರ ಮಾಡಬಾರದು. ಬದಲಾಗಿ ಅನ್‌ಬಾಕ್ಸಿಂಗ್ ವಿಡಿಯೋ ಮಾಡಿಕೊಳ್ಳುವುದು ಬಹಳ ಮುಖ್ಯ. ಈ ವಿಡಿಯೋ ಮುಂದೆ ರಿಟರ್ನ್, ರಿಪ್ಲೇಸ್‌ಮೆಂಟ್ ಅಥವಾ ರಿಫಂಡ್ ಪಡೆಯುವ ಸಂದರ್ಭದಲ್ಲಿ ಉಪಯುಕ್ತ ಸಾಕ್ಷ್ಯವಾಗಬಹುದು.
ಪ್ಯಾಕೆಟ್‌ನಿಂದ ಹಿಡಿದು ಸೀಲ್‌ವರೆಗೆ ವಿಡಿಯೋ ಮಾಡಿ
ಮೊಬೈಲ್ ಅಥವಾ ಲ್ಯಾಪ್‌ಟಾಪ್ ಡೆಲಿವರಿ ಆದ ತಕ್ಷಣ ಕೊರಿಯರ್ ಪ್ಯಾಕೆಟ್‌ನ ವಿಡಿಯೋ ಮಾಡಬೇಕು. ಪ್ಯಾಕೆಟ್‌ನ ನಾಲ್ಕೂ ಬದಿಗಳು ಮತ್ತು ಮೂಲೆಗಳನ್ನು ಸ್ಪಷ್ಟವಾಗಿ ತೋರಿಸಿ. ಎಲ್ಲಿಯಾದರೂ ಹರಿದಿದೆಯೇ, ಹಾನಿಯಾಗಿದೆಯೇ ಎಂಬುದನ್ನು ದಾಖಲಿಸಿಕೊಳ್ಳಿ. ನಂತರ ಪ್ಯಾಕೆಟ್ ಮೇಲಿರುವ ಶಿಪ್ಪಿಂಗ್ ಲೇಬಲ್‌ನಲ್ಲಿ ನಮೂದಿಸಿರುವ ಆರ್ಡರ್ ಐಡಿ ಮತ್ತು ಟ್ರ್ಯಾಕಿಂಗ್ ವಿವರಗಳನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯಿರಿ.
ಪ್ಯಾಕೆಟ್ ತೆರೆದ ಬಳಿಕ ಅದರೊಳಗಿರುವ ಗ್ಯಾಜೆಟ್ ಬಾಕ್ಸ್ ಮತ್ತು ಕಂಪನಿಯ ಸೀಲ್ ಅನ್ನು ತೋರಿಸಬೇಕು. ಬಾಕ್ಸ್‌ನ ಹಿಂಭಾಗದಲ್ಲಿರುವ IMEI ನಂಬರ್ ಅಥವಾ ಸೀರಿಯಲ್ ನಂಬರ್ ಕೂಡ ವಿಡಿಯೋದಲ್ಲಿ ಸ್ಪಷ್ಟವಾಗಿ ಕಾಣುವಂತೆ ನೋಡಿಕೊಳ್ಳಿ. ಕಂಪನಿಯ ಸೀಲ್ ಮೊದಲೇ ಹರಿದಿದ್ದರೆ ಅಥವಾ ಬಾಕ್ಸ್ ತೆರೆದ ಸ್ಥಿತಿಯಲ್ಲಿದ್ದರೆ ಅದನ್ನೂ ದಾಖಲಿಸಿಕೊಳ್ಳಿ.
ವಿಡಿಯೋ ಮಧ್ಯದಲ್ಲಿ ನಿಲ್ಲಿಸುವ ತಪ್ಪು ಮಾಡಬೇಡಿ
ಅನ್‌ಬಾಕ್ಸಿಂಗ್ ವಿಡಿಯೋ ಮಾಡುವಾಗ ರೆಕಾರ್ಡಿಂಗ್ ನಿರಂತರವಾಗಿರಬೇಕು. ಮಧ್ಯದಲ್ಲಿ ವಿಡಿಯೋ ನಿಲ್ಲಿಸುವುದು, ಎಡಿಟ್ ಮಾಡುವುದು ಅಥವಾ ಉತ್ಪನ್ನವನ್ನು ಕ್ಯಾಮೆರಾದಿಂದ ಹೊರಗಿಡುವುದು ಸಾಕ್ಷ್ಯದ ವಿಶ್ವಾಸಾರ್ಹತೆಯ ಮೇಲೆ ಪರಿಣಾಮ ಬೀರಬಹುದು. ಹೀಗಾಗಿ ಮೊಬೈಲ್ ಅನ್ನು ಸ್ಟ್ಯಾಂಡ್‌ನಲ್ಲಿ ಇರಿಸಿಕೊಂಡು ಒಂದೇ ಬಾರಿ ಸಂಪೂರ್ಣ ಪ್ರಕ್ರಿಯೆಯನ್ನು ರೆಕಾರ್ಡ್ ಮಾಡುವುದು ಉತ್ತಮ.
ಬಾಕ್ಸ್‌ನಿಂದ ಫೋನ್ ಹೊರತೆಗೆದ ಬಳಿಕ ಅದರ ಹೊರಭಾಗ, ಸ್ಕ್ರೀನ್, ಚಾರ್ಜರ್ ಸೇರಿದಂತೆ ಬಾಕ್ಸ್‌ನಲ್ಲಿರುವ ಎಲ್ಲಾ ವಸ್ತುಗಳನ್ನು ತೋರಿಸಿ. ನಂತರ ಕ್ಯಾಮೆರಾ ಎದುರಿನಲ್ಲೇ ಮೊಬೈಲ್ ಆನ್ ಮಾಡಿ. ಫೋನ್ ಆನ್ ಆಗದಿದ್ದರೆ, ಸ್ಕ್ರೀನ್ ಮೇಲೆ ಹಸಿರು ಅಥವಾ ಹಳದಿ ಗೆರೆಗಳು ಕಾಣಿಸಿಕೊಂಡರೆ ಅಥವಾ ಬೇರೆ ತಾಂತ್ರಿಕ ಸಮಸ್ಯೆ ಎದುರಾದರೆ ಅದನ್ನೂ ವಿಡಿಯೋದಲ್ಲಿ ದಾಖಲಿಸಿ. ಫೋನ್ ಸರಿಯಾಗಿ ಆನ್ ಆಗಿ ಹೋಮ್ ಸ್ಕ್ರೀನ್ ಅಥವಾ ಸೆಟಪ್ ಪೇಜ್ ಕಾಣಿಸಿಕೊಂಡ ನಂತರವೇ ರೆಕಾರ್ಡಿಂಗ್ ನಿಲ್ಲಿಸಿ.
ಒಟ್ಟಿನಲ್ಲಿ, ಆನ್‌ಲೈನ್‌ನಲ್ಲಿ ಆಫರ್ ನೋಡಿ ದುಬಾರಿ ಗ್ಯಾಜೆಟ್ ಖರೀದಿಸುವಾಗ ಬೆಲೆ ಮತ್ತು ಡಿಸ್ಕೌಂಟ್‌ಗೆ ಮಾತ್ರ ಗಮನ ಕೊಟ್ಟರೆ ಸಾಲದು. ಉತ್ಪನ್ನ ಮನೆಗೆ ಬಂದ ಬಳಿಕ ಅದರ ಸ್ಥಿತಿಯನ್ನು ಸರಿಯಾಗಿ ಪರಿಶೀಲಿಸುವುದೂ ಅಷ್ಟೇ ಮುಖ್ಯ. ಕೆಲವು ನಿಮಿಷಗಳ ಅನ್‌ಬಾಕ್ಸಿಂಗ್ ವಿಡಿಯೋ ಮುಂದೆ ಎದುರಾಗಬಹುದಾದ ರಿಟರ್ನ್ ಮತ್ತು ರಿಫಂಡ್ ಸಮಸ್ಯೆಗಳಲ್ಲಿ ನಿಮಗೆ ನೆರವಾಗಬಹುದು. ಹೀಗಾಗಿ ಹೊಸ ಗ್ಯಾಜೆಟ್ ಕೈಗೆ ಸಿಕ್ಕ ತಕ್ಷಣ ಸಂಭ್ರಮದಲ್ಲಿ ಬಾಕ್ಸ್ ತೆರೆಯುವ ಬದಲು ಮೊದಲು ಕ್ಯಾಮೆರಾ ಆನ್ ಮಾಡಿ!