ತಿರುಪತಿ: ವಿಶ್ವದ ಅತ್ಯಂತ ಶ್ರೀಮಂತ ಹಿಂದೂ ದೇವಾಲಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಆಂಧ್ರಪ್ರದೇಶದ ತಿರುಪತಿ ತಿರುಮಲ (Tirumala Tirupati) ದೇವಸ್ಥಾನದಲ್ಲಿ ಈ ವರ್ಷದ ಮೇ ತಿಂಗಳಲ್ಲಿ ಭಕ್ತರು ದಾಖಲೆ ಪ್ರಮಾಣದಲ್ಲಿ ಮುಡಿ (ತಲೆಕೂದಲು) ಸಮರ್ಪಿಸಿದ್ದಾರೆ.

12.43 ಲಕ್ಷಕ್ಕೂ ಹೆಚ್ಚು ಭಕ್ತರಿಂದ ಮುಂಡನೆ
ವೆಂಕಟೇಶ್ವರ ಸ್ವಾಮಿಯ ಮೇಲಿರುವ ಅಪಾರ ಭಕ್ತಿಯ ಸಂಕೇತವಾಗಿ ಕೇವಲ 27 ದಿನಗಳಲ್ಲಿ ಬರೋಬ್ಬರಿ 12.43 ಲಕ್ಷಕ್ಕೂ ಹೆಚ್ಚು ಭಕ್ತರು ಮುಂಡನೆ ಮಾಡಿಸಿಕೊಂಡಿದ್ದು, ಇದು ತಿರುಮಲ ಇತಿಹಾಸದಲ್ಲೇ ಹಿಂದೆಂದೂ ಕಾಣದ ದಾಖಲೆಯಾಗಿದೆ. ತಿರುಮಲ ಬೆಟ್ಟದ ಆಡಳಿತ ಮಂಡಳಿಯಾದ ತಿರುಮಲ ತಿರುಪತಿ ದೇವಸ್ಥಾನಮ್ (TTD) ಬಿಡುಗಡೆ ಮಾಡಿರುವ ಅಧಿಕೃತ ಮಾಹಿತಿ ಪ್ರಕಾರ, ಮೇ 1 ರಿಂದ ಮೇ 27 ರ ನಡುವಿನ ಅವಧಿಯಲ್ಲಿ ಒಟ್ಟು 12,43,063 ಭಕ್ತರು ತಮ್ಮ ಕೂದಲನ್ನು ದೇವರಿಗೆ ಅರ್ಪಿಸಿದ್ದಾರೆ. ಈ ಸಂಖ್ಯೆಯು ಕಳೆದ ವರ್ಷಗಳ ಇದೇ ಸಮಯಕ್ಕೆ ಹೋಲಿಸಿದರೆ ಅತ್ಯಂತ ಹೆಚ್ಚಾಗಿದೆ.

2024 ರ ಮೇ ತಿಂಗಳಲ್ಲಿ ಸುಮಾರು 10.65 ಲಕ್ಷ ಭಕ್ತರು ಮುಡಿ ನೀಡಿದ್ದರೆ, ಅದಕ್ಕೂ ಹಿಂದಿನ ವರ್ಷ 10.18 ಲಕ್ಷ ಭಕ್ತರು ಮುಂಡನೆ ಮಾಡಿಸಿಕೊಂಡಿದ್ದರು. ಬೇಸಿಗೆ ರಜೆ, ವಾರಾಂತ್ಯದ ರಜೆಗಳು ಹಾಗೂ ದೇಶ-ವಿದೇಶಗಳಿಂದ ಹರಿದು ಬರುತ್ತಿರುವ ಭಕ್ತರ ದಂಡೇ ಈ ಭಾರಿ ಏರಿಕೆಗೆ ಕಾರಣ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮೇ 18 ರಿಂದ ಮೇ 23 ರ ಅವಧಿಯಲ್ಲಿ ಪ್ರತಿದಿನ ಸರಾಸರಿ 50,000 ಕ್ಕೂ ಹೆಚ್ಚು ಭಕ್ತರು ಮುಡಿ ಸಲ್ಲಿಸಿದ್ದು, ಮೇ 23 ರ ಒಂದೇ ದಿನ ಬರೋಬ್ಬರಿ 57,580 ಭಕ್ತರು ಮುಂಡನೆ ಮಾಡಿಸಿಕೊಂಡಿರುವುದು ಇತ್ತೀಚಿನ ವರ್ಷಗಳಲ್ಲೇ ಒಂದು ದಿನದ ಗರಿಷ್ಠ ದಾಖಲೆಯಾಗಿದೆ.

ಭಕ್ತರ ಈ ಭಾರಿ ದಟ್ಟಣೆಯನ್ನು ನಿಭಾಯಿಸಲು ಟಿಟಿಡಿ ಮಂಡಳಿಯು ಮುಖ್ಯ ಕಲ್ಯಾಣಕಟ್ಟೆ ಸೇರಿದಂತೆ ತಿರುಮಲದಾದ್ಯಂತ ಇರುವ 11 ಮಿನಿ ಮುಂಡನ ಕೇಂದ್ರಗಳಲ್ಲಿ ದಿನದ 24 ಗಂಟೆಯೂ ನಿರಂತರ ಸೇವೆ ಒದಗಿಸುತ್ತಿದೆ. ಭಕ್ತರು ಸರದಿಯಲ್ಲಿ ಹೆಚ್ಚು ಹೊತ್ತು ಕಾಯುವುದನ್ನು ತಪ್ಪಿಸಲು 269 ಮಹಿಳಾ ಕ್ಷೌರಿಕರು ಸೇರಿದಂತೆ ಒಟ್ಟು 1,150 ಕ್ಕೂ ಹೆಚ್ಚು ಸಿಬ್ಬಂದಿ ಪಾಳಿ ಆಧಾರದ ಮೇಲೆ ಹಗಲಿರುಳು ಶ್ರಮಿಸುತ್ತಿದ್ದಾರೆ.

ಧಾರ್ಮಿಕ ಪ್ರಾಮುಖ್ಯತೆಯ ಜೊತೆಗೆ, ಭಕ್ತರು ಸಮರ್ಪಿಸುವ ಈ ತಲೆಕೂದಲು ಟಿಟಿಡಿ ಮಂಡಳಿಗೆ ಕಾಣಿಕೆಯೇತರ ಆದಾಯದ ಪ್ರಮುಖ ಮೂಲವಾಗಿದೆ. ವಾಣಿಜ್ಯ ವಲಯದಲ್ಲಿ 'ಕಪ್ಪು ಚಿನ್ನ' ಎಂದೇ ಕರೆಯಲಾಗುವ ಈ ಕೂದಲನ್ನು ಅತ್ಯಂತ ಜಾಗರೂಕತೆಯಿಂದ ವಿಂಗಡಿಸಿ, ಗುಣಮಟ್ಟಕ್ಕೆ ತಕ್ಕಂತೆ ವರ್ಗೀಕರಿಸಲಾಗುತ್ತದೆ. ಬಳಿಕ ಚೀನಾ, ಇಟಲಿ, ಅಮೆರಿಕ ಮತ್ತು ಬ್ರೆಜಿಲ್‌ನಂತಹ ದೇಶಗಳ ಖರೀದಿದಾರರಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹರಾಜು ಮಾಡಲಾಗುತ್ತದೆ. ಈ ಕೂದಲನ್ನು ಜಾಗತಿಕವಾಗಿ ವಿಗ್, ಹೇರ್ ಎಕ್ಸ್‌ಟೆನ್ಶನ್ ಮತ್ತು ಸೌಂದರ್ಯವರ್ಧಕ ಉದ್ಯಮಗಳಲ್ಲಿ ವ್ಯಾಪಕವಾಗಿ ಬಳಸಲಾಗುತ್ತದೆ.