ಉತ್ತರ ಪ್ರದೇಶ : ಭಾರತೀಯ ಸಾಂಪ್ರದಾಯಿಕ ಕುಟುಂಬಗಳಲ್ಲಿ ಅತ್ತೆ (Mother-in-law) ಮತ್ತು ಸೊಸೆಯ (Daughter-in-law) ಸಂಬಂಧದ ಕುರಿತು ಹತ್ತು ಹಲವು ನಕಾರಾತ್ಮಕ ಚರ್ಚೆಗಳು ನಡೆಯುತ್ತಲೇ ಇರುತ್ತವೆ. ಆದರೆ ಉತ್ತರ ಪ್ರದೇಶದ (Uttar Pradesh) ಕೋಸಿ ಕಲಾಂ ನಿವಾಸಿಯಾದ ಪ್ರೀತಿ ಚೌಧರಿ ಎಂಬ ಮಹಿಳೆ ಇವೆಲ್ಲಕ್ಕೂ ಭಿನ್ನವಾಗಿ ನಿಂತು ಇಡೀ ಸಮಾಜಕ್ಕೆ ಹೊಸ ಮಾದರಿಯಾಗಿದ್ದಾರೆ.
ತಮ್ಮ ಎಂಬತ್ತೈದು ವರ್ಷದ ವೃದ್ಧ ಅತ್ತೆ ಚಂದ್ರೋ ದೇವಿ ಅವರಿಗೆ ವೃಂದಾವನದ ಪವಿತ್ರ ಕ್ಷೇತ್ರಗಳನ್ನು ದರ್ಶನ ಮಾಡಬೇಕೆಂಬ ಬಲವಾದ ಹಂಬಲವಿತ್ತು. ವಯೋಸಹಜ ಅಶಕ್ತತೆಯಿಂದಾಗಿ ಅವರಿಗೆ ತಾವಾಗಿಯೇ ನಡೆದು ಆ ಕಠಿಣ ಹಾದಿಯನ್ನು ಕ್ರಮಿಸಲು ಸಾಧ್ಯವಿರಲಿಲ್ಲ.
ಅತ್ತೆಯ ಮನದ ಇಂಗಿತವನ್ನು ಅರಿತ ಪ್ರೀತಿ ಅವರು, ಅವರನ್ನು ಒಂದು ದೊಡ್ಡ ಟಬ್ನಲ್ಲಿ ಸುರಕ್ಷಿತವಾಗಿ ಕುಳ್ಳಿರಿಸಿ, ಅದನ್ನು ತಮ್ಮ ತಲೆಯ ಮೇಲೆ ಹೊತ್ತುಕೊಂಡು ಇಡೀ ವೃಂದಾವನ ಕ್ಷೇತ್ರವನ್ನು ಸುತ್ತಿಸಿದ್ದಾರೆ. ಹಿಂದೂ ಧರ್ಮದಲ್ಲಿ ಬ್ರಜ ಭೂಮಿಯ ಈ 84 ಕೋಸಿ ಪರಿಕ್ರಮ ಯಾತ್ರೆಗೆ ಅತ್ಯಂತ ಧಾರ್ಮಿಕ ಪ್ರಾಮುಖ್ಯತೆಯಿದ್ದು, ಇದನ್ನು ಪೂರ್ಣಗೊಳಿಸುವುದರಿಂದ ಪುಣ್ಯ ಲಭಿಸುತ್ತದೆ ಎಂಬ ಗಾಢ ನಂಬಿಕೆಯಿದೆ.
ಸುಮಾರು 252 ಕಿಲೋಮೀಟರ್ ವ್ಯಾಪ್ತಿಯ ಈ ಪವಿತ್ರ ಭೂಮಿಯಲ್ಲಿ ಅತ್ತೆಯನ್ನು ತಲೆಯ ಮೇಲೆ ಹೊತ್ತು ಸಾಗಿದ ಸೊಸೆಯ ನಡೆ ಮತ್ತು ತಾಳ್ಮೆಯನ್ನು ಕಂಡ ಸ್ಥಳೀಯರು ಭಾವುಕರಾಗಿದ್ದಾರೆ. ಇಂದಿನ ಆಧುನಿಕ ಜಗತ್ತಿನಲ್ಲಿ ಹಿರಿಯರನ್ನು ಕಡೆಗಣಿಸುವ ಜನರಿಗೆ ಈ ಘಟನೆ ಕಣ್ಣು ತೆರೆಸುವಂತಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಈ ಚಿತ್ರಗಳು ಭಾರಿ ಪ್ರಶಂಸೆಗೆ ಪಾತ್ರವಾಗಿವೆ.