ಏಕೀ ಜಮೀರ್ ಅಹಮ್ಮದ್ ಅನಿವಾರ್ಯ?

ದಾವಣಗೆರೆ ದಕ್ಷಿಣದಲ್ಲಿ ಅಲ್ಪಸಂಖ್ಯಾತ ಸಮುದಾಯದ ಪ್ರಭಾವ ಅಧಿಕವಾಗಿದೆ. ಟಿಕೆಟ್ ಹಂಚಿಕೆ ವಿಚಾರದಲ್ಲಿ ಸಣ್ಣಮಟ್ಟದ ಅಸಮಾಧಾನ ಸ್ಫೋಟಗೊಂಡಿತ್ತು. ಸಮುದಾಯದ ಮುಖಂಡ ಸಾದಿಕ್ ಪೈಲ್ವಾನ್ ಅವರು ಬಂಡಾಯದ ಬಾವುಟ ಹಾರಿಸಿದ್ದರು. ಈ ಅಸಮಾಧಾನ ಶಮನಗೊಳಿಸಿ, ಚದುರಿಹೋಗುವ ಮತಗಳನ್ನು ಕಾಂಗ್ರೆಸ್ ಬುಟ್ಟಿಗೆ ತರಲು ಜಮೀರ್ ಅಹಮ್ಮದ್ ಅವರಂತಹ ಪ್ರಭಾವಿ ನಾಯಕನ ಅನಿವಾರ್ಯತೆ ಸಿದ್ದರಾಮಯ್ಯ ಅವರಿಗೆ ಮನವರಿಕೆಯಾಗಿದೆ.

ದಾವಣಗೆರೆಯ 70 ಸಾವಿರ ಮತಗಳ 'ಮ್ಯಾಜಿಕ್':

ದಾವಣಗೆರೆ ದಕ್ಷಿಣದಲ್ಲಿ ಸುಮಾರು 70,000 ಮುಸ್ಲಿಂ ಮತಗಳಿವೆ. ಇವು ಇಲ್ಲಿನ ಗೆಲುವು-ಸೋಲನ್ನು ನಿರ್ಧರಿಸುವ ಶಕ್ತಿ ಹೊಂದಿವೆ. ಸಮರ್ಥ ಶಾಮನೂರು ಅವರ ಗೆಲುವಿಗೆ ಈ ಮತಗಳೇ ಶ್ರೀರಕ್ಷೆ. ಹೀಗಾಗಿಯೇ, ಜಮೀರ್ ಅಹಮ್ಮದ್ ಅವರು ಕೇವಲ ಪ್ರಚಾರಕರಾಗಿ ಅಲ್ಲದೆ, ಸಮುದಾಯದ ಮನವೊಲಿಸುವ 'ಟ್ರಬಲ್ ಶೂಟರ್' ಆಗಿ ಅಖಾಡಕ್ಕೆ ಇಳಿಯುತ್ತಿದ್ದಾರೆ.

ಬಾಗಲಕೋಟೆಯಲ್ಲಿ 'ಮೇಟಿ' ಪರ ಬ್ಯಾಟಿಂಗ್:

ಇತ್ತ ಬಾಗಲಕೋಟೆಯಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಉಮೇಶ್ ಮೇಟಿ ಅವರಿಗೆ ಬಲ ತುಂಬಲು ಜಮೀರ್ ಎರಡು ದಿನಗಳ ಕಾಲ ಮೊಕ್ಕಾಂ ಹೂಡಲಿದ್ದಾರೆ. ಅಲ್ಲಿನ ಅಲ್ಪಸಂಖ್ಯಾತ ಓಣಿಗಳ ಮೇಲೆ ಸಚಿವರು ಕಣ್ಣಿಟ್ಟಿದ್ದು, ಮತದಾರರ ಮನ ಗೆಲ್ಲಲು ವಿಶೇಷ ಕಾರ್ಯತಂತ್ರ ರೂಪಿಸಿದ್ದಾರೆ.

ವಿರೋಧ ಪಕ್ಷಗಳ ಲೆಕ್ಕಾಚಾರಕ್ಕೆ ಅಡ್ಡಿ?

ಬಿಜೆಪಿಯ ವೀರಭದ್ರಯ್ಯ ಚರಂತಿಮಠ (ಬಾಗಲಕೋಟೆ) ಮತ್ತು ಶ್ರೀನಿವಾಸ್ ದಾಸಕರಿಯಪ್ಪ (ದಾವಣಗೆರೆ ದಕ್ಷಿಣ) ಅವರ ವಿರುದ್ಧ ಕಾಂಗ್ರೆಸ್ ಈಗ 'ಜಮೀರ್ ಅಸ್ತ್ರ' ಪ್ರಯೋಗಿಸಿದೆ. ಸಚಿವರ ಈ ಎಂಟ್ರಿ ಬಿಜೆಪಿಯ ತಂತ್ರಗಾರಿಕೆಗೆ ಅಡ್ಡಿಯಾಗಲಿದೆಯೇ? ಅಲ್ಪಸಂಖ್ಯಾತ ಮತಗಳು ಸಂಪೂರ್ಣವಾಗಿ ಹಸ್ತದ ಪಾಲಾಗಲಿವೆಯೇ? ಎಂಬ ಪ್ರಶ್ನೆ ಈಗ ಕುತೂಹಲ ಕೆರಳಿಸಿದೆ.

ಏಪ್ರಿಲ್ 9ರ ಮತದಾನಕ್ಕೆ ದಿನಗಣನೆ ಆರಂಭವಾಗಿರುವಾಗ, ಸಿಎಂ ಸಿದ್ದರಾಮಯ್ಯ ಅವರ ಈ 'ತುರ್ತು ಬುಲಾವ್' ಕಾಂಗ್ರೆಸ್ ಪಾಲಿಗೆ ಸಂಜೀವಿನಿಯಾಗಲಿದೆಯೇ ಅಥವಾ ರಾಜಕೀಯ ತಿರುವು ನೀಡಲಿದೆಯೇ ಎಂಬುದು ಮೇ 4ರ ಫಲಿತಾಂಶದಲ್ಲಿ ತಿಳಿಯಲಿದೆ.