ಬೆಂಗಳೂರು: ದೇಶದ ರಾಜಧಾನಿ ನವದೆಹಲಿಯಲ್ಲಿ ಉಂಟಾಗಿರುವ ತೀವ್ರ ಹವಾಮಾನ ವೈಪರೀತ್ಯದ ಹಿನ್ನೆಲೆಯಲ್ಲಿ, ಕರ್ನಾಟಕದ ನಾಯಕರು ಪ್ರಯಾಣಿಸುತ್ತಿದ್ದ ವಿಶೇಷ ವಿಮಾನವು ದೆಹಲಿ ಬದಲಿಗೆ ರಾಜಸ್ಥಾನದ ಜೈಪುರ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ತುರ್ತಾಗಿ ಲ್ಯಾಂಡ್ ಆಗಿದೆ.

ವಿಮಾನದಲ್ಲಿ ಸಿದ್ದರಾಮಯ್ಯ ಅವರೊಂದಿಗೆ ಕಾಂಗ್ರೆಸ್ ಪಕ್ಷದ ಪ್ರಮುಖ ನಾಯಕರು ಮತ್ತು ಸಚಿವರ ದಂಡೇ ಇದ್ದು, ಸದ್ಯ ಜೈಪುರದಲ್ಲೇ ತಂಗಿದ್ದಾರೆ.

ವಿಮಾನದಲ್ಲಿದ್ದ ಪ್ರಮುಖ ನಾಯಕರು ಯಾರೆಲ್ಲ?

ಹವಾಮಾನ ವೈಪರೀತ್ಯದ ಕಾರಣ ಜೈಪುರದಲ್ಲಿ ಇಳಿದಿರುವ ಈ ವಿಶೇಷ ವಿಮಾನದಲ್ಲಿ ಕೆಳಗಿನ ಪ್ರಮುಖ ನಾಯಕರಿದ್ದಾರೆ:

ರಣದೀಪ್ ಸಿಂಗ್ ಸುರ್ಜೆವಾಲ (ರಾಜ್ಯ ಕಾಂಗ್ರೆಸ್ ಉಸ್ತುವಾರಿ ಹಾಗೂ ಎಐಸಿಸಿ ಪ್ರಧಾನ ಕಾರ್ಯದರ್ಶಿ)

ಕೆ.ಜೆ. ಜಾರ್ಜ್ (ಸಚಿವರು)

ಬೈರತಿ ಸುರೇಶ್ (ಸಚಿವರು)

ಎ.ಎಸ್. ಪೊನ್ನಣ್ಣ (ಮುಖ್ಯಮಂತ್ರಿಗಳ ಕಾನೂನು ಸಲಹೆಗಾರ)

ಡಾ. ಯತೀಂದ್ರ ಸಿದ್ದರಾಮಯ್ಯ (ವಿಧಾನ ಪರಿಷತ್ ಸದಸ್ಯ)

ಅಭಿಷೇಕ್ ದತ್ (ಎಐಸಿಸಿ ಕಾರ್ಯದರ್ಶಿ)

ದೆಹಲಿಯಲ್ಲಿ ಬಿರುಗಾಳಿ ಹಾಗೂ ಭಾರೀ ಮಳೆಯ ಮುನ್ಸೂಚನೆ ಇರುವುದರಿಂದ ವಿಮಾನಗಳ ಸಂಚಾರಕ್ಕೆ ಅಡ್ಡಿಯಾಗಿದೆ. ಈ ಕಾರಣದಿಂದಾಗಿ ಜೈಪುರ ವಿಮಾನ ನಿಲ್ದಾಣದ ಅಧಿಕಾರಿಗಳು ವಿಮಾನದ ತುರ್ತು ಲ್ಯಾಂಡಿಂಗ್‌ಗೆ ವ್ಯವಸ್ಥೆ ಕಲ್ಪಿಸಿದ್ದಾರೆ. ನಾಯಕರೆಲ್ಲರೂ ವಿಮಾನ ನಿಲ್ದಾಣದಲ್ಲೇ ಸುರಕ್ಷಿತವಾಗಿದ್ದು, ಹವಾಮಾನ ತಿಳಿಗೊಂಡ ತಕ್ಷಣವೇ ದೆಹಲಿಯತ್ತ ಪ್ರಯಾಣ ಬೆಳೆಸಲಿದ್ದಾರೆ. ರಾಜಕೀಯ ಬಿಕ್ಕಟ್ಟಿನ ಈ ಸೂಕ್ಷ್ಮ ಸಮಯದಲ್ಲಿ ಜೈಪುರದಲ್ಲೇ ನಾಯಕರು ಒಟ್ಟಿಗೆ ಇರುವುದರಿಂದ ಮುಂದಿನ ನಾಯಕತ್ವದ ಸೂತ್ರಗಳ ಕುರಿತು ಅಲ್ಲೇ ಪ್ರಾಥಮಿಕ ಸುತ್ತಿನ ಮಾತುಕತೆಗಳು ನಡೆಯುವ ಸಾಧ್ಯತೆಯೂ ಇದೆ ಎಂದು ವಿಶ್ಲೇಷಿಸಲಾಗುತ್ತಿದೆ.