'ನಿಮ್ಮಲ್ಲಿ ಎಷ್ಟು ಮಂದಿ ಮತದಾನದ ಹಕ್ಕನ್ನು ಕಳೆದುಕೊಂಡಿದ್ದೀರಿ?'

ತಮ್ಮ ಎಂದಿನ ಶೈಲಿಯಲ್ಲಿ ವೇದಿಕೆಯಿಂದ ಇಳಿಯುತ್ತಾ ಕೇಳಿದರು ಮಮತಾ ಬ್ಯಾನರ್ಜಿ. ಅಲ್ಲಿ ಸೇರಿದ್ದ ಶೇ 60ರಷ್ಟು ಮಂದಿ- ಹೆಚ್ಚಿನವರು ಮಹಿಳೆಯರು- ತಮ್ಮ ಕೈಗಳನ್ನು ಎತ್ತಿದರು.

'ಹೌದಾ'. ನಂಬಲಸಾಧ್ಯ ಎನ್ನುವಂತೆ ಕ್ಷಣ ಹೊತ್ತು ಮೌನವಾದ ಮಮತಾ ಅವರು, ನಂತರ ಹೇಳಿದರು: 'ಮತ್ತೆ ಓಟು ಹಾಕುವವರು ಯಾರು?'

ಪಶ್ಚಿಮ ಬಂಗಾಳದಲ್ಲಿ ಮತದಾರರ ಪಟ್ಟಿ ಸಮಗ್ರ ವಿಶೇಷ ಪರಿಷ್ಕರಣೆಯ (ಎಸ್‌ಐಆರ್) ಬಗ್ಗೆ ಮತ್ತು ಅದು ರಾಜ್ಯದ ಜನರ ಮೇಲೆ ಬೀರಿರುವ ಪರಿಣಾಮಗಳ ಬಗ್ಗೆ ಹಲವು ರೀತಿಯ ಕಥನಗಳಿವೆ. ಅದರ ಒಂದು ನೋಟವು ಮಾಲ್ಡಾದ ಇನಾಯತ್‌ಪುರದಲ್ಲಿ ನಡೆದ ತೃಣಮೂಲ ಕಾಂಗ್ರೆಸ್‌ನ ರ್‍ಯಾಲಿಯಲ್ಲಿ ಸಿಕ್ಕಿತು.

ಈಗ ವೀರಭೂಮಿಯ ರಾಮ್‌ಪುರಹಾಟ್‌ಗೆ ಬರೋಣ. ಮತಪಟ್ಟಿಯಿಂದ ಹೆಸರು ತೆಗೆದುಹಾಕಲಾಗಿರುವ ನೂರಾರು ಮಂದಿ ನ್ಯಾಯಮಂಡಳಿಯಲ್ಲಿ ಮೇಲ್ಮನವಿ ಸಲ್ಲಿಸಲು ಅಲ್ಲಿನ ಉಪವಿಭಾಗಾಧಿಕಾರಿ ಕಚೇರಿಯ ಮುಂದೆ ಸಾಲುಗಟ್ಟಿ ನಿಂತಿದ್ದರು. ಅಷ್ಟರಲ್ಲಿ ಸುದ್ದಿಯೊಂದು ಬಂತು; ನ್ಯಾಯಮಂಡಳಿಗೆ ಸಲ್ಲಿಸಬೇಕಿದ್ದ ದಾಖಲೆಗಳನ್ನು ಅಲ್ಲಿಂದ ಒಂದು ಕಿಲೋಮೀಟರ್ ದೂರದ ಕಾಲೇಜಿನಲ್ಲಿ ಸ್ವೀಕರಿಸಲಾಗುತ್ತದೆ. ಮತದಾರರ ಪಟ್ಟಿಗೆ ಮತ್ತೆ ಹೆಸರು ಸೇರ್ಪಡೆಗೊಳಿಸಬೇಕು ಎಂದು ಕಾತರದಿಂದಿದ್ದ ಮಹಿಳೆಯರು ಮತ್ತು ಪುರುಷರು ತಕ್ಷಣವೇ ಕಾಲೇಜಿನ ಬಳಿ ಸರತಿ ಸಾಲಿನಲ್ಲಿ ನಿಲ್ಲಲು ಅತ್ತ ಕಡೆ ದೌಡಾಯಿಸಿದರು.

ಸಂಕ್ಷಿಪ್ತ ಮಾಹಿತಿ - ಪೂರ್ಣ ವಿವರಣೆಗೆ ಕ್ಲಿಕ್ ಮಾಡಿಪ್ರಮುಖ ಮುಖ್ಯಾಂಶಗಳ ಸಂಕ್ಷಿಪ್ತ ಸಾರಾಂಶ

ಆಳ-ಅಗಲ | ಮತ ಸಮರ: ಎಸ್‌ಐಆರ್‌ಗೆ ನಲುಗಿದ ಪಶ್ಚಿಮ ಬಂಗಾಳ

ಒಂದು ಸಾಲಿನಲ್ಲಿಪಶ್ಚಿಮ ಬಂಗಾಳದಲ್ಲಿ ಮತದಾರರ ಪಟ್ಟಿ ಪರಿಷ್ಕರಣೆ ಪ್ರಕ್ರಿಯೆಯಿಂದಾಗಿ ಲಕ್ಷಾಂತರ ಮಂದಿ ಮತದಾನದ ಹಕ್ಕಿನಿಂದ ವಂಚಿತರಾಗುತ್ತಿದ್ದು, ತೀವ್ರ ರಾಜಕೀಯ ಸಂಘರ್ಷಕ್ಕೆ ಕಾರಣವಾಗಿದೆ.ಪ್ರಮುಖ ಅಂಶಗಳು• ಮತದಾರರ ಪಟ್ಟಿ ಪರಿಷ್ಕರಣೆ ಪ್ರಕ್ರಿಯೆಚುನಾವಣಾ ಆಯೋಗವು 2025ರ ನವೆಂಬರ್‌ನಿಂದ ಪಶ್ಚಿಮ ಬಂಗಾಳದಲ್ಲಿ ಮತದಾರರ ಪಟ್ಟಿ ಸಮಗ್ರ ವಿಶೇಷ ಪರಿಷ್ಕರಣೆ (ಎಸ್‌ಐಆರ್) ಆರಂಭಿಸಿದ್ದು, ಇದರಿಂದ ಸುಮಾರು 91 ಲಕ್ಷ ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ಕೈಬಿಡಲಾಗಿದೆ.• ಸಾರ್ವಜನಿಕರ ಸಂಕಷ್ಟ ಮತ್ತು ಸಾವುಹೆಸರು ನೋಂದಣಿಗಾಗಿ ನ್ಯಾಯಮಂಡಳಿಯ ಕಚೇರಿಗಳ ಮುಂದೆ ಸಾಲುಗಟ್ಟಿ ನಿಲ್ಲುವ ಅನಿವಾರ್ಯತೆ ಸೃಷ್ಟಿಯಾಗಿದ್ದು, ಅತಿಯಾದ ಮಾನಸಿಕ ಒತ್ತಡ ಹಾಗೂ ಆತಂಕದಿಂದಾಗಿ ಹಲವು ನಾಗರಿಕರು ಮೃತಪಟ್ಟಿರುವ ವರದಿಗಳಿವೆ.• ರಾಜಕೀಯ ಆರೋಪ ಮತ್ತು ಸಂಘರ್ಷಬಿಜೆಪಿ ಪರವಾಗಿ ಚುನಾವಣಾ ಆಯೋಗ ಕೆಲಸ ಮಾಡುತ್ತಿದೆ ಎಂದು ಟಿಎಂಸಿ ನೇರವಾಗಿ ಆರೋಪಿಸಿದೆ. ಮತ್ತೊಂದೆಡೆ, ಆಯೋಗವು ಈ ಪ್ರಕ್ರಿಯೆಯು ಪಾರದರ್ಶಕ ಮತ್ತು ನಕಲಿ ಮತದಾರರನ್ನು ತೆರವುಗೊಳಿಸಲು ಎಂದು ಸಮರ್ಥಿಸಿಕೊಂಡಿದೆ.• ನ್ಯಾಯಾಂಗ ಮತ್ತು ಆಯೋಗದ ಮಧ್ಯಸ್ಥಿಕೆಸುಪ್ರೀಂ ಕೋರ್ಟ್ ಸೂಚನೆಯ ಮೇರೆಗೆ ಕಲ್ಕತ್ತ ಹೈಕೋರ್ಟ್‌ನ ಅಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದಾರೆ. ಆದರೆ, ನಾಮಪತ್ರ ಸಲ್ಲಿಕೆ ಪ್ರಕ್ರಿಯೆ ಅಂತ್ಯಗೊಂಡಿರುವುದರಿಂದ ಪಟ್ಟಿಯಿಂದ ತೆಗೆಯಲ್ಪಟ್ಟವರು ಮತ ಚಲಾಯಿಸುವುದು ಅನಿಶ್ಚಿತವಾಗಿದೆ.• ಸಾಮಾಜಿಕ ಹಾಗೂ ಪ್ರಾದೇಶಿಕ ಪ್ರಭಾವമുಸ್ಲಿಂ ಪ್ರಾಬಲ್ಯವಿರುವ ಜಿಲ್ಲೆಗಳಲ್ಲಿ ಅತಿ ಹೆಚ್ಚು ಹೆಸರುಗಳನ್ನು ಕೈಬಿಡಲಾಗಿದೆ. ಇದು ಮಹಿಳಾ ಮತದಾರರು ಮತ್ತು ವಲಸಿಗ ಹಿಂದೂ ಮತುವಾ ಸಮುದಾಯದ ಮೇಲೂ ಭಾರಿ ಪರಿಣಾಮ ಬೀರಿದೆ.ಪ್ರಮುಖ ಅಂಕಿಅಂಶಗಳು91 ಲಕ್ಷಪಟ್ಟಿಯಿಂದ ತೆಗೆದುಹಾಕಲಾದ ಮತದಾರರ ಸಂಖ್ಯೆ57 ಲಕ್ಷಪಟ್ಟಿಯಿಂದ ಕೈಬಿಟ್ಟ ಮಹಿಳಾ ಮತದಾರರು2025ರ ನವೆಂಬರ್ 4ಎಸ್‌ಐಆರ್ ಪರಿಷ್ಕರಣೆ ಆರಂಭ ದಿನಾಂಕಶೇ 95ಮುಸ್ಲಿಂ ಪ್ರಾಬಲ್ಯದ ಜಿಲ್ಲೆಗಳಲ್ಲಿ ಕೈಬಿಡಲಾದ ಮತದಾರರ ಪ್ರಮಾಣ2132021ರ ಚುನಾವಣೆಯಲ್ಲಿ ಟಿಎಂಸಿ ಗೆದ್ದ ಸ್ಥಾನಗಳುಎಐ ಬಳಸಿ ಸಂಸ್ಕರಿಸಲಾಗಿದೆ. ಪಿವಿ ಡಿಜಿಟಲ್ ತಂಡ ಪರಿಶೀಲಿಸಿದೆ

ರಾಮ್‌ಪುರಹಾಟ್‌ಗೆ 50 ಕಿ.ಮೀ. ದೂರದ ಸುರೀಯಲ್ಲಿ ಪರಿಸ್ಥಿತಿ ಮತ್ತಷ್ಟು ಭೀಕರವಾಗಿತ್ತು. 'ಎಸ್‌ಐಆರ್ ಆರಂಭವಾದಾಗಿನಿಂದ ನಾನು ಒಂದಲ್ಲ, ಮೂರು ಬಾರಿ ಅವರು ಕೇಳಿದ ಎಲ್ಲ ದಾಖಲೆಗಳನ್ನು ಸಲ್ಲಿಸಿದ್ದೇನೆ. ಆದರೂ ಅವರು ನನ್ನ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಿದ್ದಾರೆ' ಎಂದರು ಮೀರಾ ಡೋಲುಯಿ. ಬೆಳಿಗ್ಗೆಯೇ ಮನೆ ಬಿಟ್ಟು ಹೊರಟು ಸುರೀ ತಲುಪಿದ್ದ ಅವರು, ಉದ್ದದ ಸಾಲಿನಲ್ಲಿ ನಿಂತು ನಾಲ್ಕನೇ ಬಾರಿಗೆ ದಾಖಲೆಗಳನ್ನು ಸಲ್ಲಿಸಿದ್ದರು. 'ನ್ಯಾಯಮಂಡಳಿ ನನ್ನ ಮನವಿ ತಿರಸ್ಕರಿಸಿದರೆ, ನಾನು ಎಲ್ಲಿಗೆ ಹೋಗುತ್ತೇನೋ ಗೊತ್ತಿಲ್ಲ' ಎಂದರು ಮೀರಾ.

ತಮ್ಮ ಮತದಾನದ ಹಕ್ಕನ್ನು ಕಸಿದುಕೊಂಡದ್ದರ ವಿರುದ್ಧ ದಾಖಲೆ ಸಲ್ಲಿಸಲು ದುಬ್ರಾಜ್‌ಪುರದಿಂದ ಬಂದಿದ್ದ ತನುಜಾ ಬೀಬಿ, ದಾಖಲೆ ಸಲ್ಲಿಸಿದವರೇ ಕುಸಿದುಬಿದ್ದರು. 'ಸರತಿ ಸಾಲಿನಲ್ಲಿ ನಿಂತಿದ್ದಾಗ ನನ್ನ ಹೆಂಡತಿ ಅನಾರೋಗ್ಯಪೀಡಿತಳಾದಳು' ಎಂದು ಆಕೆಯ ಗಂಡ ಮುಕಿಂ ಶೇಖ್ ಹೇಳಿದರು. ಅವರ ಹೆಸರೂ ಮತದಾರರ ಪಟ್ಟಿಯಿಂದ ತೆಗೆದುಹಾಕಲಾಗಿದೆ. 'ಆದರೆ, ನಾವು ಸರತಿ ಬಿಟ್ಟು ಹೊರಬರುವಂತಿರಲಿಲ್ಲ. ಇಲ್ಲದಿದ್ದರೆ ಅದಕ್ಕಾಗಿ ನಾವು ಮತ್ತೊಂದು ದಿನ ಬರಬೇಕಾಗುತ್ತಿತ್ತು.'

ಜೀವನ್ ಕೃಷ್ಣ ವಿಸ್ವಾಸ್ ಅವರು ತಮ್ಮ ಮಗಳು ಚಂಪಾ ಅವರೊಂದಿಗೆ ಮುಂಜಾನೆ ನಾದಿಯಾ ಜಿಲ್ಲೆಯ ಗರಾಪೋಟಾದಲ್ಲಿರುವ ತಮ್ಮ ಮನೆಯಿಂದ ಹೊರಟರು. ತಂದೆ, ಮಗಳು- ಇಬ್ಬರ ಹೆಸರುಗಳನ್ನೂ ಮತದಾರರ ಪಟ್ಟಿಯಿಂದ ತೆಗೆದುಹಾಕಲಾಗಿದೆ. ಇಬ್ಬರೂ ನಡೆದುಕೊಂಡು ಹೋಗಿ, ಆಟೊ ಹಿಡಿದು, ನಂತರ ರೈಲಿನಲ್ಲಿ ರಾಣಘಾಟ್ ತಲುಪಿದರು. ಅವರು ನ್ಯಾಯಮಂಡಳಿಯ ಮುಂದೆ ಮೇಲ್ಮನವಿ ಸಲ್ಲಿಸಲು ಮತ್ತು ತಮ್ಮ ಮತದಾನದ ಹಕ್ಕನ್ನು ಪುನರ್ ಸ್ಥಾಪಿಸಲು ಪ್ರಯತ್ನಿಸುವ ಸಲುವಾಗಿ ಹೊರಟಿದ್ದರು.

ಆದರೆ, ಅವರು ನಿಗದಿತ ಸ್ಥಳ ತಲುಪುವ ಮುನ್ನವೇ ಜೀವನ್ ಹೃದಯಾಘಾತಕ್ಕೆ ಒಳಗಾದರು. ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಅವರು ಮೃತಪಟ್ಟಿದ್ದಾರೆ ಎಂದು ಘೋಷಿಸಲಾಯಿತು. ಕುಟುಂಬವನ್ನು ಪೋಷಿಸಲು ಕಟ್ಟಡ ನಿರ್ಮಾಣದ ಸ್ಥಳದಲ್ಲಿ ಅಡುಗೆಯವರಾಗಿ ಕೆಲಸ ಮಾಡುತ್ತಿದ್ದ 68 ವರ್ಷದ ಅವರು ತಮ್ಮ ಜೀವನದಲ್ಲಿ ಅನೇಕ ಚುನಾವಣೆಗಳಲ್ಲಿ ಮತ ಚಲಾಯಿಸಿದ್ದರು. ಆದರೆ, ಕೊನೆಗೆ ಆ ಹಕ್ಕು ಕಳೆದುಕೊಂಡು ಸಾವಿಗೀಡಾದರು.

ಹೀಗೆ ಆದದ್ದು ಅವರೊಬ್ಬರಿಗೇ ಏನಲ್ಲ. ಕಳೆದ ವಾರ ಮತದಾರರ ಪಟ್ಟಿಯಿಂದ ತಮ್ಮ ಹೆಸರನ್ನು ತೆಗೆದುಹಾಕಲಾಗಿದೆ ಎಂದು ತಿಳಿದ ನಂತರ 32 ವರ್ಷದ ಅನಾರುಲ್ ಶೇಖ್ ವೀರಭೂಮಿಯ ನಲ್ಹಟಿಯಲ್ಲಿರುವ ತಮ್ಮ ಮನೆಯಲ್ಲಿ ಸತ್ತುಬಿದ್ದಿದ್ದರು. ಅವರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎನ್ನಲಾಗುತ್ತಿದೆ. ಮಾಲ್ಡಾದ ಸಹಾಪುರದ 37 ವರ್ಷದ ಕಬಿಲ್ ಶೇಖ್ ಅವರದ್ದು ಕೂಡ ಇದೇ ಕಥೆ. ಎರಡು ವಾರಗಳಲ್ಲಿ ಮತದಾರರ ಪಟ್ಟಿಯಿಂದ ಹೆಸರುಗಳನ್ನು ತೆಗೆದುಹಾಕಿದ್ದಕ್ಕೆ ಸಂಬಂಧಿಸಿದಂತೆ ಇನ್ನೂ ನಾಲ್ಕು ಸಾವುಗಳು ರಾಜ್ಯದಲ್ಲಿ ವರದಿಯಾಗಿವೆ.

ಎಸ್‌ಐಆರ್ ಪ್ರಕ್ರಿಯೆಯು ಪಶ್ಚಿಮ ಬಂಗಾಳದಲ್ಲಿ ಸುಮಾರು 220 ಜೀವಗಳನ್ನು ಬಲಿ ತೆಗೆದುಕೊಂಡಿದೆ ಎಂದು ಮಮತಾ ಬ್ಯಾನರ್ಜಿ ಅವರು ಆರೋಪಿಸಿದ್ದಾರೆ. ಆದರೆ, ಚುನಾವಣಾ ಆಯೋಗವು ಮಮತಾ ಅವರ ಹೇಳಿಕೆಯನ್ನು ಒಪ್ಪಿಲ್ಲ.

ಇದು ಉತ್ಪ್ರೇಕ್ಷೆ ಎನ್ನುವುದು ಬಿಜೆಪಿ ವಾದ. ಮತದಾರರ ಪಟ್ಟಿಯನ್ನು ಸರಿಸಡಿಸುವ ಪ್ರಕ್ರಿಯೆಗೆ ಕಳಂಕ ತರಲು ಸಹಜ ಸಾವುಗಳನ್ನೂ ಮಮತಾ ಬ್ಯಾನರ್ಜಿ ಅವರು ಬಳಸಿಕೊಳ್ಳುತ್ತಿದ್ದಾರೆ ಎನ್ನುವುದು ಅದರ ಆರೋಪ.

ವಿಧಾನಸಭಾ ಚುನಾವಣೆಗೆ ಸುಮಾರು ಆರು ತಿಂಗಳ ಮೊದಲು (2025ರ ನವೆಂಬರ್ 4ರಂದು) ಚುನಾವಣಾ ಆಯೋಗ (ಇಸಿ) ಪಶ್ಚಿಮ ಬಂಗಾಳದಲ್ಲಿ ಎಸ್‌ಐಆರ್ ಪ್ರಾರಂಭಿಸಿತು. ಡಿಸೆಂಬರ್ 16ರಂದು ಮೊದಲ ಹಂತ ಮುಗಿಯುವ ಹೊತ್ತಿಗೆ, ಮೊದಲು 7.66 ಕೋಟಿಯಷ್ಟಿದ್ದ ಮತದಾರರ ಸಂಖ್ಯೆಯು 7.08 ಕೋಟಿಗೆ ಇಳಿದಿತ್ತು. ಸುಮಾರು 58 ಲಕ್ಷ ಹೆಸರುಗಳನ್ನು 'ಎಎಎಸ್‌ಡಿ'ಗಳು ಎಂದು ತೆಗೆದುಹಾಕಲಾಗಿದೆ. ಅಂದರೆ, ಗೈರುಹಾಜರಾದವರು, ಸ್ಥಳಾಂತರಗೊಂಡವರು, ಮರಣ ಹೊಂದಿದವರು ಮತ್ತು ನಕಲಿ ಮತದಾರರು.

ಚುನಾವಣಾ ಆಯೋಗವು ಸತ್ತಿದ್ದಾರೆ ಎಂದು ಘೋಷಿಸಿ, ಪಟ್ಟಿಯಿಂದ ಹೆಸರುಗಳನ್ನು ತೆಗೆದುಹಾಕಿ‌ದ್ದ ಹಲವರನ್ನು ತೃಣಮೂಲ ಕಾಂಗ್ರೆಸ್‌ನ ಪರಮೋಚ್ಚ ನಾಯಕಿ ಮಮತಾ ಬ್ಯಾನರ್ಜಿ ಮತ್ತು ಅವರ ಉತ್ತರಾಧಿಕಾರಿ ಎನ್ನಲಾಗುವ ಅಭಿಷೇಕ್ ಬ್ಯಾನರ್ಜಿ ಅವರು ಕರೆತಂದು ಪರೇಡ್ ನಡೆಸಿದ್ದರು.

2025ರ ಡಿ.27ರಂದು ಆರಂಭವಾದ ಎರಡನೇ ಹಂತದಲ್ಲಿ ಪರಿಷ್ಕರಣೆ ಪಟ್ಟಿಯಲ್ಲಿದ್ದ 1.67 ಕೋಟಿ ಜನರನ್ನು ವಿಚಾರಣೆಗೆ ಕರೆಯಲಾಗಿತ್ತು. ಈ ಪೈಕಿ 1.36 ಕೋಟಿ ಮಂದಿಯ ಹೆಸರುಗಳ 'ಮಾಹಿತಿ ಹೊಂದಿಕೆ ಆಗುತ್ತಿಲ್ಲ' ಎನ್ನಲಾಗಿದೆ. 31 ಲಕ್ಷ ಮಂದಿಯ ಹೆಸರುಗಳು 2002ರ ಪಟ್ಟಿಯೊಂದಿಗೆ ಹೊಂದಾಣಿಕೆ ಆಗದಿರುವುದು ಸೇರಿದಂತೆ ಹಲವು ರೀತಿಯ ಸಮಸ್ಯೆ ಎದುರಿಸುತ್ತಿವೆ.

ರಾಜ್ಯದಾದ್ಯಂತ ಒಂದೇ ಪರಿಸ್ಥಿತಿ; ತಮ್ಮ ಮತದಾನದ ಹಕ್ಕನ್ನು ರಕ್ಷಿಸಿಕೊಳ್ಳಲು ಅಂಗವಿಕಲರು, ಹಿರಿಯ ನಾಗರಿಕರು, ಅನಾರೋಗ್ಯ ಇರುವವರು ಸೇರಿದಂತೆ ದೊಡ್ಡ ಸಂಖ್ಯೆಯ ಜನ ಉದ್ದದ ಸಾಲುಗಳಲ್ಲಿ ನಿಲ್ಲುತ್ತಿದ್ದಾರೆ. ಅಕ್ಷರ ದೋಷಗಳು, ಕುಟುಂಬದ ಹೆಸರಿನ ತಪ್ಪು ನಮೂದು, ವಯಸ್ಸು ಮತ್ತಿತರ ವಿವರಗಳಲ್ಲಿನ ತಪ್ಪುಗಳು 'ಮಾಹಿತಿ ಹೊಂದಿಕೆ ಆಗುತ್ತಿಲ್ಲ' ‍ಪಟ್ಟಿಯಲ್ಲಿ ಬರುತ್ತವೆ. ಹೀಗಾಗಿ ನೈಜ ಮತದಾರರು ಕೂಡ ಮತ್ತೆ ಮತ್ತೆ ವಿಚಾರಣೆಗೆ ಹಾಜರಾಗಬೇಕಾದ, ಹಲವು ರೀತಿಯ ದಾಖಲೆ ಸಲ್ಲಿಸಬೇಕಾದ ಮತ್ತು ವಿಸ್ತೃತ ಆಡಳಿತಾತ್ಮಕ ‍ಪ್ರಕ್ರಿಯೆ ಅನುಸರಿಸಬೇಕಾದ ಅನಿವಾರ್ಯಕ್ಕೆ ಸಿಲುಕಿದ್ದಾರೆ.

ಎಸ್‌ಐಆರ್ ಪ್ರಕ್ರಿಯೆ ಪೂರ್ಣಗೊಂಡ ನಂತರ ಆಯೋಗವು ಫೆಬ್ರುವರಿ 28ರಂದು ಮತ್ತೊಂದು ಪಟ್ಟಿ ಪ್ರಕಟಿಸಿತು. 63.66 ಲಕ್ಷ (ಶೇ 8.3ರಷ್ಟು) ಮತದಾರರನ್ನು ಪಟ್ಟಿಯಿಂದ ಕೈಬಿಡಲಾಗಿತ್ತು. ಜತೆಗೆ, 60.6 ಲಕ್ಷ ಮತದಾರರ ಹೆಸರುಗಳು 'ಪರಿಶೀಲನೆಯ ಹಂತ' ವಿಭಾಗದಲ್ಲಿ ಸೇರಿಸಲಾಗಿದೆ. ಇವರು ಪಟ್ಟಿಯಲ್ಲಿರಬೇಕೇ ಬೇಡವೇ ಎನ್ನುವುದನ್ನು ಸುಪ್ರೀಂ ಕೋರ್ಟ್‌ನ ನಿರ್ದೇಶನದಂತೆ ಕಲ್ಕತ್ತ ಹೈಕೋರ್ಟ್‌ನ ನ್ಯಾಯಾಂಗ ಅಧಿಕಾರಿಗಳು ಪರಿಶೀಲಿಸಲಿದ್ದಾರೆ.

'ಪರಿಶೀಲನೆಯ ಹಂತ'ದಲ್ಲಿರುವ 27 ಲಕ್ಷಕ್ಕೂ ಅಧಿಕ ಮಂದಿಯ ಹೆಸರುಗಳು ಮತದಾರರ ಪಟ್ಟಿಯಿಂದ ತೆಗೆದುಹಾಕಲ್ಪಟ್ಟಿದ್ದು, ಮೇಲ್ಮನವಿ ಸಲ್ಲಿಸಲು ಅವರು ಅದಕ್ಕಾಗಿ (ಸುಪ್ರೀಂ ಕೋರ್ಟ್‌ ನಿರ್ದೇಶನದಂತೆ) ಸ್ಥಾಪಿಸಲಾಗಿರುವ 19 ನ್ಯಾಯಮಂಡಳಿಗಳ ಮುಂದೆ ಮತ್ತೆ ಸಾಲುಗಟ್ಟಿ ನಿಲ್ಲುತ್ತಿದ್ದಾರೆ. ಏಪ್ರಿಲ್ ಆರು ಮತ್ತು ಏಳರಂದು ಆಯೋಗವು ಈ ಮಾಹಿತಿಯನ್ನು ಪ್ರಕಟಿಸಿದೆ.

ಆದಾಗ್ಯೂ, ಚುನಾವಣೆಗೆ ನಾಮಪತ್ರ ಸಲ್ಲಿಸುವ ದಿನಾಂಕ ಅಂತ್ಯವಾಗಿರುವುದರಿಂದ ರಾಜ್ಯದ 294 ವಿಧಾನಸಭಾ ಕ್ಷೇತ್ರಗಳ ಮತದಾರರ ಪಟ್ಟಿ ಪರಿಷ್ಕರಣೆ ಸ್ಥಗಿತವಾಗಿದೆ. ಪಟ್ಟಿಯಿಂದ 91 ಲಕ್ಷ ಮಂದಿಯ ಹೆಸರುಗಳನ್ನು ತೆಗೆದುಹಾಕಲಾಗಿದೆ. ರಾಜ್ಯದಲ್ಲಿ ಏಪ್ರಿಲ್ 23 ಮತ್ತು 29ರಂದು ಮತದಾನ ನಡೆಯಲಿದ್ದು, ಅದಕ್ಕೂ ಮುಂಚೆಯೇ ನ್ಯಾಯಮಂಡಳಿ ಅವರ ಹೆಸರುಗಳನ್ನು ಪಟ್ಟಿಗೆ ಸೇರಿಸಿದರೂ, ಸುಪ್ರೀಂ ಕೋರ್ಟ್‌ ಮಧ್ಯಪ್ರವೇಶ ಮಾಡದ ಹೊರತು ಅವರು ತಮ್ಮ ಹಕ್ಕು ಚಲಾಯಿಸುವುದು ಸಾಧ್ಯವಿಲ್ಲ. ರಾಜ್ಯದಲ್ಲಿ ಮತದಾರರ ಸಂಖ್ಯೆಯು 6.77 ಕೋಟಿಗೆ ಇಳಿದಿದೆ.

ಆಯೋಗ-ಟಿಎಂಸಿ ಸಂಘರ್ಷ

ರಾಜ್ಯದಲ್ಲಿ ಮತದಾರರ ಪಟ್ಟಿ ಪರಿಷ್ಕರಣೆ ಶುರುವಾದಾಗಿನಿಂದ ಚುನಾವಣಾ ಆಯೋಗ ಮತ್ತು ಟಿಎಂಸಿ ಸಂಘರ್ಷದಲ್ಲಿ ತೊಡಗಿವೆ. ವಿಧಾನಸಭಾ ಚುನಾವಣೆಯಲ್ಲಿ ಕೇಸರಿ ಪಾಳಯಕ್ಕೆ ಅನುಕೂಲ ಕಲ್ಪಿಸುವ ಉದ್ದೇಶದಿಂದ ಬಿಜೆಪಿಯ ಸೂಚನೆಯ ಅನುಸಾರ ಚುನಾವಣಾ ಆಯೋಗವು ರಾಜ್ಯದಲ್ಲಿ ಮತದಾರರ ಪಟ್ಟಿ ಪರಿಷ್ಕರಣೆ ನಡೆಸುತ್ತಿದೆ ಎಂದು ಟಿಎಂಸಿ ಆರೋಪಿಸಿದೆ.

ಚುನಾವಣಾ ವೇಳಾಪಟ್ಟಿ ಪ್ರಕಟವಾದ ನಂತರ ಹಿರಿಯ ಅಧಿಕಾರಿಗಳು ಮತ್ತು ಪೊಲೀಸ್‌ ಅಧಿಕಾರಿಗಳನ್ನು ಆಯೋಗವು ವರ್ಗಾವಣೆ ಮಾಡಿರುವುದು ಕೂಡ ಮಾಲ್ಡಾದ ಕಲಿಯಾಚಕ್‌ನಲ್ಲಿ ಉದ್ರಿಕ್ತರ ಗುಂಪು ನ್ಯಾಯಾಂಗ ಇಲಾಖೆಯ ಅಧಿಕಾರಿಗಳನ್ನು ಕೂಡಿ ಹಾಕುವಂತಹ ಸನ್ನಿವೇಶ ನಿರ್ಮಾಣಕ್ಕೆ ಕಾರಣವಾಗಿದೆ ಎಂದು ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರು ಆರೋಪಿಸಿದ್ದಾರೆ.

ದೆಹಲಿಯ ನಿರ್ವಚನ ಭವನದಲ್ಲಿ (ಚುನಾವಣಾ ಆಯೋಗದ ಮುಖ್ಯ ಕಚೇರಿ) ಏಪ್ರಿಲ್‌ 8ರಂದು ಭೇಟಿಗೆ ಹೋಗಿದ್ದಾಗ ಮುಖ್ಯ ಚುನಾವಣಾ ಆಯುಕ್ತರು ತಮಗೆ 'ಇಲ್ಲಿಂದ ತೊಲಗಿ' (ಗೆಟ್ ಲಾಸ್ಟ್‌) ಎಂದಿದ್ದಾರೆ ಎಂದು ಟಿಎಂಸಿ ಸಂಸದರು ಆರೋಪಿಸಿದ್ದು ಆಯೋಗ ಮತ್ತು ಟಿಎಂಸಿ ನಡುವಿನ ಸಂಘರ್ಷದ ಇತ್ತೀಚಿನ ಕುದಿಬಿಂದುವಾಗಿದೆ. ಈ ಆರೋಪ ಕೇಳಿಬಂದ ನಂತರ ಈ ಬಗ್ಗೆ 'ಎಕ್ಸ್‌'ನಲ್ಲಿ ಪ್ರತಿಕ್ರಿಯಿಸಿದ್ದ ಆಯೋಗವು, ಟಿಎಂಸಿಗೆ ತನ್ನ ನೇರ ಮಾತುಗಳೆಂದರೆ- ಈ ಬಾರಿ ಪಶ್ಚಿಮ ಬಂಗಾಳದಲ್ಲಿ ಚುನಾವಣೆಯು 'ಹಿಂಸಾಚಾರ-ಮುಕ್ತ', 'ಭಯ-ಮುಕ್ತ', 'ಆಮಿಷ-ಮುಕ್ತ'; ನಕಲಿ ಮತದಾನ ಇಲ್ಲದೆ, ಮತಗಟ್ಟೆ ಮತ್ತು ಸಂಪನ್ಮೂಲಗಳ ತಡೆ ಇಲ್ಲದೆ ನಡೆಯಲಿದೆ- ಎಂದು ಹೇಳಿತ್ತು. ಆಯೋಗ‌ದ ಈ ಪೋಸ್ಟ್‌ನಲ್ಲಿರುವ ಅಂಶಗಳು 'ಪಶ್ಚಿಮ ಬಂಗಾಳದಲ್ಲಿ ಚುನಾವಣೆಯಲ್ಲಿ ಗೆಲ್ಲಲು ಟಿಎಂಸಿಯು ಇದೇ ರೀತಿ ಮಾಡುತ್ತಾ ಬಂದಿದೆ' ಎಂದು ಬಿಜೆಪಿ ಹಿಂದಿನಿಂದಲೂ ಮಾಡುತ್ತಾ ಬಂದಿರುವ ಆರೋಪವನ್ನೇ ಪ್ರತಿಧ್ವನಿಸುವಂತಿತ್ತು.

2021ರ ಚುನಾವಣೆಯಲ್ಲಿ 3.28 ಕೋಟಿ ಮತಗಳನ್ನು (47.9%) ಪಡೆಯುವ ಮೂಲಕ ಟಿಎಂಸಿಯು 294 ಸ್ಥಾನಗಳಲ್ಲಿ 213 ಸ್ಥಾನಗಳನ್ನು ಗೆದ್ದಿತ್ತು. ಬಿಜೆಪಿಯು 2.63 ಕೋಟಿ (38.1%) ಮತಗಳನ್ನು ಪಡೆದು 77 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಿತ್ತು. ಎಸ್‌ಐಆರ್‌ ಪ್ರಕ್ರಿಯೆಯಲ್ಲಿ 91 ಲಕ್ಷ ಮತದಾರರ ಹೆಸರುಗಳನ್ನು ಮತದಾರರ ಪಟ್ಟಿಯಿಂದ ತೆಗೆಯಲಾಗಿದ್ದು, ಇದು 2021ರದಲ್ಲಿ ಟಿಎಂಸಿ ಮತ್ತು ಬಿಜೆಪಿ ನಡುವಿನ 65 ಲಕ್ಷ ಮತಗಳ ವ್ಯತ್ಯಾಸಕ್ಕಿಂತ ಹೆಚ್ಚಿದೆ.