ನಿಗದಿತ ಅವಧಿಯ ಆಟದಲ್ಲಿ ಉಭಯ ತಂಡಗಳು 1-1 ಗೋಲುಗಳ ಸಮಬಲ ಸಾಧಿಸಿದ್ದವು. ಆ ಬಳಿಕ ನಡೆದ ಪೆನಾಲ್ಟಿ ಶೂಟೌಟ್‌ನಲ್ಲಿ ಆಸ್ಟ್ರೇಲಿಯಾ ನಾಯಕ ಹ್ಯಾರಿ ಸೌಟರ್ ಮತ್ತು ಲ್ಯೂಕಾಸ್ ಹೆರಿಂಗ್ಟನ್ ಅವರು ಗೋಲು ಗಳಿಸುವ ಅವಕಾಶವನ್ನು ತಪ್ಪಿಸಿಕೊಂಡರು. ಇದರ ಲಾಭ ಪಡೆದ ಈಜಿಪ್ಟ್ ಐತಿಹಾಸಿಕ ಜಯ ದಾಖಲಿಸಿ ಸಂಭ್ರಮಿಸಿತು.

ಇದು ಕೇವಲ ಗೆಲುವಲ್ಲ, ಹೊಸ ಇತಿಹಾಸ ಎಂದು ಪೆನಾಲ್ಟಿ ಶೂಟೌಟ್‌ನಲ್ಲಿ ತಂಡದ ಪರ ಮೂರನೇ ಗೋಲು ದಾಖಲಿಸಿದ ಈಜಿಪ್ಟ್ ನಾಯಕ ಮೊಹಮ್ಮದ್ ಸಲಾಹ್ ಹರ್ಷ ವ್ಯಕ್ತಪಡಿಸಿದರು. ಪಂದ್ಯಕ್ಕೂ ಮುನ್ನ ನಾನು ಆಟಗಾರರಿಗೆ ಒಂದೇ ಮಾತು ಹೇಳಿದ್ದೆ, -ಇದು ನಿಮ್ಮ ಜೀವನದ ಅತ್ಯಂತ ದೊಡ್ಡ ಪಂದ್ಯ. ಯಾವುದೇ ಒತ್ತಡಕ್ಕೆ ಒಳಗಾಗದೆ, ಕಣದಲ್ಲಿ ಪ್ರತಿ ಕ್ಷಣವನ್ನೂ ಆನಂದಿಸಿ ಎಂದಿದ್ದೆ. ಈ ಪಂದ್ಯವನ್ನು ಗೆದ್ದಿರುವುದಕ್ಕೆ ಹೆಮ್ಮೆಯಾಗುತ್ತಿದೆ ಎಂದು ಸಲಾಹ್ ನುಡಿದರು.

ಪಂದ್ಯದ ಪ್ರಥಮಾರ್ಧದಲ್ಲಿ ಈಜಿಪ್ಟ್ ಆಕ್ರಮಣಕಾರಿ ಆಟಕ್ಕೆ ಮೊರೆಹೋಯಿತು. ಪಂದ್ಯದ ಆರಂಭದಲ್ಲೇ ಇಮಾಮ್ ಹೊಡೆದ ಹೆಡರ್ ಗೋಲಿನ ನೆರವಿನಿಂದ ಈಜಿಪ್ಟ್ 1-0 ಮುನ್ನಡೆ ಸಾಧಿಸಿತು. ಆದರೆ ದ್ವಿತೀಯಾರ್ಧದಲ್ಲಿ ಆಸ್ಟ್ರೇಲಿಯಾ ತಿರುಗೇಟು ನೀಡಿತು. ಆಸ್ಟ್ರೇಲಿಯಾದ ಐಡನ್ ಒ ನೀಲ್ ಅವರು ಫ್ರೀ-ಕಿಕ್ ಮೂಲಕ ಚೆಂಡನ್ನು ಗೋಲು ಪೆಟ್ಟಿಗೆಯತ್ತ ಕಳುಹಿಸಿದರು. ಈ ವೇಳೆ ಚೆಂಡನ್ನು ತಡೆಯುವ ಯತ್ನದಲ್ಲಿ ಈಜಿಪ್ಟ್‌ನ ಮೊಹಮ್ಮದ್ ಹ್ಯಾನಿ ತಾವೇ ಚೆಂಡನ್ನು ಗೋಲು ಪೆಟ್ಟಿಗೆಗೆ ಹೊಡೆದರು. ಈ ಮೂಲಕ ಉಭಯ ತಂಡಗಳು ಸಮಬಲ ಸಾಧಿಸಿದವು.

ಕೋಚ್ ತಂತ್ರ ಕೈಕೊಟ್ಟಿತು: ಪೆನಾಲ್ಟಿ ಶೂಟೌಟ್ ಹಂತದಲ್ಲಿ ಆಸ್ಟ್ರೇಲಿಯಾ ಕೋಚ್ ಹಿರಿಯ ಕೀಪರ್ ಮ್ಯಾಥ್ಯೂ ರಯಾನ್ ಅವರನ್ನು ಕಣಕ್ಕಿಳಿಸುವ ತಂತ್ರ ಹೆಣೆದರು. ಆದರೆ, ಈಜಿಪ್ಟ್‌ನ ಪೆನಾಲ್ಟಿ ಶೂಟರ್‌ಗಳು ರಯಾನ್ ಅವರನ್ನು ವಂಚಿಸಿ ಗೋಲು ಗಳಿಸಿದ್ದರಿಂದ ಆಸ್ಟ್ರೇಲಿಯಾದ ತಂತ್ರ ಫಲ ನೀಡಲಿಲ್ಲ. ರಯಾನ್ ಕೇವಲ ಮೂಕ ಪ್ರೇಕ್ಷಕರಾಗಬೇಕಾಯಿತು.

ಕ್ವಾರ್ಟರ್ ಫೈನಲ್ ಪ್ರವೇಶಕ್ಕಾಗಿ ಜುಲೈ 7ರಂದು ಅಟ್ಲಾಂಟಾದಲ್ಲಿ ನಡೆಯಲಿರುವ ಪ್ರೀ-ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಈಜಿಪ್ಟ್ ಕಣಕ್ಕಿಳಿಯಲಿದ್ದು ಹಾಲಿ ಚಾಂಪಿಯನ್ ಅರ್ಜೆಂಟೀನಾವನ್ನು ಎದುರಿಸಲಿದೆ.