ಎಸ್.ಎಸ್.ಎಲ್.ಸಿ. ಅಥವಾ ಪಿಯುಸಿ ತರಗತಿಗಳಲ್ಲಿ ಓದುತ್ತಿರುವ ವಿದ್ಯಾರ್ಥಿಗಳಲ್ಲಿ 'ಮುಂದೆ ನೀವು ಏನಾಗಬೇಕು?' ಎಂದು ಪ್ರಶ್ನಿಸಿದರೆ ಬಹುತೇಕ ಮಂದಿ ಥಟ್ಟನೆ ನೀಡುವ ಉತ್ತರ ಒಂದೋ ಇಂಜಿನಿಯರ್, ಇಲ್ಲವೇ ಡಾಕ್ಟರ್. ಅವರ ತಂದೆ ತಾಯಿಯರನ್ನು ಕೇಳಿದರೂ ಸಿಗುವುದು ಹೆಚ್ಚುಕಮ್ಮಿ ಇದೇ ಉತ್ತರವೇ.

ತಮ್ಮ ಮಕ್ಕಳನ್ನು ಇಂಜಿನಿಯರ್ ಅಥವಾ ಡಾಕ್ಟರ್ ಆಗಿ ಕಾಣಬೇಕೆಂಬುದೇ ಹೆಚ್ಚಿನವರ ಆಸೆ. ಈ ಆಸೆಯಲ್ಲಿ ತಪ್ಪೇನೂ ಇಲ್ಲ. ನಮ್ಮ ಸಮಾಜದಲ್ಲಿ ಇವೆರಡೂ ಪ್ರತಿಷ್ಠಿತ ವೃತ್ತಿಗಳು. ನಮ್ಮ ದೇಶಕ್ಕೆ ಉತ್ತಮ ಇಂಜಿನಿಯರ್‌ಗಳು, ಒಳ್ಳೆಯ ವೈದ್ಯರು ಬೇಕು. ಆದರೆ ಬದುಕಿಗೆ ಇರುವುದು ಇವೆರಡೇ ಆಯ್ಕೆಗಳಲ್ಲ.

ನಮ್ಮೆದುರು ವಿಶಾಲ ಪ್ರಪಂಚವಿದೆ. ಸಾವಿರಾರು ಉದ್ಯೋಗಗಳಿವೆ. ಆದರೆ ಕೇವಲ ಕೆಲವೇ ಉದ್ಯೋಗಗಳನ್ನು ಶ್ರೇಷ್ಠವೆಂದು ಭ್ರಮಿಸುವ ಸ್ಥಿತಿ ನಮ್ಮ ಸಮಾಜದಲ್ಲಿದೆ. ಇದಕ್ಕೆ ಕಾರಣ ತಂದೆ ತಾಯಿಯರಲ್ಲಿ ವಾಸ್ತವ ಪ್ರಪಂಚದ ಅರಿವಿನ ಕೊರತೆ ಇರುವುದು, ಮತ್ತು ವಿದ್ಯಾರ್ಥಿಗಳಲ್ಲಿ ತಮ್ಮ ಭವಿಷ್ಯದ ಉದ್ಯೋಗಾವಕಾಶಗಳ ಬಗ್ಗೆ ಸೂಕ್ತ ಮಾಹಿತಿ ಇಲ್ಲದೇ ಇರುವುದು. ಇವೆರಡಕ್ಕಿಂತಲೂ ಪ್ರಮುಖವಾಗಿರುವ ಇನ್ನೊಂದು ಕಾರಣವೆಂದರೆ ಶಿಕ್ಷಣ ಸಂಸ್ಥೆಗಳ ವಾಣಿಜ್ಯಾಸಕ್ತಿ. ಶಿಕ್ಷಣವನ್ನೇ ಬಹುಕೋಟಿ ಉದ್ಯಮ ಮಾಡಿಕೊಂಡಿರುವ ಇವು ಇಂಜಿನಿಯರಿಂಗ್-ಮೆಡಿಕಲ್ ಕೋರ್ಸುಗಳನ್ನೇ ವೈಭವೀಕರಿಸುತ್ತಾ ತಂದೆತಾಯಿಯರು ಮತ್ತು ವಿದ್ಯಾರ್ಥಿಗಳ ದಾರಿತಪ್ಪಿಸಿವೆ. ಬೇರೆ ಅವಕಾಶಗಳ ಕುರಿತು ಅವರನ್ನು ಕುರುಡರನ್ನಾಗಿಸಿವೆ.

ಇಂಜಿನಿಯರುಗಳು, ಡಾಕ್ಟರುಗಳಷ್ಟೇ ಈ ಸಮಾಜಕ್ಕೆ ಉತ್ತಮ ಅಧಿಕಾರಿಗಳು, ನ್ಯಾಯವಾದಿಗಳು, ಪೊಲೀಸರು, ಕಲಾವಿದರು, ವಿಜ್ಞಾನಿಗಳು, ಪತ್ರಕರ್ತರು, ಸೈನಿಕರು, ಉದ್ಯಮಿಗಳು, ವಿನ್ಯಾಸಕಾರರು, ಔಷಧಿ ತಯಾರಕರು, ಲೆಕ್ಕಪರಿಶೋಧಕರು, ಸಂಶೋಧಕರು- ಹೀಗೆ ಹತ್ತುಹಲವು ಮಂದಿಯ ಅವಶ್ಯಕತೆಯಿದೆ. ಸಮತೋಲನದ ಶ್ರೇಷ್ಠ ಸಮಾಜವೊಂದರ ನಿರ್ಮಾಣಕ್ಕೆ ಇವರೆಲ್ಲರ ಕೊಡುಗೆಗಳೂ ಅಗತ್ಯ ಎಂಬುದನ್ನು ನಮ್ಮ ವಿದ್ಯಾರ್ಥಿಗಳು ಅರ್ಥಮಾಡಿಕೊಳ್ಳಬೇಕು.

ಆಸಕ್ತಿಗೆ ಪ್ರಾಶಸ್ತ್ಯ ನೀಡಿ

ಬದುಕಿನಲ್ಲಿ ಏನಾಗಬೇಕು ಎಂಬುದನ್ನು ನಿರ್ಧರಿಸಲು ಎಸ್.ಎಸ್.ಎಲ್.ಸಿ. ಅಥವಾ ಪಿಯುಸಿ ಅತ್ಯಂತ ಸೂಕ್ತ ಹಂತ. ತೀರಾ ಚಿಕ್ಕ ವಯಸ್ಸಿನಲ್ಲಿ ಮಕ್ಕಳಿಗೆ ಮುಂದೆ ತಾವು ಯಾವ ದಿಕ್ಕಿನಲ್ಲಿ ಸಾಗಬೇಕು ಎಂಬ ಅರಿವಿರುವುದಿಲ್ಲ. ಆದರೆ ಅವರ ಜಾಯಮಾನ ಮತ್ತು ಆಸಕ್ತಿಗಳನ್ನು ಗಮನಿಸುವ ಅವಕಾಶ ಮತ್ತು ಹೊಣೆಗಾರಿಕೆ ಅವರ ತಂದೆತಾಯಂದಿರಿಗೆ ಮತ್ತು ಅಧ್ಯಾಪಕರಿಗೆ ಇದೆ. ಮಕ್ಕಳ ಆಸಕ್ತಿಗಳಿಗೆ ಸರಿಹೊಂದುವ ವೃತ್ತಿಕ್ಷೇತ್ರದತ್ತ ಅವರನ್ನು ಮುನ್ನಡೆಸಿದರೆ ಅದು ಯಾವುದೇ ಕ್ಷೇತ್ರವಾದರೂ ಅವರು ಅದರಲ್ಲಿ ಒಳ್ಳೆಯ ಹೆಸರನ್ನು ಸಂಪಾದಿಸಬಲ್ಲರು. ಅದು ಅವರಿಗೆ ಆರ್ಥಿಕವಾಗಿಯೂ ಸಾಮಾಜಿಕವಾಗಿಯೂ ನಿಸ್ಸಂಶಯವಾಗಿ ಒಳ್ಳೆಯ ಸ್ಥಾನಮಾನ ದೊರಕಿಸೀತು.

ಆಸಕ್ತಿಯಿಲ್ಲದ ಕ್ಷೇತ್ರಕ್ಕೆ ಎಷ್ಟೇ ಒತ್ತಾಯದಿಂದ ಮಗುವನ್ನು ನೂಕಿದರೂ ಕೊನೆಗದು 'ಎತ್ತು ಏರಿಗೆಳೆಯಿತು, ಕೋಣ ನೀರಿಗೆಳೆಯಿತು' ಎಂದಷ್ಟೇ ಆದೀತು. ನೂಕಿದವರಿಗಾಗಲೀ ನೂಕಿಸಿಕೊಂಡವರಿಗಾಗಲೀ ಅದರಲ್ಲಿ ತೃಪ್ತಿಯಿಲ್ಲ. ಮನಸ್ಸಿಗೆ ಹತ್ತಿರವಲ್ಲದ ಕೆಲವನ್ನು ಎಷ್ಟು ಕಾಲ ಮಾಡಿಯೇವು? ಒಳ್ಳೆಯ ಕಲಾವಿದನಾಗಬಲ್ಲವನನ್ನು ನೀನು ಇಂಜಿನಿಯರೇ ಆಗು ಎಂದರೆ ಹೇಗೆ? ಒಳ್ಳೆಯ ವಕೀಲನಾಗಬಲ್ಲವನನ್ನು ನೀನು ವೈದ್ಯನೇ ಆಗು ಎಂದರೆ ಹೇಗೆ? ಒಳ್ಳೆಯ ಸಾಹಿತಿಯಾಗಬಲ್ಲವನನ್ನು ನೀನು ತಂತ್ರಜ್ಞನಾಗು ಎಂದು ಒತ್ತಾಯಿಸಿದರೆ ಹೇಗೆ? ಬದುಕಿಗೆ ವಾಸ್ತವವಾಗಿ ಬೇಕಿರುವುದು

ತೃಪ್ತಿ ಮತ್ತು ನೆಮ್ಮದಿ

ಪಿಯುಸಿಯಲ್ಲಿ ವಿಜ್ಞಾನ ಆಯ್ಕೆ ಮಾಡಿಕೊಂಡವರು ಒಂದೋ ನೀಟ್, ಜೆಇಇ ಇಲ್ಲವೇ ಸಿಇಟಿ ಪರೀಕ್ಷೆಗಳಿಗೆ ತಯಾರಾಗುವತ್ತ ಹೆಚ್ಚು ಗಮನ ಕೊಡುತ್ತಾರೆ. ಅವುಗಳಲ್ಲಿ ತಕ್ಕಮಟ್ಟಿನ ರ್ಯಾಂಕ್ ಪಡೆದುಕೊಂಡವರು ಆಯಾ ಕ್ಷೇತ್ರಗಳಿಗೆ ಲಗ್ಗೆಯಿಡುತ್ತಾರೆ. ಅಲ್ಲಿ ಸೀಟು ಸಿಗದೇ ಇರುವವರು ಬಿಎಸ್ಸಿ ಕೋರ್ಸುಗಳಿಗೆ ಸೇರುವವರು ಎಂಬ ಮನಸ್ಥಿತಿ ಈಗ ಬೆಳೆದಿದೆ. ಆದರೆ ಇಂದು ಮೂಲವಿಜ್ಞಾನದಲ್ಲಿ ವ್ಯಾಸಂಗ ಮುಂದುವರಿಸುವವರ ಅಗತ್ಯ ತುಂಬ ಇದೆ ಎಂಬ ಅಂಶ ಬಹಳ ಮಂದಿಗೆ ತಿಳಿದಿಲ್ಲ. ಭೌತಶಾಸ್ತ್ರ, ರಸಾಯನಶಾಸ್ತ್ರ, ಗಣಿತಶಾಸ್ತ್ರ, ಪ್ರಾಣಿಶಾಸ್ತ್ರ ಮುಂತಾದ ಮೂಲವಿಜ್ಞಾನದ ಶಾಖೆಗಳಲ್ಲಿ ಶ್ರೇಷ್ಠ ವಿಜ್ಞಾನಿಗಳು ತಯಾರಾಗುವುದನ್ನು, ಅವರಿಂದ ಸಂಶೋಧನೆಯ ಕ್ಷೇತ್ರಕ್ಕೆ ಹೊಸಹೊಸ ಕೊಡುಗೆಗಳಾಗುವುದನ್ನು ಪ್ರಪಂಚ ಎದುರುನೋಡುತ್ತಿದೆ. ಏಕೆಂದರೆ ಯಾವುದೇ ಕ್ಷೇತ್ರ ಮುಂದುವರಿಯಬೇಕಾದರೆ ಅದರಲ್ಲಿ ಹೊಸಹೊಸ ಸಂಶೋಧನೆಗಳಾಗಬೇಕು. ಇದೊಂದು ನಿರ್ಲಕ್ಷಿತ ಕ್ಷೇತ್ರವಾಗುತ್ತಿದೆ. ಎಲ್ಲಿಯೂ ಸಲ್ಲದವರು ಮಾತ್ರ ಇಲ್ಲಿ ಉಳಿದು ಪ್ರಯೋಜನ ಇಲ್ಲ.

ಕಾನೂನು ಕ್ಷೇತ್ರ

ಲಾಯರ್ ಅಥವಾ ಜಡ್ಜ್ ನಮ್ಮ ಸಮಾಜದ ಪ್ರತಿಷ್ಠಿತ ಹುದ್ದೆಗಳು. ಪಿಯುಸಿ ಅಥವಾ ಪದವಿ ಓದಿದ ಮೇಲೆ ಎಲ್‍ಎಲ್‍ಬಿ ವ್ಯಾಸಂಗ ಮಾಡಿ ಕಾನೂನು ಕ್ಷೇತ್ರ ಪ್ರವೇಶಿಸಬಹುದು. ಪಿಯುಸಿ ಓದಿದವರು ಐದು ವರ್ಷ, ಡಿಗ್ರಿ ಓದಿದವರು ಮೂರು ವರ್ಷದ ಎಲ್‍ಎಲ್‍ಬಿ ಪದವಿ ಪಡೆಯಬೇಕಾಗುತ್ತದೆ. ಸ್ವತಂತ್ರ ಕಾನೂನು ಸಲಹೆಗಾರರಾಗಿ, ಜಿಲ್ಲಾ ನ್ಯಾಯಾಲಯ, ಹೈಕೋರ್ಟ್, ಸುಪ್ರೀಂಕೋರ್ಟುಗಳಲ್ಲಿ ವಕೀಲರಾಗಿ ಸೇವೆ ಸಲ್ಲಿಸಲು ಹೇರಳ ಅವಕಾಶಗಳಿವೆ. ಪಬ್ಲಿಕ್ ಪ್ರಾಸೆಕ್ಯೂಟರ್ ಆಗಿ, ನ್ಯಾಯಾಧೀಶರಾಗಿ ಸರ್ಕಾರಿ ಸೇವೆ ಸಲ್ಲಿಸಲೂ ಸಾಧ್ಯವಿದೆ.

ಮನಃಶಾಸ್ತ್ರ

ಮನಃಶಾಸ್ತ್ರವನ್ನು ಕೆಲವು ಕಡೆ ವಿಜ್ಞಾನ ಕೋರ್ಸುಗಳ ಭಾಗವಾಗಿ ಬೋಧಿಸುತ್ತಾರಾದರೂ, ಅನೇಕ ಕಡೆಗಳಲ್ಲಿ ಅದು ಕಲಾವಿಭಾಗದಲ್ಲೂ ಲಭ್ಯವಿದೆ. ಪಿಯುಸಿ, ಪದವಿ ಹಾಗೂ ಸ್ನಾತಕೋತ್ತರ ಹಂತಗಳಲ್ಲಿ ಮನೋವಿಜ್ಞಾನವನ್ನು ವ್ಯಾಸಂಗ ಮಾಡಬಹುದು. ಬದುಕು ಸಂಕೀರ್ಣವಾಗುತ್ತಿರುವ ಕಾಲ ಇದು. ವೇಗದ ನಗರೀಕರಣ, ಆಧುನಿಕ ಬದುಕು, ಒತ್ತಡದ ದಿನಚರಿಗಳಿಂದಾಗಿ ಜನರು ಬೇರೆಬೇರೆ ಮಾನಸಿಕ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಹೀಗಾಗಿ ಇಂದು ಮನೋವೈದ್ಯರ ಹಾಗೂ ಆಪ್ತಸಮಾಲೋಚಕರ ಅವಶ್ಯಕತೆ ಹಿಂದೆಂದಿಗಿಂತಲೂ ಹೆಚ್ಚಾಗಿದೆ. ಮನಃಶಾಸ್ತ್ರವನ್ನು ವ್ಯಾಸಂಗ ಮಾಡಿದವರು ಸ್ವತಂತ್ರವಾಗಿಯೂ, ಕಂಪೆನಿಗಳ ಉದ್ಯೋಗಿಗಳಾಗಿಯೂ ಉತ್ತಮ ವೃತ್ತಿಜೀವನ ನಡೆಸಬಹುದು.

ಜಾಹೀರಾತು ಕ್ಷೇತ್ರ

ನಮ್ಮ ದಿನಚರಿ ಬಹುತೇಕ ಜಾಹೀರಾತುಗಳಿಂದ ಸುತ್ತುವರಿದಿದೆ. ನಮ್ಮ ಪ್ರತೀ ನಿರ್ಧಾರದ ಹಿಂದೆ ಯಾವುದೋ ಒಂದು ಜಾಹೀರಾತಿನ ಪ್ರಭಾವ ಇರುತ್ತದೆ. ಪತ್ರಿಕೆ, ಟಿವಿ, ರೇಡಿಯೋ, ಅಂತರಜಾಲಗಳಲ್ಲಿ ಕಾಣಿಸಿಕೊಳ್ಳುವ ಈ ಜಾಹೀರಾತುಗಳು ಎಲ್ಲಿ ತಯಾರಾಗುತ್ತವೆ? ಯಾರು ತಯಾರಿಸುತ್ತಾರೆ? ಇಂದು ಜಾಹೀರಾತು ಒಂದು ಬಹುಕೋಟಿ ಉದ್ದಿಮೆ. ಈ ಜಾಹೀರಾತುಗಳು ತಯಾರಾಗುವುದರ ಹಿಂದೆ ಸಾವಿರಾರು ಮಂದಿಯ ಶ್ರಮ, ಕೌಶಲ, ಬುದ್ಧಿವಂತಿಕೆ ಇದೆ. ಒಂದು ಜಾಹೀರಾತಿನ ನೀಲನಕ್ಷೆಯನ್ನು ತಯಾರಿಸುವುದರಿಂದ ತೊಡಗಿ ಅದರ ಒಟ್ಟಾರೆ ನಿರ್ಮಾಣದವರೆಗೆ ಹತ್ತಾರು ಮಂದಿ ಕೆಲಸ ಮಾಡಬೇಕಾಗುತ್ತದೆ. ಪಿಯುಸಿ ಬಳಿಕ ಜಾಹೀರಾತು ನಿರ್ಮಾಣಕ್ಕೆ ಸಂಬಂಧಿಸಿದ ಕೋರ್ಸುಗಳನ್ನು ಪೂರೈಸಿ ಆ ಕ್ಷೇತ್ರ ಪ್ರವೇಶಿಸಬಹುದು. ಯಾವುದೇ ನಿರ್ದಿಷ್ಟ ಪದವಿ ಇಲ್ಲದೆಯೂ ಈ ಆಕರ್ಷಕ ಕ್ಷೇತ್ರಕ್ಕೆ ಕಾಲಿಡಬಹುದು ಎಂಬುದು
ಗಮನಾರ್ಹ.

ಗ್ರಾಫಿಕ್ಸ್ ಅಥವಾ ಅನಿಮೇಶನ್

ಜಾಹೀರಾತಿನಷ್ಟೇ ಬೇಡಿಕೆಯಿರುವ ಇನ್ನೊಂದು ಕ್ಷೇತ್ರವಿದು. ಸಿನಿಮಾರಂಗದಲ್ಲಂತೂ ಗ್ರಾಫಿಕ್ಸ್ ಮತ್ತು ಅನಿಮೇಶನ್ ಅನಿವಾರ್ಯ. ಅನಿಮೇಶನ್ ಆಧಾರದಲ್ಲೇ ನಡೆಯುವ ಟಿವಿ ಚಾನೆಲ್‍ಗಳಿವೆ. ಅನಿಮೇಶನ್ ಮತ್ತು ಗ್ರಾಫಿಕ್ಸೇ ಪ್ರಧಾನವಾಗಿರುವ ಚಲನಚಿತ್ರಗಳಿವೆ. ಹಿಂದೆ ಹಾಲಿವುಡ್‍ನಲ್ಲಿ ಪ್ರಮುಖವಾಗಿದ್ದ ಗ್ರಾಫಿಕ್ಸ್ ಇಂದು ಪ್ರಾದೇಶಿಕ ಭಾಷಾ ಚಿತ್ರಗಳಿಗೂ ಲಗ್ಗೆಯಿಟ್ಟಿದೆ. ಈ ಕ್ಷೇತ್ರದಲ್ಲಿ ಕೆಲಸ ಮಾಡಲು ಸಾವಿರಾರು ಅನಿಮೇಟರ್‌ಗಳ ಅವಶ್ಯಕತೆಯಿದೆ. ಪಿಯುಸಿ ಅಥವಾ ಪದವಿ ಬಳಿಕ ಗ್ರಾಫಿಕ್ಸ್ ಅಥವಾ ಅನಿಮೇಶನ್ ಕೋರ್ಸುಗಳನ್ನು ಮಾಡಿ ಈ ರಂಗವನ್ನು ಪ್ರವೇಶಿಸಿ ಒಳ್ಳೆಯ ವರಮಾನ ಗಳಿಸಬಹುದು.

ಮಾಧ್ಯಮರಂಗ

ಪತ್ರಿಕೆ, ಟಿವಿ ಚಾನೆಲ್‍ಗಳು, ರೇಡಿಯೋ, ಡಿಜಿಟಲ್ ಮಾಧ್ಯಮ ನಮ್ಮ ದಿನನಿತ್ಯದ ಬದುಕಿನ ಭಾಗವಾಗಿಬಿಟ್ಟಿವೆ. ಇವುಗಳಲ್ಲಿ ನಾವೂ ಉದ್ಯೋಗ ಮಾಡಬಹುದೇ ಎಂಬ ಪ್ರಶ್ನೆ ಹಲವರನ್ನು ಕಾಡಬಹುದು. ಮಾಧ್ಯಮಗಳನ್ನು ವೃತ್ತಿಜೀವನಕ್ಕೆ ಆರಿಸಿಕೊಳ್ಳುವುದರಿಂದ ಸಮಾಜದಲ್ಲಿ ನಾಲ್ಕು ಮಂದಿಗೆ ಪ್ರಯೋಜನವಾಗುವ ಕೆಲಸವನ್ನು ಮಾಡಿದ ತೃಪ್ತಿಯೂ ಲಭಿಸೀತು, ಜೀವನೋಪಾಯಕ್ಕೆ ಉತ್ತಮ ಆದಾಯವೂ ದೊರೆತೀತು. ಪಿಯುಸಿ ಬಳಿಕ ಪದವಿ ಮತ್ತು ಸ್ನಾತಕೋತ್ತರ ಹಂತಗಳಲ್ಲಿ ಪತ್ರಿಕೋದ್ಯಮ, ಮಾಧ್ಯಮ ಅಧ್ಯಯನ ವಿಷಯಗಳು ಇಂದು ಜನಪ್ರಿಯ ಆಯ್ಕೆಗಳಾಗಿವೆ. ಡಿಜಿಟಲ್ ಮಾಧ್ಯಮ ಪ್ರವರ್ಧಮಾನಕ್ಕೆ ಬಂದಮೇಲಂತೂ ಸ್ವತಂತ್ರ ಉದ್ಯೋಗಾವಕಾಶಗಳು ಹೇರಳವಾಗಿ ಹುಟ್ಟಿಕೊಂಡಿವೆ.

ಬರವಣಿಗೆ ಮತ್ತು ಭಾಷಾಂತರ

ಉತ್ತಮ ಭಾಷಾಕೌಶಲ ಬೆಳೆಸಿಕೊಂಡವರು ಪದವಿ ಬಳಿಕ ತಾಂತ್ರಿಕ ಬರವಣಿಗೆ ಮತ್ತು ಭಾಷಾಂತರವನ್ನು ಒಂದು ವೃತ್ತಿಯಾಗಿ ಸ್ವೀಕರಿಸಬಹುದು. ಕಂಟೆಂಟ್ ರೈಟಿಂಗ್ ಮತ್ತು ಟೆಕ್ನಿಕಲ್ ರೈಟಿಂಗ್ ಇಂದು ಬಹುಬೇಡಿಕೆಯ ಕ್ಷೇತ್ರ. ಬೇರೆಬೇರೆ ಕಂಪೆನಿಗಳ ಜಾಲತಾಣಗಳು, ಪ್ರಚಾರ ಸಾಮಗ್ರಿಗಳು ಹಾಗೂ ಜಾಹೀರಾತುಗಳನ್ನು ಸಿದ್ಧಪಡಿಸಿಕೊಡುವ ಸಂಸ್ಥೆಗಳಲ್ಲಿ ತಾಂತ್ರಿಕ ಬರಹಗಾರರಿಗೆ ಅಪಾರ ಅವಕಾಶವಿದೆ. ಇದನ್ನೊಂದು ಸ್ವತಂತ್ರ ಉದ್ಯೋಗವನ್ನಾಗಿಯೂ ಕೈಗೊಳ್ಳಬಹುದು. ಭಾಷಾಂತರವಂತೂ ಇಂದು ದೊಡ್ಡ ಉದ್ದಿಮೆಯಾಗಿದೆ. ಯಾವುದಾದರೂ ಎರಡು ಭಾಷೆಗಳ ಮೇಲೆ ಹಿಡಿತ ಹೊಂದಿರುವವರು ಭಾಷಾಂತರ ಕಂಪೆನಿಗಳಲ್ಲಿ ಉದ್ಯೋಗಿಗಳಾಗಿ ಹಾಗೂ ಸ್ವತಂತ್ರವಾಗಿ ಉತ್ತಮ ಆದಾಯ ಗಳಿಸಬಹುದು. ಸೃಜನಶೀಲ ಲೇಖಕರಿಗೆ ಟಿವಿ ಧಾರಾವಾಹಿ, ಸಿನಿಮಾ ಚಿತ್ರಕಥೆ-ಸಂಭಾಷಣೆ ಬರವಣಿಗೆಯಲ್ಲಿ ಸಾಕಷ್ಟು ಅವಕಾಶವಿದೆ.

ಬೋಧನೆ ಅಥವಾ ಸಂಶೋಧನೆ

ಇತಿಹಾಸ, ಅರ್ಥಶಾಸ್ತ್ರ, ಸಮಾಜಶಾಸ್ತ್ರ, ರಾಜ್ಯಶಾಸ್ತ್ರ, ಭೂಗೋಳಶಾಸ್ತ್ರ, ಕನ್ನಡ-ಇಂಗ್ಲಿಷ್ ಸಾಹಿತ್ಯ ಮುಂತಾದ ವಿಷಯಗಳನ್ನು ವ್ಯಾಸಂಗ ಮಾಡುವವರಿಗೆ ಸ್ನಾತಕಕೋತ್ತರ ಪದವಿಯ ಬಳಿಕ ಬೋಧನೆ ಹಾಗೂ ಸಂಶೋಧನೆಗಳಲ್ಲಿ ತೊಡಗಿಸಿಕೊಳ್ಳಲು ಅವಕಾಶವಿದೆ. ಖಾಸಗಿ ಹಾಗೂ ಸರ್ಕಾರಿ ವಲಯಗಳೆರಡರಲ್ಲೂ ಇವಕ್ಕೆ ಈಗ ಸಾಕಷ್ಟು ಬೇಡಿಕೆಯಿದೆ. ಶಿಕ್ಷಣ ಕ್ಷೇತ್ರದಲ್ಲಿ ನೈಜ ಆಸಕ್ತಿಯಿರುವ ಪ್ರತಿಭಾವಂತರು ಅದನ್ನು ಪ್ರವೇಶಿಸಿದರೆ ಅವರಿಗೂ, ಸಮಾಜಕ್ಕೂ ಬಹಳ ಅನುಕೂಲ.

ಭಾರತೀಯ ರೈಲ್ವೇ

ಭಾರತೀಯ ರೈಲ್ವೇ ಉದ್ಯೋಗಾವಕಾಶಗಳ ಬಹುದೊಡ್ಡ ಸಾಗರ. ಇದರಲ್ಲಿ ಪ್ರತೀ ವರ್ಷ ಸಾವಿರಾರು ಉದ್ಯೋಗಗಳು ಸೃಷ್ಟಿಯಾಗುತ್ತಿರುತ್ತವೆ, ನೇಮಕಾತಿಗಳು ನಡೆಯುತ್ತಿರುತ್ತವೆ. 6800 ರೈಲ್ವೇ ನಿಲ್ದಾಣಗಳು, 7000ಕ್ಕೂ ಹೆಚ್ಚು ಪ್ಯಾಸೆಂಜರ್ ರೈಲುಗಳು, 4000ಕ್ಕೂ ಅಧಿಕ ಗೂಡ್ಸ್ ರೈಲುಗಳು ಇರುವ ಈ ಬೃಹತ್ ದೇಶದ ರೈಲ್ವೇ ಜಾಲಕ್ಕೆ ಇಷ್ಟೊಂದು ದೊಡ್ಡ ಸಂಖ್ಯೆಯ ಉದ್ಯೋಗಿಗಳ ಅವಶ್ಯಕತೆ ಇರುವುದು ಅಚ್ಚರಿಯೇನಲ್ಲ. ಇತರ ಅನೇಕ ಸರ್ಕಾರಿ ಉದ್ಯೋಗಗಳಂತೆ ಇವುಗಳೂ ಸ್ಪರ್ಧಾತ್ಮಕ ಪರೀಕ್ಷೆಗಳ ಆಧಾರದಲ್ಲಿ ಸಿಗುವಂಥವು; ಸ್ವಪ್ರಯತ್ನದಿಂದ ದಕ್ಕಿಸಿಕೊಳ್ಳುವಂಥವು. ಆದರೆ ಕನ್ನಡಿಗರು ಇವುಗಳತ್ತ ಗಮನಹರಿಸುವುದು ಕಡಿಮೆಯೇ. ರೈಲ್ವೇಯ ಬಹುತೇಕ ನೇಮಕಾತಿಗಳನ್ನು ರೈಲ್ವೇ ನೇಮಕಾತಿ ಮಂಡಳಿ (RRB)ಗಳು ನಡೆಸುತ್ತವೆ. ಇದಕ್ಕಾಗಿಯೇ ದೇಶದ ವಿವಿಧೆಡೆ ಒಟ್ಟು 21 ಆರ್‌ಆರ್‌ಬಿ ಶಾಖೆಗಳಿವೆ.

ಗ್ರೂಪ್ ಡಿ ಹುದ್ದೆಗಳಿಂದ ತೊಡಗಿ ಪ್ಯಾರಾಮೆಡಿಕಲ್ ಹುದ್ದೆಗಳವರೆಗೆ ಸಾವಿರಾರು ಉದ್ಯೋಗಗಳಿಗೆ ಈ ಮಂಡಳಿಗಳೇ ನೇಮಕಾತಿ ನಡೆಸುತ್ತವೆ. ತಾಂತ್ರಿಕೇತರ ಜನಪ್ರಿಯ ವಿಭಾಗ (ಎನ್‍ಟಿಪಿಸಿ), ಆರ್‌ಆರ್‌ಎಫ್ ಕಾನ್‍ಸ್ಟೇಬಲ್, ಆರ್‌ಆರ್‌ಎಫ್ ಸಬ್‍ಇನ್ಸ್‍ಪೆಕ್ಟರ್, ಅಸಿಸ್ಟೆಂಟ್ ಲೋಕೋಪೈಲಟ್, ಜೂನಿಯರ್ ಇಂಜಿನಿಯರ್, ಪ್ಯಾರಾಮೆಡಿಕಲ್- ಹೀಗೆ ವಿವಿಧ ನೇಮಕಾತಿಗಳು ನಿರಂತರ ನಡೆಯುತ್ತಲೇ ಇರುತ್ತವೆ. ರೈಲ್ವೇ ಹುದ್ದೆಗಳಿಗೆ ಪುರುಷ ಹಾಗೂ ಮಹಿಳಾ ಅಭ್ಯರ್ಥಿಳೀರ್ವರೂ ಸಮಾನವಾಗಿ ಅರ್ಹರು.

ಬ್ಯಾಂಕಿಂಗ್

ಸ್ಪರ್ಧಾತ್ಮಕ ಪರೀಕ್ಷೆಗಳ ಮೂಲಕ ಉದ್ಯೋಗ ಪಡೆಯಲು ಮುಕ್ತ ಅವಕಾಶವಿರುವ ದೊಡ್ಡದೊಂದು ಕ್ಷೇತ್ರ - ಬ್ಯಾಂಕಿಂಗ್. ಸದಾ ಚಲನಶೀಲವಾಗಿರುವ ಈ ಕ್ಷೇತ್ರದಲ್ಲಿ ಉದ್ಯೋಗ ಪ್ರಮಾಣ ಕುಸಿಯುವ ಸಾಧ್ಯತೆಯಂತೂ ತೀರಾ ಅಪರೂಪ. ಬ್ಯಾಂಕಿಂಗ್‍ನಲ್ಲಿ ಪ್ರತೀವರ್ಷ ಸಾವಿರಾರು ನೇಮಕಾತಿಗಳು ನಡೆಯುತ್ತಿರುತ್ತವೆ. ಖಾಸಗಿ ಬ್ಯಾಂಕ್‍ಗಳ ಹೊರತಾಗಿ, ಸರ್ಕಾರಿ ಬ್ಯಾಂಕಿಂಗ್ ವಲಯದಲ್ಲೂ ಇಂದು ಅವಕಾಶಗಳು ವಿಫುಲವಾಗಿವೆ. ಬ್ಯಾಂಕಿಂಗ್ ಕ್ಷೇತ್ರ ಪ್ರವೇಶಿಸಲು ಬಿಕಾಂ ಅಥವಾ ಬಿಬಿಎಂನಂತಹ ಕೋರ್ಸುಗಳನ್ನು ಓದಿರಬೇಕೆಂದೇನೂ ಇಲ್ಲ. ಕಲೆ ಅಥವಾ ವಿಜ್ಞಾನ ಹಿನ್ನೆಲೆಯ ಅಭ್ಯರ್ಥಿಗಳೂ ಸ್ಪರ್ಧಾತ್ಮಕ ಪರೀಕ್ಷೆ ಎದುರಿಸುವ ಮೂಲಕ ಬ್ಯಾಂಕ್ ಅಧಿಕಾರಿಗಳಾಗಬಹುದು.

ನಾಗರಿಕ ಸೇವೆ (ಸರ್ಕಾರಿ ಉದ್ಯೋಗ):