ನಟಿ ರಶ್ಮಿಕಾ ಮಂದಣ್ಣ ಅವರನ್ನು ಬೆಂಬಲಿಸಿ, ಅವರ ಹಿಂದಿ ಉಚ್ಚಾರಣೆಯ ಬಗ್ಗೆ ವ್ಯಕ್ತವಾದ ಟೀಕೆಗಳ ವಿರುದ್ಧ ಪೋಸ್ಟ್ ಹಂಚಿಕೊಂಡಿದ್ದ ಬಾಲಿವುಡ್ ಹಿರಿಯ ಗೀತ ರಚನೆಕಾರ ಜಾವೇದ್ ಅಖ್ತರ್‌ ಅವರು, ರಶ್ಮಿಕಾ ಅವರನ್ನು 'ತಮಿಳು ನಟಿ' ಎಂದಿದ್ದರು.

ಈ ವಿಚಾರ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಗ್ರಾಸವಾಗಿತ್ತು.

ಬಳಕೆದಾರರೊಬ್ಬರು, 'ದಕ್ಷಿಣ ಭಾರತದಲ್ಲಿರುವವರೆಲ್ಲರೂ 'ಮದ್ರಾಸಿ'ಗಳು, ಅವರೆಲ್ಲರೂ ತಮಿಳು ಮಾತನಾಡುತ್ತಾರೆ ಎಂದು ನೀವು ಭಾವಿಸುವುದನ್ನು ನೋಡಿದರೆ, ನೀವೂ ಆ ಜನರಷ್ಟೇ ಮೂರ್ಖರು ಎಂದು ಹೇಳಬಹುದು. ರಶ್ಮಿಕಾ ಅವರು ಕರ್ನಾಟಕದ ಕೊಡವ ಜನಾಂಗಕ್ಕೆ ಸೇರಿದವರು; ಅವರು ಕೊಡವ ಮತ್ತು ಕನ್ನಡ ಭಾಷೆಗಳನ್ನು ಮಾತನಾಡುತ್ತಾರೆ' ಎಂದು ತಿವಿದಿದ್ದರು.

ಕ್ಷಮೆಯಾಚನೆ

ನೆಟ್ಟಿಗರ ಈ ಕಮೆಂಟ್‌ಗಳಿಂದ ಎಚ್ಚೆತ್ತ ಜಾವೇದ್ ಅಖ್ತರ್, ಕೂಡಲೇ ಕ್ಷಮೆಯಾಚಿಸಿದ್ದಾರೆ.

'ಕ್ಷಮಿಸಿ, ನನ್ನಿಂದ ತಪ್ಪಾಗಿದೆ. ನನಗೆ ವೈಯಕ್ತಿಕವಾಗಿ ಆಕೆಯ ಪರಿಚಯವಿಲ್ಲ. ಆಕೆ ನಟಿಸಿದ್ದ ಸಿನಿಮಾಗಳಲ್ಲಿ ನಾನು ನೋಡಿರುವ ಏಕೈಕ ಸಿನಿಮಾ ತಮಿಳು ಭಾಷೆಯದ್ದು. ಆದರೆ ಇಲ್ಲಿ ತಮಿಳು, ತೆಲುಗು, ಮಲಯಾಳಂ ಅಥವಾ ಕನ್ನಡ ಎಂಬುದು ಮುಖ್ಯವಲ್ಲ. ಯಾರಾದರೂ ನಮ್ಮ ಭಾಷೆಯನ್ನು ಮಾತನಾಡಿದಾಗ, ಅದು ಒಂದು ನಿರ್ದಿಷ್ಟ ಉಚ್ಚಾರಣಾ ಶೈಲಿಯಲ್ಲಿ ಇದ್ದರೂ, ನಾವು ಅದನ್ನು ಮೆಚ್ಚಿಕೊಳ್ಳಬೇಕು. ಹಾಗೆ ನೋಡಿದರೆ, ನಮ್ಮಲ್ಲಿ ಎಷ್ಟು ಜನ ಇಂಗ್ಲಿಷ್ ಅನ್ನು ಸರಿಯಾಗಿ ಉಚ್ಚರಿಸುತ್ತಾರೆ? ಒಂದು ವೇಳೆ ಇಂಗ್ಲಿಷ್ ವ್ಯಕ್ತಿಯೊಬ್ಬರು ನಮ್ಮನ್ನು ನೋಡಿ ಅಪಹಾಸ್ಯ ಮಾಡಿದರೆ ನಮಗೆ ಹೇಗೆ ಅನಿಸುತ್ತದೆ' ಎಂದು ಪ್ರಶ್ನಿಸಿದ್ದಾರೆ.

ರಶ್ಮಿಕಾ ಮಂದಣ್ಣ ಮತ್ತು ವಿಜಯ್ ದೇವರಕೊಂಡ ನಟನೆಯ 'ರಣಬಾಲಿ' ಚಿತ್ರ ಇತ್ತೀಚೆಗೆ ತೆರೆಕಂಡಿದ್ದು, ಈವರೆಗೆ, ₹73 ಕೋಟಿ ಗಳಿಸಿದೆ.