ಬೆಂಗಳೂರು: ಮೂಳೆ ಮುರಿತದಿಂದ ಸಂಕೀರ್ಣ ಸಮಸ್ಯೆಗೆ ಒಳಗಾಗುವವರಿಗೆ ಸಂಜಯ ಗಾಂಧಿ ಟ್ರಾಮಾ ಮತ್ತು ಅಸ್ಥಿ ಚಿಕಿತ್ಸಾ ಸಂಸ್ಥೆಯು '3ಡಿ ಮುದ್ರಣ ತಂತ್ರಜ್ಞಾನ' ಆಧಾರಿತ ಅತ್ಯಾಧುನಿಕ ಶಸ್ತ್ರಚಿಕಿತ್ಸೆಯನ್ನು ಪ್ರಾರಂಭಿಸಿದೆ. ಮೂಳೆ ಶಸ್ತ್ರಚಿಕಿತ್ಸೆಗೆ ಈ ತಂತ್ರಜ್ಞಾನವನ್ನು ಅಳವಡಿಸಿಕೊಂಡ ದೇಶದ ಮೊದಲ ಸರ್ಕಾರಿ ಸಂಸ್ಥೆ ಇದಾಗಿದೆ.

ಕೃತಕ ಮಂಡಿ ಜೋಡಣೆ, ಭುಜದ ಕೀಲು ಅಳವಡಿಕೆ ಸೇರಿದಂತೆ ಮೂಳೆ ಶಸ್ತ್ರಚಿಕಿತ್ಸೆಗೆ ಸಂಜಯ ಗಾಂಧಿ ಆಸ್ಪತ್ರೆ ಹೆಸರುವಾಸಿಯಾಗಿದೆ. ಇಲ್ಲಿ ರೋಬೊಟಿಕ್ ಸೇರಿದಂತೆ ವಿವಿಧ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳಲಾಗಿದೆ. ಈಗ ಈ ಸಾಲಿಗೆ '3ಡಿ ಮುದ್ರಣ ತಂತ್ರಜ್ಞಾನ'ವೂ ಸೇರಿದೆ. ಗಂಭೀರ ಹಾನಿಗೊಳಗಾಗಿ, ವಿರೂಪಗೊಳ್ಳುವ ಮೂಳೆಯ ಭಾಗಗಳನ್ನು ಮೊದಲಿನ ಸ್ವರೂಪಕ್ಕೆ ತರಲು ಈ ತಂತ್ರಜ್ಞಾನ ಸಹಕಾರಿ. ಸಂಸ್ಥೆಯಲ್ಲಿ ಈ ತಂತ್ರಜ್ಞಾನದ ನೆರವಿನಿಂದ ಐವರಿಗೆ ಶಸ್ತ್ರಚಿಕಿತ್ಸೆ ನಡೆಸಲಾಗಿದೆ.

ಭಾರತೀಯ ವಿಜ್ಞಾನ ಸಂಸ್ಥೆಯ (ಐಐಎಸ್ಸಿ) 'ಮೆಟೀರಿಯಲ್ಸ್' ವಿಭಾಗದ ಸಹಯೋಗದಲ್ಲಿ ಆಸ್ಪತ್ರೆಯು ಈ ತಂತ್ರಜ್ಞಾನ ಆಧರಿತ ಶಸ್ತ್ರಚಿಕಿತ್ಸೆಗಳನ್ನು ಮಾಡುತ್ತಿದೆ. 3ಡಿ ಮುದ್ರಣ ತಂತ್ರಜ್ಞಾನ ತಂತ್ರಾಂಶದ ನೆರವಿನಿಂದ ಕೃತಕ ಮೂಳೆಯ ಮಾದರಿಗಳು ಹಾಗೂ ಮಿಶ್ರ ಲೋಹದ ಪ್ಲೇಟ್‌ಗಳನ್ನು ಐಐಎಸ್ಸಿ ಸಂಶೋಧಕರು ವಿನ್ಯಾಸ ಮಾಡಿಕೊಡುತ್ತಿದ್ದಾರೆ. ಸಂಸ್ಥೆಯಲ್ಲಿ ಸದ್ಯ ಕೈಗಳ ಮೂಳೆ ಮುರಿತಕ್ಕೆ ಈ ಶಸ್ತ್ರಚಿಕಿತ್ಸೆ ನಡೆಸಲಾಗುತ್ತಿದೆ.

ನಿಖರ ಶಸ್ತ್ರಚಿಕಿತ್ಸೆ ಸಾಕಾರ: 'ಯುರೋಪ್ ದೇಶಗಳಲ್ಲಿ ಕ್ಯಾನ್ಸರ್ ಸೇರಿದಂತೆ ವಿವಿಧ ಶಸ್ತ್ರಚಿಕಿತ್ಸೆಗಳನ್ನು ಈ ತಂತ್ರಜ್ಞಾನದ ನೆರವಿನಿಂದ ನಿಖರವಾಗಿ ನಡೆಸಲಾಗುತ್ತಿದೆ. ಇದರಿಂದ ಮೂಳೆಮುರಿತದಂತಹ ಸಂಕೀರ್ಣ ಶಸ್ತ್ರಚಿಕಿತ್ಸೆಗಳನ್ನೂ ನಡೆಸಲು ಸಾಧ್ಯವಿದೆ. ನಮ್ಮ ದೇಶದಲ್ಲಿ ಈ ತಂತ್ರಜ್ಞಾನವು ಶಸ್ತ್ರಚಿಕಿತ್ಸೆ ಕ್ಷೇತ್ರದಲ್ಲಿ ಅಷ್ಟಾಗಿ ಬಳಕೆಯಲ್ಲಿಲ್ಲ' ಎಂದು ಸಂಸ್ಥೆಯ ಶಸ್ತ್ರಚಿಕಿತ್ಸಕ ಡಾ.ಸತ್ಯವಂಶಿ ಕೃಷ್ಣ ತಿಳಿಸಿದರು.

'ಮೂಳೆ ಮುರಿದಾಗ ಅದರ ಸ್ವರೂಪ ಬದಲಾಗಿರುತ್ತದೆ. ಮುರಿದ ಜಾಗವನ್ನು ಜೋಡಿಸಲು ಮಿಶ್ರಲೋಹದ ಪ್ಲೇಟ್‌ ಅಳವಡಿಸಬೇಕಾಗುತ್ತದೆ. ಸದ್ಯ ಬಳಕೆಯಲ್ಲಿರುವ ಪ್ಲೇಟ್‌ಗಳು ಒಂದೇ ರೂಪದಲ್ಲಿ ವಿನ್ಯಾಸಗೊಂಡಿರುತ್ತವೆ. ಹಾನಿಗೊಳಗಾದ ಮೂಳೆಯ ಸ್ವರೂಪದಲ್ಲಿ ವ್ಯತ್ಯಾಸವಿರುವುದರಿಂದ ಮಿಶ್ರಲೋಹದ ಪ್ಲೇಟ್‌ಗಳು ಎಲ್ಲರಿಗೂ ಸರಿಯಾಗಿ ಹೊಂದಿಕೆಯಾಗುವುದಿಲ್ಲ. ಹೀಗಾಗಿ, 3ಡಿ ಮುದ್ರಣ ತಂತ್ರಜ್ಞಾನವು ಈ ಸಮಸ್ಯೆಗೆ ಪರಿಹಾರ ಒದಗಿಸಲಿದೆ' ಎಂದು ವಿವರಿಸಿದರು.