ಅಹಮದಾಬಾದ್‌: ಎರಡನೇ ಜಾಗತಿಕ ಯದ್ಧದ ಸಂದರ್ಭದಲ್ಲಿ ನಾಪತ್ತೆಯಾಗಿರುವ ತನ್ನ 400 ಜನ ಯೋಧರ 'ಪತ್ತೆ ಹಾಗೂ ಗುರುತಿಸುವ' ಕಾರ್ಯದಲ್ಲಿ ನೆರವು ಬಯಸಿ ಅಮೆರಿಕದ ರಕ್ಷಣಾ ಇಲಾಖೆಯು ಗುಜರಾತ್‌ನ ನ್ಯಾಷನಲ್ ಫೋರೆನ್ಸಿಕ್‌ ಸೈನ್ಸಸ್‌ ಯೂನಿವರ್ಸಿಟಿ (ಎನ್‌ಎಫ್‌ಎಸ್‌ಯು) ಜೊತೆ ಒಪ್ಪಂದಕ್ಕೆ ಸಹಿ ಹಾಕಿದೆ.

ಯುದ್ಧದ ಸಂದರ್ಭದಲ್ಲಿ ದೇಶದ ಈಶಾನ್ಯ ಭಾಗದಲ್ಲಿ ಜಪಾನ್‌ ಸೇನೆ ದಾಳಿ ನಡೆಸಿತ್ತು. ಹೋರಾಟದ ವೇಳೆ ಯೋಧರು ನಾಪತ್ತೆಯಾಗಿದ್ದಾರೆ. ಯೋಧರ ಮೃತದೇಹಗಳನ್ನು ಪತ್ತೆ ಹಚ್ಚಿ, ಅವರ ಗುರುತು ಕಂಡುಹಿಡಿದು ಕುಟುಂಬಸ್ಥರಿಗೆ ಮಾಹಿತಿ ನೀಡುವ ಸಂಬಂಧ ಅಮೆರಿಕ ಸರ್ಕಾರ ಈ ಒಪ್ಪಂದ ಮಾಡಿಕೊಂಡಿದೆ ಎಂದು ಮೂಲಗಳು ಹೇಳಿವೆ.

'ನಾಪತ್ತೆಯಾಗಿರುವ 400 ಯೋಧರ ಡಿಎನ್‌ಎ ಮಾಹಿತಿ ಅಮೆರಿಕದ ರಕ್ಷಣಾ ಇಲಾಖೆ ಬಳಿ ಇದೆ.

ಈ ಡಿಎನ್‌ಎಗೆ ಸರಿಹೊಂದಬಹುದಾದ ಯೋಧರಿಗೆ ಸಂಬಂಧಿಸಿದ ಮಾಹಿತಿಗಾಗಿ ಇಲಾಖೆ ಯತ್ನಿಸುತ್ತಿದೆ' ಎಂದು ಎನ್‌ಎಫ್‌ಎಸ್‌ಯು ಅಧಿಕಾರಿಗಳು ಹೇಳಿದ್ದಾರೆ.