ಪಾಕಿಸ್ತಾನದ ಆರ್ಥಿಕ ಪರಿಸ್ಥಿತಿ ಈಗಾಗಲೇ ದಿವಾಳಿಯಂಚಿನಲ್ಲಿದೆ. ಇಂತಹ ಸಮಯದಲ್ಲಿ ಯುಎಇ ನೀಡಿರುವ ಈ ಎಚ್ಚರಿಕೆ ಪಾಕ್ ಪ್ರಧಾನಿ ಮತ್ತು ಸೇನೆಗೆ ನಿದ್ದೆಗೆಡಿಸಿದೆ. ವರದಿಗಳ ಪ್ರಕಾರ, ಏಪ್ರಿಲ್ 17ರ ಒಳಗೆ ಸಾಲದ ಮೊತ್ತವನ್ನು ಸಂಪೂರ್ಣವಾಗಿ ಹಿಂದಿರುಗಿಸುವಂತೆ ಯುಎಇ ಸ್ಪಷ್ಟ ಸೂಚನೆ ನೀಡಿದೆ.

ಬಡ್ಡಿ ದರ ದುಪ್ಪಟ್ಟು ಮಾಡಿದ ಯುಎಇ

ಕೇವಲ ಸಾಲ ವಾಪಸ್ ಕೇಳಿದ್ದಲ್ಲದೆ, ಪಾಕಿಸ್ತಾನಕ್ಕೆ ವಿಧಿಸಲಾಗುತ್ತಿದ್ದ ಬಡ್ಡಿ ದರವನ್ನು ಯುಎಇ ದಿಢೀರ್ ಆಗಿ ಹೆಚ್ಚಿಸಿದೆ. 2018ರಲ್ಲಿ ಪಾಕಿಸ್ತಾನದ ಆರ್ಥಿಕ ಸಂಕಷ್ಟವನ್ನು ತಪ್ಪಿಸಲು ಯುಎಇ 2 ಬಿಲಿಯನ್ ಡಾಲರ್ ಮೊತ್ತದ ಬೃಹತ್ ಸಾಲವನ್ನು ನೀಡಿತ್ತು.

ಸ್ಟೇಟ್ ಬ್ಯಾಂಕ್ ಆಫ್ ಪಾಕಿಸ್ತಾನದ ಮಾಹಿತಿಯ ಪ್ರಕಾರ, ಈ ಹಿಂದೆ ಈ ಸಾಲಕ್ಕೆ ಯುಎಇ ಶೇಕಡಾ 3ರಷ್ಟು ಬಡ್ಡಿ ವಿಧಿಸುತ್ತಿತ್ತು. ಇದರಿಂದ ಪಾಕಿಸ್ತಾನ ಪ್ರತಿ ವರ್ಷ 130 ಮಿಲಿಯನ್ ಡಾಲರ್ ಬಡ್ಡಿ ಕಟ್ಟುತ್ತಿತ್ತು. ಆದರೆ ಇದೀಗ ಯುಎಇ ಈ ಬಡ್ಡಿ ದರವನ್ನು ಶೇಕಡಾ 6.5ಕ್ಕೆ ಏರಿಕೆ ಮಾಡಿದೆ. ಇದು ಪಾಕಿಸ್ತಾನದ ಬೊಕ್ಕಸಕ್ಕೆ ಬೃಹತ್ ಹೊಡೆತ ನೀಡಿದೆ. ಕೇವಲ ಎರಡು ತಿಂಗಳ ಠೇವಣಿ ಅವಧಿ ವಿಸ್ತರಣೆಗೆ ಒಪ್ಪಿದ್ದ ಯುಎಇ ಇದೀಗ ಏಪ್ರಿಲ್ 17ರ ಅಂತಿಮ ಗಡುವು ವಿಧಿಸಿದೆ.

ಶಾಂತಿಧೂತನಾಗಲು ಹೊರಟು ನಗೆಪಾಟಲಿಗೀಡಾದ ಪಾಕಿಸ್ತಾನ

ಇರಾನ್, ಅಮೆರಿಕ ಮತ್ತು ಇಸ್ರೇಲ್ ನಡುವಿನ ಯುದ್ಧವನ್ನು ನಿಲ್ಲಿಸುವ ನೆಪದಲ್ಲಿ ಪಾಕಿಸ್ತಾನ ಜಾಗತಿಕ ಮಟ್ಟದಲ್ಲಿ ತನ್ನ ವರ್ಚಸ್ಸನ್ನು ಹೆಚ್ಚಿಸಿಕೊಳ್ಳಲು ಹವಣಿಸುತ್ತಿತ್ತು. ಇದಕ್ಕಾಗಿ ಈಜಿಪ್ಟ್, ಟರ್ಕಿ ಸೇರಿದಂತೆ ಹಲವು ಪ್ರಭಾವಿ ರಾಷ್ಟ್ರಗಳ ನಾಯಕರೊಂದಿಗೆ ಪಾಕ್ ಅಧಿಕಾರಿಗಳು ಮಾತುಕತೆ ನಡೆಸುತ್ತಿದ್ದರು. ಆದರೆ ತಮ್ಮದೇ ದೇಶದಲ್ಲಿ ಆರ್ಥಿಕ ಬಿಕ್ಕಟ್ಟು ಮಿತಿಮೀರಿದ್ದರೂ ಬೇರೆ ದೇಶಗಳ ಯುದ್ಧ ನಿಲ್ಲಿಸಲು ಹೋದ ಪಾಕಿಸ್ತಾನದ ನಡೆಯನ್ನು ಗಮನಿಸಿದ ಯುಎಇ, ಮೊದಲು ನಮ್ಮ ಹಣ ಕೊಡಿ ಆಮೇಲೆ ಜಗತ್ತಿನ ಉದ್ಧಾರ ಮಾಡಿ ಎಂಬ ಸ್ಪಷ್ಟ ಸಂದೇಶ ರವಾನಿಸಿದೆ.

ಮಧ್ಯಸ್ಥಿಕೆಯಿಂದ ಪಾಕ್ ಔಟ್, ರಷ್ಯಾ ಇನ್

ಪಾಕಿಸ್ತಾನದ ಈ ಮಧ್ಯಸ್ಥಿಕೆ ಪ್ರಯತ್ನ ಸಂಪೂರ್ಣವಾಗಿ ವಿಫಲವಾಗಿದೆ. ಇರಾನ್ ಮತ್ತು ಅಮೆರಿಕ ನಡುವೆ ಶಾಂತಿ ಒಪ್ಪಂದ ಏರ್ಪಡಿಸುವಲ್ಲಿ ಪಾಕಿಸ್ತಾನಕ್ಕೆ ಯಾವುದೇ ಯಶಸ್ಸು ಸಿಕ್ಕಿಲ್ಲ. ಇದೀಗ ಪಾಕಿಸ್ತಾನದ ಜಾಗಕ್ಕೆ ಬಲಿಷ್ಠ ರಾಷ್ಟ್ರ ರಷ್ಯಾ ಪ್ರವೇಶ ಮಾಡಿದೆ. ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರು ಖುದ್ದಾಗಿ ಈ ಸಂಘರ್ಷದ ಮಧ್ಯಸ್ಥಿಕೆ ಜವಾಬ್ದಾರಿಯನ್ನು ತಮ್ಮ ಹೆಗಲಿಗೆ ತೆಗೆದುಕೊಂಡಿದ್ದಾರೆ. ಇದರೊಂದಿಗೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ಪಾಕಿಸ್ತಾನ ಮೂಲೆಗುಂಪಾಗಿದೆ.

ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಾರ್ಮೋಡ

ಫೆಬ್ರವರಿ 28 ರಂದು ಇರಾನ್ ಮೇಲೆ ನಡೆದ ಅಮೆರಿಕ ಮತ್ತು ಇಸ್ರೇಲ್ ದಾಳಿಯ ನಂತರ ಮಧ್ಯಪ್ರಾಚ್ಯದ ಹಲವು ಭಾಗಗಳು ಯುದ್ಧಪೀಡಿತವಾಗಿವೆ. ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ನಿರಂತರ ದಾಳಿ ನಡೆಸುತ್ತಿದ್ದರೆ, ಇತ್ತ ಇರಾನ್ ಕೂಡ ತನ್ನ ಬೆಂಬಲಿತ ಸಂಘಟನೆಗಳಾದ ಹೆಜ್ಬೊಲ್ಲಾ ಮತ್ತು ಹೌತಿ ಬಂಡುಕೋರರ ಮೂಲಕ ಅಮೆರಿಕದ ಸೇನಾ ನೆಲೆಗಳನ್ನು ಗುರಿಯಾಗಿಸಿಕೊಂಡು ಪ್ರತಿದಾಳಿ ನಡೆಸುತ್ತಿದೆ.

ಈ ಸಂಘರ್ಷವನ್ನು ತಣ್ಣಗಾಗಿಸಲು ಅಮೆರಿಕ ಕೆಲವು ಕಠಿಣ ಷರತ್ತುಗಳನ್ನು ಮುಂದಿಟ್ಟಿದೆ. ಹಾರ್ಮುಜ್ ಜಲಸಂಧಿಯನ್ನು ಪುನಃ ತೆರೆಯುವುದು ಸೇರಿದಂತೆ ಪ್ರಮುಖ ಬೇಡಿಕೆಗಳನ್ನು ಈಡೇರಿಸಿದರೆ ಕದನ ವಿರಾಮಕ್ಕೆ ಸಿದ್ಧ ಎಂದು ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನಿರ್ದೇಶನದ ಮೇರೆಗೆ ಖಾಸಗಿಯಾಗಿ ಸೂಚನೆ ನೀಡಲಾಗಿದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.

ಒಟ್ಟಾರೆಯಾಗಿ ಅಂತರಾಷ್ಟ್ರೀಯ ಮಟ್ಟದಲ್ಲಿ ಶಾಂತಿಧೂತನಾಗಲು ಹೊರಟಿದ್ದ ಪಾಕಿಸ್ತಾನ ಇದೀಗ ಇತ್ತ ಸಾಲ ತೀರಿಸಲಾಗದೆ, ಅತ್ತ ಮಧ್ಯಸ್ಥಿಕೆಯಲ್ಲೂ ಯಶಸ್ಸು ಕಾಣದೆ ಅಕ್ಷರಶಃ ತ್ರಿಶಂಕು ಸ್ಥಿತಿಗೆ ಸಿಲುಕಿದೆ. ಜಗತ್ತಿನ ಕಣ್ಣಿಗೆ ಮಣ್ಣೆರಚುವ ಪಾಕಿಸ್ತಾನದ ತಂತ್ರಗಳಿಗೆ ಅರಬ್ ರಾಷ್ಟ್ರಗಳು ಈಗ ಮಣೆ ಹಾಕುತ್ತಿಲ್ಲ ಎಂಬುದಕ್ಕೆ ಯುಎಇ ನೀಡಿರುವ ಈ ಶಾಕ್ ಸ್ಪಷ್ಟ ನಿದರ್ಶನವಾಗಿದೆ.