ಈ ಅಭಿಯಾನದಲ್ಲಿ ಸ್ವತಃ ಪಾಲ್ಗೊಂಡ ರತ್ನಾಗಿರಿ ಜಿಲ್ಲಾ ಪೊಲೀಸ್ ಅಧೀಕ್ಷಕ ನಿತಿನ್ ಬಗಾಟೆ ಅವರು ಕೋಟೆಯ ಭೂಸ್ವಾಧೀನದ ಕುರಿತು ಮಾಹಿತಿಯನ್ನು ನೀಡಿದರು. 'ಈ ಕೋಟೆ ಸರಕಾರದ್ದಾಗಿದ್ದು ಎಲ್ಲರಿಗೂ ಮುಕ್ತವಾಗಿದೆ. ಆದ್ದರಿಂದ ಕೋಟೆಪ್ರೇಮಿಗಳು ಮತ್ತು ಶಿವಪ್ರೇಮಿಗಳು ಯಾವುದೇ ವದಂತಿ ಅಥವಾ ಸುಳ್ಳು ಮಾತುಗಳನ್ನು ನಂಬಿ ಕಾನೂನನ್ನು ಕೈಗೆತ್ತಿಕೊಳ್ಳಬೇಡಿ. ಏನಾದರೂ ಸಂಶಯಗಳಿದ್ದಲ್ಲಿ ನೇರವಾಗಿ ಪೊಲೀಸರನ್ನು ಸಂಪರ್ಕಿಸಿ', ಎಂದು ಪೊಲೀಸರು ಕರೆ ನೀಡಿದ್ದಾರೆ. ಈ ಸಂದರ್ಭದಲ್ಲಿ ಕೋಟೆಯ ಮಾಲೀಕತ್ವದ ಹಕ್ಕಿನ ಕುರಿತು ಅಯ್ಯಾಜ್ ಮಣಿಯಾರ್ ಅವರೂ ಸಹ ಸ್ಪಷ್ಟನೆ ನೀಡಿದರು.

ಜಿಲ್ಲಾ ಪೊಲೀಸ್ ಅಧೀಕ್ಷಕ ನಿತಿನ್ ಬಗಾಟೆ ಅವರು,

1. ಛತ್ರಪತಿ ಶಿವಾಜಿ ಮಹಾರಾಜರ ನೌಕಾದಳದ ಪ್ರಮುಖ ಭಾಗವಾಗಿದ್ದ ಗೋಪಾಲಗಡ ಕೋಟೆಯ ಮೇಲೆ ರತ್ನಾಗಿರಿ ಜಿಲ್ಲಾ ಪೊಲೀಸ್ ದಳದ ಅಧಿಕಾರಿಗಳು ಮತ್ತು ಸಿಬ್ಬಂದಿಗಳು ಸಂಪೂರ್ಣ ಪರಿಸರವನ್ನು ಸ್ವಚ್ಛಗೊಳಿಸಿದರು.

2. ಮುಂಬಯಿ ಉಚ್ಚ ನ್ಯಾಯಾಲಯದ ಕೊಲ್ಲಾಪುರ ಪೀಠವು ನೀಡಿರುವ ಆದೇಶದನ್ವಯ, ಪುರಾತತ್ವ ಇಲಾಖೆಗೆ ಗೋಪಾಲಗಡ ಕೋಟೆಯ ಜಾಗದ ಭೂಸ್ವಾಧೀನ ಪ್ರಕ್ರಿಯೆಯನ್ನು ನಡೆಸಿ ಒಂದು ವರ್ಷದೊಳಗೆ ಸ್ವಾಧೀನಕ್ಕೆ ತೆಗೆದುಕೊಳ್ಳಲು ನಿರ್ದೇಶನ ನೀಡಲಾಗಿದೆ. ಇದರಂತೆ ಪುರಾತತ್ವ ಇಲಾಖೆಯ ಸಹಾಯಕ ನಿರ್ದೇಶಕರು ಗುಂಪು ಸಂಖ್ಯೆ 82 ಮತ್ತು 83 ರ 7.5 ಎಕರೆ ಜಾಗದ ಭೂಸ್ವಾಧೀನಕ್ಕಾಗಿ ಜಿಲ್ಲಾಧಿಕಾರಿಗಳೊಂದಿಗೆ ಪತ್ರವ್ಯವಹಾರ ನಡೆಸಿದ್ದು, ಸರಕಾರಿ ದರದಂತೆ ತಗಲುವ ಮೊತ್ತವನ್ನು ತಿಳಿಸುವಂತೆ ಕೋರಿದ್ದಾರೆ.

3. ಗೋಪಾಲಗಡ ಕೋಟೆಯ ಒಳಗಿರುವ 7.5 ಎಕರೆ ಜಾಗವನ್ನು (ಪ್ರಸ್ತುತ ಎಲ್ಲಿ ಮಾವಿನ ತೋಟವಿದೆಯೋ) 1960 ರಲ್ಲಿ ಅಯ್ಯಾಜ್ ಮಣಿಯಾರ್ ಅವರ ಅಜ್ಜ ಖರೀದಿಸಿದ್ದರು. ತದನಂತರ 2016 ರಲ್ಲಿ ರಾಜ್ಯ ಸರಕಾರವು ಈ ಕೋಟೆಯನ್ನು 'ರಾಜ್ಯ ಸಂರಕ್ಷಿತ ಸ್ಮಾರಕ' ಎಂದು ಘೋಷಿಸಿತು.