ನಿವೃತ್ತಿಯ ದಿನದಂದೇ 'ಐ.ಎ.ಎಸ್.' ಅಧಿಕಾರಿಯೊಬ್ಬರು ಬಂಧನಕ್ಕೊಳಗಾಗಿರುವುದು ಹರಿಯಾಣದಲ್ಲಿ ಇದೇ ಮೊದಲ ಘಟನೆಯಾಗಿದೆ. ಈ ಹಗರಣದಲ್ಲಿ ಬಂಧನಕ್ಕೊಳಗಾದ ಮೂರನೇ 'ಐ.ಎ.ಎಸ್.' ಅಧಿಕಾರಿ ಇವರಾಗಿದ್ದಾರೆ. ಪ್ರದೀಪ ಕುಮಾರ ಅವರು ಮಾಲಿನ್ಯ ನಿಯಂತ್ರಣ ಮಂಡಳಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾಗ, ತಮ್ಮ ಹುದ್ದೆಯ ದುರುಪಯೋಗಪಡಿಸಿಕೊಂಡು ೧೬೯ ಕೋಟಿ ರೂಪಾಯಿಗಳ ಆರ್ಥಿಕ ಅಪರಾಧ ಎಸಗಿದ್ದಾರೆ ಎಂಬ ಆರೋಪವಿದೆ. ಹರಿಯಾಣ ಸರಕಾರದ ೮ ವಿಭಿನ್ನ ಇಲಾಖೆಗಳಲ್ಲಿ ನಡೆದ ಸುಮಾರು ೫೦೪ ಕೋಟಿ ರೂಪಾಯಿಗಳ ಹಗರಣದ ಪ್ರಕರಣದಲ್ಲಿ ಕೇಂದ್ರೀಯ ತನಿಖಾ ದಳವು (ಸಿಬಿಐ) ಈ ಬೃಹತ್ ಕ್ರಮ ಕೈಗೊಂಡಿದೆ.

೧. ಪ್ರದೀಪ ಕುಮಾರ ಅವರು ಮಂಡಳಿಯ ಹೂಡಿಕೆಗೆ ಸಂಬಂಧಿಸಿದ ಎಲ್ಲಾ ವ್ಯವಹಾರಗಳನ್ನು ತಮ್ಮ ವೈಯಕ್ತಿಕ ಮಟ್ಟದಲ್ಲೇ ನೋಡಿಕೊಳ್ಳುತ್ತಿದ್ದರು. ಅವರು 'ಸ್ಥಿರ ಠೇವಣಿ' (ಫಿಕ್ಸ್ ಡೆಪಾಸಿಟ್) ಮಾಡುವ ನೆಪದಲ್ಲಿ ಮಿತಿಗಿಂತ ಹೆಚ್ಚಿನ ಹಣವನ್ನು ಚಂಡೀಗಢದ ಸೆಕ್ಟರ್-೩೨ ರಲ್ಲಿರುವ 'ಐ.ಡಿ.ಎಫ್.ಸಿ.' ಬ್ಯಾಂಕಿಗೆ ಕಳುಹಿಸಿದ್ದರು. ಈ ಹಣವನ್ನು ಯಾವ ಖಾತೆಗೆ ಜಮೆ ಮಾಡಲಾಗಿತ್ತೋ, ಆ ಖಾತೆಯನ್ನು ತೆರೆಯಲು ಮಾಲಿನ್ಯ ನಿಯಂತ್ರಣ ಮಂಡಳಿಯ ಯಾವುದೇ ಅಧಿಕೃತ ಒಪ್ಪಿಗೆ ಅಥವಾ ದಾಖಲೆಗಳು ಇಲಾಖೆಯ ಬಳಿ ಇರಲಿಲ್ಲ. ಬ್ಯಾಂಕಿನಲ್ಲಿ ವಾಸ್ತವವಾಗಿ ಯಾವುದೇ 'ಸ್ಥಿರ ಠೇವಣಿ'ಯನ್ನು ಇಡಲಾಗಿರಲಿಲ್ಲ. ಅನುಮತಿಯಿಲ್ಲದೆ ತೆರೆಯಲಾದ ಈ ಖಾತೆಯಿಂದ ನಕಲಿ ಸಹಿಗಳ ಮೂಲಕ ಹಣವನ್ನು ಹಿಂತೆಗೆದುಕೊಂಡು, ಅದನ್ನು ವಿವಿಧ ನಕಲಿ ಸಂಸ್ಥೆಗಳಿಗೆ ವರ್ಗಾಯಿಸಲಾಗಿತ್ತು. ಇದರಿಂದಾಗಿ ಹರಿಯಾಣ ಸರಕಾರಕ್ಕೆ ೧೬೯ ಕೋಟಿ ರೂಪಾಯಿಗಳ ನಷ್ಟ ಉಂಟಾಗಿದೆ.

೨. 'ಸಿಬಿಐ' ತನಿಖೆಯ ಪ್ರಕಾರ, ಈ ಹಗರಣವು ಕೇವಲ ಮಾಲಿನ್ಯ ನಿಯಂತ್ರಣ ಮಂಡಳಿಗೆ ಮಾತ್ರ ಸೀಮಿತವಾಗಿಲ್ಲ. ಚಂಡೀಗಢದ 'ಐ.ಡಿ.ಎಫ್.ಸಿ.' ಬ್ಯಾಂಕ್ ಶಾಖೆಯಲ್ಲಿ ಹರಿಯಾಣ ಸರಕಾರದ ೮ ವಿಭಿನ್ನ ಇಲಾಖೆಗಳ ಸುಮಾರು ೫೦೪ ಕೋಟಿ ರೂಪಾಯಿಗಳ ಹಣವನ್ನು ನಕಲಿ ಸ್ಥಿರ ಠೇವಣಿಗಳ ಹೆಸರಿನಲ್ಲಿ ಲೂಟಿ ಮಾಡಿರುವುದು ಬೆಳಕಿಗೆ ಬಂದಿದೆ.