Actor Vijay's TVK Party: ಮೇ 6 ತಮಿಳುನಾಡಿನ ರಾಜಕೀಯದಲ್ಲಿ ಒಂದು ನಿರ್ಣಾಯಕ ದಿನವಾಗಿತ್ತು, ಯಾರ ಊಹೆಗೂ ನಿಲುಕದ ಫಲಿತಾಂಶ ತಮಿಳುನಾಡು ವಿಧಾನಸಭೆ ಚುನಾವಣೆಯಲ್ಲಿ ಬಂದಿತ್ತು. ಡಿಎಂಕೆ ಮತ್ತು ಎಐಎಡಿಎಂಕೆ (DMK And AIADMK Alliance)ಎರಡೂ ರಾಜಕೀಯ ಪಕ್ಷವನ್ನು ಬಗ್ಗುಬಡಿದು ಮೂರನೇ ಪಕ್ಷ ಟಿವಿಕೆ ಹೊಸ ಶಕ್ತಿಯಾಗಿ ಹೊರಹೊಮ್ಮಿತ್ತು.

ನಟ ರಾಜಕಾರಣಿ ವಿಜಯ್ ಅವರ ತಮಿಳಗ ವೆಟ್ರಿ ಕಳಗಂ ಪಾರ್ಟಿ ಅಧಿಕಾರ ಹಿಡಿಯಲು ಸಾಕಷ್ಟು ಹರಸಾಹಸ ಮಾಡುತ್ತಿದೆ. ಅದಕ್ಕೆ ಬೇಕಾಗಿರುವ ಬಹುಮತದ ಸಂಖ್ಯೆ ಕಡಿಮೆಯಾಗಿರುವುದೇ ಇದೀಗ ಸಾಕಷ್ಟು ರಾಜಕೀಯ ಬೆಳವಣಿಗೆಗೆ ಕಾರಣವಾಗಿದೆ. ವಿಜಯ್ ಸಿಎಂ ಆಗಿ ಪಟ್ಟಕ್ಕೇರಲು ಬೇಕಾಗಿರುವುದು 118 ಸೀಟುಗಳು, ಆದರೆ ಅವರ ಕೈಯಲ್ಲಿ ಇರುವುದು 108 ಮತ್ತು ಕಾಂಗ್ರೆಸ್ ನ 5 ಸೀಟುಗಳು. ಆದರೆ ಉಳಿಕ ಸಂಖ್ಯೆಗಾಗಿ ಅವರು ರಾಜಕೀಯ ನಡೆಸುತ್ತಿದ್ದಾರೆ.

ಚುನಾವಣೆಗೆ ಇದೇ ಮೊದಲ ಬಾರಿಗೆ ಪಾದಾರ್ಪಣೆ ಮಾಡಿದ ಟಿವಿಕೆ, 108 ಸ್ಥಾನಗಳೊಂದಿಗೆ ಏಕೈಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮುವ ಮೂಲಕ ಬೆರಗುಗೊಳಿಸಿತು. ಆದರೆ, ಪಕ್ಷವು ಬಹುಮತಕ್ಕೆ 118 ಸೀಟುಗಳನ್ನು ಗಳಿಸುವಲ್ಲಿ ವಿಫಲವಾಯಿತು. ಕಾಂಗ್ರೆಸ್ ತನ್ನ ಐದು ಶಾಸಕರೊಂದಿಗೆ ಬೆಂಬಲವನ್ನು ನೀಡಿದ ನಂತರ ಪರಿಸ್ಥಿತಿ ಸ್ವಲ್ಪ ಸಮಯದವರೆಗೆ ವಿಜಯ್ ಪರವಾಗಿ ವಾಲಿತು.

ಇದರಿಂದ ಕಾಂಗ್ರೆಸ್ ಪಕ್ಷದ ಎರಡು ದಶಕಗಳ ಅಂದರೆ 2004 ರಿಂದ ಅಖಂಡವಾಗಿ ಉಳಿದಿದ್ದ ಮೈತ್ರಿ ಮುರಿದುಬಿದ್ದಿದೆ. ಮತ್ತು 2026 ರ ಚುನಾವಣೆಗಳಲ್ಲಿ ಒಟ್ಟಾಗಿ ಸ್ಪರ್ಧಿಸಿದ್ದ ಡಿಎಂಕೆಯನ್ನು ಕಾಂಗ್ರೆಸ್ ಕೈಬಿಟ್ಟು ಟಿವಿಕೆಗೆ ಬೆಂಬಲ ಸೂಚಿಸಿತ್ತು.
West Bengal: ಮಶ್ಚಿಮ ಬಂಗಾಳದಲ್ಲಿ ಮತ್ತೆ ಹರಿಯಿತು ರಕ್ತ; ದೀದಿ ವಿರುದ್ಧ ಗೆದ್ದಿದ್ದ ಸುವೇಂದು ಅಧಿಕಾರಿ PA ಹತ್ಯೆ
ಟಿವಿಕೆ ಪಾರ್ಟಿ ಪಡೆದಿರುವ ಸೀಟುಗಳಿಂದ ಇದೀಗ ಪ್ರಮಾಣವಚನ ಸ್ವೀಕಾರಕ್ಕೆ ತೊಂದರೆಯಾಗಿದೆ. ಇದು ವಿಜಯ್ ಅವರ ಆಶಯಗಳಿಗೆ ಅಡ್ಡಿಯಾಗಿದೆ. ರಾಜ್ಯಪಾಲ ರಾಜೇಂದ್ರ ಅರ್ಲೇಕರ್ ಅವರು ಸರ್ಕಾರ ರಚಿಸಲು ಅಗತ್ಯ ಬಹುಮತದ ಪತ್ರ ನೀಡಿ ಎಂದಿದ್ದರಿಂದ ಇದೀಗ ಸಮಸ್ಯೆಯಾಗಿ ಪರಿಣಮಿಸಿದೆ.

ಟಿವಿಕೆ ಪಕ್ಷವು ಅಧಿಕೃತವಾಗಿ 108 ಸ್ಥಾನಗಳನ್ನು ಗೆದ್ದಿದ್ದರೂ, ವಿಜಯ್ ಅವರು ಗೆದ್ದ ಎರಡು ಕ್ಷೇತ್ರಗಳಲ್ಲಿ ಒಂದನ್ನು ಖಾಲಿ ಮಾಡಬೇಕಾಗಿರುವುದರಿಂದ ಪಕ್ಷದ ಸಂಖ್ಯೆ 107ಕ್ಕೆ ಇಳಿದಿದೆ. 233 ಸದಸ್ಯರ ವಿಧಾನಸಭೆಯಲ್ಲಿ, ಬಹುಮತದ ಸಂಖ್ಯೆ 117 ಕ್ಕೆ ಇಳಿಯುತ್ತದೆ. ಕಾಂಗ್ರೆಸ್ ಪಕ್ಷ ಬೆಂಬಲ ಘೋಷಿಸಿದ ಕೆಲವೇ ಗಂಟೆಗಳ ನಂತರ ಮತ್ತು ಟಿವಿಕೆ ಮುಖ್ಯಸ್ಥ ಮತ್ತು ಕಾಂಗ್ರೆಸ್ ನಾಯಕರ ನಡುವಿನ ಸಭೆಯ ನಂತರ ವಿಜಯ್ ರಾಜ್ಯಪಾಲರನ್ನು ಭೇಟಿಯಾದರು.

ಡಿಎಂಕೆ ನೇತೃತ್ವದ ಮೈತ್ರಿಕೂಟದ ಭಾಗವಾಗಿ ಮುಂದುವರೆದಿರುವ ವಿಸಿಕೆ ಮತ್ತು ಎರಡು ಎಡ ಪಕ್ಷಗಳಿಂದ ಬೆಂಬಲವನ್ನು ಪಡೆಯಲು ಟಿವಿಕೆ ಉತ್ಸುಕವಾಗಿದೆ ಎಂದು ತೋರುತ್ತದೆಯಾದರೂ, ಅವರು ಇಲ್ಲಿಯವರೆಗೆ ಯಾವುದೇ ಸಕಾರಾತ್ಮಕ ಸಂಕೇತಗಳನ್ನು ನೀಡಿಲ್ಲ, ಮತ್ತು ಕಾಂಗ್ರೆಸ್‌ನ ಬೆಂಬಲವು ಆರಂಭದಲ್ಲಿ ಟಿವಿಕೆ ಅವರ ಸ್ಥಾನವನ್ನು ಬಲಪಡಿಸುವಂತೆ ಕಂಡುಬಂದಿದೆ, ಈ ಬೆಳವಣಿಗೆಯು ಎನ್‌ಡಿಎ ಶಿಬಿರದೊಳಗೆ ಎಚ್ಚರಿಕೆಯನ್ನು ಹುಟ್ಟುಹಾಕಿದೆ.

ಬದ್ದ ವೈರಿಗಳ ಸಮಾಗಮಾ ?

ಇದರ ನಡುವೆಯೇ ತಮಿಳುನಾಡು ರಾಜಕೀಯದಲ್ಲಿ ಬದ್ದ ವೈರಿಗಳೆಂದೇ ಬಿಂಬಿತವಾಗಿರುವ ಡಿಎಂಕೆ ಮತ್ತು ಎಐಎಡಿಎಂಕೆ ಒಂದಾಗಿ ಸರ್ಕಾರ ರಚಿಸಲಿವೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಬದ್ಧ ವೈರಿಗಳಾದ ಡಿಎಂಕೆ ಮತ್ತು ಎಐಎಡಿಎಂಕೆ ತಮಿಳುನಾಡು ಮೈತ್ರಿಕೂಟವನ್ನಾಗಿ ಮಾಡಿ ಆಡಳಿತ ನಡೆಸಲು ಮುಂದಾಗಿವೆ ಎನ್ನಲಾಗಿದೆ.

ದಿನವಿಡೀ ರಾಜಕೀಯ ಅನಿಶ್ಚಿತತೆ ತೀವ್ರಗೊಳ್ಳುತ್ತಿದ್ದಂತೆ, ತಮಿಳುನಾಡಿನ ರಾಜಕೀಯ ವಲಯದಲ್ಲಿ ಹೊಸ ಸುದ್ದಿಗಳು ಹುಟ್ಟಿಕೊಂಡಿವೆ. ಬದ್ಧ ವೈರಿಗಳಾದ ಡಿಎಂಕೆ ಮತ್ತು ಎಐಎಡಿಎಂಕೆ ನಡುವೆ ತೆರೆಯ ಹಿಂದೆ ಮಾತುಕತೆ ನಡೆಯಬಹುದೆಂಬ ಕುತೂಹಲ ಮೂಡಿತು.

ಟಿವಿಕೆ ತನ್ನ ಮೊದಲ ಸರ್ಕಾರ ರಚಿಸುವುದನ್ನು ತಡೆಯುವ ಗುರಿಯನ್ನು ಈ ಎರಡು ಪಕ್ಷಗಳು ಹೊಂದಿವೆ ಎನ್ನಲಾಗಿದೆ. ಡಿಎಂಕೆ 59 ಸ್ಥಾನಗಳನ್ನು ಮತ್ತು ಎಐಎಡಿಎಂಕೆ 47 ಸ್ಥಾನಗಳನ್ನು ಗೆದ್ದುಕೊಂಡಿದೆ. ಇದರಿಂದಾಗಿ ಅವರಿಗೆ ಒಟ್ಟಾರೆಯಾಗಿ 106 ಸ್ಥಾನಗಳಾಗಲಿವೆ. ಇಲ್ಲಿಯೂ ಬಹುಮತಕ್ಕೆ ಇನ್ನೂ 11 ಸ್ಥಾನಗಳ ಕೊರತೆಯಿದೆ.

ಕಾಂಗ್ರೆಸ್ ಔಪಚಾರಿಕವಾಗಿ ಟಿವಿಕೆ ಜೊತೆ ಮೈತ್ರಿ ಮಾಡಿಕೊಂಡು ಡಿಎಂಕೆ ಜೊತೆಗಿನ ಸಂಬಂಧವನ್ನು ಕಡಿದುಕೊಂಡ ಕೆಲವೇ ಗಂಟೆಗಳಲ್ಲಿ ಈ ವರದಿಗಳು ಹೊರಬಿದ್ದವು. ಆದಾಗ್ಯೂ, ಡಿಎಂಕೆ ಅಥವಾ ಎಐಎಡಿಎಂಕೆ ಈ ಊಹಾಪೋಹದ ಬಗ್ಗೆ ಸಾರ್ವಜನಿಕವಾಗಿ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಅಂತಿಮ ಎಣಿಕೆಯ ಪ್ರಕಾರ, ಟಿವಿಕೆ 108 ಸ್ಥಾನಗಳನ್ನು ಗೆದ್ದರೆ, ಡಿಎಂಕೆ 59 ಮತ್ತು ಎಐಎಡಿಎಂಕೆ 47 ಸ್ಥಾನಗಳನ್ನು ಗೆದ್ದವು. ಕಾಂಗ್ರೆಸ್ 5 ಸ್ಥಾನಗಳನ್ನು, ಪಿಎಂಕೆ 4, ಐಯುಎಂಎಲ್ 2, ಸಿಪಿಐ 2, ಸಿಪಿಐ(ಎಂ) 2 ಮತ್ತು ವಿಸಿಕೆ 2 ಸ್ಥಾನಗಳನ್ನು ಗೆದ್ದವು. ಬಿಜೆಪಿ, ಡಿಎಂಡಿಕೆ ಮತ್ತು ಎಎಂಎಂಕೆ ತಲಾ ಒಂದು ಸ್ಥಾನವನ್ನು ಗೆದ್ದಿವೆ. ಇದೀಗ ಯಾರು ಯಾರಿಗೆ ಬೆಂಬಲ ನೀಡಲಿದ್ದಾರೆ ಎನ್ನುವುದು ಮಾತ್ರ ಕುತೂಹಲವಾಗಿದೆ.

ಇದರ ನಡುವೆ ಇಂದು ನಡೆಯಬೇಕಾಗಿದ್ದ ವಿಜಯ್ ಅವರ ಪ್ರಮಾಣವಚನ ಕಾರ್ಯಕ್ರಮವನ್ನು ಮುಂದೂಡಲಾಗಿದೆ. ಅವರು ನಾಳೆ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕಾರ ಮಾಡುವ ಸಾಧ್ಯತೆಗಳು ಹೆಚ್ಚಾಗಿವೆ.